ኤናዛራ 4

1 እንታ እጌያይና ክናና ጳለያ ናሶ ሽልንጮ ይደንታካ ኮይሶኖ ፓይለ ኮናካሞ ኖካሞ ካይሳሞሮካ ውታድማሞ፡፡ 2 እንባሳዎደስ ጌይጳደሳ የስካዛራ ኤና ክም ማነ ካይና አካናቤሳ ቾባራኔ፡፡ 3 ወትህካሞ አጎንታ አካራ ናስ ወደን ዋደንካ ፔን ኮሳ ደንታንቤ ኮ ታማሪንቤ ቾባራ ማታንቴ ካይሳሞንካ ሽንጴድና፡፡ 4 ኮደን ካ ዋደኖ ጌይጳደኖ ኮየስካና ባርያ ኤስን ሜን ካለንካ አጳጳደም ደንብንሳ ካሞ ቾባራን አጳጳም ናሳ ይሳሞ ንእስድና፡፡ 5 ኦጎኖ ካሞ ኮያማደኖ ናስ ክንት የደን ናንቴ ሀማንቴ ጌጳም የሳ ከደካናንቴቤ ደንብንሳ ቾባራን ደሀናም የእላቴካ ናንቴና፡፡ 6 ናና ክሳካም የደንታካ ባርያ አባ አባ ሀማንቴ እለታያ ናሳሞን ኡስን የሳ ወይላሞንዛራ ንእስድና፡፡ 7 አጋታካ ካካ ከካሪሳንቴ ወትህ ክሳ ናስና ወትህ ካይሰናትማሞ፡፡ ናና ካሞ ወደንታካ ባሪያ ወም ጳልማን ኤና ሀይድና፡፡ 8 አካራ ባሪየ የጲስማሳ ብራር የሳ ደንታኖ ባሪያም ጴስማስ ሜሽሳ የትህ ካሳና፡፡ 9 ኮደን ታ የትህ ባርያሞ ጴስድና ባርያካሞ የም ጴስድና ታ ፉር ሱን ቃጀናንቴቤ ታማሪን ደፂን ኦጎቤዛራ ሀስ የማቴ? ሀያንቴ ካ ክስ ካይስ ማታናንቴ ዛጋው የዛጋይ? 10 ካሎን ሮሮ ዋናቤ አሪፍ ዋናቤ ባሪ ግናቤ ቦን ናቤምሳስካኔ የሳ ስካይ፡፡ 11 የናንቴ ካሞ እጎባያይኖ ከኖ ሱን ቃጀ ኮደሀ ማይሻቴ የናንቴ እንታ ኩትንጴድና፡፡ 12 እና ናናቶ የም እምስኬ እንታ የም እታካያግያ የትህካሞ እም ታክማቴ የትህ እናንቴ የሪ ዛርቦ አሽካድማሞ፡፡ 13 የጴሳደግያ ብራንቴንካ አፎንም የናንቴ እጌያደኖ እሳ ሀጀሞንካ ሀማንቴና፡፡ 14 ሀሃሞኖ እሳ የናንቴ ጋሎ ከማቷኳ የትህ እም ቶዛጳድማሞ ወይካሞ የትህ እም ኡጋድማሞ ኮደን ካሞ ባርያሳ ኤርጎ ኤድግያ ካሎን ክይ የሱስ ክርስቶግያ ሀያቴና እም የቻደ፡፡ 15 ኤሳካ ዋዛኖ የሳ ኦጎኖ ፓይለ ሀንታ ኮየስዴ ዋደንደያያደና እን አፈ ዎሳም ቡለቴ እማቤ ዎእማይ ሀማንቴን ይናንቴን ማኛሞን የወያደኖ፡፡ 16 ጎንጴን እጌያኳ የናንቴ ጋልው የማታደ? 17 ኤና እግ የም ይዛራ ቻናንቴና ኮዛጋይ ፃልካ ትህማሞ ከዛጋይ የም ዋካለንካ ቻንቴ ይንትህ ሀያናንቴና፡፡ 18 ጎይ ፃልካ ኮደንታካ ኤና እግናናንቴ ወይጳይኖ ፃልና ኦጎኖካሞ ኮ ደኖ ሮሮውልና እንታ የማ እደና ሶጎ ትህማሞ፡፡ 19 ናና እናሻይና የሱስ ክርስቶስ የሳ እሮጎ ክሳ አርደዛራፉር አጳናንቴ እም የድድና፡፡ 20 የሳ የሪ እናንቴ አሪደን ኮጋራኳ እንታ ጌጲ ቃብምድና ታ እንታ የሣ ባክሮጎና እደ አፎ አብካ እን እጴላቃያደና እን ሀሞንታ እዋዝንጴ፡፡ 21 ይንደ እናንቴ ጌይማቴ የትህ ክና ደንብን አናንጋሳ ቾባራን ደሀ ናንቴን ዘጋይና ደንብን ይጌያዶንም የትህ ኤሳሪደዮው? 22 አብርሃም ካለሞ ካስን ካለንካ ዋም ሜን ይኖን ካለንካ ዋም ሜን ይኖን ካለንካ ናሶ ለማ ክአጳደንም ወርቃትሮጎ ኡካጳድና፡፡ 23 ኤስን ካስንካለንካ ናሳ አጳጳደ አጋሌሌ ዋን ዋሳ ደሳንቴ ይደንግያና፡፡ ኮደን ሜን ይኖን ካለንካ አጳጰደደ አጋ ደንታን ሀልን ናአናንቴን ዶንሳ ጎያና፡፡ 24 ሜና ለማ ውል ክና አፎን ብርሳጳደንዛራ ከጳዋንታካ የራ ክናሞ ጳንስግያኔ ሸደጳይ፡፡ አፓ ጌይጳደዋ ስና ጌማሪታ ሮጎና ኤጎኖካሞ ናሳ ካስታሞ አጳይኖና ናካሞ አጋርና፡፡ 25 ታ ናንስ አጋር አሪብና ፔሮን ደስም ሲና ጌማሪታግያ ማታንቴ ታ ዶንም የሩሳሌምና ኮታካይ ናሳ ይሳለማ ክንካ ካይሳሞ ሮጎ ዶደንታ፡፡ 26 ኮደን ጳ ጴደግንደኖ የሩሳሌም ናፃ ማታቴና ኮደይ ናካ ዎንደኖና፡፡ 27 ይንተታ ሀማንቴ ኡካጲድና ያ ኮኖ አጲሞና ሴኮኖ ዋዛኖ ሀናንቴ ኮዴ ያ እፓንቴን ጴስሞኖ አልልሳንቴ እለትህማ እንጌንካደን ካለንካ አንጌን ቆልሞንሳ ናና ጲፃጲድና፡፡ 28 ታ ናንስ እና ናናቶ የትህ ካሞ ደሳቅግያ ደንታን ብራዘራ ናአንቴን ደንሳ ናናኔ፡፡ 29 ዋደን ኦጎካ ዋን ጎይንካ ናና አጳጳደና ኡስንሳ ካንታንካ አጳጳደም ኦይታንቴ ያይድና ታካሞ ኦጎንታና፡፡ 30 ኮደን ካሞ ወርቃትህኖ ሀር ኮያሜ? ካይስንም ናና ከሳለማ ክንካ ቡልማ ኤስን ካሳን ናና ሜን ቻይድና ናና ለማ ክንካ ጳልማሞና ኮያማይ፡፡ 31 አጋታካ እና ናናቶ ወትህ ኤስን ሜን ቻድን ናናኤ ካይስቶን ጋንትህማሞ፡፡