20

¹ ሮሮ ካላ ኢየሱስ ዛርስንም ባርዮን ኦኖሮ ክታማርስካቤ ባርያሳ ሜርሜርን ፃሊን ክጌይካ ኤና ዳምብና ኣሽካይናሳ ጋርናቤ፣ ኤና ሙሴ ዳምብን ታማርሳይናቤ ዞንዛናቤ ፑጫንቴ ክዛራ ናእዲና፤ ² ኬኻሞ፣ “ዋድማና ክና ሃዋድማይና ሃር ብታሞኻ ኮዶን ዎናንቴ ጌይማ፤ ብታሞን ኮም ሃናንቴ እማዳ ኖ ሃውቴ?” ሃማንቴ ክካላ ኦይስዲና።

³ ኖኻሞ ኬናንቴ ይንታ ሃማንቴ ማስዲና፦ “እንታኻሞ ኦይሶ ካላ ዬኻላ እኦይሴ፤ ዬቲ ይንዳ እናንቴ ማስማቴ፤ ⁴ ዮሃንስሳ ኤናም ኑንቆንካ ሻይዻይኖ ዳምብኖ ባርያባራኻሞ ሞ ኤዲባራ ናኣዳ?”

⁵ ኬኻሞ ክንካ ይንታ ሃሳውዲና፦ “‘ባርያባራኻና ዎያምና’፣ ዎግያ ‘ታ ሃርቴ ኪም ዬኣምናድሞኖ’ ና ክያማይ፤ ⁶ ‘ኤዲባራና ዎያምና’ ዛርስኖ ፓይላ ዮሃንስ ባርያሳ ኣፖን ጌያያ ክዶንም ኬኣምናንታኻ ዎም ሱንኒካ ፓኻና ኬፓኻይ።”

⁷ ኣጋታኻ ኬ፣ “ሃምባራኻ ኮናኣዶንም ዎቲ ዼስማሞ” ሃማንቴ ክናንቴ ማስዲና።

⁸ ኢየሱስካሞ ኬግያ፣ “ኣጎንታ ኮዳና፤ እንታኻሞ ዬራ ክናም ሃር ጌጳሞኻ እኣሽካይንም ዬናንቴ ጌይማሞ” ና ክያማዶ። ⁹ ኣጋሳ ራስባራ ኢየሱስ ይንታ ሃማንቴ ዻይንሳ ካም ዛርስንናንቴ ጌያን ካርስዲና፤ “ኤዲ ካላ ዎይን ሃቃ ኮራንቴ ኤና ሃሚን ፓኻይናናንቴ እማንቴ ዎይንን ኣፕኖ ኮኡሽና እናም እናንቴ እምማቴ ሃማንቴ ፔ ኣብዛራ ቃልቴ ሮሮ ጱፅ ዎዽዲና። ¹⁰ ዋዳኖ ይንካ ዎይንን ኣፕን ፑሻዻይኖ ኮሳናዃ፤ ዎይንንሳ ኣፕን ክናንቴ ኬንእሴኻናንቴ ኖ ይሳ ዋድማን ኤያም ኬዛራ ይእስዲና፤ ኮዶን ክሳ ሃሚን ኤና ፓኻይና ክሳ ዋድማን ኤያም ዻንቴ ኣን ጉሮ ንእስዲና። ¹¹ ፕር ኖ ይሳ ዋድማ ኤድ ኣብ ካላም ይእስዲና፤ ኤና ክሳ ሃሚን ፓኻና ኪምካሞ ፕር ዻይዲና፤ ክንካኻሞ ኣልማንቴ ኣን ጉሮ ይእስዲና። ¹² ፕርካሞ ኖ ይሳ ዋድማን ኤያ ማክንሳም ይእስዲና፤ ሃሚን ፓኻይና ኣጋምካሞ ፕር ማዳንቴ ኪም ዎንን ሃሚንሳ ቡዶሮ ዻብዲና።

¹³ “ዎይንን ሃምንሳ እምባኻሞ ይጌይና፣ ‘ታ ናንሲ ሃር እያዬ? ይንዳ ፕርካሞ ናሳ እሳ እናሻያም ይእሳና እይእሳይ፤ ኬዳ ኪም ጎባና ኬጎባይ’ ና ክያማዶ።

¹⁴ “ኤና ሃምን ፓኻይናኻሞ ክሳ ናሳም ይያፓና፣ ካ ኪም ዻላያና፣ ንማቴ ኪም ዎዴሴ፤ ኦጎንታ ዋይና ዻልማኖ ዎንቲና ኮዳይ” ሃማንቴ ክንካ ዼላቅዲና፤ ¹⁵ ዎይንን ሃምንባራኻ ኪም ጳልንዛራ ቡላንቴ ኬ ዴስዲና። ታ ናንሲ ዎይንን ሃምንሳ እምባ ኬም ሃስ ክያዬ? ¹⁶ ናዴ ኤና ሃምን ፓኻይና እግናም ዴሳናክዴሳይ፤ ዎይንን ሃምንካሞ ኤና ዋኒናንቴ እማና ክእማይ።” ዛርስኖኻሞ ኣጋም ይኤሳራዶን ዋዳንካ፣ “ዬር ኦጎንታ ሃማ ዳን ኮጋሬ” ና ኬያማዶ።

¹⁷ ኢየሱስካሞ ኬም ሼዳንቴ ኬናንቴ ይንታና ክያማዶ፦ “ታ ‘ኤና ሱኒንካ ኦኖን ዻኻይናሳ ሱና ቦውዻዳ ኣጋ ሱኒ ዛጋዻያ ማትዲና ¹ ’ ሃማንቴ ኡካዻዳ ኣፓሳ ዎኻልኖ ሃርቴ? ¹⁸ ሱና ካዛራ ኤና ዲናይና ፓይላ ኣና ኬኣይ፤ ሱና ካሳ ይንዛራ ይዲናይና ኤና ፓይላ ዹሎ ማታና ኬማታይ።”

¹⁹ ኤና ሙሴ ዳምብን ታማርሳይናቤ ኤና ዳምብን ኣሽካይናሳ ጋርናቤ ኖ ዻይንሳ ኣጋም ክጌያዶኖ ኬዛራ ኮዶንም ዼሳንቴ፣ ሳኣታ ኣጋኻ ኪም ዬዳናንቴ ዛግዲና፤ ኮዶን ኬ ዛርስንም ኩርትንዽዲና። ²⁰ ኬ ኢየሱስም ኤያ ካንታቤ ጌጳሞቤ ካዳ ፔንስ ብታናንቴ ሳስካቴ እማናንቴ፣ ክሳ ኣፖንባራኻ ዼላቅና ውታይናኻ ኪም ዬዳናንቴ ዛግቴና ኬዶ፤ ኣጋታኻ ጎንዼ ኤዲግያ ማታንቴ ክላማ ክንካ ሃሳዋይና ዶያን ኤናም ኬ ክዛራ ይእስዲና። ²¹ ዶያን ኤናኻሞ ይንታ ሃማንቴና ክካላ ኬኦይሳዶ፦ “ኣስታማራዮ፣ ያ ጎንዼን ሃጌያንቤ ሃታማርሳይንቤ ሃያንቴኻሞ ባርያሳ ጎይን ጋዛን ጎንዼምባ ሃታማርሳይንቤ ኤዲ ሃውዛራኻሞ ሃዎዽሞንም ዎቲህ ዼስዲና፤ ²² ኤሳንካ ቄሳርናንቴ ግብርን ካሻዻይኖ ልኪሞ ሞ ልክታይ?”

²³ ኮዶን ኖ ኬሳ ጃኻማን ዼሳንቴ ኬግያ ይንታና ክያማዶ፦ ²⁴ “ይንዳ እናንቴ ዲናር ካላም ዻውማቴ፤ ክዛራ ዶኖ ሃው ዎት ክታኬ፣ ዛራን ኡካዻዳኻሞ ሃው ጋንትቴ?”

²⁵ ኬኻሞ፣ “ቄሳር ጋንቲና” ሃማንቴና ክናንቴ ኬማሳዶ። ኖኻሞ ኬግያ “ታ ናንሢ ቄሳር ጋይንም ቄሳርናንቴ እምማቴ፤ ባርያ ጋይናምካሞ ባርያናንቴ እምማቴ” ና ክያማዶ።

²⁶ ኣጋታኻ ዼላቅና ክጌያዳናኻ ሃማንቴ ዛርስንስ ዎትሮጎ ኪም ዻብንሻናንቴ ኬ ቻላድማሞ፤ ዬራ ኬናንቴ ክማሳዳናም ዬርሻንቴ ኬ ላይ ሃምዲና። ²⁷ ኤና ዴምጲንባራኻ ዻጲማሞ ሃማይና ኤና ሰዱቃዊና ዋኒ ኢየሱስ ካላ ናዴ ኣይሶ ኦይስዲና፤ ²⁸ ክግያ ይንታኻሞና ኬያማዶ፦ “ኣስታማራዮ፤ ኤዲ ካላ ሜ ኬማንቴ ናሶ ኣዽማ ክጅና እንዳን ናሳ ሜን ክሳ ዳልሶንም ኬማንቴ ናናም ኣዽቴ እንዳናሳናንቴ ሜቴ ክዎይሴኻናንቴ ሙሴ ዎናንቴ ኡክዲና። ²⁹ ታ ናንሲ ኣና ክሳ እንዳ ናሶ ꬆጳና ዳና፤ እንዳን ናሳ ብራስ ሜ ኬማንቴ ናሶ ኣዽማ ጃይዲና፤ ³⁰ ፕር እንዳን ናሳ ላንስኻሞ ኮም ባስካንቴ ኣጋንታ ናሶ ኣዽማ ጃይዲና፤ ³¹ ማክንስኻሞ ኮም ባስክዲና፤ ናና ሶጳናኻሞ ኣጋንታ ፑጭ ኮም ባስካንቴ ናሶ ኣዽማና ኬጃዶ። ³² ቱንስሮኻሞ ኤስኖ ጃይዲና። ³³ ኣጋታኻ ናና ꬆጳና ፓይላ ኮም ኬዬዳዶንታኻ፣ ዴምጲንባራ ዻጳዻይን ዋዳንካ ና ሃው ሜ ኮዴ?”

³⁴ ኢየሱስካሞ ኬናንቴ ይንታ ሃማንቴና ክማሳዶ፦ “ፔን ኮ ናና ኬማና ኬኬማይ፤ ኬማዻና ኬኬማዻይ፤ ³⁵ ኮዶን ዴምጵንባራኻ ዻጳንቴ ፔን ናኣንናንቴ ዶንም ኤና ሃፓይና ኬምማሞ ዎይካሞ ኬማዽማሞ፤ ³⁶ ኬ ባርያሳ ኤርጎ ኤናግያ ኬዶንታኻ ናንሲ ኬ ጅማሞ፤ ኬ ዴምጲንባራ ናና ዻጳዳና ኬዶንታኻ ኬ ባርያ ናናና። ³⁷ ሙሴ ሃቃስ ሮጳያሳ ዬር ዋርቃትሮ ይኡካዶንካ ጌጳም፣ ‘ኣብርሃም ባርያ፣ ይሳሃቅ ባርያ፣ ያእቆብ ባርያ’ ክያማዳ ኤና ዴምጲንባራ ኬዻጳይንምና ክዻዋይ፤ ³⁸ ኬ ፓይላ ክናንቴ ሳዳንካ ኬዶንታኻ፣ ኖ ኤና ሳዳንካ ዳና ባርያና፣ ኤና ጃዳና ባርያ ትማሞ።”

³⁹ ኤና ሙሴ ዳምብን ታማርሳይና ዋኒካሞ ክግያ፣ “ኣስታማራዮ፤ ያ ፃሊና ሃጌያዶ” ና ኬያማዶ። ⁴⁰ ኣጋኻ ካርሳንቴ ኤዲ ክካላ ኦይሶ ኦይሳናንቴ ዛጋዳ ቆልማሞ። ⁴¹ ሃያንቴ ኢየሱስ ኬግያ ይንታና ክያማዶ፦ “ኤና ክርስቶስም ኖ ዳዊት ናሶና ሃስ ኬያሜ? ⁴² ኦጎኖኻሞ ዳዊት ይባራንካ ዋርሳን ዋርቃትሮ ይንታ ሃምዲና፦

“ ‘ጌጳ እሳ ጌጳግያ፣

⁴⁴ ታ ናንሲ ዳዊት ኪም ‘ጌጳ’ ሃማንቴ ክግስማዳና ሃስ ክሳ ናሶ ክዴ?” ⁴⁵ ዛርስኖ ፓይላ ኪም ኤሳርቴ ኮዳዃ ይሳ ታማርናግያ ይንታና ክያማዶ፦ ⁴⁶ ኣፓላን ውልፑስ ሃሞን ጉድጶን ኣርሳንቴ ያዮን ዛጋይና፣ ጳልሮጎ ጌሶን ዛጋይና፣ ኦይሁድናሳ ምስኮን ኦኖሮቤ ድግስን ራቅሮቤ ጎሺን ራቅን ዛጋይና ኤና ሙሴ ዳምብን ታማርሳይናኻላ ዬም ማንክማቴ፤ ⁴⁷ ኬ ባርያም ጉዱጲ ምስክቴ ሜና ዳልሶናም ታይስቴ ኬሳ ኦኖናምና ኬቡራይ፤ ኤና ኬም ኬሼዴኻናንቴኻሞና ኬምስካይ፤ ኬ እግናም ብቶ ዛርቦ ካላና ኮካላይ።”