12

¹ ዋዳ ኣጋኻ ኤዲኖ ፓይዶንሳ ሺ ጱፅ ግያንዶኖ ኪም ይሳ ትጋዛራ ፑጫንቴ ኮዳዃ፣ ኢየሱስ ይሳ ታማርናናንቴ ይንታ ሃማንቴና ክጌያዶ፦ “ኤና ፈረስ ኤናሳ ኛኻዻን ኣፕንካላ ፔጌንዽማቴ፤ ኦጎኖኻሞ ካይስንሶና። ² ዬር ክጫሚ ዳ ጳል ውትማ ካላኻሞ ቆልማሞ፣ ዬር ዼሳዽማ ኣቺምር ዳ ካላኻሞ ቆልማሞ። ³ ኣጋታኻ ዬራ ፅፓሮጎ ዬዼላቃዳና ፓይላ ሜሌል ሃሞሮ ኤሳርማና ኬኤሳርማይ፤ ቆፓሮጎ ዳንቴ ዬራ ክሳ ቃሞሮ ዬሃሽክማዳና ጳሎ ማይ ጌያና ጌይዻይ።

⁴ “እያርያናቶ፤ እንታ ዬናንቴ ጌያና እጌያይ፤ ኤና ዋን ዴሳይናም፣ ሃያንቴ እስ ዬር ኣብ ካላኻሞ ኣሽካናንቴ ቻልምናም ዬኩርትንዽናኖ። ⁵ ኮዶን ይንናንቴ ዬኩርትንዼኻናንቴ ዛግሳያ ሃው ክዶንም ዬናንቴ ዻዋና እዻዋይ፤ዴሳንቴ ጋሃነምንዛራ ዻባናንቴ ጌጳሞ ይንሳ ይዳም ኪም ኩርትንዽማቴ፤ ዪኒ፣ ዬግያ ኪም ኩርትንዽማቴና እያማይ። ⁶ ሱታና ዶጝናም ሽልንጋ ታጳዛራ ሻንሽቴ ዳዻዳይዬው? ኮዶን ኬግዶር ካላኻሞ ባርያኻላ ዋልሚ ዳማሞ። ⁷ ዬሳ ሜቴሮን ዳና ስቲና ካውል ፓይላ ፓይዳዿዃና ኬዶ፤ ታ ናንሲ ዬኩርትንዽናኖ፤ ሱታና ጱፅና ባዛንሳ ጳባራ ባዛኖ ዬኖ ጌጲና።

⁸ እንታ ዬናንቴ ጌያና እጌያይ፤ ኤና ኤናሳ ዎትሮ እናንቴ ማኛሞን ዎያይና ውልናንቴ፣ እንታ ኤዲ ናሶኻሞ ባርያሳ ኤርጎን ኤናሳ ዎትሮ ኬሳ ማኚ ዳና እዳይ። ⁹ ኤናሳ ዎትሮ እንታ ኪም ዼስማሞ ሃማንቴ ኤያ ዜርማያ፣ ባርያሳ ኤርጎን ኤናሳ ዎትሮ ኪም ዼስዽማሞ ሃማና ሃንዻይ። ¹⁰ ኤና እ ኤዲ ናሶዛራ ቦውንታ ዼላቅ ጌያይና ውልናንቴ ኬሳ ሴሶን ኬናንቴ ጋራና ጋርዻይ፤ ኮዶን ኤያ ኡስን ጫራጚኒም ኢራያናንቴ ሴሶን ክሳም ክናንቴ ካላኻሞ ጋርዽማሞ።

¹¹ ኤና ዬም ዬዳንቴ ኣይሁድናሳ ምስኮን ኦኖንዛራ ዎይካሞ ኤና ብቲናቤ ኤና ጋርናቤዛራ ኣንሳቴ ኬይና ሃሞንታ ዬማሳይንም ዎይካሞ ኬናንቴ ሃር ዬማሳይንም ዬቃብምናኖ፤ ¹² ሳኣታ ኣጋኻ ኡስኖ ጫራጚኖ ዬራ ዬጌዬኻናንቴ ዛግሳይናም ዬናንቴ ጌያና ኮጌያይ።” ¹³ ዛርስንሳ ባክሮ ኤዲ ካላ ክግያ ይጌይና፤ “ኣስታማራዮ፣ እንና ናሳ ዻልማን ኮይሶንሳ እናንቴ ዬስካይናም ክካሼኻናንቴ ክናንቴ ጌይማ” ና ክያማዶ።

¹⁴ ኢየሱስካሞ ክግያ፣ “ያ ኤያ ካ፣ ኢም ዬዛራ ኤዲ ብቶ ታኻያ ዎይካሞ ኤዲ ጌጲ ሃያዳ ሃውቴ?” ና ክያማዶ።

¹⁵ ሃያንቴኻሞ ኬግያ “ኤዲሳ ሳዳኖ ዎድማሞዛራ ኮጌክንዻድሞንታኻ፣ ዬም ማንክማቴ፤ ዛላሞሮኻኻሞ ፓይላ ዬም ማንክማቴ” ና ክያማዶ።

¹⁶ ኖ ጫግሻንቴኻሞ ይንታ ሃማንቴና ዻይንሶ ኬናንቴ ክጌያዶ፦ “ኤዲ ዎድሞ ካላ ሃምንሳ ካሎን ጌጲ ኡሻዳ ዳይዲና፤ ¹⁷ ኤያ ኣጋ፣ እስንን እሳም ይንግዶር እካያ ኮና ጌጲ ኮቆልሞንታኻ ሃስ እያዬ? ሃማንቴ ይሳ ዎይላምካ ቃብዲና።

¹⁸ ይንታኻሞና ክያማዶ፦ ‘ይንታና እያያይ፤ ኮናና እሳ ዳናም ኮሳንቴ ኮና ኣብ ጌጲ ጌጲና እዻይ፤ ሃያንቴ ኬግዶር እሳ እስናቤ ኮይናቤም ፓይላ ካና እካይ፤ ¹⁹ ሳዳን እሳምካሞ፣ “እሳ ሳዳኖ፣ ዋዳ ጱፅናንቴ ሃናንቴ ዬካያ ኮይሶ እንታ ዶሪዲና፤ ታ ናንሲ ኡሲ ችማ፤ እስማ፤ ውጭማ፤ ዋዝንዽማኻሞ” ኮግያ ሃማና እያማይ።

²⁰ ኮዶን ባርያ ክግያ ‘ያ ኤያ ዴምጳ ካ፣ ሳዳን ሃሳም ሃኻላ ሶታ ካኻ ቻናንቴ ዛጋና ኬዛጋይ፤ ታ ናንሲ ሃናንቴ ሃማንቴ ሃኬራዶኖ ሃውናንቴ ኮዴ?’ ና ክያማዶ።

²¹ ኣጋታኻ ኤያ ይናንቴ ሃማንቴ ኮይሶን ፑኡሻያ፣ ኮዶን ባርያሳ ዎትሮ ዎድሞን ትማ ቱንስኖ ክሳ ኣጋንታና።” ²² ሃያንቴኻሞ ኢየሱስ ይሳ ታማርናግያ ይንታና ክያማዶ፦ “ኣጋታኻ ዬናንቴ ጌያና እጌያይ፤ ዬሳ ሳዳንናንቴ ሃር ዬእꬃይንም ዎይካሞ ዬሳ ብሺንናንቴ ሃር ዬኣርሳይን ኦጎናንቴ ዬሞይካዽናኖ፤ ²³ ኦጎኖኻሞ ሳዳኖ ዳኣኖን ካላ፣ ብሺኖኻሞ ኣፓላን ካላንካ ሳጊና። ²⁴ ይንዳ ካርያናም ሼድማቴ፤ ኬ እስን ጲማሞ፣ ፓትማሞ፣ ይንግዶር እስንን ኬካያ ኮና ኬሳ ቆልማሞ፤ ኮዶን ባርያ ኬም እꬅንሳና ክእꬅንሳይ። ታ ዬቲ ካርያና ካላንካ ካሎን ሳጋይዬው? ²⁵ ኤሳንካ፣ ዬግዶር ሞይካዻንቴ ይሳ ቦንናዛራ ክንዲ ካላ ሻባናንቴ ቻላያ ሃውቴ? ²⁶ ታ ናንሲ ዬራ ሾላም ሃያናንቴ ዬቻሊምና፣ ዬራ ዋኒናንቴ ሃርናንቴ ዬሞይካዼ?

²⁷ “ይንዳ ኡሺምና ሃሞንታ ኬጌጳይንም ሼድማቴ፤ ኬ ኣሽክቴ ጋልማሞ፤ ፑታ ዽማሞ፤ ኮዶን ዬናንቴ ጌያና እጌያይ፤ ሳላሞን ካውል ይሳ ጎሺን ኦጎ ውልካ ኡሽምና ክናሳ ካላግያ ኣፓላ ኣርሳድማሞ። ²⁸ ታ ናንሲ ሃይታላ ሃፕንዻንቴ ሳኻ ኖንዛራ ካዻይና ሾቆና ጳልን ጋይናም ባርያ ኦጎንታ ከኣርስሳያ ዳና፣ ዬቲ እምነትንሳ ቄታና ዬቤም ሃርቴ ኬኻላንካ ሳጊ ክኣርስስሞኖ? ²⁹ ኣጋታኻ ሃር ዎእꬄ ዎይካሞ ሃር ዎውጬ ሃማንቴ ዛጋኻ ዬሞይካዽናኖ፤ ³⁰ ኦጎቤም ኤዲኖ ፔን ጋላፕሮ ዶኖ ፓይላ ዛጋና ኮዛጋይ፤ ዬሮ ኦጎኖ ፓይላ ዬናንቴ ኮዛግሳይንም ዬምባ ዼስዲና። ³¹ ክናሳ ኦባራ ሳጊ ዬቲ ባርያሳ ማንግስትን ዛግማቴ፤ ዬርን ኦጎም ፓይላ ዬናንቴ ሻባንቴ እማና እንዻይ።

³² “ዬቲ ኤና ቄታና፣ ይሳ ማንግስትን ዬናንቴ እማናንቴ ዬምባሳ ቃቦኖ ፃሊኖ ኮዶንታኻ፣ ዬኩርትንዽናኖ፤ ³³ ኮይና ዬሳም ሻንሻንቴ ኤና ኩፕናናንቴ ብሬንናም ካሽማቴ፤ ዲብን ይድብሞን ራቅሮቤ፣ ኦሎሎን ይእꬅሞን ራቅሮቤ፣ ሶርብን ጌችሞሮ ኮይሶ ማቅማ ፖላሮ ዬናንቴ ፑኡሽማቴ፤ ³⁴ ዬሳ ዎይላምኖ ኮይና ዬሳሳ ራቃ ይንግዶር ዳዻዳሮና ኮዳይ። ³⁵ ዻክዻንቴ ሼክሚ ዳማቴ፤ ዬሳ ኖናኻሞ ሮጳንቴ ኬዴ፤ ³⁶ ኬሳ ጌጳ ጋይዶንባራ ክሳ ማታዛራ ኤና ካላይና ጌጳ ኬሳ ናዴ ኦኖንሳ ሙልዻፖንካላ ናዴ ክግስምና ኤና ዪሪካ ቡላይናግያ ሼክሚ ዳማቴ። ³⁷ ኬሳ ጌጳ ክናኣን ዋዳንካ ካይስና ቃይማንቴ ኬዳዃ ክያፓይና ፓፅን ይንናንቴ እንዻዳናና፤ ዬናንቴ ጎንዼና እጌያይ፣ ኬሳ ጌጳ ዻክዻንቴ ዎያንቴ፤ ኬም እꬅንስናንቴ ዳኣርሳና ክዳኣርሳይ፤ ናዴ ኬም እꬅንሳና ክእꬅንሳይ። ³⁸ ጌጳ ሶትንሳ ግዶጋልት ግዶር ዎይካሞ ሶፅማ ኣፖ ግዶርካ ናዴ ኣጋንቴ ቃይማንቴ ኬዳዃ ክያፓይና ካይስና እግና ፓፅን እንዻዳናና። ³⁹ ኮዶን ካም ዼስማቴ፤ ዲባ ሳኣታ ሃማኻ ክናኣን እኒ ኦኖን እምባ ይዼሳዳና፣ ክሳ ኦኖንሳ ኩባን ቡጫንቴ ክሳ ዲባዛራ ኖ ላይ ሃማንቴ ሼድማሞ። ⁴⁰ እንታ ኤዲ ናሶ ሳኣታ ዬቃባድማኻ እናኣንታኻ፣ ዬትካሞ ሼካንቴ ካሊማቴ።”

⁴¹ ጴጥሮስ ክግያ፣ “ጌጳዮ፣ ዻይንሳ ካም ሃጌያይኖ ዎናንቴ ሶጎሞ ሞ ኤና ዋኒናንቴ ካውል?” ና ክያማዶ።

⁴² ጌጳኻሞ ይንታ ሃማንቴና ክማሳዶ፦ “ታ ናንሲ ኤያ ጌጳ ይሳ ሞሮን ኤናናንቴ ዋዳ ሊኪ ሃማኻ ዳኣኖን ክእሜኻናንቴ ኬዛራ ይጌጵሳዳ ዋድማን ኤያ ጋዛስቤ ፓኻላስቤ ሃውቴ? ⁴³ ጌጳ ክሳ ማታቴ ክንና ዋድማን ኤያ ኦጎንታ ዋድምቴ ዳ ኣጋ ፑጋዻዳና፤ ⁴⁴ ዬናንቴ ጎንዼና እጌያይ፤ ኖ ኪም ኮይና ይሳ ዳና ፓይላ ውልዛራ ጌጵሳና ክጌጵሳይ። ⁴⁵ ኮዶን ዋድማን ኤያ ኣጋ፣ ‘ጌጳ እሳ ይሪ ንማሞ፣ ኖ ካፓና ክካፓይ’ ሃማንቴ ቃባንቴ ካይስና ኣንጌናቤ ሜናቤም ክዽናቤ፣ ይዛጋዳግያ እꬃማቤ፣ ውጫቤ፣ ክክባርያዳናቤ፤ ⁴⁶ ዋድማን ኤያ ኣጋሳ ጌጳ ኖ ሮራ ክቃባድማኻቤ ሳኣታ ክዬክንስድማኻ ናኣና ክናኣናይ፤ ሃያንቴኻሞ ኪም ኝክ ኝክ ቱማና ክቱማይ፤ ዴንታን ክሳምካሞ ኤና ኣምንድምና ላማና ክያያይ።

⁴⁷ ጌጳ ክሳ ዬራ ይዛጋይናም ዼሳንቴ ሼክማቤ ቃቦ ክሳም ኣሽክማስ ካይስታ ኣጋም ኪም ዛርቦ ዻና ዻዻይ፤

⁴⁸ ኮዶን ይሳ ጌጳሳ ቃቦን ዼስማ፣ ዬር ኪም ዻይሳያግያ ሃማ ዋድማ ሶጎ ኣሽካዳ ካይስታም ዬካ ዬካና ዻዻይ። ኤና ይንናንቴ ጱፅ እንዻዳና ፓይላ ውልካላ ጱፅና ዛጋዻይ፤ ኤና ኤልቅሞን ጱፅን ቻዳናኻላኻሞ ዬር ጱፂና ካላዻይ። ⁴⁹ እንታ ይንናንቴ እናኣዶኖ ፔሮ ኖን ኣስናንቴና፤ ታ ካዛራ ኮዬዳዳና ሃሞንታ እኒ እዋዝንዼ! ⁵⁰ ኮዶን ሻዮ እሻይዻያ ዳይዲና፤ ኦጎኖ ኮሳ ሃምማዛራ እንታ ጌጲ ሞይካዽዲና። ⁵¹ ዬኻላ ፔንዛራ ፃላሞን ባኣናንቴ እናኣዳው ኮታኻይ? ይንታ ትማሞ፤ ዬናንቴ ጌያና እጌያይ፣ እንታ ይንናንቴ እናኣዶኖ ፓሽንታን ባኣናንቴና። ⁵² ካኻ ካርሳንቴ ሞሮን ካሎንሳ ኢሮ ክንካ ፓሽማዳና ኤዲ ዶጝ ዳና ኬዳይ፤ ኤና ላማና ኤና ማካምናዛራ ዻጳናኬዻይ፣ ኤና ማካምና ኤና ላማናዛራ ዻጳንቴ ኪም ላላና ኬላላይ፤ ⁵³ እምባ ይሳ ናሳዛራ ዻጳናክዻጳይ፣ ናሳኻሞ እምባዛራ ዻጳናክዻጳይ፤ እንዳኖ ይሳ ናንዛራ ዻጳናኮዻጳይ፣ ናኖኻሞ እንዳንዛራ ዻጳናኮዻጳይ፤ ኣኻኖ ናሳ ሜንዛራ ዻጳናኮዻጳይ፣ ናሳ ሜኖኻሞ ኣኻንዛራ ዻጳንቴ ኪም ላላና ኬላላይ።” ⁵⁴ ሃያንቴኻሞ ኖ ዛርስንናንቴ ይንታና ክያማዶ፦ “ሉፕኖ ሃዮን ይዋንባራ ኮውታን ዬያፕና፣ ይሪካ ‘ዶቦኖ ናኣናንቴና ኮዶና’ ዬያማይ፤ ኦጎንታኻሞ ዳና ኮዳይ፤ ⁵⁵ ዳቡብ ግባሮኖ ዳቡብባራ ኮግባርስና፣ ‘ፔኖ ኦይዻና ኮኦይዻይና’ ዬያማይ፤ ኦጎንታኻሞ ዳና ኮዳይ። ⁵⁶ ዬቲ ክና ካይስንሶን ኤና፣ ፔንቤ ፖላንቤሳ ዴንታንም ዬክንስዻን ዬቲ ዼስዲና፤ ዋዳን ታን ጋይን ኮሳ ዴንታም ዬክንስዻይኖ ሃስ ዬም ኮባሻዴ?

⁵⁷ “ታ ዬናንቴ ጎይ ልኪ ሃማኻ ሃርቴ ዬታክሞኖ? ⁵⁸ ሃሳ ቁፓሞን ኤያ ላማ ክንካ ኣኻራ ኤያ ብቶን ታኻያሳ ዎትሮ ዎዮታ ሃይና፤ ኣኻራ ጎይሮጎ ዳንቴ ክላማ ክንካ ቃሽማናንቴ ዛግማ፤ ኦጎንታ ሃያድምና ኖ ሃም ጉቻቴ ኤያ ብቶን ታኻያዛራና ክያኣያ፤ ኤያ ብቶን ታኻያኻሞ ሃም ኤያ ዻኻያናንቴ ሳስካንቴና ክእማይ፤ ኤያ ዻኻያኻሞ ሃም ዻክን ኦኖንዛራ ኣርሳና ክኣርሳይ፤ ⁵⁹ ሃናንቴ ጌያና እጌያይ፤ ሽልንጋ ቱንስም ሃሳ ካሻቴ ቱንስዛራ ኦጎታርካ ያ ውትማሞ።