¹ ታ ናንስ ማኝና ክናግያሞና ጱፂና ለፈግያ ወም ታካንቴ ኬና ወናንቴ ባስኮን ማታይና ወም ጳካንቴ የደናንቴን ደናም ሴሶናሞ ወካለንካ ፈሪንሳንቴ ጎበን ወሳ ወትሮንደንሞ ሌማንቴ ወጎቤ፡፡ ² ካሪሰን ይንዛራን ወለምን ወቃጀደ የሪ ውልሞ ትፈሳያ የሱስም ሼደንቴ ክሳ ወትሮ ዋዛን ደንሳ ሀቃን ጋደንም ዶንሻንቴ ሀቃን ጋደንሳ ቦውንታንም ቦዋንቴ ባሪያሰ ጌጳሞን ቦረኮን ሳሞዛቅባራ ደርቅድና፡፡ ³ ታ ናንስ ካንታን ይናንቴን የቃጀደ ደንታስ ና አናቴን ደዛራ እልል የጀናኖ ሴሶን ኤናባራሳ ቶዛን ኮግያሞን ኬየስኳኳን ደንሻዶ አጋሞ ቃብማቴ ⁴ አካራ ሴሶን ለማ የማይሽን የሳ ማስንታካሞ ይንቅማዛራ ካ ቶዛ ድማሞ፡፡ ⁵ ናና የደንታካ ይንታ ማንቴ የም ሌንሳናንቴ ይንታ ሀማንቴ ጴላቃ ክጌያደም የትህ ዋልድና፡፡ እሳ ናሳ ጌጳሳ ዋጭን ሀቦውና ክጎራን ዋደንካካ እልል ሀዲናኖ፡፡ ⁶ ኦጎኖካ ጌጳ ኤያ ይናሻያሞ ጎራኔ ክጎራይ ይሳ ናሶግያ ሀያንቴ ይዳደሞ ጳኔ ክጳይ፡፡ ⁷ ባሪያ የም ይሳ ናሶግያ ክየደደንታ ካክሳ ጎሮን ክልማንሞ ደንሽማቴ ኤሳንካ ናሳ ሀውቴ ይንዛራን አምባ ይዋጭማ? ⁸ ና ፓይላ ዋጫ ኬዛራ ዋጭንያሞ ኤኤሳሪድምና ቦዋሮ አጳጳደኔ ውል ኤያ አጋ ኖስትሃማሞ፡፡ ⁹ ካሳ ጳባራ ፔሮጎ ዋጋካና ወዛራ ዋጭ ማይና ዳይድና፣ ኬሞካ ጎብቴና ዋደ፡፡ ታሀ ሳደናሳ እምባናቴ ካሳ ጳባራ ኤሳራንቴ ወትህ ሳደንሳ ደዮው? ¹⁰ ዎምባና ኬናንቴ ወኤሳሬ ካናንቴ ዋደ ቶካናቴና ዋዛራ ኬዋጭማይ ኮደን ባርያ ክሳ ገዛሞን ኤና ቻይናሳ ባክሮጎ ወደ ካናንቴ ወናንቴ ሀማንቴ ዋም ጳኔ ክጳይ፡፡ ¹¹ ዋጭኖ ፓይላ ሮራጋላ ኤድሳ እልል ዴሳ ያኔ ዋዝንሳያ ታክማሞ ኮን ራስ ባራ ቤሬ የዱሳ ኤናሞ ገዛሞ ጎይቤ ጎይን ፃልንቤ ኡሽሞና ኮያፈሳይ፡፡ ¹² አጋታካ ክንድን የሳቃ ጀደንቤ ካንታን የሳ ቃጀደንሞ ፈሽክሽማቴ፡፡ ¹³ ኤያ ኤላስ ክፓ ሼካናንቴ ሀያማቴ ካሎንካሞ ሽካለን ክጋሬ ካናቴ ራን የሳናቴ ጎይፃል አሽክማቴ፡፡ ¹⁴ ኤና ፓይ ውል ለማ ፃልንካ ደሀ ናቴ የደንዲያ ደናሞ ፓይሳ ሀይማቴ ጫራግማናንቴካሞ ዛግማቴ ጫራግማ ጌጳሞ ኤድ ካላካሞ ሀፋጳን ደንደይማሞ፡፡ ¹⁵ የግደርካ ኤድ ካለካ ባርያሳ ናሽማን ጀግሻን ኮሬ ሀያንቴካ ሽቆ ዛርቦ ባቃለንቴ የሳራ ጋሎ የሞ አሪሳን ኮጋሬ ካናንቴ ኤድ ጴፈንም ሴሳራን ኮጋሬ ካናቴ ፓካልጲማቴ፡፡ ¹⁶ አይለ ይእሳያ ደአንቴናቴ ሀማንቴ ይሳ ቶይደሞንናንቴ ዋጋ እማን ሽንሻዳ ዓሳውልግያ ኤድ ካለካሞ ባርያሞ ጎባማ የግደር ሀፋን ጋርጴ ካናንቴ ዋቻጲማቴ፡፡ ¹⁷ ራስባራካሞ ቶይደሞን ይሳሞ ጳለናንቴ ክዛጋደን ዋደንካ ክሞ ማሪጳደን የት ጴስድና ቶይደሞንሞ ዋቻጳንቴ ኤፋካ ዛጋንቴካሞ ማሳቴ ሀፋ ናንቴ ደንደይድማሞ፡፡ ¹⁸ ላአሳጳን ይደን ዳይንቤ ጌማሪታ ኖንካ አታያቤ ፂፓንቤ ጉደንቤ ዛራቤ ላይለንቤ ዛራ የስካደማሞ፡፡ ¹⁹ ሙራንሳ ሄፃንቤ ኡፍን ኬሳርጳንቤሳ ናቅስን ዛራ ና አድማሞ ኤሳሪደና ካሞ ጴላቅ አብሻባንቴ ጌያን ኬጋሬ ካናንቴ ምስክድና፡፡ ²⁰ አጋካሞ ደብና ካውል ጌማቴታሞ ከለአስና ሱንካ ፓካቴ ዴሳጴ ሀማያ ፔለቃሞ ባስክሳጳን ደንደይድማሞ፡፡ ²¹ አጋሮጎ ዴንታን ሀፋቴና ደጳደ ጌጲ ኩርትንሳያ ክደንታካ ሙሴምካሞ ኩርትነንጳንቴ ግባዝማ ሀምድና፡፡ ²² ኮደን የትህ ጵዮን ጌማርታዛራ ፓለሮን ደን የሩሳለም ባሪያሳ ከተማንዛራ ናእድና ዋዛንካ ፊጫደና ባሪያሳ ኤርጎን ኤና ጲፂናዛራ፡፡ ²³ ይንሳ ናብብ ፓለሮን ኡካጳደና ቶይድናሳ ማህበርዛራ የትህ ፄድና ውልዛራ ብቶን ታኣያ ባርያሳ ፃለሞን ይንግደር ይደን ኡስን ገዛንዛራ፡፡ ²⁴ ደንታን ሀልንሳ ብክሮን ደሀ የሱስ ዛራ ሀያንቴካ አቤል ማአስንሳ አፎን ጌያ ማአስን ይፃጳደን ዛራ የትህ የስክደና፡፡ ²⁵ ጴላቃን አጋሞ ክሞ ወትህ ዛግማሞ ሀማን ጋራንቴ ፓካልጴማቴ እግና አ ፔሮጎ ደሀንቴ ወሞ ጎርቴን ደሀና ወጋራደን ዋደንካ ከጳቃድሞና ወትህ ፓለንባራ ናአደወም ክጎሪና ክካለንካ ወፔግንጵና ሀስ ጳቃጳን ወደንደዮ? ²⁶ ዋደ ኦጎካ ናቅስኖ ክሳ ፔንሞ ክስቴና ኮደ ኮደንታ ፔን ሶጎ ጋራንቴ ፓለንም ካ ዋደ ካለ ሶጎ ክሳኔ እክሳ ይሀማንቴ ጌይድና፡፡ ²⁷ ፈርካ ካላ ሰጎ ሀማያ ጴለቃሳ አንሽኖ ኤና ቴጋጴሞና ዋቻጳንቴ ከወሜካናንቴ ኤና ቴርጋጳይናሞካሞ ይናቴን አሽከጰድኖ ኡጋቴ ቡልጳያ ኮደንታካና፡፡ ²⁸ አጋታካ ካላካሞ ጌጳሞን ቴርጋጲሞን ወቻንታካ ባርያሞ ዎጎሽ ያንቴካ ጎያ ክሞዋዝንሳያካ ጎብንታቤ ኩታሞቤካ ክም ዋሞስኬ፡፡ ²⁹ ጌጳ ዎሳናሆ ካይሳያ ክደንታካ፡፡