3

¹ ጢባርዮስ ሃንዻያ ቄሳር ክብትማዃ ቦን ታጲ ዶጝ ኮማታዃ፣ ኣጋኻሞ ጳንጥዮስ ጲላጦስ ይሁዳ ፔንሳ ብቲ ክዶንካ፤ ሄሮዶስ ኣንቲጳስ ገሊላ ፔንሳ ብቲ ክዶንካ፤ ክሳ እንዳን ናሳ ፊልጶስ ኢጡርያስቤ ጥራኮኒዶስቤ ፔንሳ ብቲ ክዶንካ፤ ሊሳኒዮስካሞ ሳቢላኒስ ፔንሳ ብቲ ክዶንካ፤ ² ሃናቤ ቀያፋቤ ኤና ኣይሁድናሳ ዳምብን አሽካይናሳ ጋርና ኬዶን ዋዳንካ፣ ዘካርያስ ናሳ ዮሃንስ ዳራሮ ክዳዃ ባርያሳ ኣፖኖ ክዛራ ናእዲና። ³ ኖኻሞ ኤናሳ ሴሶን ኬናንቴ ጋርዼኻናንቴ ሴሶን ባራኻ ማታዻይን ሻዮንም ታማርሳዳቴ ዮርዳኖስ ሌኤንሳ ራቅና ዴሞሮን ዳና ውልዛራ ናእዲና። ⁴ ኣጋኻሞ ኤያ ባርያሳ ኣፖን ጌያያ ኢስያስሳ ዋርቃትሮ ይንታ ሃማንቴ ኣፓ ክኡካዳ ጎያኻና፦

⁵ ባይናኻሞ ፓይላ ኬፆፄ፣

ጌማራቤ ጉርባናቤ ፓይላ ይርክ ኬያሜ፤

ጎይኖ ቆሮኖ ጋዝ ኮያሜ፤

ጎይኖ ሃርቾኖኻሞ ጫንቃል ኮዴ፤

⁶ ኤዲ ናሶ ሃንዻያ ፓይላ ባርያሳ ዻኣሾን ሃፓና ኮያፓይ።’”

⁷ ዮሃንስካሞ ኤና ክካላ ሻይዾታ ናኣይናም ይንታኻሞ ሃምቴና ክዶ፦ “ዬቲ ክና ጉንቶን ኦፖን ናና! ካዮን ናኣናንቴን ዶንባራ ዬዻቄኻናንቴ ዬናንቴ ጌያዳ ሃውቴ? ⁸ ታ ናንሲ ሴሶንባራ ዬማታዶን ዬር ዻዋያ ኣሽክማቴ፤ ሃያንቴኻሞ ዬሳ ዎይላምንካ ‘ዎምባ ኣብርሃም ዳይድና’ ሃማንቴ ጌያን ዬካርስናኖ፤ ባርያ ሱኒና ክና ግዶርካ ኣብርሃምናንቴ ናሶ ዻሳናንቴ ክቻላይንም ዬናንቴ ጌያና እጌያይ። ⁹ ታኻሞ ሹኮኖ ሃቃናሳ ጫጭሮ ዎዳዽዲና፤ ሃቃና ኣፕን ካምናም ፓይላ ጫራቴ ኖንዛራ ዻባና ዻባዻይ።”

¹⁰ ዛስርኖ “ታ ዎቲ ሃር ዋዬ?” ሃማንቴና ክካላ ኬኦይሳዶ።

¹¹ ዮሃንስካሞ ኬናንቴ “ኤያ ይንሳ ኣፓላ ላማን ይዳ ኤያ ይንሳ ቆልማናንቴ ክእሜ፤ ኤያ ዳኣኖን ካዳኻሞ ኤያ ይንሳ ቆልማናንቴ ክካሼ” ሃማንቴና ክማሳዶ።

¹² ኤና ግብርን ፑኡሻይናኻሞ ክካላ ሻይዾታ ናዴ ክግያ፦ “ኣስታማራዮ፦ ኤ ዎቲ ሃር ዋዬ?” ና ኬያማዶ።

¹³ ኖ ኬግያ “ዬናንቴ ጌይዻዳናሳ ጳባራ ሻባንቴ ኤና ኻላ ግብርን ዬችናኖ” ና ክያማዶ።

¹⁴ ሃያንቴ ዎታዳርናኻሞ፣ “ኤ ዎቲ ሃር ዋዬ?” ሃማንቴ ክካላ ኦይስዲና።

ኖኻሞ ኬግያ፦ “ኤዲ ካላሳኻሞ ብሬን ካንታኻ ዬሳርናኖ፤ ኤናምካሞ ፓጋሞኻ ዬቤርንስናኖ፤ ዬናንቴ ብሬና ካሻዻይና ዬካና ኬዬካይ” ና ክያማዶ።

¹⁵ ዛርስኖኻሞ ፓይላ ኪም ዼሳናንቴ ካሊቴ፣ “ኖ ይንዳ ሙሽ ክርስቶሱ?” ሃማንቴ ይሳ ኢካ ዮሃንስሳ ዬር ቃብቴና ኬዶ። ¹⁶ ዮሃንስ ኤና ፓይላግያ ይንታና ክያማዶ፦ “እንታ ዬም ኑንቆካና እሻያይ፤ ኮዶን ኤያ እሳ ሳጋ ናኣና ክናኣይ፤ እንታ ክሳ ዱጙርን ካቲን ቡላን ቻልማሞ፤ ኖ ዬም ኡስን ጫራጝንካቤ ኖንካቤ ሻያና ክሻያይ፤ ¹⁷ ቆይድኒም ሳንቴ ጫንቃል ሃያናንቴቤ፣ እስናም ኮናሮ ካናንቴ ሻርቃኖ እስንን ቡቡንሳይኖ ክሳ ኣኒሮና ኮዶ፤ ኮዶን ቱፖናም ኖን ካይሞንካ ኮቃና ክኮቃይ።” ¹⁸ ዮሃንስ ቃቦ ኣብ ጱፅካኻሞ ዛርስንም ኪሊቴ ባርያሳ ሜርሜርን ፃሊን ኬናንቴ ጌይዲና።

¹⁹ ኮዶንካሞ ገሊላ ፔንሳ ብታ ሄሮዶስ እንዳን ናሳ ሜን ሄሮድያዳም ክኬማዳ ጎያኻቤ ክሳ ዋድማና ዋኒካ ዮሃንስ ክዛራ ክዋጭማዶንታኻ፤ ²⁰ ሄሮዶስ ዬራ ክናም ዼላቅ ኣብዛራ ሻባንቴ ዮሃንስም ዻክን ኦኖን ኣርስዲና። ²¹ ዛርስኖ ፓይላ ኑንቆንካ ኮሻይዻዃ ራስባራ ኢየሱስካሞ ኑንቆንካ ሻይዽዲና፤ ኖ ባርያም ምስክቴ ክዳዃ ፖላኖ ቡልሚዲና፤ ²² ኡስኖ ጫራጚኖኻሞ፦ “ዎሌግያ ማታንቴ ክዛራ ሃንችዲና፤ ፖላንባራኻሞ “ናሳ እሳ እናሻያ ያና፤ ሃንካ ዋዝንዻና እዋዝንዻይ” ሃማያ ዼላቅ ኤሳርምዲና።

²³ ኢየሱስካሞ ዋድማን ክካርሳንካ ቦንኖ ክሳ ማካንታምግያና ኮዶ፤ ኤና ይቃባዳግያ ኖ ዮሴፕ ናሳና፣ ዮሴፕ ኤሊ ናሳና፣ ²⁴ ኤሊ ማቲ ናሳና፣ ማቲ ሌዊ ናሳና፣ ሌዊ ሚልኪ ናሳና፣ ሚልኪ ዮና ናሳና፣ ዮና ዮሴፕ ናሳና፣ ²⁵ ዮሴፍ ማታትዩ ናሳና፣ ማትታዩ ኣሞፅ ናሳና፣ ኣሞፅ ናሆም ናሳና፣ ናሆም ኤሲሊም ናሳና፣ ኤሲሊም ናጌ ናሳና፣ ²⁶ ናጌ ማኣት ናሳና፣ ማኣት ማታትዩ ናሳና፣ ማትታዩ ሴሜይ ናሳና፣ ሴሜይ ዮሴክ ናሳና፣ ዮሴክ ዮዳ ናሳና፣ ²⁷ ዮዳ ዮና ናሳና፣ ዮና ሬስ ናሳና፣ ሬስ ዘሩባቤል ናሳና፣ ዘሩባቤል ሰላትያል ናሳና፣ ሰላትያል ኔሪ ናሳና፣ ²⁸ ኔሪ ሚልኪ ናሳና፣ ሚልኪ ሃዲ ናሳና፣ ሃዲ ዮሳስ ናሳና፣ ዮሳስ ቆሳም ናሳና፣ ቆሳም ኤልሞዳም ናሳና፣ ኤልሞዳም ኤር ናሳና፣ ²⁹ ኤር ኢያሱ ናሳና፣ ኢያሱ ኤልኣዛር ናሳና፣ ኣልኣዛር ዮሪም ናሳና፣ ዮሪም ማጣት ናሳና፣ ማጣት ሌዊ ናሳና፣ ³⁰ ሌዊ ስምኦን ናሳና፣ ስምኦን ይሁዳ ናሳና፣ ይሁዳ ዮሴፕ ናሳና፣ ዮሴፕ ዮናም ናሳና፣ ዮናም ኤልያቄም ናሳና፣ ³¹ ኤልያቄም ሜልያ ናሳና፣ ሜልያ ማይናን ናሳና፣ ማይናን ማታታ ናሳና፣ ማታታ ናታን ናሳና፣ ናታን ዳዊት ናሳና፣ ³² ዳዊት እሴይ ናሳና፣ እሴይ ኢዮቤድ ናሳና፣ ኢዮቤድ ቦኤዝ ናሳና፣ ቦኤዝ ሳላ ¹ ናሳና፣ ሳላ ነኣሶን ናሳና፣ ³³ ነኣሶን ኣሚናዳብ ናሳና፣ ² ኣሚናዳብ ኣራም ናሳና፣ ኣራም ኣሮኒ ናሳና፣ ኣሮኒ ኤስሮም ናሳና፣ ኤስሮም ፓሬስ ናሳና፣ ፓሬስ ይሁዳ ናሳና፣ ³⁴ ይሁዳ ያእቆብ ናሳና፣ ያእቆብ ይስሃቅ ናሳና፣ ይስሃቅ ኣብርሃም ናሳና፣ ኣብርሃም ታራ ናሳና፣ ታራ ናኮር ናሳና፣ ³⁵ ናኮር ሴሮህ ናሳና፣ ሴሮህ ³ ራጋው ናሳና፣ራጋው ፓሌቅ ናሳና፣ ፓሌቅ ኣቤር ናሳና ፣ ኣቤር ሳላ ናሳና፣ ³⁶ ሳላ ቃይንም ናሳና፣ ቃይንም ኣርፓክስድ ናሳና፣ ኣርፓክስድ ሴም ናሳና፣ ሴም ኖኅ ናሳና፣ ኖኅ ላሜህ ናሳና፣ ³⁷ ላሜህ ማቱሳላ ናሳና፣ ማቱሳላ ሄኖክ ናሳና፣ ሄኖክ ያሬድ ናሳና፣ ያሬድ መላልኤል ናሳና፣ መላልኤል ቃይናን ናሳና፣ ³⁸ ቃይናን ሄኖስ ናሳና፣ ሄኖስ ሴት ናሳና፣ ሴት ኣዳም ናሳና፣ ኣዳምምካሞ ባርያባራኻና ዎዳዻዶ።