16

¹ ኢየሱስ ይሳ ታማርናግያ ይንታና ክያማዶ፦ “ኤዲ ዎዲሞ ካላ ኮይና ክሳም ክማንኬኻናንቴ ኮይና ይሳዛራ ኤዲ ክጌጵሳዳ ካላ ዳይዲና፤ ኤያ ክጌጵሳዳ ኣጋኻሞ ኤያ ዎድንታሳ ኮይናኻ ክኣልማይንም ክናንቴ ኣፖ ዬስክዲና። ² ኣጋታኻ ኤያ ዎድንታ ኪም ግስንሳንቴ፣ ‘ኮኖ ሃሳ እኤሳራይኖ ሃርቴ? ካሃ ካርሳንቴ ያ ኮይና እሳም ማንካናንቴ ሃቻልሞንታኻ፣ ኮይና እሳም ፓይላ እናንቴ እምማ’ ና ክያማዶ።

³ “ኤያ ኮይናም ማንካያ ይሳ ዎይላምካ ይንታና ክያማዶ፦ ‘ጌጳ እሳ ኢም ጌጳሞሮኻ ኦይታናንቴና ክዶ፤ ፓክማያ እሳ ካንታ ቆልማሞ፤ ሃያንቴኻሞ ምስክማናንቴ ቦክንዻና እቦክንዻይ፤ ኣጋታኻ ሃር እያዬ? ⁴ ኢም እሳ ጌጳሞሮኻ ኦይታዻዳና ኤና ይሳ ኦኖናዛራ ኢም ኬኣርሴኻናንቴ ዬራ እየያያም እንታ ዼስዲና።’

⁵ ኣጋታኻ ኤያ ክሳ ጌጳሳ ኤና ይንዛራን ባዛን ይዳናም ፓይላ ግስምዲና፤ ኤያ ብራስግያኻሞ ‘ጌጳሳ ባዛና ሃዛራን ዳና ሜምቴ?’ ና ክያማዶ።

⁶ ኖኻሞ ‘እዛራን ዳና ዛይቲ ዳጋንት መቶ ካላና’ ና ክያማዶ። ኤያ ኮይናም ማንካያኻሞ ክግያ ‘ዋርቃታ ይንካ ሃኣርዳዳም ችማ፤ይሪካ “ዳ ዶጝታም” ሃማንቴ ኡኩማ’ ና ክያማዶ።

⁷ ሃያንቴኻሞ ዋግያ ‘ሃዛራ ሜሚቴ ዳና?’ ና ክያማዶ። ኖኻሞ ክግያ ‘እዛራ ናሙቹሌ ሶርብ ዶጝታምና ዳና’ ና ክያማዶ። ኤያ ኮይናም ማንካያኻሞ ክግያ፣ ‘ዋርቃታ ሃሳ ብድሪ ጋንታም ቻንቴ፤ “ ኦይዲታም” ሃማንቴ ኡኩማ’ ና ክያማዶ።

⁸ ክሳ ጌጳኻሞ ኤያ ኮይናም ማንካያ ማልታ ኣጋሳ ማልታሞንም ዬርሽዲና፤ ኤና ፔን ኮ ናና ኤና ይም ታኻይና ማላ ክንካ ዴንታን ይሳ ዶንካ ናና ሮሮን ጋይና ካላንካ ማልቲና። ⁹ ኣጋታኻ ዬናንቴ ጌያና እጌያይ፣ ኮይና ፔን ኮ ጋይና ኬማቃን ዋዳንካ ኦኖን ላይን ዳዻይንዛራ ዬም ቻዼኻናንቴ፣ ኮይና ክናኻ ዬናንቴ ዬሳ ሃርያናም ፑኡሽማቴ።

¹⁰ “ኤያ ዬር ሾልካ ጋዛን ዳያ ዬር ጌጲካኻሞ ጋዛ ዳና ክዳይ፤ ኤያ ዬር ሾልካ ጋዛን ዳድማ ዬር ጌጲካኻሞ ጋዛ ዳማሞ። ¹¹ ታ ናንሲ ኮይሶን ፔን ኮ ጋንካ ጋዛ ዬዳድምና፣ ኮይሶን ጎንዼንም ሃውቴ ዬዛራ ኤልቅማያ? ¹² ኤና ኣብና ኮይሶንካ ጋዛ ዬዳድምና፣ ኮይና ዬናም ሃውቴ ዬናንቴ እማያ?

¹³ ካላኻ ኤዲ ጌጲ ላማናንቴ ካይሲ ዳንቴ ዋድማ ኣሽካናንቴ ቻላያ ኤዲ ካላኻሞ ቆልማሞ፤ ካላም ይቶዛዽና ዋም ናሻና ክናሻይ ዎይካሞ ዋም ይጎብና ዋም ቦዋና ክቦዋይ። ባርያናንቴቤ ብሬናንቴቤ ካላኻ ካይሲ ዳናንቴ ዬቲ ቻልማሞ።

¹⁴ ብሬን ናሻይና ፈረስ ኤና እግና ኦጎም ፓይላ ኤሳራንቴ ኢየሱስዛራ ሃንጭዲና። ¹⁵ ኖኻሞ ኬግያ ይንታና ክያማዶ፦ “ዬቲ ኤናሳ ዎትሮጎ ዬም ጋዛን ሃያይናና፤ ኮዶን ባርያ ዬሳ ዎይላምን ዼስዲና፤ ዬራ ኤናሳ ዎትሮ ጎሻዻዳና ባርያሳ ዎትሮጎ ቦውሚና ኬዳይ።

¹⁶ ዳምብንቤ ኤና ባርያሳ ኣፖን ጌያይናሳ ዼላቅንቤም ላይ ዮሃንስዛራ ጌይቴ ዳዽዲና፤ሃያንቴኻሞ ባርያ ማንግስትንሳ ሜርሜርን ፃሊን ጌይዽዲና፤ ኤናኻሞ ፓይላ ኦጎዛራ ኣርዳናንቴ ማይሽምቴና ኬዶ። ¹⁷ ኮዶን ዳምብሮኻ ዬር ሾሊ ኡካዻዳ ካላ ኣሽካዽማ ክሽዻንናንቴ ፖላንቤ ፔንቤ ኮካያይኖ ባዶና።

¹⁸ “ኤያ ሜን ይሳም ቡላንቴ ሜ ኣብ ኬማያ ኣጋ ኩጳሞና ክያኣይ፤ ኤያ ኤስን ኣንጋ ካላንካ ውታዶንም ኬማያ ኣጋኻሞ ኩጳሞና ክያኣይ። ¹⁹ ሃያንቴኻሞ ኢየሱስ ይንታና ክያማዶ፦ “ኣፓላን ዋችንቤ ኣፓላን ፃሊንቤም ኣርሳያ ዬር ውል ይንካላ ይፆፃዃ ዋዛንካ ዳ ኤዲ ዎድሞ ካላ ዳይዲና። ²⁰ ፕርካሞ ኤዲ ካላ ብሽንሳ ሃጅምን ጉራ ኩፓስ ኣልኣዛር ሃንዻያ ኤያ ዎድንታ ኣጋሳ ሻንሮ ዎዽቴና ክዶ፤ ²¹ ኖኻሞ ኤያ ዎድንታ ዳኣኖን ክእꬅና ክሳ ኣንሮኻ ፓላሞና ድናይናም እꬃናንቴና ክኣጝርዻይ፤ ቃስክናኻሞ ናዴ ሃጅምን ክሳም ዻጵቴና ኬዶ።

²² ኤያ ኩፓ ኣጋ ጃይዲና፤ ባርያሳ ኤርጎን ኤናኻሞ ናዴ ኪም ኣብርሃምሳ ዴሞዛራ ኣንሳቴ ያእዲና። ሃያንቴ ኤያ ዎድንታኻሞ ክጃዃ ዱካዽዲና። ²³ ኖ ሲኦሊሮ ጋሊቴ ዳንቴ ካች ሃማንቴ ኣብርሃምምቤ ክሳ ዴሞሮን ዳም ኣልኣዛርም ሃፕዲና። ²⁴ ኖኻሞ፣ ‘ኣባ ኣብርሃም፣ ባንዞ እናንቴ ቡርቃዽማ፤ ኮታር ኖን ሮጳን ኮኻ ጋሊቴ እዶንታኻ፣ ኣልኣዛር ይሳ ኣንሳ ብራም ኑንቆሮ ኣርሳንቴ ናዴ እሳ ኣታጲም ክቃጅሼኻናንቴ እናንቴ ንእስማ’ ሃንቴ እላትዲና።

²⁵ ኮዶን ኣብርሃም ክግያ ይንታና ክያማዶ፦ ‘ናሳ እሳ፣ ያ ኣና ሳዳንካ ፔሮጎ ሃዶን ዬርን ፃልን ሃያፓዳ፣ ኣጋግያ ኣልኣዛርካሞ ዬር ዛርቦ ክያፓዶንም ጶቅስማ፤ ኮዶን ታ ኖ ኮታ ክዋዝንዽና፣ ያ ጋሊቴና ሃዶ። ²⁶ ኮ ውልሳ ጳባራ ኤና ኮታርካ ዬዛራ ሳጋን ኬጋሬኻናንቴቤ፤ ሳ ሃኻላን ዳናኻሞ ዎዛራ ሳጋን ኬጋሬኻናንቴ ዎቤ ዬቤሳ ባክሮጎ ዴሎ ጌጲ ዎዳዽዲና።

²⁷ “ኖኻሞ ይንታና ክያማዶ፦ ‘ኣባ፣ ኦጎንታ ዳና፤ኣልኣዛርም ኣባ ኦኖንዛራ ሃይእሴኻናንቴ እንታ ሃም ምስክዲና። ²⁸ እሳ እንዳን ናና ዶጝና ዳይዲና፤ ኬኻሞ ጋሎን ራቅን ኮዛራ ናኣን ኬጋሬኻናንቴ ኬናንቴ ክጌዬ።

²⁹ “ኮዶን ኣብርሃም ክግያ ይጌይና፣ ‘ሙሴቤ ኤና ባርያሳ ኣፖን ጌያይናቤ ኬሳ ዳይዲና፣ ኬም ኬኤሳሬ’ ና ክያማዶ።

³⁰ ኤያ ዎድንታኻሞ ክግያ፣ ‘ኣባ ኣብርሃም ኦጎንታ ትማሞ፤ ኤዲ ካላ ዴምጲንባራ ዻጳንቴ ኬናንቴ ክይና ባርያዛራ ማታና ኬማታይ’ ና ክያማዶ።

³¹ ኣብርሃምካሞ ሙሴቤ ኤና ባርያሳ ኣፖን ጌያይናቤም ኬኤሳራድምና፣ ኤዲ ካላ ዴምጲንባራኻ ክዻጳዳናኻሞ ኬ ኣምንማሞ’ ና ክያማዶ።