DCS-Mirror-burje_duro_kxh_luk_text

¹ ዋዳን ኦጎኻ ኤዲን ፔሮ ዶን ፓይላ ፓይዳዼኻቤ ዋርቃት ግዶር ኡካዼኻናንቴ ቄሳር ኣውግስጦስ ኬራፕዲና። ² ፓይዳ ኣጋ ቄሬኔዎስ ሶርያ ፔንሳ ብቲ ክዶን ዋዳንካ ዛርስንም ፓይዳዻዳ ፓይዳ ካርሳና። ³ ኣጋታኻ ኤዲኖ ፓይላ ዋርቃትሮ ኡካዼኻናንቴ ይሳ ካታማናዛራ ያእዲና።

⁴ ዮሴፍካሞ ዳዊት ሞሮ ኤድቤ ቢዛቤ ይዶንታኻ፣ ገሊላ ፔን ግዶር ዳ ካታማስ ናዝሬትባራ ዻጳንቴ ይሁዳ ግዶር ዳ ዳዊት ካታማስ ቤቴልሔም ሃንዻንዛራ ውትዲና። ⁵ ኦጎዛራ ናብን ኡካዾታ ክያኣዶኖ፣ ስርማን ባሻዽን ኣዻናንቴ ዶን ሃራን ይሳ ማርያም ማላ ክንካና። ⁶ ኦጎታር ኬዳኻ ኮሳ ኣዽማን ሮሮኖ ሳንዲና፤ ⁷ ናሳ ይሳ ቶይዳ ኣንጌን ናሳም ኣዽዲና፤ ኣፓላንካ ኪም ኡላስዲና፤ ቾችናሳ ዎድማዻን ራቅሮ ራቅ ኮቆልማታኻ፤ ናሳም ዋጛሳ ቆሬሮ ና ዎኦስዲና። ⁸ ፔን ኦጎሮ ሶትንካ እያና ይሳም ግሽቴ ጳሎ ዎዻይና ግሽሞን ኤና ዳይዲና። ⁹ ኬኬንሽማ ባርያሳ ኤርጎን ኤያ ኬኻላ ናዴ ዎይዲና፤ ጌጳሳ ጎሺኖኻሞ ኬኻላ ኖግያ ሮጲዲና፤ ኩርታሞ ጌጲካሞ ኬም ዬድዲና። ¹⁰ ኮዶን ኤርጎን ኤያ ኬግያ ይንታና ክያማዶ፦ “ዬኩርትንዽናኖ፤ ኤዲ ውል ፓይላናንቴ ዳያ ጌጲ ዋዝንሳያ ሜርሜር ፃል እንታ ዬናንቴ ባኣቴ ናእዲና። ¹¹ ሃይታላ ዳዊት ካታማሮ ዬናንቴ ኤናም ዻኣሻያ ኤዲ ኣዻዽዲና፤ ኣጋኻሞ ኖ ጌጳ ክርስቶሲና። ¹ ¹² ይንካ ዬዼሳያ ዬራ ካ ክዴ፦ ናሶ ኣፓላኻ ኡላሳዻዃ ዋጛሳ ቆሬሮ ዎዻንቴ ክዳዃ ሃፓና ዬያፓይ።”

¹³ ኣጋዛራ ዎታደርና ፖላን ጋይና ኤርጎን ኤያ ማላ ሃፕንዽዲና፤ ባርያምካሞ ጎሺቴ ይንታና ኬያማዶ፦

¹⁴ “ጎሽኖ ባርያናንቴ ጳ ፖላንሳ ፖላና ግዶር ኮዴ፤ ፃላሞኖኻሞ ፔሮ

ኤና ክናሻይናናንቴ ኮዴ!”

¹⁵ ኤርጎን ኤና ኬኻላንካ ዞን ፖላንዛራ ኬያኣዃ ራስባራ ግሽሞን ኤና ክግያ፦ “ጌጳሳ ዎናንቴ ዻውዻዳ ዬራ ሃምማዳም ሼዳናንቴ ቤተልሔምዛራ ዎኤ” ና ኬያማዶ። ¹⁶ ኬኻሞ ዪሪካ ያእዲና፤ ማርያምቤ ዮሴፕቤ፣ ናሳምካሞ ዋጛሳ ቆሬሮ ዎዻንቴ ክዳዃ ሃፕዲና። ¹⁷ ኦጎም ሃፓንቴኻሞ፣ ናሳሳ ዬርን ጌይዻዶንም ማይ ሃያንቴ ኬናንቴ ጌይዲና። ¹⁸ ዬርን ኦጎም ኤና ኤሳርዳና ፓይላ ግሽሞን ኤና ኬጌያዳና ዬራም ጎሽዲና፤ ¹⁹ ኮዶን ማርያም ዬራ ኣጋም ይሳ ዎይላምካ ዬዳንቴ ቃብቴና ኮዶ። ²⁰ ግሽሞን ኤናኻሞ ዬራ ፓይላ ኬናንቴ ጌይዻዳግያ ኮዶን ይያፓና፦ ዬራ ይያፓዳናቤ ይኤሳርዳቤናንቴ ፓይላ ባርያም ጎሻዳቴቤ ኪም ዼግ ዼግ ሃያዳቴ ማታቴ ያእዲና። ²¹ ሮራ ሎንካይሳ ይንካ ቃማን ክታኻዻያ ክዬስካና፣ ኣኻራ እንዳኖ ኪም ኮስርማዽማ ባርያሳ ኤርጎን ኤያሳ ናባ ክናንቴ ክዎዳዳኻ ኢየሱስ ሃንዽዲና።

²² ሙሴ ዳምብን ጎይንካ ዮሴፕቤ ማርያምቤ ዪም ጫራጝሻንቴ ይቱንሳና፣ ናሳም ባርያናንቴ እሞታ ዬሩሳሌምዛራ ባኣቴ ውትዲና፣ ²³ ኣጋኻሞ ጌጳሳ ዳምብን ጎይንካ “ኣንጌን ናና ቶይዲናም ጌጳናንቴ ጫራጝሻዻዳና ኬዳይ” ሃማንቴ ኣና ኡካዻዳግያ ዳምባ ኣጋም ሃያናንቴቤ፤ ²⁴ ፕርካሞ ጌጳሳ ዳምብንካ “ኣቲ ዎሌ ላማቤ ዎይካሞ ዳራ ዎሌ ላማ” ሃማንቴ ጌይዻዳግያ ዬራ እግናም ባርያናንቴ ባኣንቴ ሙልዻሮ እማናንቴና።

²⁵ ዋዳን ኦጎኻ ኤያ ጋዛስ ዋቻ ስምኦን ሃንዻያ ዬሩሳሌም ግዶር ዳይዲና፤ ኖኻሞ እስራኤልናሳ ዋዛን ካሊቴን ዳቤ ኡስን ጫራጚን ይንዛራ ይዳ ኤዲና። ²⁶ ሃያንቴኻሞ ኤያ ባርያ ይካማዳም ሃፕማ ክጅሞንም ኡስኖ ጫራጚኖ ይንናንቴ ይጌያዳ ኤዲና፤ ²⁷ ኖ ዋዳ ኣጋኻ ኡስኖ ጫራጚኖ ክናንቴ ኮጌያዃ ባርዮን ኦኖንዛራ ኣርድዲና፤ ናሳሳ እንዳንቤ እምባቤ ዳምብን ጎይንካ ዬራ ሃይዻይናም ክናንቴ ሃያናንቴ ናሳ ኢየሱስም ባኣንቴ ኬኣርዳዶን ዋዳንካ፤ ²⁸ ስምኦን ናሳም ቻንቴ ሹብዲና፤ ባርያናንቴ ጎሽን እምቴ ይንታና ክያማዶ፦

²⁹ “ጌጳ፦ ኣና ኣፓ እናንቴ ሃጌያዳ ጎያኻ፤

ታ ናንሲ ካይስታ ሃሳም ፃሊንካ ይእስማ፤

³⁰ ኣፕኖ እሳ ኤና ውልሳ ዎትሮ ሃኣሽካዶንም፣

³¹ ሃሳ ዻኣሾን ሃፕዲና።

³² ካኻሞ ቶርስን ኤዲንናንቴ ባርያሳ ቃቦን ዻዋያ ሮሮና፤

ዛርስን ሃሳ እስራኤልናንቴኻሞ ጎሺና።”

³³ ናሳሳ ዬራ ጌይዻዳናም እምባቤ እንዳንቤ ዬርሽዲና። ³⁴ ስምኦን ኬናንቴ ፓፂ እማንቴ እንዳን ማርያምግያ ይንታና ክያማዶ፦ “ናሳ ካ እስራኤል ፔሮ ኤዲ ጱፅሳ ዲናቤ ዻጲንቶንቤናንቴ ክዴኻናንቴና፤ ሃያንቴኻሞ ኖ ኤዲ ቶዛዻዻዳ ክዴኻናንቴ ባርያ ጌይዲና፤ ³⁵ ኤዲን ጱፅንሳ ዎይላምን ቃቦኖ ክንካ ሃማንቴ ማይ ማታና ኮማታይ፤ ሃሳ ዎይላምካሞ ቤሬ እልል ጌጲ ጃኖ ኮጃይ።”

³⁶ ፕርካሞ ኣሴር ቢዛኖ ፋኑኤል ናኖ ሃና ሃንዻይኖ ባርያሳ ኣፖን ጌያይኖ ኦጎታር ዳይዲና፤ ናኻሞ ኤዲ ካልሎን ጌቻዳና፤ ኣኻራ ዱዲ ዳኣንቴ ኣንጋ ይሳ ይኬማዻዳ ላማ ቦን ꬆጳና ኮዳርቃዶ። ³⁷ ኮሳ ቦንኖ ሎንካይታም ኦይዲ ኮሳ ማታዛራ፣ ² ሮሮንቤ ሶትንቤ ባርዮን ኦኖንባራ ፔግንዽማ፣ ዳልሶ ማታንቴ ባርያም ቶሮንዽቴ ምስክቴቤ ቶሮንዽማ ምስክቴቤ ዋድምቴን ዶኖና። ³⁸ ግዳ ኣጋኻ ና ናዴ ባርያም ጎሺዲና፤ ዬሩሳሌምሳ ዻኣሾንም ኤና ካላዳና ፓይላናንቴ ናሳሳ ዬርም ጌይዲና።

³⁹ ዮሴፕቤ ማርያምቤ ጌጳሳ ዳምብን ጌይዻዶንም ፓይላ ኣሽካቴ ይቱንሳና ገሊላ ግዶር ዳ ይሳ ካታማስ ናዝሬትዛራ ማታቴ ያእዲና። ⁴⁰ ናሳኻሞ ጌጳዳቴቤ ካንታ ኡካዳቴቤ ያእዲና፤ ሃሚካሞ ማትዲና፤ ባርያሳ ፃላሞኖ ክዛራና ኮዶ። ⁴¹ እንዳንቤ እምባቤኻሞ ቦንናኻ ፋሲካን ባኣልንናንቴ ዬሩሳሌምዛራ ይቴና ኬዶ። ⁴² ናሳ ቦን ታጲ ላማ ክማታዃ ኣና ይያያግያ ባኣሊንዛራ ኬ ውትዲና። ⁴³ ባኣልን ኬ ቱንሳንቴ ይሳ ኦኖናዛራ ኬማታዃ፣ ናሳ ኢየሱስ ዬሩሳሌም ግዶር ሽዽዲና፤ ኮዶን እንዳንቤ እምባቤኻሞ ኖ ክሽዻዶን ዼስማሞ፤ ⁴⁴ ኖ ኬኻላ ኬላማ ክንካ ክዳ ማይሻንይቴ፣ ሮሮ ካላ ጎይ ያእዲና፤ ኮዶን ራስባራ ኬ ይሳ ኤዳናቤ ኤና ይሳ ናሽዽናኻላ ኪም ዛጋን ካርስዲና፤ ⁴⁵ ኪም ይያፓድሞንታኻ፣ ዛጋዳቴ ዬሩሳሌምዛራ ማትዲና።

⁴⁶ ሮሮ ማካንሳሳ ራስባራ ኤና ታማርሳይናሳ ባክሮ ዳርቃንቴ ኬም ኤሳርቴቤ ኬም ማሳቴ ኦይሶ ኦይስቴቤ ክዳዃ ባርዮን ኦኖሮጎ ኪም ሃፕዲና፤ ⁴⁷ ኤና ኪም ኤሳርዳና ፓይላ ክሳ ዼስንቶንካቤ ዬራ ክማሳይናቤም ዬርሽቴና ኬዶ። ⁴⁸ እንዳንቤ እምባቤኻሞ ኪም ይያፓና፣ የራ አጋም ዬርሽዲና፤ እንዳኖኻሞ ክግያ፦ “እሳ ናሳ፣ ሃርናንቴ ኢም ኮንታ ሃያዴ? ሃምባቤ እቤ ዎቲ ቃብማንቴ ሃም ዛግቴና ዎዶ” ና ኮያማዶ።

⁴⁹ ኖኻሞ ኬግያ፦ “ሃርናንቴ ኢም ዬዛጌ? ኣባ ኦኖሮ እዳን ኮዛግሳይንም ዬቲ ዼሳዬው?” ና ክያማዶ። ⁵⁰ ኮዶን ኬናንቴ ዬራ ክጌያዳ ኣርዳድማሞ።

⁵¹ ሃያንቴ ኖ ኬ ላማ ክንካ ናዝሬትዛራ ሃንችዲና፤ ኬናንቴኻሞ ኤሳርቴና ክዶ። እንዳኖኻሞ ዬርን ኦጎም ፓይላ ይሳ ዎይላምካ ዬድቴና ኮዶ። ⁵² ኢየሱስካሞ ፃላሞኻቤ ሃማሞቤኻቤ ጉድጳሞቤኻ ባርያቤ ኤናቤሳ ዎትሮ ጌጲዲና።

¹ 2.11 እብራይስጥ አፖኻ “መሲህ” ና ሃንዻዶ ክሳ ዎኻልኖ “ካንዻዳ” ና ሃንዻዶ፤ግሪክ አፖኻኻሞ “ክርስቶሲ” ና ሃንዻዶ አጋኻሞ “ካንዻዳ” ና

² 2.37 ቦን ሎንካይታም ኦይድናንቴ ዳልሶን ማታንቴ ዶኖ