7

¹ ኢየሱስ ዼላቅና ክናም ፓይላ ዛርስንሳ ዎትሮ ጌያቴ ይቱንሳና ቅፕርናሆምዛራ ያእዲና። ² ኦጎታርካሞ ኤያ ፖሊስና ማቶናሳ ጋራ ዳይዲና፤ ካይስታ ክሳ ካልሎን ክናሻያ ሃጃዻንቴ ጃናንቴና ክዶ። ³ ኖኻሞ ኢየሱስሳ ዬር ይኤሳራና ካይስታ ክሳም ክናንቴ ክፓሽሼኻናንቴ ኪም ክናንቴ ኬምስካኻናንቴ ኣይሁድናሳ ዞንዛና ዋኒም ክዛራ ይእስዲና። ⁴ ኤና ኣፖን ባኣቴ ያኣዳናኻሞ ኢየሱስ ካላ ይናኣና፤ ኪም ካልሎን ምስካንቴ፤ “ዬራ ካም ክናንቴ ሃዬኻናንቴ ዛግሳና ኮዛግሳይ፤ ⁵ ኣጋኻሞ ኤያ ካ ዛርስን ዎሳም ናሻና ክናሻይ፤ ዎሳ ምስኮን ኦኖንምካሞ ዎናንቴ ኣሽክሻዳ ኖና” ሃማንቴ ካልሎን ኪም ባንዝምዲና።

⁶ ሃይዻዃ ኢየሱስ ኬላማ ክንካ ያእዲና። ኖኻሞ ክሳ ኦኖን ካላ ፄዲ ክናኣና፤ ኤያ ፖሎስና ማቶናሳ ጋራ ኤና ይሳ ሃርያናም ክዛራ ይእሳንቴ ክግያ ይንታና ክያማዶ፦ “ጌጳዮ፣ ያ እሳ ኦኖን ሃኣርዴኻ ዛግሳያ ኤዲ እትሞንታኻ ኦራ ንቴ ሃጋሊናኖ፤ ⁷ ኣጋኻ ሃማንቴ እንታ ሃዛራ ያኣናንቴ እናንቴ ኮዛግሳያግያ እንታ ኢም ፓይድማሞ፤ ታ ያ ዼላቅ ካላ ሶጎ ጌይማ፣ ካይስታ እሳ ፓሻና ክፓሻይ፤ ⁸ እንታ እባራንካ እሳ ጳባራ ኤዲ ኢም ኤርጋያ ዳይዲና፤ ፕር እሳ ቾባራኻሞ እኤርጋይና ፖሎስና ዳይዲና፤ ዋግያ ይማ እያምና፣ ኖ ያኣና ክያኣይ፤ ዋግያኻሞ ኒማ እያምና፣ ኖኻሞ ናኣና ክናኣይ፤ ካይስታ እሳግያኻሞ ‘ዬራ ካም ሃይማ’ እያምና፣ ዬራ ክናንቴ ጌይዻዳም ሃያና ክሃያይ።” ⁹ ኢየሱስካሞ ኣጋም ይኤሳራና ኤያም ዬርሺዲና፤ ኤና ኪም ጫጋይናዛራ ሽራንቴ ኬግያ “እንታ ዬናንቴ ጌያና እጌያይ፤ እምነት ኮንታ ሃማ ጌጲ እስራኤል ፔሮ ካውል እንታ ሃፓድማሞ” ና ክያማዶ። ¹⁰ ኤና ይእሳዻዳናኻሞ ኦኖንዛራ ማታቴ ይናኣዶን ዋዳንካ፣ ክሳ ካይስታ ፓሻንቴ ክዳኻና ኬያፓዶ። ¹¹ ኣጋሳ ራስባራ ኢየሱስ ጌጲ ካፕማ፣ ካታማስ ናይን ሃንዻያዛራ ያእዲና፤ ክሳ ታማርናቤ ዛርሲ ጱፅካሞ ክላማ ያእዲና። ¹² ኢየሱስ ሙልዻፖን ይንካ ካታማንዛራ ኣርዳዻይንም ክዬስካና፤ ኤና ኤዲ ጃዳ ካላም ባኣንቴ ካታማንባራኻ ውትቴና ኬዶ፤ ናሳ ጃዳኻሞ እንዳንሳ ካላና፤ እንዳኖኻሞ ዳልሶና፤ ካታማን ዛርስኖ ጱፅኖ ኮላማ ዳይዲና። ¹³ ጌጳኻሞ ኮም ይያፓና ኮናንቴ ቡርቃዻንቴ ኮግያ፣ “ሃኤፕናኖ፤ ሌምማ” ና ክያማዶ። ¹⁴ ኖ ፄዲ ናዴኻሞ ሻላን ይንካ ናሳ ጃዳም ባዻዶንም ላኣስዲና፤ ኤና ባኣዳናኻሞ ትፕ ዎይዲና፤ ኢየሱስካሞ ናሳ ጃዳግያ “ያ ባርሻስ፣ ሃግያ ዻጲማና እያማይ!” ሃምዲና። ¹⁵ ኤያ ጃዳኻሞ ዻጳንቴ ዳርቅዲና፤ ሃያንቴ ዼላቃን ካርስዲና። ኢየሱስካሞ ኪም ቻንቴ እንዳንናንቴ እምዲና።

¹⁶ ኤዲኖ ፓይላ ውል ጌጲ ኩርትንዻንቴ ባርያም ጎሽቴ፤ “ኤዲ ባርያሳ ኣፖን ጌያያ ጌጲ ዎግዶርካ ውትዲና፤ ባርያኻሞ ዛርስን ይሳም ቃብዲና” ና ኬያማዶ።

¹⁷ ኢየሱስሳ ኜሙቲኖ ኦጎኖ ይሁዳ ፔሮቤ ፔና ኮሳ ዴሞሮን ዳና ፓይላ ውል ግዶር ሻምዲና። ^{1 18} ዮሃንስሳ ታማርናኻሞ ክናም ፓይላ ዮሃንስናንቴ ጌይዲና። ኖኻሞ ኬሳ ባክሮ ታማሪ ላማም ግስማንቴ፤ ¹⁹ “ናኣና ክናኣይ ይንግያ ሃንዻዳ ያሞ? ሞ ኤድ ኣብ ዎካሌ? ሃማንቴ ጌጳ ኢየሱስካላ ቃልቴ ኦይስማቴ” ሃማንቴ ኬም ክዛራ ይእስዲና።

²⁰ ኤናኻሞ ኢየሱስ ካላ ናዴ ክግያ፣ “ይንግያን ናኣና ክናኣይ ሃንዻዳ ያሞ? ሞ ኤድ ኣብ ዎካሌ? ሃማንቴና ኑንቆንካ ሻያያ ዮሃንስ ሃዛራ ዎም ክንእሳዶ” ና ኬያማዶ።

²¹ ዋዳ ኣጋኻ ኢየሱስ ኤዲ ጱፅም ሃጅሞሮኻቤ ቡርቅሮኻቤ ቤሮና ዛርቦና ባራ ቡልዲና፤ ኤና ኣፕን ካያና ጱፅናኻሞ ኬያፔኻ ሃይዲና፤ ²² ዮሃንስሳ ኤና ይእሳዻዳናግያ ኖ ይንታና ክያማዶ፦ “ቃልቴ ዬራ ዬያፓዳናቤ ዬኤሳርዳናቤም ዮሃንስናንቴ ጌይማቴ፤ ኤና ኣፕን ካያና ሃፓና ኬያፓይ፤ ኤና ኤላና ቲፕ ቲፕ ያያና ኬያያይ፤ ሙልካምባን ኤናኻሞ ፓሽቴና ኬዶ፤ ቃሞን ካያናኻሞ ኤሳራና ኬኤሳራይ፤ ኤና ጃዳናኻሞ ዴምጲንባራ ዻጲቴና ኬዶ፤ ኤና ኩፕናናንቴኻሞ ሜርሜርን ፃሊን ጌያና ጌይዻይ። ^{2 23} እዛራ ኤዲ ኢ ካዽማ ሃውካሞ ይንናንቴ ፓፅ እንዻዳናና።”

²⁴ ዮሃንስሳ ኤርጎን ኤና ማታቴ ኬዬኣዃ ራስባራ ኢየሱስ ዛርስንናንቴ ዮሃንስሳ ዬር ይንታ ሃማንቴ ጌይዲና፦ “ዳራንዛራ ይንናንቴ ዬናኣዶኖ ሃር ሼዳናንቴቴ? ግባሮን ይሾሻይና ባልጉዳናም ሼዶታው ዬናኣዶ? ²⁵ ታ ናንሲ ሃር ሼዶታ ዬናኣዴ? ኤያ ኣፓላን ባሺን ኣርሳዳም ሼዶታው ዬናኣዶ? ኤና ኣፓላን ባሺን ኣርሳንቴ ቃያይናቤ ጋሎን ቆልማ ዳይና ኦ ማንግስት ኦኖሮ ዬናንቴ ዳይዲና። ²⁶ ታ ናንሲ ሃር ሼዶታ ዬናኣዴ? ኤያ ባርያሳ ኣፖን ጌያያም ሼዶታው ዬናኣዶ? ዪኒ ልኪና፤ ዬናንቴ ጌያና እጌያይ ሼዶታ ዬናኣዳ ኤያ ባርያሳ ኣፖን ጌያያሳ ሳጋሚና። ²⁷ “‘ሃም ብራንቴ ጎይን ሃሳም ሃናንቴ ኣሽካያ እሳ ኤርጎን ኤያም ሃሳ ብራሮ ይእሳና እይእሳይ’ ሃማንቴ ይንሳን ኡካዻዳ ኣጋ ኖና፤ ²⁸ እንታ ዬናንቴ ጌያና እጌያይ፤ ኤና ሜና ይኣዻዳና ግዶርካ ዮሃንስካላ ኤዲ ሳጋያ ቆልማሞ፤ ኮዶን ባርያ ማንግስትሮ ኤያ ውልካላንካ ሾላ ኣጋ ክካላንካ ሳጋና ክሳጋይ።”

²⁹ ኤና ዬራ ኣጋም ኤሳራዳና ፓይላቤ ግብርን ኤና ፑኡሻይና ካውል፣ ዮሃንስሳ ሻዮንካ ሻይዻንቴ ባርያ ጎንዼ ክዶንም ዻውዲና፤ ³⁰ ኮዶን ኤና ፈረስ ኤናቤ ኤና ሙሴ ዳምብን ዼሳዳናቤ ዮሃንስ ኣንሮጎ ሻይዻን ይጋራዶንታኻ ባርያ ኬናንቴ ቃባ ክቃባዳም ቦውዲና።

³¹ ሃያንቴኻሞ ኢየሱስ ይንታና ክያማዶ፦ “ታ ናንሲ ኤዲን ታንጋን ኮም ሃርካ እዬክንሴ? ዎይካሞ ሃር ኬታኬ? ³² ኤና ጳልሮጎ ዳርቃንቴ ኪም ግስማይናምና ኬታኻይ። ኬኻሞ “ዎቲ ዬናንቴ ቱሉንጎን ፑግዲና፣ ዬቲ ክርባድማሞ፤ ዎቲ ዬናንቴ ዙልሞ ዎቡላዃ፤ ዬቲ ኤፓድማሞ’ ክግያ ሃማይናምና ኬታኻይ። ³³ ኦጎኖ ይንታ ኮማታዶኖ ኑንቆንካ ሻያያ ዮሃንስ እስን እꬅማቤ ዎይን ውጭማቤ ክንና ክዛራ ቤሮ ዳይዲና ና ዬያማዶ። ³⁴ ፕር እንታ ኤዲ ናሶ እꬃዳቴቤ ውጫዳቴቤ እንና፣ ክግያ እꬅሞ ኤዲቤ ውጮ ኤዲቤ ኤና ግብርን ፑኡሻይናቤ ሴሶን ኤናቤሳ ሃርያናና ዬያማዶ። ³⁵ ታ ናንሲ ሃማሞኖ ሊክ ኮዶንም ናና ኮሳ ፓይላ ውልካ ዼሳዽዲና።” ³⁶ ኣጋሳ ራስባራ ፋራሳዊይናሳ ኤዲ ካላ ኢየሱስ ክላማ ክንካ ክእꬅሜኻናንቴ ኦኖን ይሳዛራ ቾችንሻናንቴ ግስምዲና፤ ኖኻሞ ፋራሳዊያ ኦኖን ኣርዳንቴ እꬅማናንቴ ዳርቅዲና። ³⁷ ካታማስ ኣጋሮ ዶኖ ሜ ሴሶ ኤድ ካላ፣ ኢየሱስ ኤያ ፋራሳዊያ ኦኖሮ እꬅምቴ ዳርቃንቴ ክዶን ይኤሳራና ና ኣልባስጥሮስ ቃርምሻኻ ሽቶ ባኣንቴ ናእዲና፤ ³⁸ ክሳ ዙሎባራ ራን ክሳኻላ ዎያንቴ ኤፕቴ ራን ክሳም ይሳ እርማን ኑንቆንካ ጫፕሽቴ ይሳ ስትንካኻሞ ዹቃን ካርስዲና፤ ራን ክሳም ሱንቅቴ ሽቶንካ ቃዽዲና። ³⁹ ኪም ቾችንሻዳ ፋራሳዊያኻሞ ኦጎም ይያፓና፣ “እኒ ኤያ ካ ኤዲ ባርያሳ ኣፖን ጌያያ ይዳና፣ ኤስኖ ኪም ላኣሳዶኖ ሃው ኮዶንቤ፣ ሃያንቴኻሞ ሜ ሃሳማ ኮዶንም እኒ ዼሳዻን ቻላናክቻላይ፤ ና ሴሶ ኤዲና” ሃማንቴ ይሳ ዎላምንካ ቃብዲና። ⁴⁰ ኢየሱስካሞ ክግያ፣ “ስምኦን፣ ሃናንቴ ዬር እጌያያ ዳይዲና” ና ክያማዶ። ኖኻሞ “ኣስታማራዮ፣ እናንቴ ጌይማ” ና ክያማዶ። ⁴¹ ኢየሱስካሞ ክግያ ይንታና ክያማዶ፦ “ኤያ ብሬን ብድርሳያኻላ ብሬን ብድራዳና ኤዲ ላማ ዳይዲና፤ ኤያ ዋዛራ ዲናር ማቶ ዶንጝ፣ ኤያ ላንሳዛራኻሞ ዲናር ዶጝታም ዳይዲና። ⁴² ዬር ኬካሻያ ኬሳ ኮቆልሞንታኻ ኤያ ኬላማ ውልናንቴ ባዛና ኬሳም ኬናንቴ ጋርዲና። ታ ናንሲ ኤና ላማ ውልግዶርካ ኤያ ኬናንቴ ብድርሳዳም ጌጲካ ናሻያ ሃማቴ?” ⁴³ ስምኦንካሞ፦ “እካላ ይንናንቴ ባዛን ጱፅን ኤያ ጋርዻዳምና ክታኻይ” ሃማንቴና ክማሳዶ። ኢየሱስካሞ ክግያ “ሊኪና ሃጌያዶ” ና ክያማዶ። ⁴⁴ ኤስንዛራ ማታቴ ሼዳንቴ ስምኦንግያ ይንታና ክያማዶ፦ “ኤስን ኮም ሼድቴው ሃዶ? እንታ ሃሳ ኦኖንዛራ እኣርዳዃ ያ እሳ ራንናንቴ ኑንቆኻሞ እማድማሞ፤ ኮዶን ና ራና እሳም ይሳ እርማን ኑንቆንካ ጫፕሽቴ ይሳ ስቲንካ ዹቅዲና። ⁴⁵ ያ ኢም ካላኻሞ ሱንቃድማሞ፤ ኮዶን ና እኒ እኣርዳዳሮኻ ካርሳንቴ ራን እሳም ሱንቃን ዎይሳድማሞ። ⁴⁶ ያ እሳ ሜቴን ዋኣትንካ ቃዻድማሞ፤ ኮዶን ና ራን እሳም ሽቶንካ ቃዽዲና። ⁴⁷ ኣጋታኻ ሃናንቴ ጌያና እጌያይ፤ ና ኢም ጌጲ ኮናሻዶንታኻ ሴሶ ጱፅ ኮሳ ኮናንቴ ጋርዽዲና፤ ኮዶን ኤያ ይንሳ ሴሶን ሾሊን ጋርዻያ ኣጋ ሾሊ ሶጎና ክናሻይ። ⁴⁸ ኢየሱስካሞ ኤስንግያ “ሴሶን ሃሳም ሃናንቴ ጋርዽዲና” ና ክያማዶ። ⁴⁹ ቾችና ክላማ ክንካ እꬅምቴ ዳርቃዳናኻሞ “ካ ኤዲሳ ሴሶም ጋራያ ኖ ሃውቴ?” ሃማንቴ ኬ ክንካ ሃሳውዲና። ⁵⁰ ኢየሱስካሞ ኤስንግያ “እምነትኖ ሃሳ ሃም ዻኣሽዲና፤ ፃሊንካ ይማ” ና ክያማዶ።