21

¹ ኢየሱስ ካች ሃማንቴ ክሼዲና ኤና ዎድሞና ባርዮ ኦኖንሳ ብሬን ፑኡሻዻን ሳጥንሮ ብሬን ኬዻብካ ሃፕዲና። ² ሃያንቴኻሞ ኤዲ ሜ ዳልሶ ኩፒ ካላ ሳንቲም ላማም ሳጥንን ኦጎሮ ኮዻብካ ሃፕዲና፤ ³ ይንታኻሞና ክያማዶ፦ “ዬናንቴ ጎንዼና እጌያይ፤ ኤና ፓይላ ውል ካላ ኤስኖ ዳልሶኖ ኩፒኖ ኮኖ ሳጊ እምዲና፤ ⁴ ኤና ክና ዋኒ ኬእማዶኖ ኮይና ይሳ ጱፅና ዳና ግዶሮካና፤ ኮዶን ና ኩፒ ዳንቴ ካላኻሞ ሽእሽማ ይሳ ዳናም ፓይላ እምዲና።” ⁵ ክሳ ታማርና ግዶር ዋኒ ባርዮን ኦኖኖንም ሱኒና ፃሊናኻቤ ኤና ባርያናንቴ ኮይና ኬእማዳናቤኻ ኣሽካዻዃ ኮጎባዶንም ክንካ ሃሳውቴ ኬዳዃ፣ ኢየሱስ ይንታና ክያማዶ፦ ⁶ “ኮኖ ዬያፓይኖ ፓይላ ኮስምማ ሱኒ ሱኒዛራ ኮንታ ዶርማንቴ ኮሽዽሞን ዋዳኖ ናኣና ኮኣናይ።”

⁷ ኬኻሞ ክግያ፣ “ኣስታማራዮ፣ ታ ናንሲ ዬሮ ኦጎኖ ፓይላ ሃ ኮያሜ? ሃያንቴኻሞ ዬሮ ኦጎኖ ኮያማንሳ ብራሮ ዬራ ብራንቴ ሃፕንዻያ ሃርቴ?” ⁸ ኖኻሞ ኬናንቴ ይንታ ሃማንቴና ክማሳዶ፦ “ዬቲ ጎይ ጋዳ ያኣና ዬም ማንክማቴ፤ ኤዲኖ ጱፅኖ፣ ‘እንታ ክርስቶስና’፣ ሃያንቴኻሞ፣ ‘ዋዳኖ ሳንዲና’ ሃማንቴ እሳ ናብንካ ናኣና ኬናኣይ፤ ኮዶን ዬቲ ኬም ዬጫግናኖ። ⁹ ባንቆንቤ ዛርስንሳ ጄካን ዬኤሳርና ዬቃꬅምናኖ፤ ዬራ ኣጋ ብራንቴ ክያሜኻናንቴ ዛግሳና ኮዛግሳይ፤ ኮዶን ቱንስኖ ይሪካ ሃምማሞ።”

¹⁰ ሃያንቴኻሞ ኬናንቴ ይንታና ክያማዶ፦ “ዛርስኖ ዛርስን ዋኒዛራ ዻጳና ኮዻጳይ፣ ማንግስትካሞ ማንግስት ዋዛራ ዻጳና ክዻጳይ፤ ¹¹ ፔንሳ ዝጋ ጌጲ ማታና ኮማታይ፤ ዳቆምቤ ሃጅሞምቤ ራቅ ዋና ዋና ግዶር ዳና ኮዳይ፤ ዬር ኩርትንሳያቤ ፖላንባራኻ ዬር ሃምማንቴ ዼስማ ሃምማና ኮያምማይ።

¹² “ኮዶን ዬሮ ኦጎኖ ፓይላ ኮያምማ ኮሳ ብራሮ ኤና ዬም ዬዳና ኬዬዳይ፤ ዬም ኦይታንቴና ኬያያይ፤ ኣይሁድናሳ ምስኮን ኦኖንዛራቤ ዻክን ኦኖንዛራቤ ዬም ኣርሳና ኬኣርሳይ፤ ኤና ብትናቤ ኤና ጌጵናቤሳ ዎትሮ ዬም ባኣና ኬባኣይ፤ ኮኖ ፓይላ እንካ ሃማንቴ ዬዛራ ዬስካና ኮዬስካይ። ¹³ ኦጎኖኻሞ ኤናናንቴ ማኚ ዬዴኻናንቴ ዬናንቴ ጎይ ፃሊና ኮዳይ። ¹⁴ ኣጋታኻ ሃር ዎማሴ ሃማንቴ ብራንቴ ዬቃብምናኖ። ¹⁵ ዬሳ ቁፓሞን ኤና ፓይላ ዜርማናንቴቤ ማሳናንቴ ኬቻልሞን ኣፖንቤ ሃሞሞንቤም እንታ ዬናንቴ እማና እእማይ። ¹⁶ ዬምባናቤ ዬንዳናቤ፣ ዬንዳና ናናቤ፣ ዬሳ ኤዳናቤ፣ ዬያርና ካውል ዬም ሳስካንቴ እማና ኬእማይ፤ ዬግዶር ዬሳ ዋኒም ዴሳና ኬዴሳይ፤ ¹⁷ እንካ ሃማንቴ ኤና ውልሳ ዎትሮጎ ቶዛዻዻዃና ዬዳይ። ¹⁸ ኮዶን ዬሳ ስትና ግዶርካ ስቲ ካላኻሞ ካይማሞ፤ ¹⁹ ዎቻዻንቴ ዎያንቴኻሞ ሳዳን ዬሳም ዻኣሻና ዬዻኣሻይ። ²⁰ ዬሩሳሌምም ባንቆን ኤናኻ ታኻዻዃ ዬያፕና፣ ዋዳኖ ይንካ ኮካያይኖ ኮዬስካዶን ዼስማቴ። ²¹ ዋዳ ኣጋኻ ኤና ይሁዳ ግዶር ዳና ጉርባናዛራ ኬጎቤ፤ ኤና ካታማሮጎ ዳናኻሞ ኦጎባራ ኬውቴ፤ ኤና ካታማንሳ ቡዶሮ ዳናኻሞ ካታማንዛራ ኣርዳን ኬጋሬ፤ ²² ዬራ ዋርቃትሮ ኡካዻዳና ፓይላ ጎንዼ ኬማቴኻናንቴ ዋዳ ኣጋ ዻባሞን ይንካ ካዻያ ሮራና። ²³ ፔን ኮሮ ጋሎ ጌጲ ማታና ኮማታይ፤ ዛርስን ኮዛራኻሞ ቦክ ናኣና ኮናኣይ፤ ኣጋታኻ ዋዳን ኦጎኻ ሜና ስርማናናንቴቤ ናናም ቆኦሻይናናንቴቤ ሃይ! ²⁴ ሃልፓካ ኬ ጃና ኬጃይ፤ ቶርስን ውልዛራ ኬም ሮጋና ሮጋዻይ፤ ዬሩሳሌምካሞ ኤና ቶርስና ዋዳኖ ኮሳ ማቃዛራ፤ ኤና ቶርስናኻ ኮም ትጋዻዃና ኮዳይ። ²⁵ “ሃዮንዛራቤ፣ ኣርፕንዛራቤ ኤዝንንዛራቤ ዬር ሃፓንቴ ዼሳዻድማ ማታና ኮማታይ፤ ኛፓስን ቱልማይንሳ እርጎንካ ሃማንቴ፣ ኤድኖ ፔሮ ዶኖ ፓይላ ቃብማና ኮቃብማይ፤ ሃያንቴኻሞ ጄካና ኬጄካይ፤ ²⁶ ፖላናሳ ካንታና ኬጄካንታኻ፣ ኤድኖ ኩርታሞኻቤ ፔሮ ናኣናንቴ ዶኖ ሃርቴ ሃማንቴ ካሊቴ ቃጃና ኬቃጃይ። ²⁷ ዋዳን ኦጎኻ እንታ ኤዲ ናሶ ካንታንካቤ ጎሺ ጌጵካቤ ሉፕንካ እኒካ ኢም ሃፓና ኬያፓይ። ²⁸ ዬትካሞ ዬራ እግና ሃምማን ኬካርስና፣ ዻቆኖ ዬሳ ኮሳናዶንታኻ፣ ዻጳንቴ ዎይማቴ፤ ዎትን ዬሳም ዞን ካች ሃይማቴ።”

²⁹ ጫግሻንቴኻሞ ኖ ዻይንሳ ካም ይንታ ሃማንቴ ኬናንቴ ጌይዲና፦ ባላስንቤ ሃቃና ዋኒቤም ፓይላ ሼድማቴ፤ ³⁰ ቃልጶና ኬሳ ኬኮዳዃ ዬያፕና፣ ዬቲ ዬባራንካ ዋዳን ኦጎኻ ቦናኖ ኮሳናዶንም ዼስዲና። ³¹ ሃያንቴኻሞ ዬራ እግና ኬያማይንም ዬያፕና ባርያሳ ማንግስትኖ ኮዬስካዶንም ዼስማቴ።

³² “ዬናንቴ ጎንዼና እጌያይ፤ ዬሮ ኦጎኖ ፓይላ ኮሳ ሃምማዛራ ኤዲኖ ታን ጋይኖ ካይማሞ። ^{1 33} ፖላንቤ ፔንቤ ካያና ኬካያይ፤ ኮዶን እሳ ዼላቅኖ ካይማሞ።”

³⁴ ኣጋታኻ ዴንታ ሱን ሃማኻቤ፣ ውጮ ጵፅ ውጭቴቤ ዴንታን ዬዶንናንቴ ቃብምቴ ዎይላምኖ ዬሳ ካያንቴ፣ ሮራ ኣጋ ዛኒግያ ዬኬንሽማ ዬም ዬዳን ክጋሬኻናንቴ ፓኻልዽማቴ፤ ³⁵ ዬራ ኣጋ ኤዲን ፔን ጋላፕሮ ዶንዛራ ፓይላ ዬስካና ክዬስካይ። ³⁶ ኣጋታኻ ዬርን ናኣንባራኻ ዬዻቄኻናንቴቤ እ ኤዲ ናሶሳ ዎትሮጎ ዎያን ዬቻሌኻናንቴ ሮሮ ውል ዋቻዻንቴ ምስክማቴ።”

³⁷ ኢየሱስ ሮሮን ባርዮን ኣኖሮጎ ታማርስቴ ዳንቴ፣ ኮዶን ሶትን ደብረዘይት ሃንዻያ ጉርባስዛራ ውታንቴ ዎዽቴና ክዶ። ³⁸ ዛርስኖኻሞ ፓይላ ኪም ኤሳራናንቴ ባርዮን ኦኖንዛራ ክዛራ ቡሪን ንቴና ኮዶ።