18

¹ ታማርና ክሳ ቃጆ ቆልማ ሮሮ ውል ኬምስኬኻ ኮዛግሳይንም ዻዋናንቴ ኢየሱስ ዻይንሳ ካም ኬናንቴ ጌይዲና፦ ኬግያ ይንታኻሞና ክያማዶ፦ ² “ካታማ ካላ ግዶር ባርያም ኩርትንዽማቤ ኤዲም ጎብማ ብቶ ታኻያ ኤዲ ካላ ዳይዲና። ³ ካታማስ ኣጋሮኻሞ ሜ ዳልሶ ካላ ዳይዲና፤ ናኻሞ ‘ቁፓሞን ኤያ እሳ ላማ እሳ ሃሳዋስ ዳናንቴ እናንቴ ብቶ ታክማ’ ሃማንቴ ላይና ክዛራ ኮያኣይ። ⁴ “ኤያ ብቶን ታኻያኻሞ ብራቴንካ ኮናንቴ ኤሳርድማሞ፤ ኮዶን ራስባራ ይሳ ዎይላምካ ይንታና ክያማዶ፦ ‘እንታ ባርያም እኩርትንዽምናኻሞ፣ ኤዲም እጎብምናኻሞ፤ ⁵ ኤስኖ ዳልሶኖ ኮኖ ሮሮ ውል ናዴ ኢም ጋልንሻን ኮጋሬኻናንቴ ኮናንቴ ብቶን ታኻና እታኻይ፤ ኮናንቴ ብቶን እታኻድምና ሮሮ ውል ናዴ ኢም ቃጅሻናኮቃጅሻይ።”

⁶ ጌጳኻሞ ይንታና ክያማዶ፦ “ኤያ ብቶን ልክን ታክማሳ ጌይዻዳም ኤሳርማቴ። ⁷ ኤ ባርያ ሮሮንቤ ሶትንቤ ክዛራ እላታይና ኤና ይሳ ካምድናናንቴ ብቶን ታኻይዬው? ኤሳራንቴኻሞ ኤሳርድማግያ ላይ ጫክ ክዳይ? ⁸ ዬናንቴ ጌያና እጌያይ፤ ብቶን ታኻናክታኻይ ኣጋንታ ይሪካ ኬናንቴ ብቶን ታኻና ክታኻይ፤ ኮዶን እንታ ኤዲ ናሶ እናኣን ዋዳንካ ፔሮጎ ኬዳ ኤዲ እምነትካ እንታ ሃፓው? ⁹ ኤና ይም ጋዛግያ ሃያንቴ ፓይዳንቴ ፖራዻይናቤ ኤና ዋኒም ቦዋይናቤናንቴ ዻይንሳ ካም ኢየሱስ ይንታ ሃማንቴ ጌይዲና፦ ¹⁰ “ኤዲ ላማ ዋኒ ባርዮን ኦኖን ምስኮታ ናእዲና፤ ካላ ፈረስ ኤና፣ ኤያ ዋ ግብር ፑኡሻያና። ¹¹ ኤያ ፋራሳዊኻሞ ፃክሪሚ ዎያንቴ ይናንቴ ይንታ ሃማንቴና ክምስካዶ፦ ‘ባርያዮ፤ እንታ ኤና ዋኒ ጋንታ ግያ ሰሪ ኤዲቤ፣ ጋኻ ኤዲቤ፣ ቡሎቤ፣ ሃያንቴኻሞ ኤያ ካ ግብርን ፑኡሻያግያኻሞ እትሞንታኻ ጎሽኖ ሃናንቴ ኮዴ፤ ¹² ሳምንታሳኻሞ ኢሮጎ ሮሮ ላማ ቶሮንዻንቴና እምስካይ፤ ዬራ እያፓይናሳ ታጲና ግዶርካኻሞ ካላም ሃናንቴ እማና እማይ።’

¹³ “ኮዶን ኤያ ግብርን ፑኡሻያ ፔጌ ዎያንቴ፣ ፖላንዛራ ሼዳን ጋራንቴ ዎቲ ይሳም ኣቻንቴ፤ ሃያንቴ ይሳ ሳዳም ጫእቴ ‘ባርያዮ፤ እ ሴሶን ኤያናንቴ ሴሶን እሳም እናንቴ ጋርማ’ ሃምቴና ክዶ።

¹⁴ “ዬናንቴ ጌያና እጌያይ፤ ፋራሳዊያ ካላንካ ኤያ ኣጋ ባርያሳ ዎትሮ ኤዲ ጋዛግያ ፓይዳዻዃ ይሳ ኦኖንዛራ ማትዲና፤ ኤና ዪም ዼግ ዼግ ሃያይና ፓይላ ቦዋዻናኬቦዋዻይ፤ ኮዶን ኤና ይም ዪርክ ዪርክ ሃያይና ዼጊና ኬዳይ።” ¹⁵ ኢየሱስ ናናናንቴ ክዻክሜኻናንቴ ኤዲኖ ናናም ክዛራ ባኣቴ ንቴና ኮዶ፤ ክሳ ታማርናኻሞ ኦጎም ይያፓና ኬም ጎርዲና። ¹⁶ ኮዶን ኢየሱስ ናናም ይዛራ ግስማንቴ ይንታና ክያማዶ፦ “ናናም እዛራ ኬኔኤኻናንቴ ጋርማቴ፣ ዬማርናኖ፤ ባርያሳ ማንግስትኖ ክናግያን ዳናናንቴና። ¹⁷ ዬናንቴ ጎንዼና እጌያይ፤ ኤና ባርያሳ ማንግስትን ናሶግያ ናሻንቴ ቻድምና ኮዛራ ካላኻሞ ኣርድማሞ። ¹⁸ ኤና ኣይሁድናሳ ጋርና ግዶር ካላ ክግያ፣ “ኣስታማራ ፃላዮ፤ ሳዳንካ ላይ ዳናንቴ ሃር እያዬኻ ኮዛግሴ?” ሃማንቴ ኦይስዲና።

¹⁹ ኢየሱስካሞ ይንታ ሃማንቴና ክናንቴ ክማሳዶ፦ “ሃርናንቴ እግያ ፃላስ ሃሜ? ባርያ ካላስሳ ኦባራ ኤዲ ካላኻሞ ፃሊ ቆልማሞ፤ ²⁰ ‘ኩጳሞ ሃይናኖ፣ ኤዲ ሃዴስናኖ፣ ሃድብምናኖ፣ ፖጋሞኻ ማኛሞ ሃዎይናኖ፣ ሃምባቤ ሃንናቤም ጎብማ’ ሃማይና ዳምብናም ያ ዼስዲና።”

²¹ ኤያኻሞ ክግያ፣ “እግናም እንታ እሳ ናሳሞሮኻ ካርሳንቴ ኣሽክቴና እዶ” ና ክያማዶ።

²² ኢየሱስካሞ እግናም ይኤሳራና ክግያ፣ “ታ ናንሲ ሃኻላ ዬር ካላ ሽዽዲና፤ ኮይና ሃሳ ዳናም ፓይላ ሻንሻቴ ብሬና ኬሳም ኤና ኩፕናናንቴ እምማ፤ ፖላሮጎ ኮይሶ ሃፓና ሃያፓይ፤ ሃያንቴ ናዴ ኢም ጫግማ” ና ክያማዶ።

²³ ኮዶን ኤያ ኣጋ ዬራ እግናም ይኤሳራና፣ ኮይሶ ክሳ ጱፅ ኮዶንታኻ እልል ጃይዲና። ²⁴ ኢየሱስካሞ ኤያም ሼዳንቴ ይንታና ክያማዶ፦ “ኤና ዎድሞናናንቴ ባርያ ማንግስትንዛራ ኣርድንቶኖ ካልሎን ዋቺና። ²⁵ ኤና ዎድሞና ባርያ ማንግስትን ኬኣርዳንናንቴ ጋማላ ማርፌሳ ፑላኻ ኮኣርዳይኖ ባዶና።”

²⁶ ኦጎም ኤና ኤሳርዳናኻሞ፣ “ታ ኦጎንታ ዳና፣ ሃውቴ ዻቃያ?” ና ኬያማዶ።

²⁷ ኢየሱስካሞ፣ “ኤዲ ናሶናንቴ ዬር ቻልምማ ባርያናንቴ ቻልማና ኮቻልማይ” ና ክያማዶ።

²⁸ ጴጥሮስካሞ ክግያ፣ “ዎቲ ዬራ ዎሳ ዳናም ፓይላ ጋራንቴ ሃም ጫግዲና” ና ክያማዶ።

²⁹ ኢየሱስካሞ ኬግያ ይንታና ክያማዶ፦ “ዬናንቴ ጎንዼና እጌያይ፤ ባርያ ማንግስትንናንቴ ሃማንቴ ኦኖን ይሳም ዎይካሞ ሜን ይሳም ዎይካሞ ይሳ እንዳን ናናም ዎይካሞ እምባቤ እንዳምቤም ዎይካሞ ናና ይሳም ጋራዳ፤ ³⁰ ዋዳን ኮኻ ዬር ጱፅ ሳጊቤ፣ ዋዳን ናኣይንካኻሞ ሳዳን ላይን ዳይንም ሃፓና ክያፓይ።” ³¹ ኢየሱስካሞ ይሳ ታማርና ታጲ ላማናም ዋና ቡላንቴ ኬግያ፦ “ታ ናንሲ ዬሩሳሌምዛራ ውታናንቴና ዎዶ፤ ኤና ባርያሳ ኣፖን ጌያይና እ ኤዲ ናሶሳ ዬራ ዋርቃትሮ ኬኡካዳና ፓይላ ሃምማና ኬያማይ። ³² ኢም ኤና ቶርስናናንቴ ሳስካንቴ እማና እንዻይ፤ ኬኻሞ ኢም ቦዋና ኬቦዋይ፤ ጋልንሻና ኬጋልንሻይ፤ ፓፅንካሞ እዛራ ማማና ኬማማይ፤ ኢም ዻና ኬዻይ፤ ሃያንቴኻሞ ኢም ዴሳና ኬዴሳይ። ³³ እንታኻሞ ሮራ ማክንሳኻ ዴምጲንባራኻ ዻጳናእዻጳይ” ና ክያማዶ።

³⁴ ኮዶን ክሳ ታማርና ዬራ እግና ፓይላ ግዶር ዬር ኬናንቴ ኣርዳዳ ካላኻሞ ቆልማሞ፤ ዬራ ክጌያዳና ኬኻላ ሽርሚና ኬዶ፤ ኖ ዬር ሃር ኬናንቴ ክጌያዶንም ኬ ዼሳድማሞ። ³⁵ ኢየሱስ ኢያሪኮዛራ ክሳንሳዶን ዋዳንካ፣ ኤዲ ኣፒ ካያ ካላ ጎይንሳ ዴሞሮ ዳርቃንቴ ምስክምቴና ክዶ። ³⁶ ኤያ ኣፕን ካያስካሞ ዛርስኖ ኦጎኻ ኮሳጋይንም ኤሳራንቴ ኬኻላ ዬር ሃር ኮዶንም ኦይስዲና። ³⁷ ኬኻሞ ክግያ፣ “ናዝሬት ጋንቴ ኢየሱስ ኮኻ ሳግቴና ክዶ” ሃማንቴ ጌይዲና።

³⁸ ኖኻሞ፣ “ዳዊት ናሳ ኢየሱስዮ፣ እናንቴ ቡርቃዽማ!” ሃማንቴ እላትዲና።

³⁹ ኤና ብራንቴ ይቴን ዳናኻሞ ጫክ ክያሜኻናንቴ ኪም ጎርዲና፤ ኮዶን ኖ፣ “ዳዊት ናሳዮ፤ እናንቴ ቡርቃዽማ!” ሃማንቴ ካልሎን እላትዲና።

⁴⁰ ኢየሱስካሞ ዎያንቴ ኤያም ክዛራ ኬኣንሴኻናንቴ ኤናናንቴ ጌይዲና፤ ክዛራኻሞ ክናኣዃ፤ ⁴¹ ኖ ክግያ “ሃር ሃናንቴ እያዬኻናንቴ ሃዛጌ?” ሃማንቴ ኦይስዲና። ኤያ ኣፕን ካያስካሞ፣ “ጌጳዮ፤ ሃፓናንቴና እዛጋይ” ና ክያማዶ።

⁴² ኢየሱስካሞ ክግያ፣ “ሼድማ፤ እምነትኖ ሃሳ ሃም ዻኣሽዲና” ና ክያማዶ። ⁴³ ኤያኻሞ ኣጋዛራ ሃፓን ቻልዲና፤ ባርያም ጎሻዳቴ ኢየሱስም ጫግዲና። ዛርስኖኻሞ ፓይላ ኦጎም ይያፓና ባርያናንቴ ጎሽን እምዲና።