1 የሱስ ክርስቶስ የም ይናንቴን ናፃን ኪቡልደኖ ጋሎ ቆልማ የዴካናቴና አጋታካ ዋቻጳንቴ ወይማቴ ፈር ማታንቴ ካይስሞሮጎ የአሪድናኖ፡፡ 2 የናቴ እጌያይንም ጳቅስማቴ ቃማን ታካጳናንቴ የዛግናካሞ የሱስ ክርስቶስ ካለካሞ የናንቴ ክአግሞን እንታ ጳውሎስ ጌያኔ እጌያይ፡፡ 3 ቃማንተ ታካ ጳናንቴ ዛጋይና ፓይላ ደንብንካም ፓይለ ከአሽካካናንቴ ፈርካሞ ኤና ውልናንቴ ማይና እጌያይ፡፡ 4 ደንብንካ ሀማንቴ ገዛጳናንቴ ዘጋይና የሱስ ክርስቶስ ካለንካ ፌግንጴስድና ናሽማካለንካ ካም ፌግንጴድና፡፡ 5 ኮደን ወትህ ወካለደን ገዛሞን ኡስንካ ሀማንቤ የሱስም ወቻደን ጎንካ ፎሽኮካና ወካለይ፡፡ 6 የሱስ ክርስቶስካ ወደና ቃማን ወታካጳደካም መወታካጴድሞናካሞ ዋጋ ቆልማማ ዋጋንካ ደሀይኖ ናሽማንካ ናአይኖ የሱስለማ ደታኖ ሶጎና፡፡ 7 ጎባኖ የሳ ፃልና ኮደታ የም ራስዛራ ማሳደኖ ጎንጴንሞ ኤሳራን የጋሬ ካናቴ ሀውቴ የም ማራደ? 8 ታ ታይስና እግናጎያ ይንካ የም እግስማያ ካትህማሞ ከና አዶ፡፡ 9 ማትህናቄተና ኛኝ ጱፂና ከትህሳይ፡፡ 10 ቃቦ የሳ አብቆልሞንም ጌጵካ እም ጴሳጲድና፡፡ 11 አና ናና እን ኮው ቃማ ታካጳ የናንቴ እጌያያደና እን ኮውል አም ሀስ ኦይታንቴ ኬያያየ? እን ኦንታደና ሀቃኖ ጋደኖ ዱርሞ ማታንቴ ኮሻጳደናና፡፡ 12 ኤና ይናንቴ የሪ ውል ይአሪዳድሞና ቃማን ከታካጳደኖ ሶጎ ትህማሞ የሪ አብ ሻጳደ ደይድና፡፡ 13 እና ናናቶ ናፃ የዴካናንቴ የም ግስማጴድና ኮደን ናፃሞን የሳም አግርማቤ ዋ ቃቦ ዋድማ አሽካያ የያይኖ አጎናንቴ ካለ የሳ ዋናንቴ ናሽማካ ክዴ፡፡ 14 ደንብኖ ፓይላ አፎ ካለዛራ ማሳጲድ አጋ ካሞ ሀያሪ ያም ሀም ሀናሽያግ ክሞካሞ ናሻማና ኮያማይ፡፡ 15 ኮደን ካሞ ክም ናሽን ጋራንቴ ክሞ የቶዛጳያ ደሀና ክሞ የደቴ የካ ያይንሞ ጴስማቴ፡፡ 16 ታናንስ ኡስንካ ደሀማቴና እያማይ የሳ ዋንሳ እግርማንም የአስክናኖ 17 ወሳ ዋኖ ኡስንሳ ዛጋጴሞን ኡስኖ ካሞ ወሳ ዋንሳ ዛጋጴሞን ከአግርጳንታካ ኬእግናካሞ ክንካ ካይሞንታካ የራ የዛጋይናሞ የዋድምናኖ፡፡ 18 ኮደን ኡስንካ የዲያደና ደንብንሳ ቾባራ ትህማሞ የደሀይ፡፡ 19 ዋንሳ ዋድማኖ ማይና ኮደ አጎኖካሞ ቡለሞቤ ሜሽ ጎይ ጨግን ቶቤ ኩጳሞቤና፡፡ 20 ሜሽሞ ምስክነትቶቤ አሽኮቤ ኤድም ቶዛጳቤ ኡሮቤ አግርማቤ ዋጭቤ ሀሞ ኤና ፓይላ ውል ካለንካ ሳግ ያንቴ ሽድንቶቤ ኤና ካለንካ ፓሽማንቴ ደሀቤ ካንስቤ 21 ቁፓሞቤ ባሪያሞቤ ወርሳ ክርባቤ እግናና ከታካይ፡፡ ብራንቴ እጌያድግያ ታካሞ ጌያኔ እጌያይ ደንታን ኦጎግያሞ ደሀይና ፓይላ ባሪያሳ ፓለን ኦኖን አሪድማሞ፡፡ 22 ኮደን ኡሳንሳ ጎይኖ ናሽማቤ ክንካ ፃል ደሀቤ ክናንቴ ጴላቅ ደንሻቤ ጎብንታቤ ገዛሞቤ፡፡ 23 ኤድሞ ጎባጳይኖ ሀጳር ሀሞ ማስቴ ሽንቶና የራ እግናግያሞና ማራያ ደንብ ቆልማሞ፡፡ 24 ኤና የሱስ ክርስቶስ ጋይና ዋንቤ ኮሳ ቃቦንቤ አግርማቤሞ ክንካ ዝትህድና፡፡ 25 ኡስላማ ክንካ ወደሀና ኡስንካ ወያየ፡፡ 26 ክሞ ቶዛጴቴቤ ክሞ ቦውቴቤ የሪ ቆልማዛራ ቃሞ የቁንፂናኖ፡፡