1 ኮደንካ ገጰካ ጵክ ኤድ ማታደሀና ግስሞን የቻደን ናተ እንታ ይንታ ልክ የደካናተ ምስካና እምስካይ፡፡ 2 ጭራሺ ጋዛና ይሀማተ ክንካ ናሽማንካ ክዙሎ ማንታን ክም ሽድቴ የራ ውልም ደንደያይና ደሀማተ፡፡ 3 ናሽማን ሙራንካ ቃቦ የስካም ካለ ሐያይንተ ካንታጵማተ፡፡ 4 ግስጵደን ዋደንካ ጎይ ካላዘራ ግስጵደን ታካ ፓይላ ውል ብሺህ ካለቤ ካንቴ ካለቤና ደሀና፤ 5 ቢት ካላ፤ እምነት ካላ፣ ሽዬ ካላ ይድና፤ 6 ውልስ ጰባራ ደሀ፤ ውል ግዶ ዋድማያ፤ ውል ግዶ ደሀያ ፍይላ ውልሳ እምባተን ደሀ ብት ካላ ደድና፡፡ 7 ክርስቶስ ኮደንካሞ ይቃባይካ ሐማንተ ውፓይለ ውልናተ ደጋ እምድና፡፡ 8 አጋታካ ይንታና ክያማይ "ዞን እውታደን ዋደንካ፤ ሮግማ ሮጋንቴ፤ ኤናናተ ስጦታና እማደው፡፡" 9 ኦጎንታ ኮደን "ዞንና አውታይ" ሐንጰያ አጋ ፍሪ ምጫን ደን ኜንሳ ራቅንዘራና ክያንቻደ ሐማንተ ጌይጵድምና ሐርሐንጰዴ? 10 ምጫካሞ ሐንቻዶ፤ ውልም ፍጀደሀ ኜን ጋላፍን ኮሚ ወወደ፣ ፎላንሳ ውልዘራ ውታደሀ አጋ ኖና ይጰር፡፡ 11 ኤና ዋን ባሪያስ ዋድማናተ ይእስጵይና፣ ኤና ዋን ባሪያሳ አፎን ጵለቃይናቤ ባሪያ ካለንካ ቃቦንም ቻይና ኤና ዋንም ባሪያሳ ቃቦንም ቻይና ኤና ዋንም ባሪያሳ ቃልንም ታማርስይና ዋንም ፍሪካሞ ግሺም ኤድቤ አስታማርቤ ከማተካና እማደሀ ኖና፤ 12 ኦጎኖካሞ ክርስቶስሳ ብሺይንም ክጋማተካ ናተና፤ ኤና ጋዘና ባሪያስ አገልግሎና ከሽካካናተና ሐማተና 13 ኮያማይ ኦጎኖካሞ፤ ውት ፍይለ ውል ባሪያስ ናስም ምስካካቤ ክም ጵስንታቤካ ሐፍጰይን ኤዳሞንካ፣ ናእንቶንካቤ ኤድ ካላ ማታንተ፣ ክርስቶስቤካ ደንካ ጋዘሞን ጎይንካ ወስ የስካዘራና፡፡ 14 ታነስካሞ ቱልማይንካ ብራዘራቤ፤ ቡይዘራቤ፣ አይታጵደቴ፣ ዋና ዋና ሐሞንካ ተማሪሳ ግባሮንካ ኤናሳ ሽልንጫ ጀካማሰቤ፣ ታይስካቤ፣ እስቤ፣ ኦራቤ ውኩራይና ናና ሽልና ማታን ወጋሬ፡፡ 15 ልካ ክስም ናሽማካ ለቃንተ፣ ሜጼጫን ደሀዘራ ክዘራ ጵለቅንካ ፓይላ ገጰና ወገጰይ፤ ኖካ ክርስቶስና፤ 16 ክንካ ሐማንተ፤ ብሺንሳ ፓይለ ሐፓጅይና ቃዋና የድተኬ፣ አሬተቤ፤ ፋይለ ቡሲና ውል ዋድ ይንት ይንት አስክተ ናሽማካና ከጌጰይ ይካም ሽያና ኬሳያይ፡፡ 17 ኦጎንታ ኮደንካሞ ክናም ጌያና እጌያያይ፤ ገጰካ ሐማንተካም ኤልቆማና ኢያልቅማይ ቃቦ የስካካሞ ኤና ባሪያም ጵስምናግያ ኩን ኤድ ይሐንተ የያየካናተካሞ ዘስክማሞ፡፡ 18 ጰቅታን ኬካሞ ይሳ ወይለም ባራካ ኮደን ታካ ወይላ ካሳ ይቃብሞን ታካ ፅፍና ባሪያ ጎይንባራካሞ እድምድና (ፉግጵድና)፡፡ 19 ቃቦ ኬሳካ ከካያደን ታካ ዋዝስማ አግርማ ዘርቦኖ ፋይለ ኮጋልሽካናተ ደሀናተካ ሴስን ገጰናተ ይካ ሳስካተ እምድና፡፡ 20 ኮደንካ ይትሞ ክርስቶስም ጵሰይሐና ጎይ ኦጎንታ ሐማ ግደርትማሞ የዳው፤ 21 ጎደጵባ ክስካሞ ጰለቅም ኤስሪድና ይት የሱስካሞ እምነትካ ክደንካሞ ክንካ ታማርድና ይት፡፡ 22 ብራተን ይንን የደኖ ስይሐኖ፣ ሱድማን አግርማኖ ይካጵንተ ደኖ ብሸን ጌቸን ቡለተ የጰስካናተካሞ ታማሪድና ይት፡፡ 23 ፍሪካ ሜቴ የሱስ ቃቦካ የፍሽካናተ፤ 24 ገንጵባ ጋዘሞካ ከደንካሞ ገዘናቤ፣ ባሪያም ከታካይንካሞ አሽካጵይሐም ኤያ ሐለም ኬአሪስካናተና፡፡ 25 ኮይንካሞ ፎጋሞንም ጋሪማቴለ ይት ፓይላ ውልተ ክንካ ኤደና (ሞሮን) ኤናልማ የሪ ጎንጵባ ሶጎ ጵላቅማተ፤ 26 ክም ጎሪማተ ኮያማን የሪዘርቦንም የዋድምናኖ፤ ዋጭይን የስዛራካሞ አዬኖካ እባናን ኮጋሬ፤ 27 ራቅካ ሜሽናናተ የእምናኖ፡፡ 28 ድባ ዱብምተን ይካ አይታላካ ካሪሳንተ ይዘባሞን ክጋሬ፤ ኮደንካሞ ጋሎን ኤያናተ ክዕማያ የሪካሞ ኮቆልምና ዋድማ ጋዛ ዋድማንተ ሀፓናተካሞ ክቃጀ፡፡ 29 ኮዘስካያ ግያ ኤና ዋንካሞ ገዝስያ (ጵአሻያ) ናብናካሞ ጫሪግሺያ ጵለቅ ጋዛ ሶጎ ጵለቅማ ጵለቅ ዘርቦካ አፎን ሐሳባራንካካሞ ውታን ኮጋሬ፡፡ 30 ሮሮ ጵልናተ ሐም ይሐስን ጋዘን ባሪያሳ ኡስንካ ሀጵጋሲናኖ፡፡ 31 ገጰሞንቤ፤ ዕለትቤ፣ ጵጋቤም፤ ሐም ራብሽንቤ፣ እሪሞንቤ፣ ፓይላ የሪዘርቦን የለማa ክንካ ደሀን ኮጋሬ ጋራማተ፡፡ 32 የሱስ ክርስቶስካ ሐማንተ ባሪያካ የናተ ዘርቦንም ክጋራደ ግድ፡ ይትካሞ ክናተ ዘሪቦንም ጋሪ ማተ፤ ክናተ ይትሞ ቃባይናቤ፤ ክም ካሞ ኬልሻይና ይሐማቴ፡፡