11

¹ ሮሮ ካላ ኢየሱስ ራቅ ካላ ግዶር ባርያም ምስክቴና ክዶ፤ ምስኮን ይቱንሳና፣ ክሳ ታማርና ግዶር ካላ ክግያ፣ “ጌጳዮ፤ ዮሃንስ ታማርና ይሳም ባርያም ምስካዻን ክታማርሳዳግያ ያኻሞ ዎም ባርያም ምስካዻን ታማርስማ” ና ክያማዶ።

² ኖኻሞ ኬግያ ይንታና ክያማዶ፦ “ዬቲ ባርያም ዬምስክና ይንታ ሃምማቴ፦

“ዎምባዮ፣

ናብኖ ሃሳ ኮጫራጝሜ፤

ማንግስትኖ ሃሳ ኮኔኤ፤

³ ሮራኻ ዎእꬃን ዳኣኖን ሮራኻ ሮኻ ዎናንቴ እምማ፤ ⁵ ሃያንቴኻሞ ኖ ኬግያ ይንታና ክያማዶ፦ “ዬግዶር ኤዲ ካላሳ ሃርያ ኮዳና፣ ሶትን ግዶጋልትንካ ኦኖን ክሳዛራ ቃልቴ፤ ‘እያርያ፤ ሙና ማካም እናንቴ ብድርስማ፤ ⁶ እሳ ሃርያ ካላ ጎይባራ ክናኣዃ ዬር ክናንቴ እእማያ ካላኻሞ ቆልማሞ’ ሃማንቴ ምስክዲና ይንዳ ዎያሜ። ⁷ “ኤያ ኦኖሮን ዳኻሞ ኢም ሃጋሊንሽናኖ፤ ሙልዻፖን ቁልፓዽዲና፤ ናና እሳኻሞ እላማ ክንካ ዎዻንቴና ኬዶ፤ ናንሲ እንታ ዻጳንቴ ሃናንቴ እማናንቴ ቻልማሞ” ሃማው ክያማይ? ⁸ እንታ ዬናንቴ ጌያና እጌያይ፤ ክሳ ሃርያስ ክዶንናንቴ ዻጳንቴ ይእማድምናኻሞ ኪም ክጋልንሻንናንቴ ሶጎ ሃማንቴ ክዛጋይናም ፓይላ ክናንቴ እማና ክእማይ።

⁹ “ኣጋታኻ እንታ ዬናንቴ ጌያና እጌያይ፤ ኦይስማቴ ዬናንቴ እማና እንዻይ፤ ዛግማቴ ሃፓና ዬያፓይ፤ ሙልዻፖን ካላ ናዴ ግስምማቴ ዬናንቴ ቡላና ቡልዻይ፤ ¹⁰ ኦጎኖኻሞ ኤና ኦይሳይና ፓይላ ቻና ኬቻይ፤ ኤና ዛጋይናኻሞ ሃፓና ኬያፓይ፤ ኤና ሙልዻፖንካላ ናዴ ግስማይናናንቴኻሞ ቡላና ቡልዻይ።

¹¹ “ዬሳ ባክሮ ኤዲ ካላ ናሶ እምባ ዳንቴ፣ ናሳ ክካላ ካራ ክምስክና፣ ጉኖን እማያ እምባ ሃውቴ? ¹² ዎይካሞ ሙቃዮ ክምስክና ቆሎምፖን እማያ ሃውቴ? ¹³ ዬቲ ኤዲ ዛርቦ ዳንቴ፣ ናና ዬሳናንቴ ዬር ፃል እማዻን ዬዼሳዳና፤ ታ ኦጎንታ ዳና ዬምባ ፖላሮን ዳ ኤና ክካላ ምስካይናናንቴ ኡስን ጫራጚን ሃርቴ ሻባንቴ ክእምሞኖ!” ¹⁴ ሮሮ ካላ ኢየሱስ ኤዲ ኣፖ ካያ ካላዛራ ቤሮ ቡልቴና ክዶ፤ ቤራኻሞ ክውታዃ ራስባራ ኤያ ኣፖን ካያስ ዼላቅዲና፤ ዛርስኖኻሞ ዬራ ኣጋም ዬርሺዲና። ¹⁵ ኮዶን ኤዲኖ ዋኒ፣ “ቤሮናሳ ጌጳ ብኤል ዜቡልካና ቤሮናም ክቡላይ” ና ኬያማዶ።

¹⁶ ሃያንቴ ኤና ዋኒካሞ ጋሮ ዬር ሃፓናንቴ ፖላሮኻ ኬናንቴ ዬር ሃሊ ክዻዌኻናንቴና ኬዛጋዶ።

¹⁷ ኮዶን ኢየሱስ ቃቦ ኬሳም ዼሳንቴ ይንታና ኬግያ ክያማዶ፦ “ማንግስት ኪም ፓላያ ፓይላ ካያና ክካያይ፤ ኦና ኪም ፓላያኻሞ ይፓና ክይፓይ። ¹⁸ ዬቲ እግያ ያ ቤራም ሃቡላይኖ ብኤልዜቡል ቤሮናሳ ጌጳኻናና ዬያማይ፣ ኮዶን ሜሺ ኪም ይፓላያ ዳና ክሳ ማንግስትኖ ሃስ ሃማንቴ ዋቻዻንቴ ኮዎዬ? ¹⁹ እንታ ቤሮን እቡላይኖ ብኤል ዜቡልካ ኮዳና፣ ታ ናንሲ ናና ዬሳ ሃውካ ኬቡሌ? ኣጋታኻ ኬ ዬዛራ ብቶን ታኻይናና ኬዳይ። ²⁰ ኮዶን እንታ ቤሮናም ባርያ ኣኒንካ እቡላያ ዳና፣ ባርያሳ ማንግስትኖ ዬዛራ ኮናኣዶንም ዼስማቴ።

²¹ ኤዲ ዋቺ ካላ ኦኖን ይሳም ሼካንቴ ክማንክና፣ ኮይና ክሳ ፃሊንካ ዳና ኬዳይ። ²² ኮዶን ኤዲ ካሎን ዋቺ ክዛራ ናዴ ክላማ ዳማንቴ ኪም ይባሽና፣ ዻክዾን ይንካ ክኤርማዶንም ቡልሳና ክቡልሳይ፤ ኮይና ክሳም ሮጋንቴኻሞ ኤና ዋኒናንቴ ካሻና ክካሻይ።

²³ “ኤያ እላማን ትማ ኢም ቶዛዻና ክቶዛዻይ፤ ኤያ እላማ ክንካ ፑእሽማኻሞ ላላና ክላላይ።

²⁴ “ቤሮ ኤዲ ባራንካ ይውትና ኡኩንሳናንቴ ኑንቆ ይቆልማ ራቅዛራ ቃልቴ ጋላና ክጋላይ፤ ራቅ ይንግዶር ይኡኩንሳያም ሃያፓድምና፣ ‘ኦና ይንባራ እናኣዳዛራ ማታና እማታይ’ ና ክያማይ። ²⁵ ማታቴ ክንና ኦኖን ሳዻዃቤ ኣግሳዿዃቤና ክያፓይ። ²⁶ ሃያንቴ ቃልቴ ይካላንካ ካልሎን ዛርቦ ዳና ቤሮ ꬆጳናም ኣንሳቴና ክናኣይ፤ ኣርዳንቴኻሞ ኦጎታር ዳና ኬዳይ፤ ኤያ ኣጋናንቴ ዴንታ ብራስ ካላንካ ካርናስ ካሎን ዛርቦና ክዳይ።”

²⁷ ኢየሱስ ኣጋም ጌይቴ ክዳዃ፣ ዛርስንሳ ባክሮኻ ሜ ካላ ናቅሲ ይሳም ዼግ ሃያንቴ “ናሶን ኦሎኖ ሃም ባኣዶኖቤ ኣምና ሃቆጫዳናቤ ፑጋዻዳና” ና ኮያማዶ።

²⁸ ኮዶን ኖ “ኤና ፑጋዻዳና ባርያሳ ዼላቅን ኤሳራንቴ ይንካ ዳይና” ና ክያማዶ። ²⁹ ዛርሲ ጱፅካሞ ክዛራ ኮፑጫዶን ዋዳንካ ኢየሱስ ይንታና ክያማዶ ፦ “ኤዲኖ ታን ጋይኖ ኮኖ ኤዲ ዛርቦና፤ ዬር ሃሊ ሃፓናንቴና ኮዛጋይ፤ ኮዶን ዮናስዛራ ዬራ ሃላ ሃምማዳሳ ኦባራ ዬር ሃሊ ኣብ ኬናንቴ ሃይዽማሞ። ³⁰ ኦጎኖኻሞ ዮናስ ነነዌ ኤናናንቴ ዬር ሃሊ ክማታዳግያ፣ እንታ ኤዲ ናሶኻሞ ኤዲን ታን ጋይን ኮናንቴ ዬር ሃሊና እማታይ። ³¹ ኤስኖ ደቡብ ጋይኖ ብትኖ ብቶን ታኻዻን ዋዳንካ ኤዲን ታን ጋይን ኮላማ ክንካ ዻጳንቴ ኬም ዻብንሻና ኮዻብንሻይ፣ ኦግኖኻሞ ና ሳላሞንስ ሃማሞን ኤሳራናንቴ ፔን ፔጌንባራ ናእዲና፣ ታ ኤዲ ኮታር ሳላሞን ካላ ሳጊ ዳይዲና። ³² ነነዌ ኤና ዮናስሳ ታማርን ኤሳራንቴ ዻቆን ጎይንዛራ ኬኣርዳዶንታኻ ብቶን ታኻዻን ዋዳንካ ኤዲን ታን ጋይን ኮላማ ክንካ ዻጳንቴ ኬም ዻብንሻና ኬዻብንሻይ፤ ታ ኤዲ ኮታር ዮናስ ካላ ሳጊ ዳይዲና። ³³ ኤዲ ኖን ሮጵሳንቴ ራቅ ኣቺምር ዎይካሞ ኣኻሾሳ ኢር ዎዳያ ቆልማሞ፤ ኦጎኖኻሞ ኦኖንዛራ ኣርዳይናናንቴ ፓክ ኮዴኻ ኖንም ዼግ ሃያንቴና ክዎዳይ። ³⁴ ሃሳ ብሽንናንቴ ሮሮን ማታይኖ ኣፕኖ ሃሳና፤ ኣፕኖ ሃሳ ጫንቃል ኮዳና ብሺኖ ሃሳ ፓይላ ፓኪና ኮዳይ፤ ኮዶን ኣፕኖ ሃሳ ሃጅሞ ኮዳና ብሺኖ ሃሳ ፓይላ ፂፓና ኮዳይ። ³⁵ ኣጋታኻ ሃሳ ኢሮ ኖኖ ሮጳይኖ ፂፓን ኮጋሬኻናንቴ ሃም ማንክማ። ³⁶ ታ ናንሲ ብሺኖ ሃሳ ፓይላ ፓክ ኮዳናቤ፣ ሃሳ ብሺንሳ ራቅ ፂፓዳ ኮቆልምና፣ ኖኖ ሃሳ ብሺሮን ዳና ጉራንሳዻዳግያና ኬሼሽካይ። ³⁷ ኢየሱስ ዼላቃቴ ክሳ ቱንሳ፣ ፋራሳዊ ካላ ክላማ ክንካ ክእꬅሜኻናንቴ ይሳ ኦኖሮ ኪም ግስምዲና፤ ኖኻሞ ክላማ ክንካ ኣርዳንቴ እꬅማናንቴ ዳርቅዲና። ³⁸ ፋራሳዊያ ኢየሱስ ዳኣኖንሳ ብራሮ ኣኒን ይሳም ክሻያድሞንም ይያፓና ቃቦ ያእዲና። ³⁹ ጌጳኻሞ ክግያ ይንታና ክያማዶ፦ “ታ ዬቲ ፈረስ ኤና ኑንቆን ሻርቃንቤ እꬅሞን ሻርቃንቤሳ ዙሎን ሶጎና ዬሻያይ፤ ኮዶን ዬሳ ኢኖ ማዝንቶምቤ ዛርባሞምቤኻና ኮፆፃዶ። ⁴⁰ ዬቲ ኤና ዴምጲና፣ ባርያ ጳልን ጋይንም ዎዳዳ ኢን ጋይን ዎዳዳይዬው? ⁴¹ ኮዶን ዬራ ኢሮ ዳናም ኤና ኩፒናናንቴ እምማቴ፣ ሃያንቴ ናንሲ ዬር ፓይላ ውል ዬናንቴ ጫንቃሊና ኮዳይ።

⁴² ኮዶን ዬት ፈረስ ኤና ሃይ! ኣዝሙድቤ ጤና ኣዳምቤ ዎና ዬጲያዳናሳ ታጲና ግዶርካ ካላም ባር ናንቴ እማና ዬእማይ፤ ኮዶን ብቶንም ጎይ ልኪካ ታክንቶባራቤ ባርያም ናሻዻንባራቤ ዬቲ ግባርስድማሞ፤ ኮዶን ዬቲ እኒ ኪና ኦም ጋርማ ክናምካሞ ዬኣሽኬኻናንቴ ዛግሳና ኮዛግሳይ።

⁴³ ዬት ፈረስ ኤና ሃይ! ኣይሁድናሳ ምስኮን ኦኖሮ ጎሺ ቦርኮቶ ዬናሻንታኻ ጋባንሳ ግዶሮ ኤና ዬም ጎሺ ጌሶኻ ኬጌሴኻናንቴ ዬዛጋንታኻ ሃይ! ⁴⁴ ኤና ዼስማ ትጋዳቴ ይያኣይና ሃፕንዽምና ዱክናም ዬታኻንታኻ ሃይ!”

⁴⁵ ኤና ሙሴ ዳምብን ዼሳዳና ግዶር ኤዲ ካላ ይማሳና “ኣስታማራዮ፣ ኦጎንታ ሃጌይና ዎም ካውል እሪቴና ሃዶ” ሃማንቴና ክጌያዶ።

⁴⁶ ኢየሱስካሞ ይንታና ክያማዶ፤ “ዬቲ ኤና ዳምብን ዼሳዳና ሃይ፤ ኤና ባስክሳናንቴ ይቻልሞን ባስኮን ዴፆንና ኤናም ዬባስክስሳይ፤ ኮዶን ዬቲ ዬናንቴ ዬሳ ኣንሳ ብራኻ ላኣሳናንቴኻሞ ዛግማሞ። ⁴⁷ ዬምባና ይዴሳዳና ኤና ባርያሳ ኣፖን ጌያይናሳ ዱክንም ዬኣሽካንታኻ ሃይ! ⁴⁸ ታ ናንሲ ዬቲ ዬምባና ዋድማና ኬኣሽካዳናም ኣሽካይና ኬሳ ማኚናና፤ኬ ኤና ባርያሳ ኣፖን ጌያይናም ዴስዲና፣ ዬትካሞ ኬሳ ዱክናም ኣሽካናዬኣሽካይ። ⁴⁹ ኣጋታኻ ባርያሳ ሃማሞኖ ይንታና ኮያማዶ፤ ‘ኤና ባርያሳ ኣፖን ጌያይናቤ ኤና ይእሳዻናቤም ኬናንቴ ኒእሳና እኒእሳይ፤ኬ ዋኒም ዴሳና ኬዴሳይ፤ ዋኒምካሞ ኦይታንቴና ኬያያይ።’ ⁵⁰ ኣጋታኻ ኤዲኖ ታን ጋይኖ ኮኖ ኣና ፔን ጋላፕን ኮም ዎዳዻዳሮኻ ካርሳንቴ ኤና ባርያሳ ኣፖን ጌያይናሳ ማኣስን ይንቅማዶንም፣ ፓይላ ኬኻላ ኦይሳናኦይሳዻይ፤ ⁵¹ ኣቤል ማኣስሮኻ ካርሳንቴ ሙልዻንቤ ባርያ ኦኖንቤሳ ባክሮ ይንቅማዶን ዘካርያስ ማኣስንዛራ ዶንም ኬኻላ ኦይሳና ኦይሳዻይ፤ ዪኒ፣ ዬናንቴ ጌያና እጌያይ፤ ኤዲን ታን ጋይን ኮኻላ ዬራ ክናም ኦይሳና ኦይሳዻይ።

⁵² “ዬቲ ኤና ዳምብን ዼሳዳና ሃይ! ዼስንቶን ሙልዻፖን ቡላይን ዬርን ዬቲ ቻይዲና፤ ኮዶን ዬትካሞ ዬናንቴ ኣርዳድማሞ፤ ኤና ኣርዳይናምካሞ ዬቲ ማርዲና።”

⁵³ ኢየሱስ ኦጎባራ ክውታዃ ኤና ሙሴ ዳምብን ታማርሳይናቤ ፈረስ ኤናቤ ኪም ርብንዻንቴ ኦይሶኻ ኪም ዬዲዲና፤ ⁵⁴ ዼላቅና ክሳ ኣፖሮኻ ውታይናኻ ኪም ሴሳናንቴ ዛግቴና ኬዶ።