¹ አጋታካ የሱስ ክርስቶጋን ተማሪን ብራን አንጳደን ጋራንቴ ይንደ ወጌጴ ዴንጲን ዋድማሮካ ጳቆንዛራ አሮ ደጳንቤ ባርያሞ ካሞ ወጨጋደን ጎይንም ፈርካሞጳባን ወጋሬ፡፡ ² ሀያንቴካም ትቆንካ ሻይጳንቤ ኤናዛራ አንን ወደጳንቤ ጃደናሳ ዴንጲንባራ ጳ ጲንቶንቤ ብቶን ቱንስ ቆልሞንቤሳ ተማሪን ፈር ጳሳን ወጋሬ ³ ባሪያ ክናሻያደና ክናሞና ወአሽካይ፡፡ ⁴ ካላላ ሰጎን ይናንቴን ይሮጳደና ፎላንባራንካ እምንቶ እንጳደንም ሀፋደና ኡስን ገዛንም ቻናንቴን ደና፡፡ ⁵ ባርያሳ አፎን ፃልንቤ ፔን ናአንሳ ካንታን ቻደና፡፡ ⁶ ኮደን ራስባራካሞ ፈር ማታንቴ ጳቆን ጎንዛራ ንማሞ አጋካሞ ሀርቴ ከካሞ ይሳ ሴስንካ ባርያ ናሳም ፈር ማሳንቴ ዝታንቴ ኬስንሳና ኬያያይ፡፡ ⁷ ሮሮ ውል ኮዛራ ደቦን ሀንጫይንም ውጫንቤ ኤያ ፓካ ያናንቴካሞ ኡሻይንም ባሪያካለንካ ቻኔ የቻይ፡፡ ⁸ ኮደን ካሞ ኡኩምን ፔኖ ባቃልሳይኖ ዋጋ ቆልማሞ አሽሞኖካሞ ሳንስድና ቱንስሮካሞ ዋንካ አታቴ ከአታይ፡፡ ⁹ እናናንቶ ኦጎንታ አጋያደናካ ወሳ ፓሽንቶለማ ክን የሪ ጌጴ ኮደንሞ ወትህሞ ጴስድና፡፡ ¹⁰ ባሪያ ጳጋ ኤድህ ትህማሞ ኖ የሳ ዋድማንም አናካሞ ታካሞ ኤና ገዛናናንቴ ክሳ ናብንሳ ነሽማንካ የአሽካደንም ዋልማሞ፡፡ ¹¹ ደንታን ብራዘራ ናአናንቴ ደኖ ኮሳ ናአዛራ የትህ ውል የሳ ደንታን ኮሞ የጳዎካናንቴ ዘጋኔ እዘጋይ፡፡ ¹² የሱስም ዩቻደንካ ክናንቴ ደንሻንቴቤ ደንታን ብራዛራ ናአናንቴ ደንም ጳላይናሞ የታኬ ሣናንቴ ኤና አሪደናንቴ ዘግሞናግያ የደካናንተ ዋትህ ዛግማሞ፡፡ ¹³ ባሪያ አብራሃምናንቴ ደንታን ብራዘራ ናአይንም ይእማደን ዋዲን የሪ ይንካ ክአሽንሻያ ክለን ስጋያ ኮቆልሞንታካ ይንካ አሽንሽድና፡፡ ¹⁴ ይንታካሞና ክያማዶ ይያማን ሀናንቴ ፓፂን እማኔ እማይ ብዘን ሀሳሞካም ጱፃና እያያይ፡፡ ¹⁵ አብራሃም ካሞ ወይላሞ ካለካ ይካለደን ታካራስባራ ደንታን ብራዛራ ናአይንም ሀፊድና፡፡ ¹⁶ ኤናካሞ ኬካላንካ ስጋያካ አሽንሻኔ ከአሻንሻይ ከአሻንሳደን ጎይንካካሞ የራ ኬካለን ካቤግንጳታንካ ኬሳ ባክሮካ ዜርማኖካሞ ውታኔ ከውታይ፡፡ ¹⁷ ባሪያ ቃቦ ይሳም ይኦስክሞ ደንታን ብራዘራ ና አይንም ኤና ጳለይና ናንቴ ማሀይ ሀያናንቴ ይዘጋደን ናንቴ አሽንሽድና፡፡ ¹⁸ ባሪያ ካለካ ፎግማናንቴ ዛግማሞ ኖካሞ የራ ለማና አስካጴም ደንታን ባራዛራ ና አናንቴን ደንም ወየዴካናንተ ወትህካሞ ወሌሜ ካናንቴ ሀይድና፡፡ ¹⁹ ወትህካሞ ወሳ ሳደንናንቴ ጎይ ገዛማ ብራዘራናአ ያ ደይድና ጎያ አጋካሞ አፓለን ጋደንሳ ዙሎባራ አና ደሀሳ አንም አርደኔ ወአሪደይ፡፡ ²⁰ ራቃ አጋካሞ የሱስ ወናንቴ ሃማንቴ ብራንቴ ክአሪ ደደኔ ኖካሞ ባሪያሳ ኤርጎን ኤናግያ ጌጳሞ ገዛ ለይጱንስቆል ካይናካራ ማትህድና፡፡