6

¹ ኡኩንሳ ሮሮ ካላ ኢየሱስ ሃምንሳ ኢንካ ይቴና ክዶ፤ ታማርና ክሳኻሞ ትሻን ቁንፃንቴ ሻክምቴ ጋእቴና ኬዶ። ² ፈረስ ኤና ግዶርካሞ ኤና ዋኒ ኬግያ “ኡኩንሳን ሮራ ጋላ ዬርን ሃይዽሞንም ሃርናንቴ ዬያዬ” ና ኬያማዶ።

³ ኢየሱስካሞ ይንታ ሃማንቴና ኬናንቴ ክማሳዶ፦ “ዳዊት ይዳቃዻዶን ዋዳንካ ኤና ክላማ ክንካ ዳና ላማ ዬራ ክያያዳም ዬቲ ናባባዳዬው? ⁴ ኖ ባርዮን ኦኖን ኣርዳንቴ ኣይሁድናሳ ዳምብን ኣሽካይና ሶጎ ይእꬃን ሙናን ቻንቴ ጋይዲና፤ ኤና ክላማን ዳናናንቴኻሞ እምዲና።” ⁵ ሃያንቴኻሞ ኢየሱስ ኬግያ፣ “ኤዲ ናሶ ኡኩንሳን ሮራሳ ጌጳና” ና ክያማዶ።

⁶ ኡኩንሳ ሮሮ ኣብካኻሞ ኖ ኣይሁድናሳ ባርያም ምስካዻን ኦኖንዛራ ኣርዳንቴ ታማርስቴና ክዶ፤ ኦጎታር ኤዲ ኣን ምዛቂ ይንሳ ይማልግማዳ ካላ ዳይዲና። ⁷ ኤና ሙሴ ዳምብን ታማርሳይናቤ ፋራሳዊይናቤ ኪም ጎይ ይንካ ይቤርንሳያ ዛጋንቴ ኤያም ኡኩንሳን ሮራ ጋላ ክፓሽሻይንም ሼዳናንቴ ካላንቴና ኬዶ። ⁸ ኢየሱስካሞ ቃቦ ኬሳም ዼሳንቴ ኤያ ኣንንሳ ማልግማዳግያ “ዻጳንቴ ኤናሳ ዎትሮ ዎይማ!” ሃምዲና፤ ኤያኻሞ ዻጳንቴ ዎይዲና።

⁹ ኢየሱስካሞ ኬግያ “ይንዳ ዬኻላ ዬር ካላ እኦይሴ፤ ኡኩንሳ ሮራ ጋላ ሃይዼኻናንቴ ጌይዻዶኖ ዬር ፃል ሃይንቶሞ ሞ ዬር ዛርቦ? ሳዳ ዻኣሻሞ ሞ ሳዳ ካይሳ?” ና ክያማዶ።

¹⁰ ሃያንቴ ኢየሱስ ኤና ክሳ ዴሞሮ ዳርቃዳናም ፓይላ ሼዳንቴ፤ ኤያ ኣንንሳ ማልግማግያ፦ “ኣኒ ሃሳም ፒክ ሃይማ” ና ክያማዶ። ኤያኻሞ ጌይዻዳግያ ሃይዲና፤ ክሳ ኣናኻሞ ጫንቃል ፓሽዲና። ¹¹ ኮዶን ኤና ጌጲ ዻጋስዲና፤ ኢየሱስዛራ ሃር ዋዬ ሃማንቴ ኬ ክንካ ዼላቅዲና። ¹² ሮራና እግናሳ ሮሮ ካላኻ ኢየሱስ ባርያም ምስካናንቴ ጉርባስዛራ ውትዲና፤ ሶታ ኣጋም ሜሌል ባርያም ምስክቴ ዎዽዲና። ¹³ ፔኖ ኮሶፃና ታማርና ይሳም ግስማንቴ ታጲ ላማናም ኬግዶር ካምዲና፤ ኬናንቴ ኤና ይእሳዻዳና ሃማንቴ ናቢ ዎድዲና። ¹⁴ ኬኻሞ ጴጥሮስ ሃማንቴ ክግስማዳ ስሞኦንቤ፣ እንዳን ናሳ እንድርያስቤ፣ ያእቆብቤ፣ ዮሃንስቤ፣ ፊልጶስቤ፣ በርቴሎሞስቤ፣ ¹⁵ ማትዮስቤ፣ ቶማስቤ፣ እልፕዮስ ናሳ ያእቆብቤ፣ ፔን ይሳናንቴ ዎያዳ ስምኦንቤ፣ ¹⁶ ያእቆብ ናሳ ይሁዳቤ ራስባራ ኢየሱስም ሳስካንቴ እማዳ ኣስቆሮንቱ ፔን ጋንታ ይሁዳቤና። ¹⁷ ኢየሱስ ጉርባስባራኻ ኬላማ ክንካ ሃንቻንቴ ራቅን ጳልሮ ዎይዲና፤ ኦጎታር ክሳ ታማርናሳ ዋኒ ዳይዲና፤ ይሁዳ ፔና ፓይላ ግዶርካቤ፣ ዬሩሳሌም ግዶርካቤ፣ ጢሮስቤ ሲዶና ኛፓስንሳ ማራሮኻ ናኣዶኖ ዛርስኖ ጱፅኖ ኦጎታር ዳይዲና። ¹⁸ ኤና እግናኻሞ ይንናንቴ ኬናኣዶኖ ክካላ ታማራናንቴቤ ይሳ ሃጅሞና ግዶርካ ፓሻናንቴቤና። ኤና ቤሮንካ ጋሊቴን ዳናኻሞ ፓሽዲና፤ ^{1 19} ካንታኖ ክግዶርካ ውታንቴ ኤና ፓይላም ፓሽሽቴ ኮዶንታኻ፣ ኤና ፓይላ ኪም ላኣሳናንቴ ዛግቴና ኬዶ። ²⁰ ኖ ታማርና ይሳዛራ ሼዳንቴ ኬግያ ይንታና ክያማዶ፦

“ዬቲ ኤና ኩፕና ባርያሳ ማንግስትኖ ዬንቲ ኮዳንታኻ፣

ዬቲ ኤዲ ፑጋዻዳና፤

²² ኤና ኤዲ ናሶኻ ሃማንቴ ዬም ኬቶዛዽና፤ ይሳ ባክሮኻ ዬም ዋና ቡላንቴ፤ ዬዛራ ዬር ዛርቦ ኬጌይናቤ ናቢ ዬሳም ኬሴስና ዬቲ ኤዲ ፑጋዻዳና፤ ²³ እምባና ኬሳ ኣና ኤና ባርያሳ ኣፖን ጌያይናዛራ ክናም ኬያያዶንታኻ፣ ጳ ፖላሮ ካሺኖ ዬሳ ጌጲና ኮዳይ፤ ኣጋታኻ ሮራ ኣጋኻ ዋዝንዽማቴ፤ ዋርሳኻሞ ክርብማቴ። ²⁴ ኮዶን ዬቲ ኤና ዎድሞና ታ ዬዋዝንዻዶንታኻ፣ ሃዪ! ²⁶ ኤና ፓይላ ዬሳ ዬርን ፃላሞን ኬጌይና ዬቲ ሃዪ! እምባና ኬሳ ኣና ፖጋሞንካ ባርያሳ ኣፖን ጌያይና ኤናናንቴ ኣጋንታና ኬሃያዶ። ²⁷ “ኮዶን ዬቲ ኤና እናንቴ ኤሳራይናናንቴ እንታ ጌያና እጌያይ፤ ጋላ ዬሳም ናሽማቴ፤ ኤና ዬም ቶዛዻይናናንቴኻሞ ዬር ፃል ሃይማቴ፤ ²⁸ ኤና ዬም ኣሻይናናንቴ ዬቲ ዻክምማቴ፤ ኤና ዬዛርን ዛርቦን ኣሽካይናናንቴኻሞ ባርያም ምስክማቴ፤ ²⁹ ኤያ ሃሳ ካርጫም ጫኣያናንቴ ካርጫ ዋምካሞ እምማ፤ ኤያ ሃሳ ኮቴን ቻያናንቴ ካርቴና ሃሳም ኪም ሃማርናኖ። ³⁰ ኤና ሃኻላ ምስካይና ውልናንቴ እምማ፤ ኤያ ሃሳ ኮይሳም ቻዳ ሃናንቴ ክማሴኻናንቴ ሃኦይስናኖ። ³¹ ኤና ዬናንቴ ኬያዬኻናንቴ ዬራ ዬዛጋይናም፣ ዬትካሞ ኬናንቴ ኦጎንታ ሃይማቴ።

³² ኤና ዬም ናሻይናም ዬናሻያዳና ሃርካ ሳጊ ዬዴ? ሴሶን ኤናኻሞ ኤና ኬም ናሻይናም ናሻና ኬናሻይ። ³³ ኤና ዬናንቴ ዬርን ፃልን ሃያዳናናንቴ ዬር ፃል ዬሃያያዳና ሃርካ ሳጊ ዬዴ? ሴሶን ኤናኻሞ ኦጎንታ ሃያና ኬሃያይ። ³⁴ ኤና ብድሪ ዎናንቴ ማሳና ኬማሳይ ሃማንቴ ዬቃባይናናንቴ ዬብድርሳያ ዳና ሃርካ ሳጊ ዬዴ? ሴሶን ኤናኻሞ ዬራ ይብድርሳዳናም ፓይላ ቻና ዎቻይ ሃማንቴ ሴሶን ኤናናንቴ ብድርሳና ኬብድርሳይ። ³⁵ ኮዶን ጋላ ዬሳም ናሽማቴ፤ ዬር ፃልካሞ ኬናንቴ ሃይማቴ፤ ኤናኻላ ማሳቴ ቻናንቴ ቃሞ ቁንፅማ ብድርስማቴ፤ ዬቲ ኦጎንታ ዬያይና ዬሳ ካሽኖ ጌጲና ኮዳይ፤ ባርያ ጌጳሳኻሞ ናና ዬዳይ፤ ኖ ኤና ኪም ጎብምናናንቴቤ ኤና ዛርቦናናንቴቤ ፃሊና ክዶ። ³⁶ ዬምባ ኤናናንቴ ክቡርቃዻያግያ ዬቲህካሞ ኤናናንቴ ቡርቃዻይና ዳማቴ። ³⁷ ኤናም ዬዻብንሽናኖ፣ ዬምካሞ ዻብንሻዽማሞ፤ ኤናም ዬቦውናኖ ዬምካሞ ቦውዽማሞ፤ ኤናሳ ሴሶን ጋርማቴ፣ ዬናንቴኻሞ የሳ ሴሶም ጋራ ጋርዻይ። ³⁸ ኤናንቴ እምማቴ፣ ዬናንቴኻሞ እማና እንዻይ፤ ሻርቃስ ይንካ ኤናናንቴ ዬሳፓርዳኻ ማሳንቴ ይንካ ዬናንቴ ሳፓራናሳፓርዻይ። ካሳ ኦባራ ሻርቃስ እንቃንቴ ጁጋዻዳኻ ፆፃንቴ ይንቅማያ ፃላኻ ሳፓራንቴ ዬናንቴ ዬሳ ዴሞዛራ እማና እንዻይ።

³⁹ ሃያንቴ ኖ ዻይንሳ ካም ይንታ ሃማንቴና ኬናንቴ ክጌያዶ፦ “ኤያ ኣፕን ካያ፣ ኤያ ኣፕን ካያስም ኣንሳናንቴ ቻላው? ኬ ላማ ውል ኪም ዬዳቴ ኦሎሮ ኣርዳይዮው? ⁴⁰ ታማራ ይሳ ኣስታማራ ካላንካ ሳግማሞ፤ ይያማንካሞ ኤያ ፃሊ ሃያንቴ ታማራዳ ይሳ ኣስታማራግያና ክዳይ።

⁴¹ ሃንና ናሳሳ ኣፕሮን ዳ ዬራ ሾላም ሃርናንቴ ሃሼዴ? ሃሳ ኣፕሮ ቱፓን ግያንዶን ዶን ያ ሼዳይዮው? ⁴² ኣፕን ሃኖሮ ሃቃ ዶንም ሼድማ ሃንና ናሳግያ:- ‘እንና ናሳ፣ ሃሳ ኣፕሮን ዳ ዬራ ሾላም እቡሌ’ ሃስ ሃማናንቴ ሃቻሌ? ያ ካይስንሶን ኤያ ካ፣ ብራቴንካ ቱፓን ኣፕን ሃኖሮን ዶን ቡልማ፤ ሃያንቴ ናንሲ ዬራ ሾላ ሃንና ናሳሳ ኣፕሮን ዳም ቡላናንቴ ፃሊ ሃያንቴ ሼዳና ሃሼዳይ።" ⁴³ ሃቃ ባሺ ዳንቴ ኣፒ ዛርቦ ካያ ሃቃ ቆልማሞ፤ ሃያንቴኻሞ ሃቃ ዛርቦ ዳንቴ ኣፒ ባሺ ካያ ሃቃ ቆልማሞ። ⁴⁴ ሃቃናም ፓይላ ኬሳ ኣፕናኻ ዼሳና ዼሳዻይ፤ ሃቃ ኡኩምካ ዳ ግዶርካ ሃቃ ባላስሳ ኣፕ ሾማዽማሞ፤ ካዻላ ግዶርካ ዎይን ኣፕ ጫራዽማሞ ⁴⁵ ኤዲ ፃል ይሳ ዎይላምሮ ዬርን ፃሊን ፆፃዶሮኻ ዬራ ፃላ ኣጋም ጌያናክጌያይ፤ ኤያ ዛርባ ይሳ ዎይላምሮ ዬርን ዛርቦን ፆፃዶሮኻ ዬራ ዛርባ ኣጋምና ክቡላይ። ኤዲ ይሳ ዎይላምሮ ዬርን ፆፃዶሮኻ ኣጋም ቡላቴ ጌያናክጌያይ። ⁴⁶ ዬራ እጌያይናም ዬቲ ኣሽክማሞ፤ ታ እግያ ‘ጌጳዮ፣ ጌጳዮ’ ሃርናንቴ ዬያሜ? ⁴⁷ ኤዲ እዛራ ናኣያ ፓይላ እሳ ዼላቅን ኤሳራንቴ ኣሽካያ ሃውም ክታኻይንም ዬናንቴ እዻዌ፤ ⁴⁸ ኤያ ኣጋ ኦኖን ዻኻንቴ ኦሎን ፄሪ ኮያንቴ ላይታንዛራ ኦኖን ይሳም ዻኻዳሚና ክታኻይ፤ ሚሮኖ ጉንዛንቴ ኦና ኣጋም ይቅዲና፤ ኦና ኣጋም ፃሊ ዻኻዻዶንታኻ ይቃናንቴ ቻላድማሞ። ⁴⁹ ኮዶን ኤያ እሳ ዼላቅን ኤሳራንቴ ኣሽክማ ኣጋ ኦኖን ይሳም ኦሎን ፄሪ ኮያንቴ ላይታንዛራ ዬስክማ ፔሮ ኦኖን ዻኻዳምና ክታኻይ፤ ምሮኖ ካንታኻ ናዴ ኦና ኣጋም ኮይቃዶን ዋዳንካ ይሪካ ይፕዲና፤ ይፕንቶኖ ክሳኻሞ ካልሎን ጌጲና ኮዶ።