¹ አጋ መሽንሳ ገዜስ ሳሌም ብታቤ ጳ ጴግንዶ ደሀ ጌጳ ባሪያ ካይናኔ ኖካሞ አብራሃም ብትህናሞ ባሻንቴ ክማትህካ ሀፋንቴ ክናንቴ ፓፂን አምድና፡፡ ² አብራሃምካሞ ኮይና ይሳ ደና ግደሪካ ታጲ ታጲ ቡለንቴ እምድና፡፡ ብራንቴንካ ናብኖ ክሳ ገዛሞንሳ ብትህ ናኔ ሀንጳዶ ፈር ራስባራ ሳሌምሳ ብታ ሀንጳደ ፃለሞንሳ ብታኔ፡፡ ³ እንባቤ እንደቤ ወይካሞ ክሳ አጳማንሳ ብዘ ቆልማሞ ክሳ ቦንሳ ካርስ ሳደንሳካሞ ቱንስ ቆልማሞ ኮደንካሞ ባርያሳ ናሶ ሀያንቴ ጳይንሳ ጳኳ ካይን ቢይን ደሀያ ማታንቴ ደሀኔ ክደሀይ፡፡ ⁴ ይንደ ኖ ሀማሳ ጌጴ ክደን ቃብማቴ ውልሳ ብራሮ ሀያንቴ ግሰንጳያ አብራሀሞ ካውል ኮይና ይሮጋደና ግደርካ ታጲናሞ ቡለንቴ እምድና፡፡ ⁵ ካይንማሞን ይናንቴን አንጳደና ሌዊይ ናናካ ወንደናናና አብራሃም ብዛ ካደናካሞ ዘርስን ካለቤ እንደናና ይናቤካለንካ ኮይና ከያፋይና ግደርካ ታጲናሞ ኬቼካናቴ ደንብኖ ጌይድና፡፡ ⁶ ኮደን ብዛኖ ኮኖ ሌዊይ ብዛ ትህማሞ ይያማን ካሞ አብራሃም ካለንካ ታጲናሞ ቻይድና ደንታ ብራዛራ ናአይንም ካሞ ቻደና ናንቴ ፓፂ እምድና፡፡ ⁷ ሽለሞ የሪ ጌጲካ ቸጋጳይኖ እይ ካጳጲማሞ፡፡ ⁸ ባካለባራ ታጲናሞ ኤና ቻይና ጃኔ ክጀይ ባካለባራ ለይ ሳደንካ ደኔ ካደሄ ከናንቴ ጌጵጰደናሞ ካሞ ቻኔ ከቻይ፡፡ ⁹ ሀያንቴ ካሞ ታጲናሞ ቻያ ሌዊይሞ አብራሃምካ ታጲናሞ እምድና ሀንጳን ደንደያኔ ወደንደያይ፡፡ ¹⁰ አጋካሞ አብራሃም ማይሻንካ ገዛሞን ይያፋደን ዋደንካ ሌዊይ አዳራ እንባ አብራሃሞሳ ጉሽሮና ክዶ፡፡ ¹¹ ጫራጎማሞ ሀፈጰንደንቤ ደንብን ዘርስናንቴ እንደን እን ሌዊይ ካይንማሞን ጎይንካ ደና አሮን ግያ ጋራንቴ የሳ ማይሽርካ ጌጳሞን ገዛንካደ ካይን አብ ክኔኤ ካናንቴ ሀርናንቴ ከዛግሳደ? ¹² ካይንናም አስካጳን ደና ደንብንም ካሞ አስካጳይኖ ግድና፡፡ ¹³ የሪ ፓይላ ውል ካሞ ክናንቴ ጌያደኖ ብዛ አብግደርካና ብዛ ካሮካ ደንብን ይንግደር አሻካጳን ራቅን አጎሮጎ ኤድ ዋድማደሀ ካለካሞ ቆልማሞ፡፡ ¹⁴ ጌጳ ዋሳ ይሁዳ ብዛንባራ ክና አደኖ ማይ ኮንታካ ሙሴ ካይናትናሳ ወናንቴ ይጌያደን ብዛን ኮባራን የሪ ካለካሞ ክጌያደ ቆልማሞ፡፡ ¹⁵ ካይን አብ ይሳ ማሽርካካሞ ገዛስ ክና አይንም ከደን ወትህ ኤናናንቴ ወጌያደና ጎያካ ማይና፡፡ ¹⁶ ኖካሞ ካይን ክደኖ ከይሞን ሳደንሳ ከንታን ሀማንቴና ብዛን ከግያ ደንብንሳ ቆባራ ትህማሞ፡፡ ¹⁷ ይንታ ሀማንቴ ክናንቴ ማኛሞን ወይጲድና ማይሽባ ጌጳሞን ገዛስ ያ ካይና ለይ ቱንስን ቆልማሪ፡፡ ¹⁸ ኤርጋሳ ብራስ ቃጂቤ ዋጋ ቆልማ ክደንታካ ክደንታካ አስካጲድና፡፡ ¹⁹ ኤድ ካለካሞ ደንብንም ጎይ ገዛካ አስካጳይ ቻማጲሞታ ባሪያ ዛራ ይንካ ወፄደያ ደንታ ፀልይ ናእድና፡፡ ²⁰ ኮኖካሞ አሽንሻጳማ ሀማድማሞ ዋን ካን ከማታደኖ አሽንሻማና፡፡ ²¹ ኮደን ኖ ካይ ክታደኖ አሽንሻንቴና አጋካሞ ባሪያ የንታ ሀማንታ ጌይድና ጌጳ ኣሽንስድና ቃቦ ይሳሞ ካሞ አስክማሞ ያ ለይ ቱንስ ቆልማ ካይንና፡፡" ²² አሽንሻሳ አጋካ ሀማንቴ የሱስ ደንታን ሀልናንቴ ወሳ ደሞ ወይድና፡፡ ²³ ይሳ ዋድማንካ ብራዛራ ያአን ዴንጲኖ ኮማራኳ ካይና ብራናሳካሞ ፓይደኖ ጱፂና፡፡ ²⁴ ኮደን የሱሳ ለይን ደሀያ ክደንታ ካይንማሞን ክኖን ኦስከጲማሞ፡፡ ²⁵ አጋታካ ኬናንቴ ሀማንቴ ሮሮ ውል ክምስካንታ ሳደንካ ኬደንታካ ክንካ ሀማንቴ ባሪያ ዛራ ናአይናሞ ክም ጳአሽጳን ቻለኔ ክቻለይ፡፡ ²⁶ ታናንስ ወናንቴ ዛግሰያ ጫንቃለማ ዛሪቦን ቆልማ ካሎን ጫንቃለማ ሴስን ኤናካለን ፔጌን ደሀቤ ፎለናሳካሞ ጳባራ ጌጳጳደ ካይና አጋግያ ማና፡፡ ²⁷ ኖካሞ ካይና ዋንጋታግየ ብራቴን ሴሶን ይኖንናንቴ ፈር ዘርስንጋናንቴ ባሪያዛራ ሴስን ሻእስን ዋድማን አሽክንቶ ዘግስማሞ ይም ሳስካንቴ ይእማደን ዋደንካ ዋሳ ሴሶናንቴ ቱንስ ይንካ ሴስሳ ሸጳጳያ ጎይ ይሀያንቴ እምድና፡፡ ²⁸ ደንብኖ ኤና ካንታን ቃጂናሞ ካይናት ጋራ ሀያንቴና ኮጌጳሳይ ደንብንሳ ራስባራ ናአደ ኮደን አሽንሻደ ለይን ጫንቃልን ደሀያ ናሳ ይሳም ጌጲስድና፡፡