10

¹ ሃያንቴ ጌጳ ኤዲ ꬆጳታም ላማ ኣብ ካማንቴ ኬም ጌጵስዲና፤ ኖ ይንዛራ ክያኣይና ካታማናቤ ሞሮና ፓይላ ውልዛራ ኪም ብራንቴ ኬዬኤኻናንቴ ላማ ላማ ሃያንቴ ይእስዲና፤ ² ይንታኻሞና ኬግያ ክያማዶ፦ “እስኖ ፑኡሻዼኻ ዛግሳይኖ ጱፂና፤ ኮዶን ኤና ዋድማይና ቶኻና፤ ኣጋታኻ ኤያ እስናሳ እምባ ኤና ዋድማይናም ሃምንዛራ ክይእሴኻናንቴ ምስክማቴ። ³ ታ ናንሲ ይማቴ፤ እያና ጋንታግያ ዮዮናሳ ባክንካና ዬም እይእሳይ። ⁴ ጎርጶ ዎይካሞ ኦኾሎ ዎይካሞ ዱጙር ዬባኣናኖ፤ ጎይሮ ኤዲ ካላኻሞ ዬጌስናኖ።

⁵ “ኦኖ ካላዛራ ዬኣርድናኻሞ ብርሳንቴ ፃሊኖ ኦና ካናንቴ ኮዴ ሃምማቴ፤ ⁶ ኤዲ ፃል ኦጎታር ይዳና፣ ፃላሞኖ ዬኖ ኬዛራ ሳጋና ኮሳጋይ፤ ኦጎታር ኤዲ ፃል ኮቆልምና ፃላሞኖ ዬሳ ዬዛራ ማታና ኮማታይ። ⁷ ኤያ ዋድማያናንቴ ካሺ ኮዛግሳንታኻ፤ ዬራ ዬናንቴ ኬእማይናም እስቴቤ ውጭቴቤ ኦና ይንግዶር ዬኣርዳዳሮ ዳርቅማቴ፤ ኦና ዋሮኻ ኦና ዋዛራ ዬሳግናኖ።

⁸ ካታማ ካላዛራ ዬኣርድና ኤና ዬም ኬቾቻዳና፣ ዬራ ዬናንቴ ኬእማይናም እꬅማቴ፤ ⁹ ኤና ሃጅሞና ኦጎታር ዳናም ፓሽሽቴ ኬግያ ‘ባርያሳ ማንግስትኖ ዬዛራ ሳንስዲና’ ሃምማቴ። ¹⁰ ኮዶን ካታማ ካላዛራ ዬኣርዳዃ ዬም ኬቾቻድምና፣ ጳልንዛራ ውታንቴ ይንታ ሃምማቴ፦ ¹¹ ‘ዎሳ ራንዛራ ዶን ዬሳ ካታማንሳ ቡቡንናም ካውል ዬናንቴ ዹርዹራና ዎዱርዹራይ፤ ኮዶን ባርያሳ ማንግስትኖ ዬኻላ ኮሳንሳዶን ኦጎም ዼስማቴ።’ ¹² እንታ ዬናንቴ ጌያና እጌያይ፤ ሮራ ኣጋኻ ካታማስ ኣጋ ካላንካ ሶዶምዛራ ዻባሞኖ ናአይኖ ባዶና ኮዳይ።

¹³ ሃይ ኮራዚን! ሃይ ቤቴ ሳይዳ! ዬራ ሃምማን ግያንዳና ሃግዶር ሃይዻዳና ጢሮስቤ ሲዶናቤ ግዶር ሃይዻዳና እኒ ኣና ዋዳ ሲዮን ኣፓላን ኣርሳንቴ ዲብን ዋቃዻንቴ ሴሶንባራኻ ማታና ኬማታይ። ¹⁴ ኮዶን ብቶን ሮራ ጋላ ዬካላንካ ጢሮስቤ ሲዶናቤናንቴ ዻባኖ ባዶና ኮዳይ። ¹⁵ ቅፕርናሆም፣ ያኻሞ ዞን ፖላንዛራ ዼግ ዼግ ሃምዲው? ምጫ ኦሎን ፄሪንዛራ ሃንቻና ሃያንቻይ።

¹⁶ “ኤያ ዬም ኤሳራያ ኢም ኤሳራና ክኤሳራይ፤ ኤያ ዬም ቺማ ኢም ቺማሞ፤ ኤያ ኢም ቺማስ ኣባ ኢም ንእሳዳም ችማሞ።” ¹⁷ ኤና ꬆጳታም ላማናኻሞ ዎዛኻ ማታቴ ናዴ ክግያ “ጌጳዮ፣ ቤሮና ኻውል ሃሳ ናብንካ ሃማንቴ ዎናንቴ ኤሳርዲና” ና ኬያማዶ። ¹⁸ ኖኻሞ ኬግያ ይንታና ክያማዶ፦ “ሜሺ ጳልቃትግያ ፖላንባራኻ ክዲኒካ እንታ ሃፕዲና። ¹⁹ ታ ናንሲ ጉኖንቤ ቆሎምፖንቤ ዬትጌኻናንቴ ጋልታሳ ካንታን ፓይላዛራ እንታ ዬናንቴ ጌጳሞን እምዲና፤ ዬር ካላኻሞ ዬም ጌናያ ቆልማሞ። ²⁰ ይያማንካሞ ቤሮና ዬናንቴ ኬኤሳራዶን ኦጎኻ ሃማንቴ ዬዋዝንዽናኖ፤ ኮዶን ናብን ዬሳም ፖላሮጎ ኡካዻዳኻ አጋኻ ዋዝንዽማቴ።”

²¹ ዋዳን ኦጎኻ ኢየሱስ ኡስን ጫራጚንካ ጌጲ ዋዝንዻንቴ ይንታና ክያማዶ፦ “ፖላንቤ ፔንቤሳ ጌጳ ኣባ፣ ኮም ፓይላም ኤና ማልትናቤ ኤና ዬርን ዼሳዳናቤኻላ ኣቻንቴ ናና ሾሊናንቴ ሃዻዋዶንናንቴ ሃም ጎሻና እጎሻይ፤ ዪኒ ዎምባ፣ ኮኖ ቃቦኖ ሃሳ ፃሊኖና።

²² ዬራ ፓይላ ውልም ኣባባራንካ እናንቴ እንዽዲና፤ ሃያንቴኻሞ ናሳ ሃው ክዶንም ባርያ ዎምባሳ ኦባራ ኤዲ ዼሳዳ ቆልማሞ፤ ባርያ ዎምባ ሃው ክዶንምካሞ ናሳሳ ኦባራ ኤዲ ዼሳዳ ቆልማሞ፤ ፕር ናሳኻሞ ኤያ ይንናንቴ ክዻዋያሳ ኦባራ ኤዲ ባርያ ዎምባም ዼሳያ ካላኻሞ ቆላማሞ።

²³ ይሳ ታማርናዛራኻሞ ሽራንቴ ኬግያ ሶጎ ይታና ክያማዶ፦ “ዬቲ ዬራ ዬያፓይናም ኣፕና ሃፓይና ፑጋዻዳና፤ ²⁴ እንታ ዬናንቴ ጌያና እጌያይ፤ ኤና ባርያሳ ኣፖን ጌያይና ጱፅናቤ ብቲና ጱፅናቤ ዬቲ ዬራ ሃፕቴ ዬዳናም ሃፓናንቴ ዛጋንቴ ኬ ሃፓድማሞ፤ ዬራ ኤሳርቴ ዬዳናም ኤሳራናንቴ ዛጋንቴ ኬ ኤሳርድማሞ።” ²⁵ ሮሮ ካላ ኤዲ ሙሴ ዳምብን ዼሳዳ ካላ ኢየሱስ ካላ ጋሮ ዬር ሃፓናንቴ ክግያ፣ “ኣስታማራዮ፤ ሳዳን ላይን ዳይንም ሃፓናንቴ ሃር እያዬ?” ና ክያማዶ።

²⁶ ዬሱሱካሞ፣ “ዬራ ዳምብሮ ኡካዻዳ ሃርቴ? ሃሞንታ ሃናባቤ?” ሃማንቴ ክናንቴ ማስዲና።

²⁷ ኤያኻሞ ክናንቴ ማሳንቴ፣ “ባርያ ጌጳ ሃሳም ሃሳ ዎይላምሮኻ ቡላንቴቤ፣ ሃሳ ሳዳንካ ፓይላቤ፣ ሃሳ ካንታንካቤ ሃሳ ቃቦንካቤ ፓይላ ናሽማ፤ ሃያንቴ ሃሃያርያምካሞ ሃም ሃናሻያግያ ናሽማና ኮያማይ” ና ክያማዶ።

²⁸ ኢየሱስካሞ ክግያ፣ “ያ ሊኪና ሃጌያዶ፤ ያኻሞ ኦጎንታ ሃይማ፤ ሳዳንካ ዳና ሃዳይ” ና ክያማዶ።

²⁹ ኤያኻሞ ይም ጫራጝ ሃያናንቴ ዛጋንቴ ክግያ፤ “ኤሳንካ እሳ ሃርያስ ሃውቴ?” ና ክያማዶ።

³⁰ ኢየሱስካሞ ይንታ ሃማንቴና ክናንቴ ክማሳዶ፦ “ኤዲ ካላ ዬሩሳሌምባራኻ ኢያሪኮዛራ ሃንችቴ ቃውን ኤና ኤናም ዻይናዛራና ክውታዶ፤ ኬ ኣፓላን ክሳም ቡላንቴ ኪም ዻዻቴ፤ ሃያንቴ ሎቃስካ ጋራንቴና ኬያኣዶ። ³¹ አይሁድናሳ ዳምብን አሽካያ ኤዲ ካላኻሞ ጎይን ኦጎኻ ምጫ ይቴ ኪም ሃፓንቴ ኦኻንቴ ያእዲና። ³² ፕር ኤዲ ሌዊ ቢዛ ካላ ራቃ ኣጋም ናዴ ኖኻሞ ኪም ሃፓንቴ ኦኻንቴ ያእዲና። ³³ ኮዶን ሳማርያ ኤዲ ካላ ጎይን ኦጎም ይቴ ኤያ ይዶን ራቅንዛራ ዬስክዲና፤ ኤያም ሃፓንቴ ክናንቴ ቡርቃዽዲና፤ ³⁴ ክካላ ናዴኻሞ ሃጅምን ክሳዛራ ዋኣትንቤ ዎይንን ዚኣንቤ ካንቴ ዻኻንቴ፤ ይሳ ኡኩልንዛራኻሞ ዎዳንቴ ኤና ቾቺና ይንግዶር ይዎድማን ኦኖንዛራ ባኣቴ ቃልቴ ኦጎታር ኪም ቶሪዲና። ³⁵ ዋጋላሞንካሞ ዲናር ላማ ቡላንቴ ቾቺና ይንግዶር ይዎድማን ኦኖንሳ ኤያ እምባናንቴ እማንቴ ክግያ፣ ‘ባንዞ ኤያ ካም እናንቴ ቶርማ፤ ክናሳ ጳባራ ኮይና ሃቡላይናም እማትና ሃናንቴ ማሳናእማሳይ’ ና ክያማዶ።

³⁶ “ታ ናንሲ፣ ኤና ማካምና እግና ግዶርካ ኤያ ቃውን ኤና ይዻዳናንቴ ሃርያ ማታዳ ሃኻላ ሃማቴ?”

³⁷ ኤያ ዳምብን ዼሳዳኻሞ፣ “ኤያ ክናንቴ ቡርቃዻዳ” ና ክያማዶ። ኢየሱስካሞ ክግያ “ያኻሞ ቃልቴ ኣጋንታ ሃይማ” ና ክያማዶ። ³⁸ ኢየሱስቤ ታማርና ክሳቤ ክንካ ጎይን ኬይካ፤ ኢየሱስ ሞሮ ካላዛራ ኣርድዲና፤ ሜ ካላ ማርታ ሃንዻይኖ ኪም ይሳ ኦኖንዛራ ቾቻቴ ኣርስዲና። ³⁹ ኮሳኻሞ ማርያም ሃንዻይኖ እንዳን ናኖ ዳይዲና፤ ማርያምካሞ ጌጳሳ ዼላቅን ኤሳርቴ ክሳ ራንካላ ዳርቃንቴና ኮዶ። ⁴⁰ ኮዶን ማርታ ዋድማ ጱፅ ኣሽክቴ ጋሊቴ ይዶንታኻ ክካላ ናዴ ክግያ፦ “ጌጳዮ፤ እንና ናኖ ዋድማን እናንቴ ሶጎ ጋራንቴ ኮዳርቅና ሃርናንቴ ላይ ሃማንቴ ሃሼዴ? ኢም ኮኬልሼኻናንቴ ኮናንቴ ጌይማ” ና ኮያማዶ።

⁴¹ ኮዶን ጌጳ ይንታ ሃማንቴና ኮናንቴ ክማሳዶ፦ “ማርታ፣ ማርታ፤ ያ ዬር ጱፅናንቴ ቃብቴና ሃዶ፤ ሃያንቴኻሞ ቴሪቴና ሃዶ፤ ⁴² ኮዶን ዬራ ዛግሳያ ካላ ሶጎና፤ ማርያም ዬር ፃሊና ኮካሽማዶ፤ ኣጋምካሞ ኮኻላንካ ቻዽማሞ።”