6

¹ ባርዮን ኤና ጱፃዻዳቴ ይቴ ኬዶን ዋዳንካ፣ ግርክባራ ናኣዳና ኣሁድ ኤና፣ ይሁዳ ግዶር ዳና ኣይሁድናዛራ ጉንድምዲና፤ ኬ ይንናንቴ ኬጉንድማዶኖ ሮሮውል ዳኣኖንሳ ካሽንቶንባራ ኬሳ ዳልሶናም ፃሊ ሼዳዻድሞንታኻና። ² ኣጋታኻ ኤና ይእስድና ታጲ ላማና ኤና ኣምናዳና ዋኒም ክዛራ ፑኡሻንቴ ኬግያ ይንታና ኬያማዶ፦ “ዎቲ ዳኣኖን ካሻናንቴ ሃማንቴ ባርያሳ ዼላቅን ዋድማን ዎጋሬኻናንቴ ዎም ዛግስማሞ። ³ ኣጋታኻ ዎንዳና ናናቶ፣ ዬግዶርካ ኡስን ጋዛንካ ዳና ሃማሞን ይንሳ ይዳና ኤዲ ዼስዲ ꬆጳ ካምማቴ፤ ጌጳሞን ኮም ክናንቴ እማና ዎእማይ። ⁴ ኮዶን ዎቲ ባርያም ምስካናንቴቤ ዼላቅንም ጌያናንቴቤ ዋቻዻና ዎዋቻዻይ።

⁵ ቃባ ኣጋ ኬ ፓይላ ውልም ዋዝንስዲና፤ እምነትንካቤ ኡስን ጋዛንካቤ ፆፃዳም እስጢፋኖስቤ ሃያንቴኻሞ ፊልጶስቤ፣ ጵሮኮሮስቤ፣ ኒቃሮናንቤ፣ ጢሞናንቤ፣ ጰርሜናንቤ፣ ኣይሁድ ኤድ ማታዳ ፔን ኣንፆኪያ ኤያ ኒቆላዎስቤም ኬ ካምዲና። ⁶ ኤና እግናምካሞ ኬ ኣንሳቴ ናዴ ኤና ይእስድናሳ ዎትሮ ዎይስዲና፤ ኤና ይእስድናኻሞ ባርያም ምስካንቴ ኣን ይሳም ኬዛራ ዎድዲና።

⁷ ባርያሳ ዼላቅኖኻሞ ጌጳዳቴ ያእዲና፤ ኢየሩሳሌም ግዶር ኤና ኣምናዳና ካሎን ጱፃዻዳቴ ያእዲና፤ ካህንናሳካሞ ኤዲ ጱፅ ኣምንዲና። ⁸ ዋዳን ኦጎኻ እስጢፋኖስ ባርያሳ ፃላሞንካቤ ካንታንቤኻ ማታንቴ ዛርስንሳ ባክሮ ዬርን ዬርሻዻንቤ ዬርን ሃምማንቴ ዼስሞን ግያንዶንቤም ሃይቴና ክዶ። ⁹ “ኤና ካይሳሞንባራኻ ውታዳናሳ ምስኮን ኦና” ሃንዻያ ግዶር ዳና ኤና ቀሬናባራቤ፣ እስክንድርያባራቤ፣ ኪልቂያባራቤ፣ እስያ ፔናባራቤ ናኣዳና ዼላቅ ዻሳንቴ እስጢፋኖስ ላማ ዜርማ ካርስዲና፤ ¹⁰ ኮዶን ኖ ይንካ ክዼላቃይን ሃማሞንቤ ኡስን ጋዛንቤም ኬ ባሻናንቴ ቻላድማሞ።

¹¹ ሃያንቴ ኬ “እስጢፋኖስኖ ሙሴቤ ባርያቤም ክእርካ ዎቲ ኤሳርዲና” ሃማይና ኤናም ዼሳዽማ ዎይስዲና።

¹² ጎያ ኣጋኻ ሃማንቴ ኬ ዛርስንቤ፣ ዞንዛናቤ፣ ኤና ሙሴ ዳምብን ታማርሳይናቤም ዻሳንቴ፣ እስጢፋኖስኖም ዬድሳንቴ ኤና ኣሁድናሳ ብቶን ታኻይናሳ ዎትሮ ኬ ባእዲና። ¹³ “ኤያ ካ ራቃን ጋዛን ኮሮቤ ዳምብንዛራቤ እርሞን ካላኻሞ ጋራድማሞ” ሃማንቴ ክዛራ ኤና ፖጋሞንካ ማኛሞን ዎያይናምካሞ ኬ ዎይስዲና። ¹⁴ ኣጋኻሞ ኣጋ ናዝሬት ጋንታ ኢየሱስ ራቃ ካም ክካይሳንቤ ሙሴባራኻ ዳምብን ዎቻዶንም ክኦስካይንም ክጌይካ ዎቲ ኤሳርዲና።

¹⁵ ኤዲኖ ብቶን ታኻዻይሮ ዳርቃዶኖኻሞ ፓይላ እስጢፋኖስም ላይ ኬሼድና ዎትኖ ክሳ ኬኻላ ባርያሳ ኤርጎ ኤድ ዎቲግያ ማትዲና።