17

¹ ኢየሱስ ይሳ ታማርናግያ ይንታና ክያማዶ፦ “ኤናም ዬር ጎይ ጋዳዛራ ይእሳያ ኮሳ ናኣኖ ሽዽማሞ፤ ኮዶን ኤናም ጎይን ጋዳንዛራ ይእሳን ዬርን ባኣያ ኤያ ኣጋናንቴ ሃይ። ² ኤያ ኣጋ ናና ካናና ክናሳ ካላም ጎይ ጋዳዛራ ክይእሳንናንቴ፣ ሱኒ ዴስማያ ክሳ ቆርጭሮ ዻኻንቴ ኛፓስሮጎ ዻባዽና ክናንቴ ባሺና። ³ ኣጋታኻ ዬም ማንክማቴ። “ሃምባ ናሳ ክሴሳዳና ኪም ጎሪማ፤ እንታ ዻቢና ክያማዳና ሴሶን ክሳም ክናንቴ ጋርማ። ⁴ ሮራሳ ኢሮ ኢ ꬆጳግያ ሃም ክሴሳዳና፣ ‘እንታ ዻቢና’ ሃማንቴ ኢ ꬆጳ ሃዛራ ክማትና ሴሶን ክሳም ክናንቴ ጋርማ።

⁵ ኤና ይእሳዻዳናኻሞ ጌጳግያ፣ “ዎናንቴ እምነትን ሻብማ” ና ኬያማዶ።

⁶ ጌጳኻሞ፣ “ዬናንቴ ኮልፒ ኣፕግያ ዳናኻሞ እኒ እምነት ሾሊ ኮዳና፣ ሻፖን ሃቃስካግያ፣ ‘ካሮኻ ቡጭማንቴ ቃልቴ ኛፓስንሳ ግዶሮ ዎይማ’ ዬያምና ዬናንቴ ኤሳራና ክኤሳራይ” ና ክያማዶ።

⁷ ሃያንቴኻሞ ኢየሱስ ይንታና ክያማዶ፦ “ዬሳ ባክሮጎ ኤዲ ካላሳ ሃሚ ፓኻያ ዋድማ ኤድ ዎይካሞ ግሽሞ ኤዲ ኮዳና፣ ኖ ዋድማንባራኻ ክሳ ናኣ ክግያ፣ ‘ይሪካ ዳኣኖንዛራ ንማ’ ሃማው ክያማይ? ⁸ ኦጎንታ ይያማንናንቴ ክግያ፣ ‘ብራቴንካ እባንን ዳኣኖን እእꬄኻናንቴ እናንቴ ባክማ፤ እሳ እꬅማቴቤ እሳ ውጫቴቤ ቱንሳዛራ ያ ዋቻዻንቴ እናንቴ ዋድምማ፤ ሃያንቴ ያኻሞ እꬃናሃእꬃይ፤ ውጭናሃውጫይ’ ሃማይዬው? ⁹ ታ ናንሲ ኤያ ካ፣ ዋድማን ኤያ ክናንቴ ክኤሳራዶንታኻ ኪም ማሳቴ ጎሻው ክጎሻይ? ¹⁰ ኣጋታኻ ዬትካሞ ዬራ ዬናንቴ ጌይዻዳናም ፓያላ ዬዋድምና፣ ‘ዎቲ ዋድማን ኤና ፓይዶን ቆልምናና፤ ዬራ ዎባራንካ ዎዋድሜኻናንቴ ዛግሳይናም ዎቲ ኣሽክዲና’ ሃምማቴ።” ¹¹ ኣጋሳ ራስባራ ኢየሱስ ዬሩሳሌም ዛራ ይቴ፣ ሰማርያቤ ገሊላቤሳ ባክንካ ሳጋንቴ ያእዲና፤ ¹² ሞሮ ካላዛራኻሞ ይኣርዳና ኤና ሙልካምባን ዬድንዻዳና ታጲና ኪም ሃፕዲና፤ ኬኻሞ ፔጌ ዎያንቴ፣ ¹³ ናቅሲ ይሳም ዼግ ሃያንቴ ክግያ፣ “ጌጳ ኢየሱስ፣ ዎናንቴ ቡርቃዽማ!” ና ኬያማዶ።

¹⁴ ኖኻሞ ኬም ይያፓና፣ “ቃልቴ ዬም ኤና አይሁድናሳ ዳምብን አሽካይናናንቴ ዻውማቴ” ና ክያማዶ። ኬኻሞ ጎይሮጎ ይቴ ዳንቴ ፓሽዲና።

¹⁵ ኬግዶርካሞ ዋ ይፓሻዶን ይያፓና ናቅሲ ይሳም ዼግ ሃያንቴ ባርያናንቴ ጎሺን እማዳቴ ኢየሱስዛራ ማትዲና፤ ¹⁶ ኢየሱስሳ ዎትሮ ኮምፓርሳንቴ ክናንቴ ጎሽን እምዲና፤ ኤያ ኣጋኻሞ ሰማርያ ፔን ኤዲና።

¹⁷ ኢየሱስካሞ ይንታ ሃማንቴና ክካላ ክኦይሳዶ፦ “ኤና ፓሻዳና ታጲ ጋኬ? ኤ ኤና ሳልና ሃሞንታ ኬያኣዴ? ¹⁸ ቶርስን ኤያ ካሳ ኦባራ ኤዲ ማታቴ ናዴ ባርያናንቴ ጎሺ እማያ ቆላይዬው?” ¹⁹ ኖ ኤያግያኻሞ “ዻጳንቴ ይማ፤ እምነትኖ ሃሳ ሃም ፓሽሽዲና” ና ክያማዶ። ²⁰ ኤና ፈረስ ኤና ኢየሱስም ባርያ ማንግስትኖ ሃ ኮኔኤ? ሃማንቴ ክካላ ኦይስዲና። ኖኻሞ ኬናንቴ ይንታ ሃማንቴ ማስዲና፦“ባርያ ማንግስትኖ ዬር ሃፓዻያኻ ንማሞ፤ ²¹ ኤናኻሞ ኮግያ፣ ‘ና ኮታሪና’ ዎይካሞ ‘ኦ ኦጎታሪና ኮዶ’ ሃማናንቴ ቻልማሞ፤ባርያሳ ማንግስትኖ ዬሳ ባክሮና ኮዶ።”

²² ኖ ይሳ ታማርናግያኻሞ ይንታና ክያማዶ፦ “እ ኤዲ ናሶሳ ሮሮና ግዶር ካላም ሃፓናንቴ ዬኣጝርዻን ዋዳኖ ናኣና ኮናይ፤ ኮዶን ዬቲ ሃፕማሞ። ²³ ኤዲኖኻሞ ዬግያ፣ ‘ኦ ኦጎታሪና’ ዎይካሞ ‘ኮታሪና ክዶ’ ሃማና ኬያማይ፤ ኮዶን ኬም ጫጋቴ ዬይናኖ፤ ²⁴ ኦጎኖኻሞ ጳልቃትኖ ጳልቃታንቴ ፖላንም ፓይላ ፓክ ኳያያግያ፣ ሮራ እንታ ኤዲ ናሶ ይንካ እናኣያ ጋላ ኦጎንታና ክዳይ። ²⁵ ኮዶን ኦጎኖ ኮሳ ሃምማሳ ብራር ኤዲ ናሶ ጋሎ ጱፅ ጋልንቶቤ ኤድን ታን ጋይን ኮኻላ ክቦውዼኻናንቴ ዛግሳና ክዛግሳይ።

²⁶ “ኣና ኖህ ዋዳንካ ይያማዳግያ፣ ኤዲ ናሶ ዋዳንካኻሞ ኦጎንታ ዳና ኮዳይ፤ ²⁷ ኖሆ ጋግንዛራ ክኣርዳዳ ሮራ ክሳ ዬስካዛራ ኤና እꬅቴቤ፣ ውጭቴቤ፣ ኬምቴቤ፣ ኬማዽቴቤና ኬዶ፤ ካይሶን ኑንቆኖኻሞ ናዴ ፓይላ ውልም ካይስዲና።

²⁸ “ሎጥ ዋዳንካኻሞ ኣና ኦጎንታና፤ ኤና እስቴቤ ውጭቴቤ፣ ሻንቴቤ ሻንሽቴቤ፣ ሃቃንካሞ ኮርቴቤ ኦኖን ዻክቴቤና ኬዶ፤ ²⁹ ኮዶን ሎጥ ሶዶምባራ ክውታዳ ሮራ ጋላ ኖቤ ዲን ሃንዻያ ኮቃያቤ ዶቦግያ ፖላንባራኻ ዻንቴ ፓይላ ውልም ካይስዲና።

³⁰ “እንታ ኤዲ ናሶ እናኣን ዋዳንካኻሞ ኦጎንታና ኮዳይ። ³¹ ሮራ ኣጋኻ ኤያ ኦኖንስ ዱርሮን ዳ ኦኖንሳ ኢሮጎ ኮይና ዳናም ቻናንቴ ሃንቻን ክጋሬ፤ ሃያንቴኻሞ ኤያ ሃምሮን ዳኻሞ ይሳ ኦኖንዛራ ራስዛራ ማታን ክጋሬ። ³² ዬት ሎጥ ሜኒም ጶቅስማቴ። ³³ ኤና ሳዳን ይሳም ዳሳናንቴ ዛጋይና ፓይላ ሳዳን ይሳም ካይሳና ኬካይሳይ፤ ኮዶን ኤና ሳዳን ይሳም ሳስካንቴ እማይና እግና ሳዳን ይሳም ዳሳና ኬዳሳይ። ³⁴ እንታ ዬናንቴ ጌያና እጌያይ፤ ሶታ ኣጋኻ ኤዲ ላማ ዼጴ ካላ ግዶሪና ኬዎዻይ፤ ኤያ ዋም ቻና ቻዻይ፤ ዋ ሽዻና ክሽዻይ። ³⁵ ሜ ላማ ክንካ ዴስማና ኬዴስማይ፤ ኤስን ዋም ቻና ቻዻይ፤ ዋ ሽዻና ኮሽዻይ። ³⁶ ኤዲ ላማ ሃምን ክንካና ኬፓክማይ፤ ኤያ ዋም ቻና ቻዻይ፤ ዋ ሽዻና ክሽዻይ።”

³⁷ ኬኻሞ ክግያ ማሳንቴ፣ “ጌጳዮ፤ ኬም ኮሳ ቻዻኖ ሃሞዛራቴ?” ና ኬያማዶ። ኖኻሞ፣ “ዬር ጃዳ ይዳ ራቅ ግዶር ኩፆና ፑጫና ኬፑጫይ” ና ክያማዶ።