13

¹ ዋዳን ኦጎኻ፣ ኤና ዋኒ ኢየሱስ ካላ ናዴ ይጌይና፦ “ገሊላ ኤና ሙልዻሮጎ ባርያናንቴ ቁሊ ኡኩቴ ኬዶን ዋዳንካ፣ ጲላጦስ ኬም ክዴሳንቴ ኬሳ ማኣስናም ቁላ ኬኡካዳና ማላ ክንካ ዎርስዲና” ሃማንቴ ክናንቴ ጌይዲና። ² ኖኻሞ ኬናንቴ ይንታ ሃማንቴና ክማሳዶ፦ “ታ ገሊላ ኤና ክና ጋሎኖ ኦጎኖ ኬዛራ ኮዬስካዶኖ ገሊላ ኤና ዋኒ ፓይላ ካላንካ ዬኻላ ካልሎን ሴሶ ኤድ ኬዳው ኮታኻይ? ³ ኦጎንታ ትማሞ፤ እንታ ዬናንቴ እጌያና እጌያይ ሴሶንባራኻ ዬማታድምና ዬትካሞ ፓይላ ኣጋንታ ካያና ዬካያይ። ⁴ ዎይካሞ ሰሊሆም ግዶር ካርሚኖ ሱኒን ጋይኖ ይንዛራ ኮይፖዃ ጃዳና ኤና ታጲ ሎንካይና ኤና ዬሩሳሌም ግዶር ዳና ፓይላ ግዶርካ ዬኻላ ሳጊ ሴሶ ኤድ ኬዳው ኮታኻይ? ⁵ ኦጎንታ ትማሞ፤ እንታ ዬናንቴ እጌያና እጌያይ፤ ዬትካሞ ሴሶንባራኻ ዬማታድምና ፓይላ ኣጋንታ ካያና ዬካያይ።

⁶ ሃያንቴኻሞ ኖ ይንታ ሃማንቴ ዻይንሳ ካም ኬናንቴ ጌይዲና፦ “ኤዲ ካላ ይሳ ዎይንን ሃምን ራቅሮጎ ክኮራዳ ባላስ ሃቃ ካላ ክሳ ዳይዲና፤ ኖኻሞ ኣፒ ክግዶር ዛጋናንቴ ናዴ ኣፒ ካላኻሞ ሃፓድማሞ። ⁷ ኖ ዎይንን ሃምንሳ ዋድማን ኤያግያ ‘እንታ ክግዶር ኣፒ ሃፓና እያፓይ ሃማንቴ ቦን ማካም ባላሳ ካዛራ ናዴ፤ እንታ ኣፕ ካላኻሞ ሃፓድማሞ፤ ኣጋታኻ ኪም ጫራቴ ዻብማ፤ ኖ ፔኒም ሃርናንቴ ሱን ክውጬ?’ ና ክያማዶ።

⁸ “ኮዶን ኖ ይንታ ሃማንቴና ክናንቴ ክማሳዶ፦ ‘ጌጳዮ፣ ዴሞን ክሳም እሳ ዎዳዛራቤ ዱባ እሳ ካዛራ ቦና ካናንቴ ሶጎ ጋርማ፤ ⁹ ቦና ናኣያ ኣፒ ክካዳና ኦጎ ፃሊና፤ ክካድምና ኪም ጫራና ሃጫራይ።” ¹⁰ ኢየሱስ ኡኩንሳን ሮራ ጋላ ኣይሁድናሳ ምስኮ ኦኖ ካላ ግዶር ታማርስቴና ክዶ። ¹¹ ኦጎታርካሞ ቦን ታጲ ሎንካይግያ ኤስኖ ቤሮንሳ ዙሎን ቁንዱል ይያዶኖ ሜ ኻላ ዳይዲና፤ ናኻሞ ዙሎኖ ኮሳ ቁንዱል ኮያማዶንታኻ ካች ሃማናንቴ ካላኻሞ ቻላድማሞ። ¹² ኢየሱስካሞ ኮም ይያፓዶን ዋዳንካ ኮም ግስማንቴ፣“ያ ኤስኖ ኮኖ፣ ሃጅማ ሃም ዬዳዳሮኻ ያ ጫንቃል ሃምዲና” ና ክያማዶ፤ ¹³ ኣን ይሳምካሞ ኮዛራ ዎድዲና፤ናኻሞ ኣጋዛራ ካች ሃማንቴ ዎይዲና፤ ባርያናንቴኻሞ ጎሺን እምዲና።

¹⁴ ኮዶን ኤያ ኣይሁድናሳ ምስኮን ኦኖንሳ ጋራ ኢየሱስ ኡኩንሳን ሮራ ጋላ ክፓሽሻዶታኻ፣ ዋጭማንቴ ዛርስንግያ፤ “ዋድማን ይንካ ኣሽካዻይና ሮሮና ላና ዳይዲና፤ ኣጋታኻ ሮሮና እግናኻ ናዴ ፓሽማቴ፤ ኡኩንሳን ሮራኻ ትማሞ” ና ክያማዶ።

¹⁵ ጌጳኻሞ ክናንቴ ማሳንቴ ይንታና ክያማዶ፦ “ዬቲ ክና ካይስንሶን ኤና፣ ዬሳ ባክሮ ኤዲ ይሳ ዋኻም ዎይካሞ ኡኩልታም ክሳ ዻክድሮኻ ኡኩንሳን ሮራ ጋላ ቡላንቴ ኑንቆ ዉሾታ ያኣያ ቆላይዬው? ¹⁶ ታ ኤስኖ ኮኖ ኣብርሃም ናሶ ኮዳዃ፣ ሜሺ ኮም ቦን ታጲ ሎንካይናንቴ ይዻዃዃ ዶኖ፤ ዻክን ኦጎሮኻ ኡኩንሳን ሮራ ጋላ ኮም ቡሊንቶ ዛግሳይዬው?”

¹⁷ ኖ ኣጋም ክጌያዶን ዋዳንካ ኤና ክሳ ቁፓሞን ኤና ፓይላ ቦኪንዽዲና፤ ኮዶን ዛርስኖ ፓይላ ዬር ሃሊ ኖ ክያያዳኻ ዋዝንዽዲና። ¹⁸ ሃያንቴኻሞ ኢየሱስ ይንታና ክያማዶ፦ “ባርያ ማንግስትኖ ሃር ኮታኬ? ሃርላማ ኮም እዬክንሴ? ¹⁹ ኪም ኤዲ ካላ ቻንቴ ይሳ ሃምሮ ይጵያዳ ሻፖ ኣፒና ክታኻይ፤ ኖ ጌጳንቴኻሞ ሃቃ ጌጲ ማትዲና፤ ካርያና ፖላን ጋይናኻሞ ክሳ ኣንትናዛራ ዱንክዲና።”

²⁰ ሃያንቴኻሞ ኖ ይንታና ክያማዶ፦ “ባርያ ማንግስትንም ሃር ላማ ክንካ እዬክንሴ? ²¹ ሜ ካላ ቡኮኖ ኮዱቤኻናንቴ ዹሎ ጱፅ ላማ ኮዎርሳዳ ኛኻዻ ኣፓ ሾላምና ክታኻይ። ²² ኣጋሳ ራስባራ ኢየሱስ ዬሩሳሌምዛራ ይቴ ዳንቴ፣ ይንካ ይሳጋይና ካታማናቤ ሞሮናቤ ግዶር ታማርሳዳቴ ይቴና ክዶ። ²³ ኤዲ ካላ ክካላ ናዴ ክግያ፣ “ጌጳዮ፣ ኤና ዻቃይና ኤዲ ቄታ ሶጎው?” ና ክያማዶ። ኖኻሞ ኬግያ ይንታና ክያማዶ፦ ²⁴ “ሙልዻፓ ቆቃስካ ኣርዳናንቴ ማይሽምማቴ፤ እንታ ዬናንቴ ጌያና እጌያይ፤ኤዲኖ ጱፅኖ ኣርዳናንቴ ዛጋና ኮዛጋይ፤ ኮዶን ኬናንቴ ቻልምማሞ፤ ²⁵ ኤያ ኦኖንሳ እምባ ኦኖንም ክቁልፓዃ ዬቲ ጳልባራ ዎያንቴ፣ ‘ጌጳዮ፤ ዎናንቴ ቡልማ’ ሃማንቴ ሙልዻፖን ካላ ዎያንቴ ግስማናዬግስማይ። ኮዶን ኖ፣ ‘ሃው ዬዶንቤ ሃምባራኻ ዬናኣዶንቤም እንታ ዼስማሞ’ ሃማንቴና ዬናንቴ ክማሳይ።

²⁶ “ዬትካሞ፣ ‘ዎቲ ሃላማ ክንካ እꬅምዲና፣ ክንካኻሞ ዎቲ ውጭዲና፤ዎሳ ኛርን ጳሎኻሞ ያ ታማርስዲና’ ና ዬያማይ።

²⁷ ኖኻሞ ዬግያ፣ ‘እንታ ዬናንቴ እጌያና እጌያይ፤ ዬቲ ሃው ዬዶንቤ ሃምባራኻ ዬናኣዶንቤም እንታ ዼስማሞ፤ ዬቲ ክና ኤና ዛርቦና ፓይላ እካላንካ ፔጌ ዳማቴ’ ና ክያማይ።

²⁸ “ኣብርሃምቤ፣ ይሳሃቅቤ፣ ያእቆብቤ፣ ኤና ባርያሳ ኣፖን ጌያይናቤም ፓይላ ባርያ ማንግስትንሳ ኢሮ ዬያፕናቤ፤ ናንሲ ዬም ጳሎ ዻባዻዃ ዬሽዽና ዋዳን ኣጋኻ ኤፕቤ ግግሪ ማሳቤና ኮዳይ። ²⁹ ኤዲኖ ሃዮን ይውታንባራቤ፣ ሃዮን ይዋንባራቤ፣ ጳባራቤ፣ ቾባራቤ ናዴ ባርያሳ ማንግስትሮ እꬅሞን ራቅሮጎ ዳርቃና ኬዳርቃይ። ³⁰ ኤና ራስባራን ዳናሳ ባክሮ ኤና ብራሮን ዳይና ዳይዲና፣ ኤና ብራሮን ዳናሳ ባክሮ ኤና ራስባራ ዳይና ዳይዲና።” ³¹ ዋዳን ኦጎኻ ፈረስ ኤና ግዶር ኤና ዋኒ ክካላ ናዴ ክግያ፣ “ሄሮዶስ ሃም ዴሳናንቴ ክዛጋዶንታኻ ኮታርካ ዻጳንቴ ይማ” ና ኬያማዶ።

³² ኖኻሞ ኬግያ ይንታና ክያማዶ፦ “ቃልቴ ኩዪታ ኣጋናንቴ ዬሳ ጌያኖ፤ ‘ሃይታላቤ ሳኻቤ ቤሮናም ቡላና እቡላይ፤ ኤና ሃጅሞናም ፓሽሻና እፓሽሻይ፤ ሮራ ማክንሳ ጋላኻሞ እቃባዳዛራ ዬስካና እዬስካይ ሃማንቴ ኖ ጌይዲና’ ሃምማቴ፤ ³³ ኮዶን ኤያ ባርያሳ ኣፖን ጌያያ ዬሩሳሌምሳ ኦባራ ራቅ ኣብ ግዶር ክጄኻናንቴ ክዛግስሞንታኻ፣ ሃይታላቤ ሳኻቤ፣ ኦሽጋላቤ ኦጎዛራ ያኣና እያኣይ፤

³⁴ “ዬሩሳሌም፣ ዬሩሳሌምዮ፣ ያ ኤና ባርያሳ ኣፖን ጌያይናም ዴሳይኖ፣ ኤና ሃዛራ ንእሳዻዳናምካሞ ሱኒንካ ፓኻይኖ! ባቻ ይሳ ናናም ይሳ ኮልንሳ ኢሮ ኮፑኡሻያግያ ናና ሃሳም ፑኡሻናንቴ ሃማግያ እዛጋዴ፤ ኮዶን ያ ጋርዲና፤ ³⁵ ሼድማቴ፤ ታ ኦኖና ዬሳ ጎልቂ ማታንቴ ሽዽዲና። ዬናንቴ ጌያና እጌያይ፤ ኤያ ጌጳ ናብንካ ናኣያ ፑጋዻዳና ዬሳ ሃማዛራ ካኻ ካርሳንቴ ዬቲ ኢም ሃፕማሞ።”