15

¹ ሮሮ ካላ ኤና ግብርን ፑኡሻይናቤ፣ ሴሶን ኤናቤ ፓይላ ኢየሱስ ክጌያይን ኤሳራናንቴ ክካላ ፑጭዲና። ² ኤና ፈረስ ኤናቤ ኤና ሙሴ ዳምብን ታማርሳይናቤ፣ “ኤያ ካ ሴሶን ኤናም ናሻናክናሻይ ኬላማኻሞ ክንካ እꬅማና ክእꬅማይ” ሃማንቴ ጉንድምዲና።

³ ኢየሱስካሞ ይንታ ሃማንቴና ኬናንቴ ዻይሳ ካም ክጌያዶ፦ ⁴ “ዬሳ ባክሮ ኤዲ ካላሳ እያት መቶ ካላ ኮዳና፣ ኬግዶርካሞ ካላ ክካያዳና፣ ሳልታም ሳልናም ጳልሮጎ ጋራንቴ ካያዳም ዛጋቴ ይሳ ሃፓዛራ ይማ ሃውቴ? ⁵ ይያፕና ካሎን ዋዝንዻንቴ ይሳ ካፓናሮ ዎዳንቴ፤ ⁶ ይሳ ኦኖንዛራ ማታቴ ናኣና ክናኣይ፤ ይሳ ሃርያናቤ ጉሊን ኤናቤም ክዛራ ግስማንቴ ኬግያ፣ ‘እሳ እያታ ካያዳም እንታ ሃፕዲና፤ እላማ ክንካ ዋዝንዽማቴ’ ና ክያማይ። ⁷ ዬናንቴ ጌያና እጌያይ፤ ኣጋግያ ኤና ጋዛና ሴሶንባራኻ ማታን ይዛግስምና ሳልታም ሳልናኻ ዋዝንዻዻንሳ ኦባራ ባርያዛራ ማታያ ሴሶን ኤያኻ ሃማንቴ ጳ ፖላሮ ዋዛ ጌጲና ኮዳይ። ⁸ “ዎይካሞ ሜ ካላ ሽልንጊ ታጲ ይንሳን ዶኖ፣ ታጲና ግዶርካ ካላ ክካይና፣ ይሳ ሃፓዛራ ኦኖሮ ኖንኒም ኣሳንቴ ኦኖን ሳንቴ ሃፓናንቴ ካሎን ዛግሞኖ ኤስኖ ና ሃውቴ? ⁹ ይያፓን ዋዳንካኻሞ ይሳ ሃሪያናቤ ጉልን ኤናቤም ክዛራ ግስማንቴ ኬግያ፣ ‘እሳ ሽልንጋ ካያዳም እንታ ሃፕዲና እላማ ክንካ ዋዝንዽማቴ’ ና ኮያማይ። ¹⁰ ዬናንቴ ጌያና እጌያይ፤ ኣጋግያ ሴሶ ኤድ ካላ ባርያዛራ ክማትና ባርያሳ ኤርጎን ኤናሳ ዎትሮጎ ዋዛና ክዳይ። ¹¹ ሃያንቴኻሞ ኢየሱስ ኬግያ ይንታና ክያማዶ፦ “ኤዲ ካላሳ ናሶ ላማ ዳይዲና። ¹² ኬግዶርካሞ ናሳ ሾላ እምባግያ፣ ‘ኣባ፣ ኮይና ሃሳ ግዶርካ እናንቴ ዬስካይናም እናንቴ እማ’ ና ክያማዶ፤ እምባኻሞ ኬናንቴ ኮይና ይሳም ካሽዲና።

¹³ “ሮሮ ጱፅ ካፕማ፣ ናሳ ሾላ ኮይና ይና ፓይላ ውልም ባኣንቴ ፔ ፔጌዛራ ያእዲና፤ ኦጎታርካሞ ኮይናኻ ኣልማቴ ቱንስዲና። ¹⁴ ኮይናም ፓይላ ኣልማቴ ክቱንሳዃ፣ ፔን ኦጎሮ ዳቆ ጌጲ ኣርድዲና፤ ኖኻሞ ጋሊዲና። ¹⁵ ኣጋታኻ ኖ ፔን ኦጎ ኤዲ ካላዛራ ኣርድዲና፤ ኤያኻሞ ጉቱምና ክሳም ክግሼኻናንቴ ግሽሞንዛራ ኪም ይእስዲና። ¹⁶ ጉቱምናሳ እꬃዻይንም ቱፖን እꬃናንቴ ኣጝርዽቴና ክዶ፤ ኮዶን ኦጎምካሞ ኤዲ ክናንቴ እማያ ቆልማሞ።

¹⁷ “ኮዶን ዎይላም ይጶቃና ይንታና ክያማዶ፦ ‘ኣባሳ ዋድማን ኤናሳ ዳኣኖ ሃማግያ ኬዳ ኮሽዻዴ፤ ኮዶን እንታ ኮታር ዳቆንካ ጃናንቴና እዶ! ¹⁸ ታ ዻጳንቴ ኣባዛራ ቃልቴ፣ ክግያ ይንታ እያማይ፦ “ኣባዮ፤ ፖላሮ ባርያሳ ዎትሮ ፔሮኻሞ ሃሳ ዎትሮጎ እንታ ሴሶ ኣሽክዲና፤ ¹⁹ ካሃ ካርሳንቴ ሃሳ ናሶ ሃማንቴ ግስዼኻናንቴ እንታ ዛግስማሞ፤ ሃሳ ዋድማን ኤናሳ ካላግያ ኢም ሼድማ’ ና እያማይ። ²⁰ ሃያንቴ ኖ ዻጳንቴ እምባዛራ ያእዲና። ኮዶን ኣኻራ ፔጌ ክዳዃ፣ እምባ ኪም ሃፓንቴ ክናንቴ ቡርቃዽዲና፤ ክዛራኻሞ ጎባኻ ናዴ ዬዳንቴ ሱንቅዲና።

²¹ “ናሳኻሞ ክግያ፣ ‘ኣባዮ፤ፖላሮ ባርያሳ ዎትሮ ፔሮኻሞ ሃሳ ዎትሮጎ እንታ ሴሶ ኣሽክዲና፤ ናንሲ ካሃ ካርሳንቴ ሃሳ ናሶ ሃማንቴ ግስዼኻናንቴ እንታ ዛግስማሞ’ ና ክያማዶ።

²² “ኮዶን እምባ ይሳ ዋድማን ኤናግያ ይንታና ክያማዶ፦ ‘ይሪካ ኣፓላና ግዶርካ ኣፓላ ባሺ ባኣቴ ናዴ ኪም ኣርስስማቴ፤ ክሳ ኣኒሮኻሞ ጋዉ ኮጝማቴ፤ ራሮ ክሳኻሞ ዱጙሪ ኣርስስማቴ ²³ ዋኻ ዱርፓምካሞ ጉቻቴ ናዴ ማችማቴ፤ እꬅቴ፤ ዎዋዝንዼ፤ ²⁴ እሳ ናሳ ካ ጃይዲና፣ ኮዶን ታ ሳዳን ካና ክዶ፤ ኖ ካይቴ ዻብዲና፣ ኮዶን ታ ሃፓዽዲና።” ሃያንቴኻሞ ኬ ዋዝንዻን ካርስዲና።

²⁵ “ዋዳ ኦጋኻ ናሳ ጌጳ ሃሚሮና ክዶ፤ ሃያንቴኻሞ ኦኖንዛራ ማታቴ ፄዲ ክናኣና፣ ሙራ ፑጋዽካቤ ዋርሳ ክርባዽካቤና ክኤሳራዶ፤ ²⁶ ኖኻሞ ዋድማን ኤናሳ ካላም ግስማንቴ ኮኖ ና ሃርቴ እኤሳራይኖ ሃማንቴ ክካላ ኦይስዲና። ²⁷ ዋድማን ኤያኻሞ፣ ‘ሃንና ናሳ ፃሊንካ ማታቴ ክናኣዶንታኻ ሃምባ ዋኪ ዱርፒ ክናንቴ ማችዲና’ ና ክያማዶ።

²⁸ “እንዳን ናሳ ጌጳኻሞ ዋጭምዲና፤ኦኖንዛራኻሞ ኣርዳናንቴ ዛጋድማሞ፤ እምባኻሞ ጳልንዛራ ውታንቴ ክኣርዴኻናንቴ ኪም ምስክዲና። ²⁹ ኮዶን ኖ ማሳንቴ እምባግያ ይንታና ክያማዶ፦ ‘እንታ ቦንና ክናሳ ኢር ሃናንቴ ካይስግያ ዋድምዲና፤ኢም ሃኤርጋዳና ኤርጎና ግዶርካ ካላምካሞ እንታ ጋራድማሞ፤ ኮዶን እሳ ሃያሪያና ማላ ክንካ እዋዝንዼኻናንቴ እናንቴ እንቃሶ ናሶ ዳናኻሞ እማድማሞ፤ ³⁰ ኮዶን ናሳ ሃሳ ካ ኮይና ሃሳኻ ኤና ቡሎና ላማ ኣልማቴ ቱንሳንቴ ክንና፣ ዋኻ ዱርፓምና ክናንቴ ሃማቻዶ’ና ክያማዶ።

³¹ “እምባኻሞ ክግያ ይንታና ክያማዶ፦ ‘ናሳ እሳ፣ ያ ሮሮ ውል እላማ ክንካና ሃዶ፤ ኮይና እና ፓይላ ውል ሃንቲና፤ ³² ኮዶን ሃንና ናሳ ካ ጃይዲና፣ ኮዶን ታ ሳዳኻ ማትዲና፤ ኖ ካይቴ ዻብዲና፣ ታ ሃፓዽዲና፤ ኣጋታኻ ዋዝንዽቴ ዎእꬄ፣ ዎውጬ።’”