¹ ደንብኖ የራ ፃልና ብራዛራ ናአንቴን ሺፎና ኮደይ ጎንጴንባ ጎይትህማሞ፣ አካታካ ለይ ቦንናግደሪ ወይሳቆልማ ባጳይኖ ፈርካሞ መስዋትንቤ ሞስኮንቤም ኤና አማይናም ካሎን ጫራግሻናንቴ ደንደይማሞ፡፡ ² እን ኬም ኮጨራግሽያደና መስዋትን እጎንቶን ጋራየው? ኤና ፈርካሞ ሞስኮናንቴ ናአይና ቱንስ ከጫራግማንታካ እን ኬሳ ሜቴሮጎ ወትህ ሴሶ ኤድ ሀማያ ቃቦ ኮናእድምናና፡፡ ³ ኮደን ካሞ መስዋትና እግና ሴቦንም ቦንናሳ እሮጎ ጵቅሳይናና፡፡ ⁴ አጋካሞ ዋጋቤ ቁለቤሳ ማአስኖ ሴሶንም ካይሳጳን ደንደይድማሞ፡፡ ⁵ አጋታካ የሱስ ክርስቶስ ፔንዛራ ይናአደን ዋደንካ ይንታ ሀምድና፣ መስዋትንቤ ሜባቤም እንታ ዛግማሞ ኮደን ዋንም እናንቴ እማ፤ ⁶ መስዋትይና ኮቃጳይ ሴሶን ናንቴ መስዋትና አንጳይናቤካ ዋዝንጳድማሞ፡፡ ⁷ ዋደን ኦጎካ ይንታና ክያማይ ወርቃትሮጎ እሳ ይንታ ኡካጳደግያ ጌጳ እንታ ሀሳ ቃቦናም አሽካናንቴ ናእድና፡፡ ⁸ ኮደን ደንብኖ ከሞ ክያየካናንቴ ከጌያንካሞ ኖ ብራንቴ መስዋትንቤ ሜባንቤ መስዋትን ኮቃጳንቤ ወሳ ሴሶንናንቴ መስዋትን አንጳንቤም ዛግማሞ ይንካካካሞ ዋዝንጳድማሞና ክያማይ፡፡ ⁹ ፈርካሞ እንታ ሀሳ ቃቦናም አሽካናንቴ ናእድናና ክያማደ ለንሳሞ አሽካናንቴ ብራስም ሺእሺድና፡፡ ¹⁰ ቃባ አጋካ የሱስ ክርስቶስሳ ዋንካ ሀማንቴ መስዋትን እንጳደንካ ቱንስ ወትህ ጫራግምድና፡፡ ¹¹ ካይና ውል ሮሮ ውል ወያንቴ ዋድማን ይሳም ከአሽካይ መስዋትና እግና ሴስንም ካሎን ቡለጳን ደንዲይምና ሮሮ ውልና ከእማይ፡፡ ¹² ኮደን ካይና ካ መስዋዕት ካለስም ቱንስ እማንቴ ባሪያሳ ምዛቅባራ ደርቅድና፡፡ ¹³ ዋደ አጋሮካ ካርሳንቴ ጋለ ክሳሳ ክሳ ራንሳ ትጋጳያ ኬሳ ማታዛራ ካለኔ ክካላይ፡፡ ¹⁴ ኦጎኖካሞ መስወታ ካለስካ ጫራግማደናም ቱንስ ጫንቃለምና ክያያደንታካ፡፡ ¹⁵ ኡስኖ ጋዛኖ ካም የራ ክናሳ ማኝና ኮደይ፣ ብራቴንካ ይንታና ክያማይ፣ ¹⁶ አጋሳካሞ ራስባራ ኬላማ ጋንካ ይንካ እደያ አፓ ካዔ፣ ና ክያማይ ጌጳ፤ ደንብን እሳም የሳ ወይለምሮጎ ዳሳኔ እደሳይ (ወደኔ እወዳይ) የሳ ሜቴሮጎካሞ ኡካፄ ኡኡካይ፡፡" ¹⁷ ሀያንቴካሞ ሴሶን የሳ የሳ ጋሮን ዋድማንቤ ናንስ እንታ ቃብማሞና ክያማይ ¹⁸ ሀይጴኳ ናንስ ኪናሞ ሺእሻጲካ ራስባራ ሴሶ ናንቴ ሀማንቴ መስዋት እንጳያ ደማሞ፡፡ ¹⁹ ወንደና ናናቶ ታናንሶ የሱስሳ ማስንካ ጋዛናሳ ገዛንዛራ አሪደናንቴ ወትህ ካሞ ሽያሞ ሀፈድና፡፡ ²⁰ ኦጎኖካሞ አፓለን ጋደንካ ኖካሞ ወናንቴ ይሳ ዋንካ ሀማንቴ ክቡላዳ ጎያ ሀለ አጋካና፡፡ ²¹ ባሪያሳ አሮሮጎ ጌጳሳጳዳ ካይን ጌጲ ወሳ ኮደንታካ ²² ቃቦን ዛሪቦሮካ ጫራግማናቴ ወይለም ወሳዛራከሞ ፓፂንቴ ብሽን ወሳሞካሞ ኑቆ ጫንቃለማካ ሻጳንቴ ወይለም ካለቤ ቃቦ ካለቤካ ባሪያዛራ ወክድሜ፡፡ ²³ ደንታን ብራዘራ ናአናንቴ ደንም ወናንቴ እማዳ ጋዛ ክዶንታካ ክም ቻንቴ ክለማ ወደሀን ደንታንም ወቻጳንቴ ወየዴ፡፡ ²⁴ ክሳ ናሽማናንቴቤ ዋድማን ፃንል ናንቴቤ ሀሞንታ ወጎባያንም ወቃቤ፡፡ ²⁵ ኤና ዋንካሞ ሀይጳንም ከጋራደግያ ክንካ ወደን ደንታን ወሳሞ ጋራን ወገሬ ሀያንኔካሞ ሮራ ፄደደቴ ክናአይንሞ የያፋና ክሞ ወፓካልሴ፡፡ ²⁶ ጎንጴንባን ጴስንቶን ወቻካ ራስባራ ጴሳንቴ ጴስማግያ ሴሶንካ ዋቻጳን ወደያደና ናንስ ሴሶናንቴ ደሀያ መዋት አብ ደሀማሞ፣ ²⁷ ኮደን ሽጳዶ ብቶኖ ሪትንሳይኖ ባርያሳ ጋለሞ እሳይኖ ኖሆን ካይሞንም ካልንቶ ካሎንቶ ሶጎና፡፡ ²⁸ ሙሴ ደንብንም ቦዋደ ሀውካሞ ክዴ ኤድ ለማ ወይካሞ ማካሞ ማኛሞን ከወይና ቃቦ ቆልማ ዴሳሪ ዴሳጳይ፡፡ ²⁹ ታ ባሪያሳ ናሳሞ ታጋደ ይንካ ክሞ ጫራግሻጳ ደንም ደንታን ብራዛራ ና አናንቴን ደንዛራ ሳስካን ማአስንም የሪሾል ሀያንቴ ሼደያ ናሽማን ኡስንም ሴሳያ ብቶ ሀማግያ ክዛራ ኮታካጴ ሀማንቴ የቃቤ? ³⁰ ኡሮኖ እንትህና እንታ በዛናሞ ካሻኔ እካሻይሀማደሞ ወዴሳደንታካ ሀያንቴካሞ ጌጳ ዘርስንዛራ ብቶን ታካኔ ክታካይና ክያማይ፡፡ ³¹ ባሪያ ሊይን ደንሳ አንሮጎ ድናጳይኖ ኦጎኖ ካሎን ኤድም ኩርትንሳያኔ፡፡ ኖኖ የናንቴ ኮሮጳኳራስባራ ጋሎንሳ እሮጎ ዋቻጳንቴ የወያደና ቦንና አና ሳጋ ደናሞ ቃብማቴ፡፡ ^{32 33} ሮሮ ዋን ጳልሮጎ እርሞንቤ ካማንቤናንቴ ስስካቴ አንጷኳና የዶ ፈር ዋደ አብካ ኤና ጋሎን ኮግያሞንካ ይንዛራን ይየስካደናለማ ክንካ ጋሔን ጋለኔ የጋለይ፡፡ ³⁴ የትህካሞ የናንቴ ሳግቤ ሮሮ ውል ኮይስ ደያካ የዶንም የጴስዶን ታካ ጳካጳከናናንቴ ቡቃጰማቴ ኮይና ኬም ቡራ ጳደናካሞ ዋዛካ ቾችማቴ፡፡ ³⁵ አጋታካ የሱስናንቴ ደንታን ጌጶን የሳደንም የጳብናኖ፡፡ ³⁶ ባርያሳ ቃቦን አሽካናንቴ ደንታን ብራዛራ ናአናንቴን ዶንም ቻናንቴ ዋቻጳንቴ ወይንቶና ከዛግሳይ፡፡ ³⁷ አጋካሞ ጋሎን ዋደንሳ ራስባራ ናአያ ኖ ናአኔ ክናአይ ካፈማሞ፡፡ ³⁸ ኮደን ገዛና የሱስካና ኬደሀይ ራስዛራ ክማትህና ሳደኖ እሳ ክንካ ዋዝንጴማሞ፡፡ ³⁹ ኮደን ወትህ ኤሳራንቴ ጳቃይና ካለንካና ራስዛራ ማታንቴ ካያይና ባራ ትህማሞ፡፡