¹ ዛርስኖ ኪም ታኻንቴ ጭጅቴ ባርያሳ ኣፖን ክታማርሳይንም ኤሳርቴ ኮዶን ዋዳንካ፣ ኢየሱስ ጌንሳሬጥ ኛፓስንካላ ዎያንቴና ክዶ፤ ^{1 2} ዋዳስ ኣጋኻ ጋጊ ላማ ኛፓስንሳ ኣፖሮ ኡኩማንቴ ኬዳዃ ኖ ሃፕዲና፤ ኮዶን ኤና ካራን ኤምማይና ጋግናባራኻ ሃንቻንቴ ኜፑቴይና ይሳም ሻይቴና ኬዶ። ³ ጋግና ዳና ግዶር ስምኦን ጋጋዛራ ሃንቻንቴ ፔንባራኻ ሾሊ ክፔሬኻናንቴ ኪም ኦይስዲና፤ ሃያንቴኻሞ ጋግንዛራ ዳርቃንቴ ዛርስንም ታማርሳን ካርስዲና። ⁴ ዼላቃም ጌያቴ ይቱንሳና ስምኦንግያ፦ “ጋግን ሃሳም ሌኤን ግዶንዛራ ጩርሻንቴ ካራን ዬዳናንቴ ኜፑቴይና ዬሳም ዻብማቴ” ና ክያማዶ። ⁵ ስምኦንካሞ ክግያ ይማሳና፦ “ኣስታማራዮ፦ ሶትን ሜሌል ኤምቴ ዎቲ ቃጃንቴ ካራ ካላኻሞ ዬዳድማሞ፤ ታ ያ ሃጌያዳና ኜፑቴይናም ኑንቆሮ ዻባና እጳባይ” ና ክያማዶ። ⁶ ኬ ኣጋንታ ኬሃያዶን ዋዳንካ ካልሎን ካራ ጱፅ ዬድዲና፤ ኬሳ ኜፑቴይናኻሞ ታኻን ካርስዲና። ⁷ ጋጋ ዋ ግዶር ዳና ኬሳ ሃርያና ናዴ ኬም ኬኬልሼኻናንቴ ኬ ኣኒካ ግስምዲና፤ ኬኻሞ ናዴ ጋግና ላማ ውል ግዶር ካራን ፆኦስዲና፤ ጋግና ኬሳኻሞ ፁዋን ካርስዲና። ⁸ ስምኦን ሃንዻያ ጴጥሮስካሞ ዬርን ኦጎም ሃፓንቴ ኢየሱስሳ ቡቆሮ ጳርፃንቴ ይጌይና “ጌጳ፦ እንታ ሴሶ ኤዲና፤ እካላንካ ዪማ” ና ክያማዶ። ⁹ ኖ ይንናንቴ ይንታ ክጌያዶኖ ክቤ ኤና ክማላን ዳና ካራን ጱፅን ይዬዳዶን ዬርሻንቴና፤ ¹⁰ ሃያንቴኻሞ ስምኦንሳ ሃርያና ዘብድዮስ ናና፣ ያእቆብቤ ዮሃንስቤ ዬራ ኣጋም ዬርሽዲና። ኢየሱስካሞ ስምኦንግያ፦ “ሃርኩትንዽናኖ፦ ናንሲ ካኻ ካርሳንቴ ኤዲ ኤማያና ሃዳይ” ና ክያማዶ። ¹¹ ኬኻሞ ጋግናም ፔንዛራ ይክድንሳና ራስባራ ፓይላ ውልም ጋራንቴ ኪም ጫግዲና። ¹² ኢየሱስ ካታማናሳ ካታማ ዋሮጎ ክዶን ዋዳንካ ኤዲ ሙልካምባንካ ² ዳ ካላ ካታማስ ኣጋሮ ዳይዲና፤ ኤያ ኣጋ ኢየሱስም ይያፓና ዎትሮ ክሳ ጳርፃንቴ፦ “ጌጳ፦ ሃናሻያዳና ኢም ፓሽሻዻን ቻላና ሃቻላይ” ሃማንቴ ኪም ምስክዲና። ¹³ ኢየሱስካሞ ኣን ይሳኻ ኪም ላኣሳንቴ፦ “እንታ ናሽዲና፣ ፓሺማ!” ና ክያማዶ። ኣጋዛራ ኤያሳ ሙልካምባኖ ካይዲና። ¹⁴ ኢየሱስካሞ ክግያ “ዬራ ካም ኤዲ ካላናንቴኻሞ ሃጌይናኖ፤ ይያማን ቃልቴ ሃም ኣይሁድ ኤናሳ ዳምብ አሽካያናንቴ ዻውማ፤ ሃፓሻዶኖ ኬናንቴ ማኚ ኮዴኻናንቴ ቃልቴ ሙሴ ይጌያዳ ዳምባም ሙልዻሮ ኣሽክማ” ና ክያማዶ። ¹⁵ ይንታ ኮዶንካሞ ዼላቅኖ ክሳ ጌይዻይኖ ካልሎን ሻሚዲና፤ ኤዲኖ ካልሎን ጱፅኖኻሞ ኖ ዼላቅን ክጌያይንም ኤሳራናንቴቤ ሃጅሞና ይሳ ግዶር ፓሻናንቴ ፑጭቴና ኮዶ። ¹⁶ ኮዶን ኢየሱስ ሮሮ ውል ራቅ ፃክርሚዛራ ውታንቴ ምስክቴና ክዶ። ¹⁷ ሮሮ ካላ ኢየሱስ ታማርስቴና ክዶ፤ ኦጎታርካሞ ገሊላ ፔንባራቤ ይሁዳ ፔንሳ ሞሮናባራቤ ዬሩሳሌምባራ ናኣዳና ፈረስ ኤናቤ ኤና ሙሴ ዳምብን ታማራሳይናቤ ዳርቃንቴና ኬዶ፤ ኖ ክፓሽሼኻናንቴ ባርያሳ ካንታኖ ክላማና ኮዶ። ¹⁸ ዋዳስ ኣጋኻ ኤና ኤዲ ራንሳ ማልግማዳ ካላም ሻላንካ ሾፓቴ ናእዲና፤ ኢየሱስሳኻሞ ዎትሮ ዎዳናንቴ ኦኖንዛራ ኣርዳናንቴኻሞ ኬ ሃይዲና። ¹⁹ ዛርስንሳ ጱፃሞንካ ሃማንቴ ኦኖንዛራ ኣርስዻይኖ ኬም ኮባሻዶንታኻ ጳ ኦኖንሳ ዱርንዛራ ውታንቴ ዱሪን ጯቃታንቴ ኤያ ራንሳ ማልግማዳም ክሳ ሻላንካ ዛርንሳ ባክንካ ኢየሱስሳ ዎትሮ ሃ ንችሽዲና።