1 ሐያንቴ ኢየሱስ ክርስቶስ ባርያሣ ምዛቅባራ ክደርደራቃሮ የራ ደናናንቴ ካም ሐርማቴ፡፡ 2 ቃቦ የሣካም ጰሀ ፎለንዛራ ሦጎ ኮዴ ፌን የርንዛራ ደንከጋሬ፡፡ 3 የጀደንታካ ሣደን የሣም ካም ኢየሱስ ክርስቶስ ለማ ኪንካ ባርያካሐማንቴ ካ ካይሣጲና የናንቴ፡፡ 4 ሣደቴ ደሀ ኢየሱስ ክርስቶስ ኪያፋንጰያ ኪዎደስካ ይትካም የራ አጋካ ኪለማ ኪንካ ክብርካ ሐፋጰና የሐፋጰደ፡፡ 5 አጋታካ ፌንኮሣ እንግርማንካም ጋርማቴ ኪና ሴሦና ሐንጰደናም ማአብካላ ያእንቶቤ ሜስን ዎድማን አሽኪንቶቤ ፋትውትቤ ቃብዘርቦቤ የርን አንንካ አሽኪድን ምስካቤ የር እግና ፃቅማና፡፡ 6 የራ ኪናካ ሐማንቴ ባርያሣ ጰጋናንቴ ኤሣርምና ዛራና ናአና ኪናአደ፡፡ 7 ይትካም አናብርካ የደን ዴታሮካ ሣደን የሳካም ቃቦና ኪናካ ማስድና የዳደ፡፡ 8 ታሀካም ፋር ዎጭቤ ጰገንቤም እርምንቤ ቆፂን ኤድም በኪንሣያ ሐሣዎ ሐምቴን ጌይጰደና የራ ፋይለ ውሊም ጋርማቴ፡፡ 9 ኤያ አና ብራስም ስራባራካ የቡለደኖ ኪም የቶዛጰንታካው ይት ሦጎ ኪንካ ፎገም የጰለቅናኖ፡፡ 10 አሽካዳ ብሽንካ ደግያ ማታንቴ ሜቴን አሽካያ ኤያሐለም የት አርስድው፡፡ 11 አጎታ ግርክሮካም ይሁ ሮካም ታጲምናካም ታካጰደናካም ጋለካም አስኩቱ ሐንጰይና ዎድማን ኤና ካም ጌጰ ሐማንቴ ዎናዎና ደጲማም የርካለ ፍር ኢየሱስ ክርስቶስ ፋይለ ውሊጋንትና፡፡ 12 ሐያንቴካ ኤና ጫራግሽጰናቤ ኤና ናሽጰናቤ ባርያሣ ጎንጴ የደንካ ሐማንቴ ቡርቃምንቤ ፃለምንቤ ጫራግማምንቤም ደንሽንቤም አርሣንቴ ደሐማቴ፡፡ 13 ይት ሦጎ ኪንካ ኪም ጎሽንቴ የሣካም ዎሀ ዎምካም ጰገስቴ የደርካም ከሸጴሐማንቴ ጌይማቴ ጌጰ የግያ ኮሽጴ ኪያማያ ግያ ይትካም ዎንም ከሸጴ ሐማንቴ ጌይማቴ፡፡ ጌጰ የግያ ኮሽጴ ኪያማያ ግያ ይትካም ዎንም ከሽጴ ሐማንቴ ጌይማቴ፡፡ 14 ኪና ፋይለ ውሊዛራ ውሊምካም ካሎን ካለ ሐያንቴ ደሣያ ናሽማካ ደማቴ፡፡ 15 ብሽ ካለግያ ደንቴ ይናቴ የምግስማጰናም ክርስቶስሣ ፃሊኖ ዎይለምኖ የሣ ብአርሴ ኤድ ጎሽጰያ ደሀማቴ፡፡ 16 ኢየሱስ ክርስቶስሣ ቃሊኖ የካለ ኮያፄ የለማኪንካካም ኮዴ ይትሦጎ ካም ኪንካ ሐምካ ሁሊም ፋይለ ታማራንቴ ኪምካም ኪሊማቴ ዎርሣንካም ሌማንቴ ባርዩ ኤደግያ ማታንቴ ጎሽን እምታ ወይለም የሣካ ባርያናንቴ ጵስማቴ፡፡ 17 ኪንካ ሐማንቴ ባርያናንቴ ጎሽን እምቴ የደና ፃሊና ቃሊንካካም ሐፍሐፍ የአሽካንካካም ውሊም ፋይለ ኢየሱስ ናብንካ አሽኪማቴ፡፡ 18 ሜናቶ ጌጰካ ሐማንቴ ፃሊንካ አጎና የሣናንቴ ኤሣርማቴ፡፡ 19 አንጌናቶ ማና የሣካም ናሽማቴ ኬናንቴ ዛርቦ የማትናኖ፡፡ 20 ናናቶ የሪከኖ ጌጰም ኮዎዝንሣካ ሐማንቴ ሐምባቤ ሐናቤናንቴ የር ውሊካ ኬናንቴ ኤሣርማቴ፡፡ 21 ዎምባናቶ ካንታ የጂናኖ ናና የሣካም ጋለን ኬጋሬ፡፡ 22 ዎድማን ኤናቶ ኤድም ዎዝንሣናንቴቤ ሼደጰናንቴ ሐማንቴ ቃቦ ፃሊካ ወይለምንካካም ጌጰም ኩርትጰንቴ ፌንኮሣ ጌጰ የሣናንታካም ፋይለ ሁሊካ ኬናንቴ ኤሣርማቴ፡፡ 23 ፋይለ የአሽካደኖካም ኤድ ናሦናንቴ ትማም ጌጰናንቴ ሐማንቴ የአሽካይናም ፋይድማቴ ወይለም ካለካ አሽኪማቴ፡፡ 24 ጌጰካ ሐማንቴ ብድርና ከይና የቻይናም ካም ዎሊማቴ ኬደንካም ይት ጴስድና ይናንቴ የአሽካያካም ኢየሱስ ክርስቶስና፡፡ 25 ሴሶን ኤያካም ይሳ አንንጋይናክም ሐፋና ኪያፋይ ውሊም ካም ካለ ሐያቴ ሼደጰደ፡፡