4

¹ ጴጥሮስቤ ዮሃንስቤ ዛርስንናንቴ ጌይቴ ኬዳዃ፣ ካህንናቤ ኤና ባርዮን ኦኖን ዻቃናይናሳ ጋራቤ ሃያንቴኻሞ ሰዱቃዊይና ዼሳዽማ ኬዛራ ናእዲና። ² ኬኻሞ ኤና ይእስዲና ዛርስንም ኬ ታማርሳዳኻቤ ኢየሱስካ ሃማንቴ ዴምጲንባራኻ ዻጲንቶኖ ኮዶንም ኬጌያዳኻ ጌጲ ዻጋስዲና። ³ ጴጥሮስቤ ዮሃንስቤምካሞ ኬ ዬድዲና፤ ዋዳኖኻሞ ሶቲ ኮዶንታኻ ኮሳ ሶፃዛራ ኬም ዻክን ኦኖሮጎ ኬ ዎኦስዲና። ⁴ ይንታ ኮዶንካሞ ኤና ዼላቅን ኤሳርዳና ግዶር ኤዲኖ ጱፅኖ ኣምንዲና፤ ኣንጌናሳኻሞ ፓይዶኖ ሺ ዶጝ ዬስክዲና።

⁵ ቡርን ኮሳ ኤና ኬሳ ጌጲናቤ ዞንዛናቤ፣ ሃያንቴኻሞ ኤና ሙሴ ዳምብን ኡካይናቤ ኢየሩሳሌም ግዶር ክንካ ፑጭዲና። ⁶ ካህንናሳ ጋራ ሃናቤ፣ ቀያፋቤ፣ ዮሃንስቤ፣ እስክንድሮስቤ ካህንናሳ ጋራሳ ኤዳናቤ ፓይላ ኦጎታር ናእዲና። ⁷ ኬኻሞ ጴጥሮስቤ ዬዋስቤም ይሳ ባክሮ ዎይሳንቴ፣ “ዬራ ካም ይንካ ዬያያዶኖ ሃር ካንታኻቴ ዎይካሞ ሃው ናብንካቴ?” ሃማንቴ ኬ ኦይስዲና።

⁸ ዋዳን ኦጎኻ ጴጥሮስ ኡስን ጋዛንካ ማታንቴ ኬግያ ይንታና ክያማዶ፦ “ዬቲህ ክና ዛርስንሳ ኤና ጋርናቤ ዞንዛናቤ፤ ⁹ ሃይታላ ኤያ ራንሳ ማልግማ ናንቴ ዬራ ፃላ ሃይዻዳም ሃሞንታ ክፓሻዶንም ዬኦይሳያዳና፤ ¹⁰ ዬቲህ ዬዝታዳኻ ኮዶን ባርያ ዴምጲንባራኻ ይዻሳዳ ናዝሬት ጋንታ ኢየሱስ ክርስቶስ ናብንካ ክፓሻዶንቤ ዬሳ ዎትሮ ክውያዶንቤም ዬቲህ ዬዳናኻሞ እስራኤል ዛርስኖኻሞ ፓይላ ካም ዼስማቴ። ¹¹ ኖኻሞ፣

“ ‘ዬቲህ ኤና ኦኖን ኣሽካይና ዬቦዋዳ፣

ሱና ኣጋ ¹ ኦኖንሳ ጉራሲና።’

¹² ዻቆ ኤዲ ኣብ ሃውካኻሞ ሃፓዽማሞ፤ ዎዻቄኻናንቴ ኤናናንቴ እንዻዳ ናባ ካሳ ኦባራ ፖላንሳ ቾባራ ናቢ ኣብ ዳ ቆልማሞ።

¹³ ኤናኻሞ ጴጥሮስቤ ዮሃንስቤ ኩርትንዺማ ኦጎንታ ኬዼላቃዶን ይያፓዶን ዋዳንካ፣ ኤዲ ታማርዲማ ኬዶንም ዼሳንቴ ኬናንቴ ዬር ዋና ማቲዲና፤ ኣና ኢየሱስ ላማ ክንካ ኬዶን ኬ ዼስዲና። ¹⁴ ኤያ ፓሻዳም ኦጎታር ኬላማ ክንካ ዎያንቴ ክዳዃ ይያፓዶንታኻ ዬር ኬጌያያ ኬኻላ ካይዲና። ¹⁵ ሃያንቴ ኤና ብቶን ታኻይናሳ ዎትሮ ኬም ኬውቴኻናንቴ ኬ ጌይዲና፤ ሃያንቴኻሞ ኬ ክንካ ፑጫንቴ ሃሳውዲና። ¹⁶ ይንታኻሞና ክግያ ኬያማዶ፦ “ታ ናንሲ ኤና ክናም ሃስ ዋዬ? ኤዲኖ ኢየሩሳሌም ግዶር ዶኖ ፓይላ ዬራ ሃምማን ግያንዳና ኣንን ኬኖንካ ሃይዻዳናም ዼስዲና፣ ኣጋታኻ ካም ካይስንሳናንቴ ዎቲህ ቻልማሞ። ¹⁷ ይያማንካሞ ዬራ ካ ዛርስንሳ ባክሮ ካሎን ሻማን ክጋሬኻናንቴ፣ ኤና ክና ናባ ካኻ ፕርካሞ ኤዲ ካላናንቴኻሞ ጌያን ኬጋሬኻናንቴ ኬም ኩርቲንሳንቴ ዎጌዬ።”

¹⁸ ኬም ግስንሳንቴኻሞ ኢየሱስ ናብንካ ካላኻሞ ዼላቃን ኬጋሬኻናንቴቤ ታማርሳን ኬጋሬኻናንቴ ኬ ኬናንቴ ጌይዲና። ¹⁹ ኮዶን ጴጥሮስቤ ዮሃንስቤ ማሳንቴ ኬግያ ይንታና ኬያማዶ፦ “ባርያናንቴ ኤሳራን ጋራንቴ ዬናንቴ ኤሳርዻይኖ ልኪ ኮዳና ይንዳ ዬቲህ ጌይማቴ፤ ²⁰ ዎቲህ ዎባራንካ ዬራ ዎያፓዳናቤ ዎኤሳራዳናቤም ጌያን ጋርማሞ።”

²¹ ፕርካሞ ኬም ኩርትንሳንቴ ጌያንቴ ኬም ጋርዲና፤ ኣጋኻሞ ዛርስኖ ፓይላ ዬራ ሃምማዳናንቴ ባርያናንቴ ጎሺን እምቴ ኬዶንታኻ ኬዛራ ዬር ዛርቦ ሃያናንቴ ኬ ቻላዲማሞ። ²² ኤያ ዬራ ሃምማን ግያዳኻ ፓሻዳሳ ቦንኖ ክሳ ኦይዲታምሳ ጳባራና ኮዶ። ²³ ጴጥሮስቤ ዮሃንስቤ ኬም ቡልዻዃ ኤና ይሳዛራ ማታቴ ቃልቴ ኤና ካህንናሳ ጋርናቤ ዞንዛናቤሳ ኬዛራ ዬራ ጌይዻዳናም ፓይላ ኬናንቴ ጌይዲና። ²⁴ ኬኻሞ ክናም ይኤሳርዶን ዋዳንኻ ክንካ ማታንቴ ናቅሲ ይሳም ዼግ ሃያንቴ ባርያዛራ ይንታና ኬያማዶ፦ “ውልሳ ጌጳ ባርያ፣ ያ ፖላንቤ፣ ፔንቤ፣ ኛፓስንካሞ፣ ኬሳ ኢሮን ዳናም ካውል ፓይላ ዎድዲና፤ ²⁵ ያ ኡስን ጋዛንካ ሃሳ ዋድማን ኤያ ዎምባ ዳዊት ኣፖንካ ይንታ ሃማንቴ ጌይዲና፦

“ ‘ቶርስኖ ሃርናንቴ ኮዻጋሳዴ?

ኤ ኤዲኖ ሃርናንቴ ሱን ባንቆ ኮፓኬ?

²⁶ ኤና ፔን ብቲና ጎይዲና፤

ኤና ፔን ግሻይና ክዛራ ፑጭዲና፤

ጌጳዛራቤ

ኤያ ክሳ ክካማዳዛራ ² ኬ ኦሺዲና።’

²⁷ ጎንዼኻሞ ሄሮዶስቤ ጳንጦስ ጲላጦስቤ፣ ቶርስን ዋኒቤ እስራኤል ዛርስንቤ ላማ ካታማስ ካሮ ያ ሃካማዳ ሃሳ ናሳ ጋዛስ ኢየሱስዛራ ባንቆ ፓኻናንቴ ፑጭዲና፤ ²⁸ ኣጋኻሞ ክያማዶኖ ሃሳ ካንታንቤ ቃቦንቤ ዬራ ኣና ኬታኻዳ ጎንዼ ክያሜኻና። ²⁹ ጌጳ ታኻሞ ዎም ኬኩርትንሳይንም ሼድማ፤ ሃሳ ዋዲማን ኤና ኣፖን ሃሳም ኩርትንዺማ ጌያናንቴ ኬቻሌኻናንቴ ሃይማ። ³⁰ ፓሽሻናንቴ ኣንን ሃሳም ጳስማ፤ ናሳ ሃሳ ጋዛስ ኢየሱስ ናብንካ ዬራ ሃምማን ግያንዳናቤ ዬራ ሃምማንቴ ዼስምናቤም ሃይማ።”

³¹ ኬኻሞ ባርያም ኬምስካዃ ራስባራ ራቃ ይንግዶር ኬዳ ዝግምዲና፤ ኬ ፓይላ ውልዛራ ኡስኖ ጋዛኖ ካይምዲና፤ ባርያሳ ዼላቅንምካሞ ኩርትንዽማ ኬ ጌይዲና። ³² ኤና ኣምናዳናኻሞ ፓይላ ዎይላም ካላኻቤ ቃቦ ካላኻቤ ማታንቴ ክንካና ኬዶ፤ ይሳ ኮይና ዳናምካሞ ፓይላ ኬ ይንቲ ሃይዲና፣ ኤዲ ይንቲግያ ሶጎ ሃያንቴ ፓይዳያ ካላኻሞ ቆልማሞ። ³³ ኤና ይእስዲናኻሞ ጌጳ ኢየሱስሳ ዴምጲንባራኻ ዻጳዻዶንም ካንታኻ ጌያዳቴ ብራዛራ ያእዲና፤ ኬ ውልዛራ ባርያሳ ኬልሾ ጌጲና ዶኖ። ³⁴ ኬሳ ባክሮኻሞ ጋሎ ኤድ ካላኻሞ ቆልማሞ፤ ኣጎኖኻሞ ኬ ይሳ ሃምናም ዎይካሞ ይሳ ኣኖናም ፓይላ ሻንሻንቴ ኮይናም ባኣቴ ናዴ፣ ³⁵ ኤና ይእስድናሳ ኣንሮ ዎድቴ፣ ኤና ፓይላ ውልናንቴ ዛግሳይናግያ ካሽቴና ኬዶ።

³⁶ ቆጵሮስ ግዶር ዳ ዮሴፕ ሃንዻያ ሌዊ ኦሎ ኤዲ ካላ ዳይዲና፤ ኤና ይእስድናኻሞ ኪም ባርናባስ ሃማንቴ ግስምዲና፣ ዎኻልኖ ክሳካሞ 'ሌንሳ ናሶ' ና ሃንዻዶ። ³⁷ ኖኻሞ ፔያ ይሳም ሻንሻንቴ ናዴ ኤና ይእስድናሳ ኣንሮጎ እምዲና።