19

¹ ኢየሱስ ኢያርኮዛራ ኣርዳንቴ ኦጎኻ ሳጋንቴ ይቴና ክዶ። ² ዘክዮስ ሃንዻያ ኤዲ ካላ ኦጎታር ዳይዲና፤ ኖ ኤና ግብርን ፑኡሻይናሳ ጋሪቤ ኤዲ ዎድሞቤና። ³ ኖኻሞ ኢየሱስ ሃንዻያ ሃማ ክዶንም ሃፓናንቴ ዛጋና ክዛጋይ፤ ኖ ኤዲ ፄዲ ይዶንታኻ ዛርስንስ ጱፃሞንካ ሃማንቴ ኪም ሃፓናንቴ ቻላድማሞ። ⁴ ኢየሱስካሞ ጎይን ኦጎኻ ሳግቴ ክዶንታኻ፣ ኪም ሃፓናንቴ ብራዛራ ጎብቴ ቃልቴ ሻፖ ካላም ውትዲና።

⁵ ኢየሱስካሞ ራቃ ኣጋም ይዬስካና፣ ዞን ኪም ሼዳንቴ፣ “ዘክዮስ ይሪካ ሃንችማ! ሃይታላ ኦኖን ሃኖሮጎ ሃቃናእያቃይ” ና ክያማዶ። ⁶ ኖኻሞ ይሪካ ሃንቻንቴ ዋዛኻ ኪም ቾችዲና።

⁷ ኤና ኦጎታር ዳናኻሞ ኦጎም ሃፓንቴ፣ “ሴሶን ኤያ ኦኖሮጎ ኣርዳንቴ ቾችንሻዻናንቴና ክዶ” ሃማንቴ ጉንድምዲና።

⁸ ኮዶን ዘክዮስ ዎያንቴ ጌጳግያ “ጌጳዮ፣ ኮይሶን እሳ ዶሮኻ ባኻላም ኤና ኩፕናናንቴ እማና እእማይ፤ ኤዲም ፖጋሞኻ እሳርዳናኻሞ፣ ኤያ ኣጋናንቴ ኦይዲግያ ሻባንቴ ማሳና እማሳይ” ና ክያማዶ።

⁹ ኢየሱስካሞ ክግያ ይንታና ክያማዶ፦ “ኤያ ካ ኣብርሃም ናሶ ክዶንታኻ፣ ሃይታላ ሳዳን ዻቆኖ ኦኖን ኮዛራ ናእዲና፤ ¹⁰ ኦጎኖኻሞ እንታ ኤዲ ናሶ ይንናንቴ እናዻዶኖ ኤና ካያዳናም ዛጋናንቴቤ ዻኣሻናንቴቤና። ¹¹ ዛርስኖኻሞ ኦጎም ኤሳርቴ ኬዳዃ፤ ኖ ዬሩሳሌምዛራ ክሳንስዶንታኻቤ ኤዲን ካላ ባርያሳ ማንግስትኖ ኮናኣዳግያ ኬማይሻዶንታኻ፣ ኖ ፕር ዻይንሶ ኣብ ኬናንቴ ጌይዲና፤ ¹² ይንታኻሞና ክያማዶ፦ “ኤዲ ጎሻዻዳ ካላ ብታሞን ቻንቴ ማታናንቴ ፔ ፔጌ ካላዛራ ያእዲና፤ ¹³ ይሳ ዋድማን ኤና ግዶርካኻሞ ታጲናም ግስማንቴ ምናን ¹ ሃንዻይና ብሬ ታጲ ኬናንቴ እማንቴ ኬግያ፣ ‘እሳ ማታቴ ናኣዛራ ይንካ ንግድማቴ’ ና ክያማዶ።

¹⁴ ክሳ ፔን ኤናኻሞ ኪም ይቶዛዻዶንታኻ፤ ‘ዎዛራ ክብትሜኻናንቴ ዎቲ ዛግማሞ’ ሃማንቴ ክሳ ራስባራ ኣፖ ክናንቴ ይእስዲና።

¹⁵ “ይያማንካሞ ኤያ ጎሻዻዳ ኤጋ ብቲ ማታንቴ ይሳ ፔንዛራ ማታቴ ናእዲና፤ ክሳ ዋድማን ኤናኻሞ ምናን ሃንዻይና ክእማዳናኻ ንግዳቴ ሜም ኬፑኒሳዶንም ዼሳናንቴ ኬም ግስንስዲና።

¹⁶ “ዋድማን ኤያ ብራስካሞ ናዴ ክግያ፣ ‘ጌጳዮ፣ ምናና እናንቴ ሃእማዳኻ ንግዳንቴ እንታ ምናን ታጲ ፑኒስዲና’ ና ክያማዶ።

¹⁷ “ክሳ ጌጳኻሞ ክግያ፣ ‘ያ ዋድማን ኤያ ጋዛስ፣ ፃሊና ሃያዶ፤ ዬራ ሾላኻ ሃጋዛዻዶንታኻ፣ ካታማ ታጲዛራ ሃናንቴ ጌጳሞ እንዽዲና’ ና ክያማዶ።

¹⁸ “ዋድማን ኤያ ላንሳኻሞ ናዴ ክግያ፣ ‘ጌጳዮ፤ ምናና እናንቴ ሃእማዳኻ ንግዳንቴ ምናን ዶጝ እንታ ፑኒስዲና’ ና ክያማዶ።

¹⁹ “ክሳ ጌጳኻሞ ክግያ ‘ሃናንቴኻሞ ካታማ ዶጝዛራ ጌጳሞ እንዽዲና’ ና ክያማዶ።

²⁰ “ዋድማን ኤያ ዋኻሞ ናዴ ክግያ ይንታና ክያማዶ፦ ‘ጌጳዮ፣ ሃሳ ምናና ኣፓላንካ ቱፓቴ እዎዳዳ ካሼ፤ ²¹ ያ ዬራ ሃዎዳድማም ቻያ፣ ሃጲያድሞንም ፓታያ ጋሮ ኤድ ሃዶንታኻ እንታ ሃም ኩርትንዽዲና።’

²² “ጌጳ ክሳኻሞ ክግያ ይንታና ክያማዶ፦ ‘ያ ዋድማን ኤያ ዛርባ! ኣፓ ሃጌያዳኻ ሃዛራ ብቶን ታኻና እታኻይ እንታ ዬራ እዎዳድማም ቻያ፣ እጲያድሞንምካሞ ፓታያ፣ ጋሮ ኤዲ እዶንም ሃዼሳዳና፤ ²³ እኒ ናዴ ምናና እሳም ኬፑናዳናኻ እቼኻናንቴ፣ ሃርናንቴ ኤና ይንካ ኣሽካይናናንቴ እማን ሃጋራዴ?’

²⁴ “ክሳ ጌጳኻሞ ኤና ኦጎታር ዎያንቴን ዳናግያ፣ ‘ምናናም ክካላንካ ቻንቴ ኤያ ምናን ታጲ ይንሳ ይዳናንቴ እምማቴ’ ና ክያማዶ።

²⁵ “ኬኻሞ ጌጳግያ ‘ጌጳዮ፣ ክካላ ምናን ታጲ ዳይዲና’ ና ኬያማዶ።

²⁶ “ኖኻሞ ይንታና ክያማዶ፦ ‘ዬናንቴ ጌያና እጌያይ፤ ኤያ ይንሳ ዳናንቴ ሻባና ሻባዻይ፤ ኮዶን ኤያ ይንሳ ቆልማሳ ዳምካሞ ክካላ ቻና ቻዻይ። ²⁷ ኮዶን እንታ ኬዛራ እብትሜኻናንቴ ኤና ዛጋድምና እሳ ጋላ እግናም ኦራ ኣንሳቴ ናዴ እሳ ዎትሮጎ ኬም ዴስማቴ።’ ” ²⁸ ኢየሱስ ኣጋም ጌያንቴ ናንሲ፣ ዬሩሳሌምዛራ ውታናንቴ ኬም ብራንቴ ይቴና ክዶ፤ ²⁹ ደብረዘይት ሃንዻያ ጉርባስ ካላን ዳና ካታማና ቤተ ፋጌቤ ቢታንያቤዛራ ይዬስካዶን ዋዳንካ ይሳ ታማርና ግዶርካ ላማ ኬሳም ይንታ ሃማንቴና ክይእሳዶ፤ ³⁰ “ሞራ ዬሳ ዎትሮን ዳዛራ ይማቴ፤ ኦጎታርካሞ ዬኣርዲና ኤዲ ይንዛራ ይዳርቃድማ ኡኩሊ ናሶ ዻክማንቴ ክዳዃ ሃፓና ዬያፓይ፤ ቡላንቴኻሞ ኦራ ዻቴ ንማቴ። ³¹ ኤዲ ሃውካሞ ዬግያ፣ ‘ሃርናንቴ ዬቡሌ?’ ሃማንቴ ኮኦይስና፣ ‘ጌጳናንቴ ዛግሳና ኮዛግሳይ’ ሃማንቴ ጌይማቴ።”

³² ኤና ይእሳዻዳናኻሞ ቃልቴ ኬናንቴ ክጌያዳግያ ኮዳዃ ሃፕዲና። ³³ ኤና እምባናኻሞ ኡኩልቶን ናሳም ኬቡልካ ሃፓንቴ፣ “ኡኩልቶን ናሳም ሃርናንቴ ዬቡሌ?” ሃማንቴ ኬኻላ ኦይስዲና።

³⁴ ኬኻሞ፣ “ጌጳናንቴ ዛግሳና ክዛግሳይ” ና ኬያማዶ።

³⁵ ሃያንቴኻሞ ኬ ኡኩልቶን ናሳም ኢየሱስዛራ ዻቴ ናዴ፣ ኣፓላና ይሳም ኡኩልቶን ናሳዛራ ኣፓንቴ ኢየሱስም ክዛራ ዼግ ዳኣርስዲና። ³⁶ ኤናኻሞ ኖ ጎይን ክያኣንዛራ ኣፓላና ይሳም ኣፕቴና ኬዶ።

³⁷ ደብረዘይት ጉርባስካ ጎይን ምጫ ሃንቻንዛራ ኬሳንሳዶን ዋዳንካ፣ ኤዲኖ ጱፅኖ ኪም ጫጋዶኖ ዬርን ሃምማንቴን ዼስሞን ይያፓዶንታኻ ዋዝንዻንቴ እላታንቴ ይንታ ሃማንቴ ባርያም ጎሻን ካርስዲና፦ ³⁸ “ብታ ጌጳሳ ናብንካ ናኣያ ፑጋዻዳና!” “ፖላሮ ፃላሞኖ፣ ፖላናሳ ፖላሮኻሞ ጎሽኖ ኮዴ!”

³⁹ ዛርስንሳኻሞ ባክሮጎ ፈረስ ኤና ዋኒካሞ ኢየሱስግያ፣ “ኣስታማራዮ፣ ታማርና ሃሳም ጎርማ” ና ኬያማዶ። ⁴⁰ ኖኻሞ ኬግያ፣ “ዬናንቴ ጌያና እጌያይ፤ ኬ ጫክ ኬያምናኻሞ፣ ሱኒና እላታና ኬእላታይ” ና ክያማዶ።

⁴¹ ኢየሱስ ዬሩሳሌምዛራ ይሳንሳና ካታማስም ሼዳንቴ ኮናንቴ ኤፕዲና፤ ⁴² ይታኻሞና ክያማዶ፦ “እኒ ሃናንቴ ፃላሞን ባኣያም ሃይታላ ሃዼሳዳና ሃርቴ ዶኖ! ኮዶን ታ ኖ ሃሳ ኣፕሮኻ ካይዲና፤ ⁴³ ጋላ ሃሳ ዴሞሮ ሃሳ ካርሚን ጫኣንቴ፣ ራቅ ውልባራኻ ታኻንቴ ሃም ይንካ ኬጋልንሻን ዋዳኖ ናኣና ኮናኣይ፤ ⁴⁴ ሃቤ ካርምንሳ ኢሮጎ ሃላማን ዳና ናና ሃሳቤም ፔን ላማ ክዛራ ዎርሳና ኬዎርሳይ፤ ሱኒናኻሞ ሱንንዛራ ኬዴኻናንቴ ኬ ጋርማሞ፤ ኦጎኖኻሞ ባርያ ይንካ ሃዛራ ክናኣዳ ዋዳስም ያ ዼሳድማሞ።” ⁴⁵ ኣጋሳ ራስባራ ኢየሱስ ባርዮን ኦኖን ኣርዳንቴ፣ ኦጎታርካ ኤና ኮይሶን ሻንሻይናም ኦይትዲና፤ ⁴⁶ ሃያንቴኻሞ ኬግያ “ ‘ኦኖኖ እሳ ምስኮ ኦኖና ኮዳይ’ ሃማንቴ ዋርቃትሮጎ ኡካዽዲና፤ ኮዶን ዬቲ ‘ኤና ዲብናሳ ኣዽሚ ራቅ’ ሃይዲና” ና ክያማዶ።

⁴⁷ ሮሮ ውልካሞ ባርዮን ኦኖንሳ ኢሮጎ ኖ ታማርስቴና ክዶ፤ ኤና ዳምብን ኣሽካይናሳ ጋርናቤ፣ ኤና ሙሴ ዳምብን ታማርሳይናቤ፣ ኤና ዛርስንሳ ጋርናቤ ኪም ዴሳናንቴ ዛግቴና ኬዶ፤ ⁴⁸ ኮዶን ዛርስኖ ፓይላ ታማርን ክሳም ኮቻዶንታኻ፣ ዬራ ኬሃያያ ኬኻላ ካይዲና።