5
1
ኤያ ሃናንያ ሃንዻያ ይሳ ሜን ሳጲራ ላማ ክንካ ራቅ ሻንሽዲና።
2
ክሳ ሜኖኻሞ ዼሳንቴ ኖ ብሬና ይሻንሻዳና ግዶርካ ዋኒም ሺእሻንቴ ሽዻዳናም ባኣቴ ናዴ ኤና ይእስድናሳ ኣንሮጎ ዎድዲና።
3
ኮዶን ጴጥሮስ ይንታና ክያማዶ፦ “ሃናንያ፣ ኡስን ጋዛን ሃታይሴኻናንቴቤ ራቅን ሃሻንሻዶንሳ ብሬን ዋኒም ሃሽእሽኻናንቴ ሜሺ ሃሳ ዎይላምሮጎ ዬር ዛርቦ ሃርናንቴ ክፆኦሳዴ?
4
ኣኻራ ሃሻንሽማሳ ብራር ኤ ሃንቲሞ? ሃሻንሻዃኻሞ ብሬና ሃሳ ኣንሮሞ ኬዶኖ? ኤ ዬራ ካም ሃሳ ዎይላምካ ሃስ ሃቃባዴ? ያ ባርያምና ሃታይሳዶ ኤዲ ትማሞ ሃታይሳዶ።
5
ሃናንያኻሞ ኣጋም ይሳ ኤሳራ ጳርፃንቴ ጃይዲና፤ ኤና ኦጎም ኤሳራዳና ፓይላ ጌጲ ኩርትንዽዲና።
6
ባርሻናኻሞ ዻጳንቴ ኤያም ቱፓንቴ ባኣቴ ቃልቴ ዱክዲና።
7
ክሳ ሜኖኻሞ ሳኣት ማካምግያ ካፓንቴ ዬራ ሃምማዳም ዼስማ ናዴ ኣርድዲና።
8
ጴጥሮስካሞ ኮግያ፣ “ይንዳ እናንቴ ጌይማ፤ ራቅን ዬሳም ብሬና ክናዛራው ዬሻንሻዶ?” ሃምዲና።
ናኻሞ ክግያ፣ “ዪኒ፣ ኮይና ክናዛራና ዎሻንሻዶ” ና ኮያማዶ።
9
ጴጥሮስካሞ ኮግያ፣ “ጌጳሳ ኡስንም ታይሳናንቴ ሃስ ኦጎንታ ዬዋድማዴ? ኤና ሃሳ ኣንጋም ዱካዳና ማታቴ ናዴ ኮታ ሙልጳፖሮና ኬዶ፤ ሃምካሞ ባኣቴ ያኣና ኬያኣይ” ሃምዲና።
10
ናኻሞ ኣጋዛራ ክሳ ራን ባክሮጎ ጳርፃንቴ ጃይዲና፤ ባርሻናኻሞ ኬኣርዲና ና ጃንቴ ኮዳዃ ሃፕዲና፤ ኮም ቡላንቴ ኣንጋ ዱክንሳ ዴሞሮ ዱክዲና።
11
ባርዮን ኤና ፓይላቤ ኤና ኦጎም ኤሳራዳናቤዛራ ፓይላ ኩርታሞ ጌጲ ኣርድዲና።
12
ኤና ይእስድናኻሞ ዛርስንሳ ባክሮ ዬርን ጱፅን ሃምማን ግያንዶንቤ ዬር ዬርሻዻያቤ ሃይዲና፤ ባርዮን ኤናኻሞ ሰላሞንሳ ያዮን ራቃ ሃንዻያ ግዶር ፑጭቴና ኬዶ።
13
ኤዲ ካላኻሞ ኬዛራ ካይማናንቴ ዛጋዳ ቆልማሞ፤ ኮዶን ኤዲኖ ኬም ጎባና ኬጎባይ።
14
ኤና ኣንጌና ጱፅናቤ ሜና ጱፅናቤ ሮሮ ውል ኣምንቴ ኬዛራ ካይምቴና ኬዶ።
15
ኣጋኻ ሃማንቴ፣ ጴጥሮስ ኦጎኻ ክሳግና ክሳ ሹፖኖ ኤና ዋኒም ኮላኣሴኻናንቴ ሃማንቴ ኤና ሃጅሞና ኬሳም ኣልጋንካቤ ሻላንካቤኻ ባኣቴ ጎይን ዴሞሮ ዎኦስቴና ኬዶ።
16
ኢየሩሳሌምንሳ ዴሞሮ ዳና ካታማና ግዶርካ ኤና ሃጂሞናቤ ኤና ቤሮን ይሽማዃ ጋሊቴን ዳናቤም ኤዲኖ ባኣቴ ንቴንዶኖ ራቅንም ቆቅስቴና ኬዶ፤ ኤና ኬ
ባኣዳናኻሞ ፓይላ ፓሽቴና ኬዶ።
17
ኣጋኻ ሃማንቴ ካህንና ጋራቤ ክላማን ዳና ሰዱቃዊና ፓይላ ኬዛራ ፆላሳዽዲና፤
18
ኤና ይእስዲናምካሞ ኬ ዬዳንቴ ዻክን ኦኖሮ ኣርስዲና። 19 ኮዶንካሞ ባርያሳ ኤርጎን ኤያ ሶትንካ ናዴ ዻክን ኦኖንሳ ሙልዻፖን ቡላንቴ ኬም ቡላንቴ፣ ኬግያ፦
20
“ይማ፣ ባርዮን ኦኖንሳ ሻንሮ ዎይማቴ፤ ሳዳን ዼላቅን ኮም ፓይላ ዛርስንናንቴ ጌይማቴ” ና ክያማዶ።
21
ፔኖ ኮሳፃናኻሞ ጎያ ኬናንቴ ጌይዻዳኻ ሃማንቴ፣ ኬ ባርዮን ኦኖን ኣርዳንቴ ዛርስን ታማርሳን ካርስዲና።
ካህንናሳ ጋራቤ ኤና ክላማን ዳናቤ ናዴ ኣይሁድናሳ ብቶን ታኻይናቤ እስራኤልናሳ ዞንዛናቤም ክዛራ ቡክናንቴ ፑእሽዲና፤ ኤና ይእስድናም ኣንሳቴ ናዼኻናንቴ ዻክን ኣኖንዛራ ኬ ኤናም ይእስዲና።
22
ኤና ባርዮን ኦንኖን ዻቃናይናኻሞ ዻክን ኦኖንዛራ ቃልቴ ኬም ሃፓድማሞ፤ ማታቴ ናዴ ኬግያ ይንታና ኬያማዶ፦
23
ዻክን ኣኖኖ ፃሊ ዲፃዻዃና ኮዶ፤ ኤና ዻቃናይናኻሞ ሙልዻፖሮ ዎያንቴ ኬዳዃና ዎያፓዶ፤ ኮዶን ቡላንቴ ዎኣርዲና ኢሮጎ ኤዲ ካላኻሞ ቆልማሞ።
24
ኤና ባርዮን ኣኖን ዻቃናይናሳ ጋራቤ ካህንናሳ ጋርናቤ ዬራ ኣጋም ኤሳራንቴ ኬናንቴ ዬር ዋና ኮማታዃ ኬ ዬርሽዲና።
25
ዋዳ ኣጋኻ ኤዲ ካላ ናዴ ኬግያ፣ “ኤና ዻክን ኣኖን ዬኣርሳዳና ባርዮን ኣኖንሳ ሻንሮ ዎያንቴ ዛርስንም ታማርስቴና ኬዶ” ና ክያማዶ።
26
ኤና ባርዮን ኣኖን ዻቃናይናሳ ጋራ ዎታደርና ይሳ ላማ ክንካ ቃልቴ ኬም ኣንሳቴ ናእዲና፤ ኤና ኬም ኣንሳቴ ናኣዳናኻሞ ዛርስኖ ኬም ሱኒንካ ፓኻና ሃማንቴ ይኩርትንዻዶንታኻ ካንታኻ ኣንሳቴ ናኣድማሞ።
27
ኤና ይእስድናምካሞ ኬ ኣንሳቴ ናዴ ኤና ብቶን ታኻይናሳ ዎትሮ ዎይስዲና፤ ኤና ኣይሁድናሳ ዳምብን ኣሽካይናሳ ጋራኻሞ ኬኻላ ይንታ ሃማንቴና ክኣይሳዶ፦
28
“ናባ ካኻ ታማርሳን ዬጋሬኻናንቴ ብርሳንቴ ዎቲ ዬናንቴ ጌይዲና፤ ኮዶን ዬቲ ዬሳ ታማሪንካ ኢኢየሩሳሌምም ፆኦስዲና፤ ሃያንቴኻሞ ኤያ ካሳ ማኣስን ዎም ኣይሳዼኻናንቴ ታኻንቴ ዬቲ ዻጵዲና!”
29
ጴጥሮስቤ ኤና ይእስዲና ዋኒቤ ማሳንቴ ይንታና ኬያማዶ፦ “ኤና ናንቴ ዎኤሳራንናንቴ ባርያናንቴ ዎቲ ዎኤሳራይኖ ዛግሳና ኮዛግሳይ!
30
ዬቲ ሃቃንዛራ ዝታንቴ ዬዴሳዳ ኢየሱስም ዎምባና ባርያ ዴምጲባራኻ ዻስዲና፤
31
ኖኻሞ እስራኤልናንቴ ሴሶንባራኻ ማትንቶ ጎይቤ ኬሳ ሴሶንሳ ጋርንቶ ጎይ ክዴኻናንቴ፣ ባርያ ኪም ውልሳ ጳባራ ክዴኻቤ ዻኣሾ ኤድ ሃያንቴ ይሳ ምዛቅባራ ዼግ ዼግ ሃይዲና።
32
ዎቲካሞ ዬራ ክናሳ ማኚና፤ ሃያንቴኻሞ ባርያ ኤና ክናንቴ ኤሳራይናናንቴ ክእማዶኖ ኡስኖ ጋዛኖ ማኚና።
33
ኤናኻሞ ዼለቃ ኣጋም ይኤሳራና ጌጲ ዻጋስዲና፤ ኬም ዴሳናንቴኻሞ ዛግዲና።
34
ኮዶን ዛርስን ውልሳ ጎባዻያ ሙሴ ዳምብን ታማርሳያ ኤያ ገማልያል ሃንዻያ ፈርሳዊ ካላ ኤና ብቶን ታኻይናሳ ባክሮ ዎያንቴ ኤና ይእስድናም ኤና ኬም ጳልንዛራ ኬቡላዃ ሾሊ ኬካፔኻናንቴ ጌይዲና፤
35
ኤና ብቶን ታኻይናግያኻሞ ይንታና ክያማዶ፦ “ዬቲህ እስራኤል ኤናቶ፣ ኤና ክናዛራ ዬራ ሃያናንቴ ዬዛጋዳም ፃሊ ሃያንቴ ዬቃበኻ ዛግሳና ኮዛግሳይ።
36
ኣና ካሳ ብራር፣ ኤያ ቴዎዳስ ዻጳንቴ ዪም ጌጲግያ ክያያዃ ኤዲ ማቶ ኦይዲ ኪም ጫግዲና፤ ኮዶን ኪም ዴሳዽዲና፤ ኤና ኪም ጫጋዳናኻሞ ፓይላ ላልምዲና፤ ክሳ ዬራኻሞ ሽዽዲና።
37
ክሳ ራስባራኻሞ፣ ዛርስን ፓይዳዻን ዋዳንካ ገሊላ ኤያ ይሁዳኻሞ ዻጳንቴ ዛርሲ ዻስዲና፤ ኤዲ ኪም ጫጋዳኻሞ ሃፕዲና፤ ኮዶን ኖኻሞ ካይዲና፣ ኤና ኪም ጫጋዳናኻሞ ላልምዲና።
38
ኣጋታኻ ታኻሞ እንታ ዬናንቴ እጌያያ ኤና ክናም ጋርማቴ፣ ዬላኣስናኖ፤ ኬሳ ቃቦኖ ዎይካሞ ኬሳ ዋድማኖ ኤዲባራ ኮዳና ካያና ኮካያይ፤
39
ኮዶን ባርያባራ ኮዳና ዬቲ ኬም ዎይሳናንቴ ቻልማሞ፤ ኬዳ ዬቲ ባርያ ላማ ክንካ ዋጭምቴ ዬዶ።”
40
ኬኻሞ ክሳ ክሊማሲም ኤሳራንቴ፣ ኤና ይእስድናም ግስንሳንቴ ዻይስዲና፤ ፕርካም ኢየሱስ ናብንካ ዼላቃን ኬጋሬኻናንቴ ጌያንቴ ኬም ጋርዲና።
41
ኤና ይእስድናኻሞ ናብን ክሳኻ ሃማንቴ ኤና ሃንጫዻን ይዛግሳይና ኬዶንታኻ ኤና ብቶን ታኻይናሳ ዎትሮኻ ዋዛኻ ውታንቴ ያእዲና፤ ባርዮን ኦኖሮቤ ኦኖና ግዶርቤ፣ ኢየሱስ
ኖ ክርስቶስ ክዶንም ሮሮ ውል ታማርሳሮኻቤ ጌያሮኻቤ ኬ ራስዛራ ካላኻሞ ማታድማሞ።