3

¹ ሃዮ ካላ ጴጥሮስቤ ዮሃንስቤ ባርያም ምስካዻን ዋዳንካ ሮሮንሳ ሳኣት ሳልካ ባርዮን ኦኖንዛራ ውትቴና ኬዶ። ² ባርዮን ኦኖንዛራ ኤና ኣርዳይናኻላ ዬር ክምስኬኻናንቴ ሮሮ ውል ኤና ኪም ባኣቴ ናዴ ፃሊ ሃንዻይን ባርዮን ኦኖንሳ ሙልዻፖሮ ዳኣርሳዻያ ኤዲ እንዳንሳ ኢንባራ ይውታዳዛራ ያይማ ኤዲ ካላ ዳይዲና። ³ ኖኻሞ ጴጥሮስቤ ዮሃንስቤ ባርዮን ኦኖንዛራ ኬኣርድካ ሃፓንቴ ኬኻላ ዬር ምስክዲና። ⁴ ጴጥሮስካሞ ዮሃንስማላ ዳንቴ ኤያም ላይ ሼዳንቴ፣ “ይንዳ ዎም ሼድማና” ክያማዶ። ⁵ ኤያኻሞ ዬር ካላ ኬኻላ ሃፓናንቴ ማይሻንቴ ኬም ላዪ ሼድዲና።

⁶ ኮዶን ጴጥሮስክ ክግያ፣ “እሳ ብሬቤ ዎርቄቤ ቆልማሞ ኮዶን እሳ ዳም ሃናንቴ እማና እማይ፤ ናዝሬት ጋንታ ኢየሱስ ክርስቶስ ናብንካ ዻጳንቴ ያይማና” ክያማዶ። ⁷ ክሳ ኣና ምዛቃምካሞ ዬዳንቴ ዻስዲና ኣጋዛራ ክሳ ራንቤ ጋራን ቡቆናቤ ዋቻዽዲና፤ ⁸ ኖ ጩራንቴኻሞ ትፕ ዎይዲና፤ ያያንካሞ ካርስዲና፤ እስቤ ኦራቤ ይቴቤ ጩርቴቤ ባርያም ጎሻዳቴ ኬላማ ባርዮን ኦኖንሳ ሻንንዛራ ኣርድዲና። ⁹ ዛርስኖኻሞ ፓይላ ኖ ያይቴ ባርያም ጎሽቴ ክዶን ይያፓዶን ዋዳንካ፣ ¹⁰ ኤያ ካ ኣና ፃሊን ሃንዻይን ባርዮን ኦኖንሳ ሙልዻፖሮ ዳርቃንቴ ምስክማያ ክዶንም ዼስዲና፤ዬራ ክዛራ ሃማዳ ኬናንቴ ካሎን ዬር ዋና ማትዲና። ¹¹ ኤያ ፓሻዳኻሞ ጴጥሮስ ዮሃንስቤም ዬዳንቴ ክዷዃ፤ ዛርስኖ ፓይላ ኬናንቴ ካሎን ዬር ዋና ኮማቷዃ ኬ ይንግዶር ኬዳ ሰላሞንሳ ያዮን ራቃ ሃንዻያዛራ ጎባኻ ናእዲና። ¹² ጴጥሮስካሞ ኦጎም ይያፓዶን ዋዳንካ ይንታና ኬግያ ክያማዶ፤ “እስራኤል ዛርስናቶ፣ ኮም ሃርናንቴ ካሎን ዬር ዋና ሃያንቴ ዬሼዴ? ሃያንቴኻሞ ዎሳ ካንታንካ ዎይካሞ ዎሳ ጋዛሞኻ ኤያ ካ ፓሻንቴ ክያዬኻ ዋያዳግያ ፓይዳንቴ፣ሃርናንቴ ዎም ላይ ኦጎንታ ዬሼዼ? ¹³ ዬቲህ ክጄኻናንቴ ሳስካንቴ ዬእማዳ፣ጲላጦስ ቡላናንቴ ክዛጋዶንካሞ ክሳ ዎትሮ ዬዜርማዳ ዎምባና ባርያ፣ኣብራሃምቤ፣ይሳቅቤ ያእቆብቤ ባርያናሳ ይሳ ኢየሱስም ጎሽዲና፤ ¹⁴ ኤያ ጫራጛቤ ጋዛስቤም ዬቲ ቶዛዻንቴ ኤናም ዴሳዳም ዬናንቴ ክቡሌኻናንቴ ዬቲህ ጲላጦስም ምስክዲና፤ ¹⁵ ኤያ ሳዳን ይንካ ሃፓዻያም ዬቲህ ዴስዲና፤ ኮዶን ባርያ ኪም ዴምጲንባራኻ ዻስዲና፤ ዎቲካሞ ኦጎናንቴ ማኚናና። ¹⁶ ካ ኤያ ዬያፓያቤ ዬዼሳዳ ክዋቻዻዶኖ ኢየሱስ ናብንካ ኣምናንቴና፤ ዬቲህ ፓይላ ውል ዬያፓዳግያ ጫንቃል ክፓሼኻናንቴ ሃያዶኖ ኢየሱስሳ ናብንቤ ክንካ ሃማንቴ ሃፓዻን እምነትንካና።

¹⁷ እና ናናቶ፣ ታኻሞ ዬቲህ ይንናንቴ ኮም ዬያያዶኖ ዬሳ ኤና ጋርና ጋንታግያ ዼስማ ዬያያዶንም እንታ ዼስዲና። ¹⁸ ኮዶን ክንታ ክርስቶስ ¹ ጋሎን ክቼኻ ባርያ ኤና ይሳ ኣፖን ጌያይናኻ ፓይላ ኣፓ ይጌያዳም ሃይዲና። ¹⁹ ታ ናንሲ ሴሶን ዬሳም ዬናንቴ ጋርዼኻናንቴ ሴሶን ጎይንባራኻ ማቲማቴ፤ ጎይን ዬኖንባራኻሞ ማቲማቴ፤ ጌጳ ባራንካ ዬናንቴ ዬም ይንካ ዻሳቴ ዎይሳዻያ ዋዳ ናኣና ኮናኣይ። ²⁰ ሃያንቴ ኣና ብርሳንቴ ዬናንቴ ሃማንቴ ቃባዻዳ ክርስቶስም ኣጋኻሞ ኢየሱስም ዬናንቴ ንእሳና ክንእሳይ። ²¹ ባርያ ብርሳንቴ ኤና ክሳ ኣፖን ጌያይና ኣፖንካ ክጌያዳግያ፣ ዋዳኖ ይንካ ዬር ፓይላ ውልም ክያልሳንሣ ኮሳ ዬስካዛራ ኖ ፖላሮ ክካፔኻናንቴ ዛግሳና ኮዛግሳይ። ²² ሙሴ ኣና ይንታ ሃምዲና፦ ‘ጌጳ ባርያ ዬንታ ኤድ ኣፖ ጌያያ እግያማ ዬሳ ባክሮኻ ዬናንቴ ዻሳና ክዻሳይ፤ ኖ ዬናንቴ ክጌያይናም ፓይላ ኤሳርማቴ። ²³ ኤያ ኣፖን ጌያያ ኣጋም ኤያ ኤሳርማ ዛርስን ይሳሳ ባክሮኻ ክካዬ።’

²⁴ ጎንዼኻሞ ሳሙኤልካ ካርሳንቴ ኤና ኣፖን ጌያይና ዻጳዳና ፓይላ ዋዳና ክናሳ ዬር ጌይዲና። ²⁵ ዬቲህካሞ ኤና ባርያሳ ኣፖን ጌያይና ናናና፤ ሃያንቴኻሞ ባርያ ኣብራሃም ግያ፣ ‘ቶርስን ፔሮን ዶን ፓይላም ሃሳ ቢዛንካ ፑጋና ፑጋዻይ’ ሃማንቴ ክጌያዳ ኣፓም ዻላይናና። ²⁶ ባርያ ናሳ ይሳም ይዻሳዶን ዋዳንካ፤ ዬ ፓይላ ውልም ዬሳ ዛርባሞሮኻ ማሳንቴ ፑጋናንቴ ኪም ብርሳንቴ ዬዛራ ንእስዲና።”