14

¹ ኡኩንሳ ሮሮ ካላ ኢየሱስ እꬅማናንቴ ኤና ፋራሳዊይናሳ ጋርናሳ ካላ ኦኖንዛራ ክኣርዳዶን ዋዳንካ፤ ኤና ኪም ኣፒ ማራኻ ሼድቴና ኬዶ። ² ኦጎታርካሞ ኤዲ ብሺ ኤትማኻ ጋላያ ካላ ኢየሱስሳ ዎትሮ ዳርቃንቴ ዳይዲና። ³ ኢየሱስካሞ ኤና ሙሴ ዳምብን ዼሳዳናቤ ፈረስ ኤናቤግያ፣ “ኡኩንሳ ሮራ ጋላ ኤና ሃጅሞናም ፓሽሻዻያ ልኪሞ ሞ ልኪታይ?” ሃማንቴ ኬኻላ ኦይስዲና። ⁴ ኮዶን ኬ ዬር ካላኻሞ ጌያድማሞ። ኖኻሞ ኤያም ዬዳንቴ ፓሽሻንቴ ይእስዲና።

⁵ ሃያንቴኻሞ ኬግያ፣ “ዬሳ ኤዲ ካላሳ፣ ናሶ ዎይካሞ ዋኪ ኡኩንሳን ሮራ ጋላ ኦሎሮ ኮኣርዲና ይሪካ ቡልማ ሃውቴ?” ና ክያማዶ። ⁶ ኬኻሞ ዬር ካላኻሞ ማሳናንቴ ቻላድማሞ። ⁷ ኢየሱስካሞ ኤና ግስንዻዳና ጎሺ ቦርኮቶ ኬዛጋይንም ሃፓንቴ ይንታ ሃማንቴ ዻይንሳ ካም ኬናንቴ ጌይዲና። ⁸ “ኤዲ ካላ ጋይዶንዛራ ሃም ክግስምና፣ ጌጳሞ ራቅዛራ ሃዳርቅናኖ፤ ኤዲ ጌጳሞኻ ሃሳ ሳጊ ግስንዻዳና፤ ⁹ ዬላማ ውልም ኤያ ግስማዳ ናዴ ሃግያ ‘ራቃ ካም ኤያ ካናንቴ ጋርማ’ ና ክያማይ፤ ያኻሞ ቦክንዻናንቴ ራቅ ይርክ ሃማዛራ ሃንቻንቴ ዳርቃና ሃዳርቃይ። ¹⁰ ኮዶን ሃም ግስንዻን ዋዳንካ ራቅ ይርካ ሃማ ሼዳንቴ ዳርቅማ፤ ኤያ ሃም ግስማዳ ይንና ሃግያ እያርያ ራቃ ሃናንቴ ዛግሳያ ካሮ ዳርቅማና" ና ክያማይ፤ ዋዳ ኣጋኻ ሃምካሞ ኤና ሃላማ እꬃማናንቴ ዳርቃዳና ውልሳ ዎትሮ ጎባና ጎባዻይ። ¹¹ ኦጎኖኻሞ ኤና ዪም ዼግ ዼግ ሃያይና ፓይላ ይርክ ማታና ኬማታይ፤ ኤና ዪም ይርክ ይርክ ሃያይናኻሞ ፓይላ ዼግ ዼግ ማታና ኬማታይ።”

¹² ፕር ኢየሱስ ኤያ ኪም ግስማዳግያ ይንታና ክያማዶ፦ “ትፓን ዳኣኖንናንቴቤ ዎይካሞ እባንን ዳኣኖንናንቴቤ ኤናም ሃግስምና፣ እናንቴ ኢ ባዛ ማሳናኬማሳይ ሃማንቴ ኤና ሃሳ ናሽዽናም ዎይካሞ ሃንና ናናም ዎይካሞ ኤዳና ሃሳም ዎይካሞ ሃሳ ጉልን ኤና ዎድሞናም ሃግስምናኖ። ¹³ ኮዶን ዳኣኖን ባኻንቴ ኤናም ሃግስማን ዋዳንካ ኤና ኩፕናቤ፣ ኤና ዛራንሳ ጆግናቤ፣ ኤላናቤ፣ ኤና ኣፕን ካያናቤም ግስምማ፤ ያኻሞ ፑጋዻዳና ሃዳይ። ¹⁴ ኦጎኖኻሞ ኤና እግና ሃናንቴ ኢን ባዛን ማሳዻን ኬቻልሞንታኻ፣ ኤና ጋዛናሳ ዴምጲንባራ ኬዻጳን ዋዳንካ፣ ሃናንቴ ኢን ባዛናም ማሳና ማሳዻይ።” ¹⁵ ኤና ኢየሱስ ማላ ክንካ እꬅማናንቴ ዳርቃዳና ግዶርካ ኤዲ ካላ ኣጋም ይኤሳራና ክግያ “ኤያ ባርያ ማንግስትሮጎ እꬅማናንቴ ዳርቃያ ፑጋዻዳና”ና ክያማዶ።

¹⁶ ኢየሱስካሞ ክናንቴ ይንታና ክያማዶ፦ “ኤዲ ካላ ግስሞ ጌጲ ኣሽካንቴ ኤዲ ጱፅ ግስምዲና፤ ¹⁷ ግስሞን ሳኣትኖ ኮዬስኳዃ ቾቺና ግስንዻዳናናንቴ ‘ዬር ፓይላ ውልም ኣሽክሚና፤ ንማቴ’ ሃማንቴ ክግስሜኻ ካይስታ ይሳም ኬዛራ ይእስዲና።

¹⁸ “ኮዶን ኬ ፓይላ ውል ሽዻናንቴ ዬር ይንቲ ጌያን ካርስዲና፤ ዋ ክግያ፣ ‘ታ ኣኻራ ሃሚ እሻናዶንታኻ ቃልቴ እሼዴ፤ እዛራ ሃዻጋስናኖ እንታ ዬስክማሞ’ ሃምዲና።

¹⁹ “ዋኻሞ ክግያ፣ ‘ዋኪ ሃሚ ፓኻያ ታጲ እንታ ሻንዲና፤ ኬም እርርሶታ እያኣይንታኻ፤ እዛራ ሃዻጋስናኖ እንታ ዬስክማሞ’ ሃማንቴ ጌይዲና።

²⁰ “ዋኻሞ ክግያ ‘እንታ ኣኻራ ኡታ እዶንታኻ፣ ናኣናንቴ እንታ ቻልማሞ’ ና ክያማዶ።

²¹ “ካይስታኻሞ ማታቴ ናዴ ኦጎም ይሳ ጌጳናንቴ ጌይዲና። ዋዳ ኣጋኻ ኦኖንሳ ጌጳ ዋጭማንቴ ካይስታግያ፣ ‘ይሪካ ካታማንሳ ጎይና ጌጲናቤ ሾሊናቤዛራ ዪማ፤ ኤና ኩፕናቤ፣ ኤና ዛራንሳ ኣርስናቤ፣ ኤና ኣፕን ካያናቤ፣ ኤላናቤም ኦራ ኣርስማ’ ና ክያማዶ።

²² “ኤያ ካይስታኻሞ ክግያ፣ ‘እሳ ጌጳ፤ ዬራ ሃጌያዳና ፓይላ ሃምሚዲና፤ ፕርካሞ ራቅ ሽዻዳ ዳይዲና’ ሃማንቴ ጌይዲና።

²³ “ጌጳኻሞ ካይስታግያ ‘ጎይና ካታማን ጋይናዛራቤ ጎይና ካታማንሳ ቡዶሮ ዳናዛራ ውትማ፤ ኦኖኖ እሳ ኮፆፄኻናንቴ ኤና ሃያፓይናም ፓይላ ኣንስቴ ናዴ ኣርስማ፤ ²⁴ ዬናንቴ ጌያና እጌያይ፤ ኤና እግና ግስንዻዳና ግዶርካ ኤዲ ካላኻሞ ግስሞን እሳም እꬅማሞ’ ና ክያማዶ። ²⁵ ዛርስኖ ጱፅኖ ክላማ ክንካ ይቴ ኮዳዃ፣ ኢየሱስ ኬዛራ ማታንቴ ኬግያ ይንታና ክያማዶ፦ ²⁶ “ኤና እዛራ ናኣይና ፓይላ እምባቤ እንዳንቤም፣ ሜን ይሳቤ ናና ይሳቤም፣ እንዳን ናና ኣንዛናቤ እንዳን ናና ኣንጌናቤም ሃያንቴ ይሳ ሳዳንምካሞ ካውል ይጋራድምና፣ ኖ እሳ ታማሪ ዳናንቴ ቻልማሞ፤ ²⁷ ኤያ ይሳ መስቀልን ባስክሳንቴ ኢም ጫጋድማ ኣጋ ኖ እሳ ታማሪ ዳናንቴ ቻልማሞ።

²⁸ “ዬግዶርካ ኤዲ ካላ ኦኖን ኣሽካናንቴ ይዛግና፣ ኣሽካቴ ይቱንሳያቤ ይቱስማቤም ብራቴንካ ዳርቃንቴ ኦኖን ኣሽካን ዋጋን ቃብማ ሃውቴ? ²⁹ ኦኖን ኣሽካን ካርሳንቴ ቱንሳን ይባሻዻዳና፣ ኤና ሃፓይና ፓይላ ኪም ኦልታና ኬኦልታይ፤ ³⁰ ኬ ‘ኤያ ካ ኦኖ ኣሽካ ካርስዲና፤ ኮዶን ቱንሳኖ ኪም ባሸዲና’ ና ኬያማይ።

³¹ “ዎይካሞ ኤዲ ቢቲ ካላ ቢቲ ኣብም ማላ ኪም ኡካናንቴ ይዻጲና፣ ቢታ ዋ ባንቆን ኤና ሺህ ታጲን ይንሳ ይዳ፣ ብታ ዋ ባንቆን ኤና ሺህ ላማታም ኣንሳቴ ናኣያም፣ ይባሻንቤ ይባሽሞንቤም፣ ብራቴንካ ዳርቃንቴ ብታ ኦሽማ ሃውቴ? ³² ዳማን ይባሻዻዳና ብታ ዋ ኣኻራ ፔጌ ክዳዃ፣ ኣፖን ኤናም ይእሳንቴ ቃሺና ክኦይሳይ፤ ³³ ኣጋንታ፣ ዬግዶርካ ሃውካሞ ዬራ ዳናም ፓይላ ጋርማ፣ እሳ ታማሪ ዳናንቴ ቻልማሞ።

³⁴ “ሶቆ ባሺና፤ ሶቆ ይሳ ዳፃሞን ኮካይስና፣ ሃስ ሶቆ ማታንቴ ዳፃዻን ክቻሌ? ³⁵ ፔንናንቴቤ ዬር ፔን ሽትሻያ ኣሽካናንቴ ኮኣግሞንታኻ፣ ቡዶንዛራ ዻባና ዻባዻይ። ናንሲ ‘ኤያ ቃሞን ኤሳራን ካዳ ክኤሳሬ።”