8
1
ኣጋሳ ራስባራ ኢየሱስ ባርያ ማንግስትንሳ ሜርሜርን ፃሊንም ታማርሳዳቴ ካታማናቤ ሞሮናቤኻ ሳግዲና። ታጲ ላማና ይእስድና ክላማ ክንካ ዳይዲና፤
2
ሃያንቴኻሞ ቤሮንባራቤ ሃጅሞናባራቤ ፓሽሻዻዳና ሜና ዋኒካሞ ክላማ ክንካና ኬዶ፤ ኬኻሞ ቤሮን ꬆጳን ይንባራኻ ይውታዶኖ መግደላ ፔን ጋይኖ ማርያምቤ፣
3
ሄሮዶስ ኦኖን ዻቃናያሳ ኩዛ ሜኖ ዮሃናቤ፣ ሶስናቤ፣ ሃያንቴኻሞ ኤና ዋኒ ጱፅና ዳይዲና፤ እግናኻሞ ኮይና ይናኻ ኬናንቴ ዋድምቴን ዳናና።
4
ኤዲኖ ጱፅካሞ ክዛራ ፑጫንቴ ኮዳዃቤ፤ ሃያንቴ ኤና ካታማ ኣብ ኣብባራኻ ክዛራ ንቴ ኬዶን ዋዳንካ፤ ኖ ዻይንሳ ካም ይንታ ሃማንቴና ኬናንቴ ክጌያዶ፦
5
“ኤዲ ሃሚ ፓኻያ ካላ ሃሚን ይሳዛራ ጴንታ ጲዮታና ክያኣዶ፤ ክጲያን ዋዳንካ ጴንታና ዋኒ ጎይንሳ ዴሞሮና ኬዲናዶ፤ ራንካኻሞ ኬም ትጋዽዲና፤ ካርያናኻሞ ኬም እꬅዲና።
6
ጴንታና ዋኒካሞ ራቅን ሃርቾሮና ኬዲናዶ፤ ይባቃላናኻሞ ራቅኖ ጫፒ ኮትሞንታኻ ዋችዲና።
7
ሃያንቴ ጴንታና ዋኒ ኡኩምንሳ ባክሮና ኬዲናዶ፤ ኡኩምኖኻሞ ኬላማ ክንካ ጌጳንቴ ኬም ሹማቴ ሽእሽዲና።
8
ጴንታና ዋኒካሞ ፔን ፃልሮና ኬዲናዶ፤ ይባቃላናኻሞ ማቶዛራ ማቶና ኬኡሻዶ።” ኖ እግናም ጌያቴ ይቱንሳና ናቅሲ ይሳም ዼግ ሃያንቴ “ኤያ ቃሞን ኤሳራን ካዳ ክኤሳሬ” ና ክያማዶ።
9
ታማርና ክሳኻሞ ዻይንሳ ኣጋሳ ዎኻሊንም ክካላ ኦይስዲና።
10
ኖኻሞ ይንታና ክያማዶ፦ “ባርያ ማንግስትንሳ ኢን ኑንቆንም ዬዼሴኻናንቴ ዬናንቴ እንዽዲና፤ ኮዶን ኤና ዋኒናንቴ
“ ‘ ኬ ሃፓንቴ ይሳ ዎይላምሮ ዎዳን ኬጋሬ፤
ኤሳራንቴኻሞ ጶቅሳን ኬጋሬካኻናንቴ ኬናንቴ ዻይንሶኻና ጌይዻይ።’
11
ታ ናንሲ ዻይንሳሳ ዎኻላ ካና፦ ይንግያን ጴንታኖ ሃንዻዶኖ ባርያሳ ዼላቅኖና።
12
ጴንታና ጎይንሳ ዴሞሮ ዲናዳና እግና ኤና ባርያሳ ዼላቅን ኤሳራይናና፣ ኮዶን ኣምናንቴ ዻቃን ኬጋሬኻናንቴ ሜሻሳ ናዴ ባርያሳ ዼላቅንም ይንሳ ዎይላምሮኻ ክቻይና ኤናና።
13
ጴንታና ሃርቾን ራቅሮ ዲናዳና እግና ኤና ባርያሳ ዼላቅንም ኤሳራንቴ ዋዛንካ ቻይናና፤ ኬ እግና ዋዳ ቶኻናንቴና ኬኣምናይ፤ ጫጪ ኬሳ ኮቆልሞንታኻ ጋሎኖ ኮናኣን ዋዳንካ ኬ ኤና እግና ይሪካ ጋራንቴ ያኣይናና።
14
ጴንታና ኡኩምንሳ ባክሮ ዲናዳና እግና ኤና ባርያሳ ዼላቅንም ኤሳራይናና። ኤና እግና ዋዳ ቶኻ ካፓንቴ ፔን ኮሳ ዴንታን ቃብቴቤ፣ ኮሳ ዎዲማሞንቤ፣ ኮሳ ዋዛንቤኻ እዛቃዻዃ ጎይ ልኪካ ኣፕን ካምናና።
15
ጴንታና ፔን ፃልሮ ዲናዳናኻሞ እግና ኤና ባርያሳ ዼላቅንዛራ ቃቦ እማንቴቤ ዎይላም ካላቤኻ ኤሳራንቴ ይንካ ዳይናና፣ ዶንሻንቴቤ ይንካ ዋቻዻንቴቤ ኣፕን ካይናና።
16
“ኖንም ሮጲሳንቴ ዳሳ ኢር ዎይካሞ ኣልጋን ቾባራ ዎዳያ ኤዲ ካላኻሞ ቆልማሞ፤ ኤና ኦኖንዛራ ኣርዳይና ኖን ኬያፔኻናንቴ ዼግ ሃያንቴና ኬዎዳይ።
17
ኦጎኖኻሞ ዬር ኣቺምር ዳ ሃፕንዽማ፣ ዬር ዼሳዽማ ኖንናንቴ ሃፕንዽማ፤ ዬር ኣምር ዳ ኮቆልሞንታኻና።
18
ታ ናንሲ ሃሞንታ ሃያንቴ ዬኤሳራይንም ፃሊ ቃብማቴ፤ ኤያ ይንስ ዳናንቴ ሻባና ሻባዻይ፤ ኮዶን ኤያ ይንስ ቆልማኻላ እሳ ዳይዲና ይንግያን ሃማንቴ ክቃባያምካሞ ክካላ ቻና ቻዻይ።”
19
ኣጋሳ ራስባራ ኢየሱስ እንዳንቤ እንዳን ናናቤ ኖ ክዶን ራቅንዛራ ናእዲና፤ ኮዶን ዛርስንሳ ጱፃሞንካ ሃማንቴ ክካላ ዬስካናንቴ ኬ ቻላድማሞ።
20
ዋዳስ ኣጋኻ “ሃንናቤ ሃንና ናናቤ ሃም ሼዳናንቴ ናዴ ጳሎ ዎያንቴና ኬዶ” ሃማንቴ ኤና ዋኒ ክናንቴ ጌይዲና።
21
ኢየሱስካሞ ኬናንቴ ይማሳና “እንናቤ እንና ናናቤ ባርያሳ ዼላቅን ኤሳራንቴ ይንካ ኤና ዳይና” ና ክያማዶ።
22
ሮሮ ካላ ኢየሱስ ታማርና ይሳ ላማ ጋግንዛራ ሃንቻንቴ፤ ኬግያ “ኛፓስንሳ ሳባራ ዎሳጌ” ና ክያማዶ፤ ሃያንቴ ኬ ያኣን ካርስዲና።
23
ይቴኻሞ ኬዳዃ ኢየሱስሳ ኣፒ ኮግንዻዃ ራትዲና፤ ዋዳን ኦጎኻ ኛፓስሮጎ ቱልማይኖ ዻጵዲና፤ ኑንቆኖኻሞ ጋግንሳ ኢን ኮካይማዶንታኻ ኬ ካዮን ኣፖሮና ኬዶ።
24
ታማርናኻሞ ክካላ ናዴ፤ “ጌጳዮ፣ ጌጳዮ፣ ካያናንቴና ዎዶ!” ሃማንቴ ኪም ቃንስዲና። ኖኻሞ ዻጳንቴ ግባሮንቤ ቱልማይንቤ ጎሪዲና፤ ዋዳን ኦጎኻ ቱልማይኖ ዎይዲና፣ ኛፓስኖኻሞ ጫክ ሃምዲና።
25
ኖኻሞ ይሳ ታማርናግያ “ዬሳ እምናትኖ ቆላ?” ና ክያማዶ። ኬኻሞ ኩርትንዻንቴቤ ጎሻንቴቤ “ካ ግባሮንቤ ኑንቆንቤም ጎራያ፣ ኬኻሞ ይንናንቴን ይኤሳራያ ኖ ሃውቴ?” ና ክግያ ኬያማዶ።
26
ኣጋሳ ራስባራ ኬ ገሊላ ኛፓስንሳ ሳባራን ዶን ጌርጌሴኖን ፔንዛራ ጋግንካ ሳግዲና።
27
ኢየሱስካሞ ጋግንባራ ፔንዛራ ክያንቻንዶን ዋዳንካ ቤሮን ይሽማዳ ካታማን ኦጎ ኤዲ ካላ ኪም ሃፕዲና፤ ኤያ ኣጋ ቦን ጱፅናንቴ ኣፓላ ኣርስማ ኦኖሮ ዳን ጋራንቴ ዱክን ራቅንም ይሳ ኦኖ ሃያዳና።
28
ኤያ ኣጋ ኢየሱስም ይያፓዶን ዋዳንካ እላታንቴ ክሳ ዎትሮ ጳርፃንቴ፣ ናቅሲ ይሳም ዼግ ሃያንቴ “ባርያ ጌጳ ናሳ ኢየሱስ፣ እላማ ሃሳ ዶኖ ሃርቴ? ኢም ጋልንሻን ሃጋሬኻናንቴ እንታ ሃም ምስክዲና” ና ክያማዶ።
29
ኖ ይንናንቴ ይንታ ክያማዶኖ ኤያ ግዶርካ ክውቴኻናንቴ ኢየሱስ ውትማ ሃማንቴ ክጌያዶንታኻና። ቤራኻሞ ላይ ክዻጳንታኻ ኤያም ሳንሳላትንካቤ ዛውን ራን ዻኻንቤኻ ዻኻንቴ ኪም ማንካዽናኻሞ ሳንሳላትን ይንካ ዻኻዻይንምካሞ ታሽካንቴ ቤሮኖ ክዛራን ዶኖ ኪም ዳራንዛራና ኮኣንሳይ።
30
ኢየሱስካሞ ክግያ “ናብኖ ሃስ ሃውቴ?” ሃማንቴ ኦይስዲና። ኖኻሞ ቤሮ ጱፅ ኪም ኮሽማዶንታኻ፣ እሳ ናብኖ “ሌጌዎን” ና ክያማዶ።
31
ቤሮናኻሞ ኦሎን ፄሪንዛራ ኬም ይእሳን ክጋሬኻናንቴ ኪም ጌጲ ምስክዲና።
32
ራቅን ኦጎሮ ጌማርታዛራ ጉቱሚ ኬል ጱፅ ግሽቴና ዳዻዶ፤ ቤሮናኻሞ ጉቱምናዛራ ኣርድማቴ ኬግያ ክያሜኻናንቴ ኪም ምስክዲና፤ ኖኻሞ ኬኣርዴኻናንቴ ጌይዲና።
33
ቤሮናኻሞ ኤያባራንካ ውታንቴ ጉቱምናዛራ ኣርድዲና፤ ጉቱምናኻሞ ዴሎንሳ ኣፖንዛራ ምጫ ሙጉማንቴ ኛፓስንዛራ ካይማንቴ ፁውዲና።
34
ግሽሞን ኤናኻሞ ዬራ ሃምማዳናም ይያፓዶን ዋዳንካ፤ ጎብቴ ቃልቴ ካታማናቤ ሞሮናቤ ግዶር ጌይዲና።
35
ዛርስኖኻሞ ዬራ ሃይዻዳናም ሼዳናንቴ ይዶንባራኻ ውታንቴ ኢየሱስዛራ ናእዲና። ኤያ ቤሮን ይንባራ ይውታዳ ኣፓላ ኣርሳንቴ ሜቴ ክሳ ኮማቷዃ ኢየሱስሳ ራንሳ ዴሞሮ ዳርቃንቴ ክዳዃ ይያፓና ኬ ኩርትንዽዲና።
36
ኤያ ቤሮን ይሽማዳ ክፓሻዶንም ኤና ሃፓዳና፣ ሃስ ሃማንቴ ክፓሻዶንም ዛርስንናንቴ ጌይዲና።
37
ጌርጌሴኖንሳ ዴሞሮ ኤና ዳና ፓይላ ጌጲ ኬኩርትንዻዶንታኻ ፣ ኦጎታርካ ክዬኤኻናንቴ ኬ ኢየሱስም ምስክዲና፤ ኖኻሞ ጋግንዛራ ሃንቻንቴ ማታቴ ያእዲና።
38
ኤያ ይንባራኻ ቤሮን ይውታዳኻሞ ክላማ ክንካ ዳናንቴ ኢየሱስም ምስክዲና፤ ኮዶን ኢየሱስ ይንታ ሃማንቴና ኪም ክይእሳዶ፦
39
“ሃሳ ኦኖንዛራ ማታቴ ቃልቴ ዬርን ጌጶን ባርያሳ ሃናንቴ ሃይዻዶንም ጌይማ” ና ክያማዶ። ኤያኻሞ ኢየሱስሳ ዬርን ጌጶን ክናንቴ ሃይዻዶንም ካታማና ፓይላዛራ ጌያዳቴ ያእዲና።
40
ዛርስኖኻሞ ፓይላ ክሳ ናኣም ካሊቴ ይዶንታኻ፣ ኢየሱስ ክናኣና ኬ ዋዛኻ ኪም ቾችዲና።
41
ዋዳ ኦጎኻ ኢያኢሮስ ሃንዻያ ኣይሁድናሳ ምስኮን ኦኖንሳ ጋራ ናዴ፣ ኢየሱስሳ ራሮ ዻርፃንቴ ክሳ ኦኖንዛራ ክዬኤኻናንቴ ኪም ምስክዲና፤
42
ይንናንቴኻሞ ኪም ክምስካዶኖ ናኖ ክሳ ቦንንሳ ታጲ ላማኖ ካላን ብሽኖ ኦጎኖ ሶጎ ኮዶንታኻና፤ ናኻሞ ሎቃስካና። ኦጎዛራኻሞ ይቴ ክዳዃ ዛርስኖ ኪም ይቅቴ ካልሎን ኪም ጭጅቴና ኮዶ።
43
ቦን ታጲ ላማናንቴ ማኣስን ይንቅስቴ ዶኖ ሜ ካላ ዳይዲና፤ ኮይና ይሳ ዳናም ፓይላ ኤና ዼሻን እምባናናንቴ እማቴ ቱንሳንቴ ኤዲ ካላኻሞ ኮም ፓሽሻናንቴ ቻላዳ ቆልማሞ።
44
ናኻሞ ኢየሱስሳ ቡዶባራ ናዴ ክሳ ኣፓላንሳ ብራም ላኣስዲና፤ ማኣስኖ ኮሳ ይንቅምቴን ዶኖኻሞ ኣጋዛራ ዎይዲና።
45
ኢየሱስካሞ፣ “ሃውቴ ኢም ላኣሳዳ?” ና ክያማዶ። ኤና ፓይላ ዎቲ ሃም ላኣሳድማሞ ኬያማዃ ጴጥሮስ ክግያ፣ “ጌጳዮ፤ ዛርስኖ ፓይላ ሃም ታኻንቴ ይቅቴቤ ጭጅቴቤ ኮዳዃ ሃውቴ ኢም ላኣሳ ሃስ ሃሜ?”
46
ኮዶን ኢየሱስ፣ “ኤዲ ካላ ኢም ላኣስዲና፤ ካንታኻሞ እባራንካ ኮውታዶንም እንታ ዼስዲና” ና ክያማዶ።
47
ኤስኖኻሞ ዬራ ኮሳ ማይ ክዼስማዶንታኻ፤ ግባዛዳቴ ናዴ ክሳ ዎትሮ ጳርፅዲና፤ ሃርናንቴ ይላኣሳዶንቤ ሃሞንታ ይሪካ ይፓሻዶንቤም ዛርስን ፓይላ ውልሳ ዎትሮ ጌይዲና።
48
ኖኻሞ ኮግያ “ናኖ እሳ፣ እምነትኖ ሃሳ ሃም ፓሽሽዲና፤ ፃሊንካ ይማ” ና ክያማዶ።
49
ኢየሱስ ኣኻራ ዼላቅቴ ክዳዃ ኤዲ ካላ ኣይሁድናሳ ምስኮን ኦኖንሳ ጋራ ኢያኢሮስ ኦኖንባራ ናዴ፣ ኢያኢሮስ ግያ “ናኖ ሃሳ ጃይዲና፤ ናንሢ ኣስታማራም ሃቃጅሽናኖ” ና ክያማዶ።
50
ኮዶን ኢየሱስ ኣጋም ይኤሳራና ኢያኢሮስ ግያ፣ “ሃይ ሃኩርትንዽናኖ፤ ሃሳ እምነት ሶጎ ኮዴ፣ ናኖ ሃሳ ፓሻና ኮፓሻይ” ና ክያማዶ።
51
ኢየሱስ ኢያኢሮስ ኦኖንዛራ ኣርዳናንቴ ይያያዶን፤ ጴጥሮስቤ፣ዮሃንስቤ፣ ያእቆብቤ ሃያንቴኻሞ ናንሳ እምባቤ እንዳንቤሳ ኦባራ ኤዲ ካላኻሞ ክላማ ኮኣርዴኻናንቴ ዛጋድማሞ።
52
ዋዳን ኦጎኻ ኤዲኖ ፓይላ ሃይኤ፣ ሃይኤ ሃንቴ ኤፕቴና ኬዶ። ኮዶን ኢየሱስ ኬግያ “ዬኤፕናኖ፣ ናኖ ዎዻንቴና ኮዶ፣ ጃድማሞ” ና ክያማዶ።
53
ኤናኻሞ ናኖ ኮጃዶንም ይዼሳዶንታኻ ክዛራ ሃንጭዲና።
54
ኮዶን ኢየሱስ ናንሳ ኣኒም ዬዳንቴ “ያ ናኖ ኮኖ፣ ዻጲማ” ና ክያማዶ።
55
ናኖኻሞ ኢዞ ማስዲና፤ ኣጋዛራኻሞ ና ዻጳንቴ ዎይዲና፤ ኢየሱስካሞ ኤና እꬃሮ ኮናንቴ ኬእሜኻናንቴ ጌይዲና።
56
ናንሲ እምባቤ እንዳንቤ ዬርሽዲና፤ ኮዶን ኖ ዬራ ሃምማዳናም ኤዲ ካላናንቴኻሞ ጌያን ኬጋሬኻናንቴ ኪሊዲና።