7

¹ ኤና ባርያናንቴ ዳምብን ኣሽካይናሳ ብታ ክግያ፤ “ዬራ ካ ሃዛራ ቤርንሳዻዳ ጎንዼው?” ሃምዲና።

² እስጢኖስካሞ ይንታ ሃማንቴና ክማሳዶ፦ “እንና ናናቤ ዎምባናቤዮ፣ እናንቴ ኤሳርማቴ! ዎኮጎ ኣብርሃም ካራንዛራ ኒማ ኣኻራ መስጴጦምያ ግዶር ዳንቴ ጎሻዻያ ባርያ ክናንቴ ሃፕንዻንቴ፤ ³ ክግያ ‘ሃሳ ፔሮኻቤ ኤና ሃሳባራኻቤ ውታንቴ ሃናንቴ እዻዋያ ፔያስዛራ ይማ’ ሃምድና።

⁴ ኖኻሞ ከላዳና ፔሮኻ ውታንቴ ካራን ግዶር ዳርቅዲና። እምባ ክጃዃ ባርያ ኪም ባኣቴ ታ ዬቲህ ፔያስ ይንግዶር ዬዳ ካዛራ ናእዲና። ⁵ ራቃ ካሮኻሞ ባርያ ክናንቴ ፔ ሾሊካሞ እማድማሞ፤ ኮዶን ዋዳን ኦጎኻ ኖ ካላኻሞ ናሶ ቆልማ፣ ክቤ ክሳ ራስባራ ቢዛኖ ናኣይኖ ክኖ ፔን ኮም ኬዻላይንም ባርያ ክናንቴ ኣሽንሻንቴ ጌይዲና። ⁶ ፕርካሞ ባርያ ክናንቴ ይንታ ሃማንቴ ጌይዲና፦ “ቢዛኖ ሃሳ ቶርስን ፔሮ ቾቺና ኮዳይ ቦን ማቶ ኦይዲካሞ ካይሲ ማታንቴ ጋሊቴኻሞ ዳና ኬዳይ። ⁷ ኮዶን ኤና ኬም ካይሲ ሃያንቴ ሻናዳናም እንታ ኬኻላ ኦይሳና እኦይሳይ። ፔን ኦጎባራ ኬ ውታንቴ ናዴ ፔን ኮሮ ኢም ጎሻና ኬጎሻይ። ⁸ ሃያንቴኻሞ ቃማን ታኻዻን ዳምብን ክናንቴ እምዲና፤ ኣብርሃምካሞ ይሳሃቅም ኣዽዲና፤ ሮራ ሎንካይሳኻኻሞ ክሳ ቃማን ታክዲና። ይሳሃቅካሞ ያእቆብም ኣዽዲና፤ ያእቆብካሞ ቢዛና ታጲ ላማና እምባናም ኣዽዲና።

⁹ ኤና ቢዛናሳ እምባናኻሞ ዮሴፕም ቶዛዻንቴ ግብፅዛራ ካይሲ ክዴኻናንቴ ኪም ሻንሽዲና፤ ኮዶን ባርያ ክላማ ክንካና ክዶ፤ ¹⁰ ክሳ ጋሎንባራ ባርያ ኪም ቡላንቴ ግብፅ ግዶር ቢታ ፈርኦንካላ ዎቲ ፃላሞቤ ሃማሞቤ ክናንቴ እምዲና፤ ፈርኦን ግብፅ ግዶርቤ ይሳ ኦኖሮጎ ፓይላ ኪም ጌጲስዲና።

¹¹ “ዋዳን ኦጎኻ ግብፅ ፔሮቤ ከነኣን ፔሮቤ ፓይላ ጋሎ ጌጲ ባኣዳ ዳቆ ናእዲና፤ ዎምባናኻሞ ዬር ይእሳያ ካይስዲና። ¹² ያእቆብካሞ ግብፅ ግዶር እስን ኮዶን ይኤሳራና ዎምባናም ዹርካ ብራንቴ ግብፅዛራ ይእስድና። ¹³ ፕርካሞ ያያ ላንሳኻ ኬይና ዮሴፕ እንዳናናናቴ ይም ማይ ጌይዲና፤ ፈርኦንካሞ ዮሴፕ ኤናም ዼስዲና። ¹⁴ ኣጋሳ ራሳባራ ዮሴፍ ኤዲ ይእሳንቴ እምባ ያእቆብቤ ክሳ ሞሮን ኤና ሦጳታም ዶጝናም ይሳም ፓይላ ንእስዲና። ¹⁵ ያእቆብካሞ ግብፅዛራ ሃንችዲና፤ ክቤ ዎምባናቤኻሞ ኦጎታር ጃይዲና፤ ¹⁶ ኬሳ ዋናምካሞ ፔን ሴኬምዛራ ባኣዻዃ ኣብርሃም ዔሞር ናና ኻላ ራቃ ኮይሶኻ ክሻናዳሮ ኬም ዱካዽዲና።

¹⁷ “ባርያ ኣብርሃምናንቴ ኣፓ ኣሽንሻንቴ ክጌያዳ ጎንዼ ክማታይን ዋዳኖ ኮዬስካዃ፣ ዛርስኖ ዎቲኖ ግብፅ ግዶር ጱፃዻዳቴ ያእዲና። ¹⁸ ኣጋሳ ራስባራ ዮሴፍም ዼስማ ብቲ ኣብ ግብፅ ግዶር ብትምዲና። ¹⁹ ኖኻሞ ዛርስን ዎሳም ጋሮኻ ጋሊንሽዲና፣ ናና ኬሳ ታን ኣዻዻዳናምካሞ ኬጄኻናንቴ ጳልሎ ኬዻበኻ ኖ ኬም እሸክንሽዲና።

²⁰ ዋዳን ኦጎኻ ሙሴም ኣዻዺዲና፤ ኖኻሞ ባርያባራ ናሽማን ሃፓዳ ናሶ ፃሊና ¹ ክዶ። ኖኻሞ እምባ ኦኖሮ ኣርፒ ማካም ኪም ማንካዻዃ ጌጵዲና። ²¹ ኪም ጳልሎ ዻባዻዃ ፈርኦን ናኖ ሃፓንቴ ካማንቴ ናሶ ይንትግያ ሃያንቴ ኪም ጌጵስዲና። ²² ሙሴኻሞ ግብፅሳ ሃማሞንም ፓይላ ታማርዲና፤ ይሳ ዼላቅንካቤ ዋድማንካቤ ዋቺ ማትዲና።

²³ ሙሴሳ ቦኒኖ ኦይድታም ኮማታዃ፣ ይሳ እንዳናና እስራኤል ናናም ሼዶታ ያኣናንቴ ቃብዲና። ²⁴ ኖኻሞ ግብፅ ኤድ ካላ ክሳ ኤናሳ ኤዲ ካላም ክዽካ ሃፓንቴ ግብፅ ኤያም ዴስዲና፤ ኤያ ክሳ ጋላያናንቴኻሞ ኖ ዎይዲና። ²⁵ ኖኻሞ ክሳ ኤና ባርያ ክንካ ሃማንቴ ኬም ካይሳሞሮኻ ክቡላያም ኬዼሳዳግያና ክማይሻዶ፤ ኮዶን ኬ ዼሳድማሞ። ²⁶ ቡርን ኮሳኻሞ ፕር እስራኤል ኤዲ ላማ ዋኒ ኪም ዽቴ ኬዳዃ ኖ ዬስክዲና፤ ኬም ቃሻናንቴኻሞ ዛጋንቴ፣ ኬግያ ‘ዬቲህ ኤና ክና፣ ዬቲህ ክሳ እንዳናሶና፤ ሃስ ኪም ዬቶሼ?’ ሃምዲና።

²⁷ “ኮዶን ክሳ ሃርያስም ኤያ ቶሻያ ሙሴም ይቃንቴ ይንታና ክያማዶ፤ ‘ሃም ዎዛራ ጌጲቤ ቢቶ ታኻያቤ ሃያንቴ ዎዳዳ ሃውቴ? ²⁸ ሞ ያ ና ግብፅ ኤያም ሃዴሳዳግያ ኢምካሞ ዴሳናንቴው ሃዛጋዶ?’ ²⁹ ሙሴኻሞ ዬራ ኣጋም ይሳ ኤሳራ፣ ምድያምዛራ ጎብቴ ቃልቴ ፔን ኦጎሮጎ ቾቺ ዳንቴ ዳርቅዲና፤ ኦጎታርካሞ ኣንጌ ናሶ ላማ ኣዽዲና።

³⁰ ቦን ኦይድታምሳ ራስባራ፣ ሲና ጌማርታሳ ዴሞሮ ዳራን ዶሮ፣ ሃቃስ ዳቡጫማ ሮጳያሳ ኢሮ ባርያሳ ኤርጎ ኤድ ክናንቴ ሃፕንዽዲና። ³¹ ሙሴ ዬራ ይያፓዳ ክናንቴ ዬር ዋና ማትዲና፤ ዬራም ፃሊ ሼዳናንቴ ክፄድስና ባርያባራ ዼላቅ ክግያ፦ ³² ‘እንታ ሃኮጎና ኣብርሃም ባርያ፣ ይሳሃቅ ባርያ፣ ያእቆብ ባርያና’ ክያማዃ ኤሳርዲና። ሙሴኻሞ ጌጲ ኩርትንዽዲና፤ ሼዳናንቴኻሞ ዛጋድሞ።

³³ ጌጳኻሞ ክግያ ይንታና ክያማዶ፦ ‘ሃሳ ዱጙርን ራሮኻ ቡልማ፤ ራቃ ይንግዶር ሃዎያዳ ጫራጚና ክዶ። ³⁴ ግብፅ ግዶር ዶን ዛርስን እኖንሳ ጋሎም ጎንዼ እንታ ሃፕዲና፤ ኬሳ ጋሎንሳ እላትን እንታ ኤሳርዲና፤ ኬም ዻኣሻናንቴኻሞ እንታ ሃንችዲና። ታ ናንሲ ንማ፤ ግብፅዛራ ሃም ማሳቴ ይእሳና እይእሳይ።’

³⁵ “ናንሲ ኬ እግና ክግያ፣ ‘ሃም ጌጲቤ ብቶ ታኻያቤ ሃያዳ ሃውቴ?’ ሃማንቴ ኬቦዋዳ ሙሴ ኣጋም ሃቃስ ዳቡጫማ ሮጳያሳ ኢሮ ኤርጎን ኤያ ክናንቴ ይያፕንዻዳኻ ሃማንቴ ባርያ ኪም ኤዲ ጌጲቤ ዻኣሻያቤ ሃያንቴ ኬዛራ ይእስዲና። ³⁶ ኖኻሞ ግብፅባራ ኬም ኣንሳቴ ቡልዲና፤ ግብፅ ግዶርቤ ኛፓስን ዛዎን ሃንዻይሮቤ ዳራሮ ቦን ኦይድታም ዬራ ሃምማን ግያንዳናቤ ዬራ ሃምማንቴ ዼስምናቤም ኖ ሃይዲና።

³⁷ እስራኤል ዛርስንግያ፣ ‘ባርያ ኤዲ እግያ ዳ ባርያሳ ኣፖን ጌያያም ዬግዶርካ ዬናንቴ ቡላና ክቡላይ’ ሃማንቴ ጌያዳ ሙሴ ካ ኖና። ³⁸ ኖኻሞ ሲና ጌማርታሮ ክናንቴ ጌያዳ ባርያሳ ኤርጎን ኤያቤ ዎኮጎናቤ ማላ ክንካ ዳራሮ ዛርስንሳ ባክሮና ክዶ፤ ዎዛራ ሳስካናንቴኻሞ ሳዳን ዼላቅን ኖ ቻይዲና።

³⁹ ኮዶን ዎኮጎና ኪም ናሻድማሞ፤ ክናንቴ ኤሳራናንቴ ይዛጋድሞንታኻ ይሳ ቃቦንካ ግብፅዛራ ማትዲና። ⁴⁰ ኣሮን ግያኻሞ ይጌይና ‘ዬራ ባርዮግያ ሃያንቴ ዎምስካይና ዎሳ ብራሮ ያኣይናም ዎናንቴ ኣሽክማ፤ ግብፅባራ ዎም ኣንሳቴ ቡላዳ ሙሴ ክዛራ ሃርው ዬስካዶኖ ዎቲ ዼስማሞ” ሃምዲና። ⁴¹ ዋዳን ኦጎኻ ኬ ዬር ኦቶግያ ዳ ኣሸካንቴ፣ ዬራ ይምስካያ ኣጋናንቴ ኬ ቁሊ ኡክዲና፤ ዬራ ይሳ ኣኒንካ ይኣሽካዳኻ ዋዝንዻንቴ ክርብዲና። ⁴² ኮዶን ባርያ ኬኻላንካ ፔግንዽዲና፤ ፖላሮ ዶን ኤዝንን ኬምስካኻናንቴ ኬም ሳስካቴ ኤዝንንናንቴ ኖ እምዲና፤ ጎያ ኣጋኻኻሞ ኤና ባርያሳ ኣፖንሳ ጌያይናሳ ዋርቃትሮጎ ይንታ ሃማንቴ ኡካዻዳ ኣፓ ጎንዼ ማትዲና፦

“‘ዬቲህ እስራኤል ኤና፣ ቦን ኦይድታም ዳራሮ ዬዶን ዋዳንካ፤ ቁሊን ሙልዻሮ ዬቲህ እናንቴ ኡክዲው

ዎይካሞ ዬርን እናንቴ ዬእማያ እናንቴ ባእድው?

⁴³ ኮዶን ምስካናንቴ ዬኣሽካዳና ሞሎክሳ ኦኖንቤ፣

ዬራ ዬምስካይና ሬምፉምሳ ኤዝንንቤም

ዬቲህ ዼግ ዼግ ሃይዲና።

ኣጋታኻ እንታ ዬም ሮጋዼኻናንቴ ሃያና እያይ፤ ባቢሎንሳ ኦባራኻሞ ዬም ሙጋና እሙጋይ።

⁴⁴ ባርያ ሙሴናንቴ ክዻዋዳኻቤ ክጌያዳ ጎያኻቤ ኣሽካዻዶኖ ባርያ ዼላቅንሳ ይንግዶር ዳዻን ዱንካኖ፣ ዎምባና ማላ ክንካ ዳራሮና ኮዶ። ⁴⁵ ዎኮጎናኻሞ ባርያ ዼላቅንሳ ይንግዶር ዳዻን ዱንካንም ቻንቴ፣ ባርያ ኢያሱካ ሃማንቴ ክኦይታዳና ቶርስናሳ ፔን ይዻላዶን ዋዳንካ ኮም ባኣንቴ ኬ ኤርድዲና፤ ናኻሞ ዳዊት ቦኒንሳ ዬስካዛራ ኦጎታር ዳርቅዲና፤ ⁴⁶ ዳዊትካሞ ባርያሳ ዎትሮጎ ናሽማን ይያፓዶንታኻ ያእቆብ ² ባርያናንቴ ይንግዶር ክዳያ ኦኖ ኣሽካናንቴ ባርያም ምስክዲና፤ ⁴⁷ ኮዶን ክናንቴ ኦኖን ኣሽካዳ ሳላሞኒና።

⁴⁸ ኮዶን ባርያ ጌጳ ኤዲሳ ኣኒካ ኣሽካዻዳ ኦኖ ግዶር ዳማሞ፤ ኣጋኻሞ ኤያ ባርያሳ ኣፖን ጌያያ ይንታ ክጌያዳኻና፦ ⁵¹ “ዬቲህ ዎይላምንሳ ጶቅስምና፣ ቃሞንሳ ኤሳርምና ሜቴንሳ ቆሮና! ዬምባና ጋንታግያ ኡስን ጋዛንም ሮሮ ውልና ዬቶዛዻይ። ⁵² ኤና ባርያሳ ኣፖን ጌያይና ግዶር ዬምባናሳ ኤዲ ኦይታዽማ ዳይድው? ኤያ ጋዛስ ናእንቶን ጌያዳና ኤናም ኬ ዴስዲና፤ ዬቲህካሞ ታ ኪም ሳስካቴ እምዲና፣ ሃያንቴኻሞ ዴስዲና፤ ⁵³ ባርያሳ ኤርጎን ኤያ ባራ ዳምብን እንዻዶን ዬቲህ ቻይዲና ኮዶን ዬቲህ ኮንካ ዳድማሞ።” ⁵⁴ ኤዲኖ ብቶን ታኻዻን ራቅሮ ፑጫንቴ ዶኖ ኦጎም ኤሳራንቴ ካልሎን ዋጭምዲና፤ ኣሲካሞ ክዛራ ጋእዲና። ⁵⁵ ኮዶን እስጢፋኖስ ባርያሳ ኡስን ጋዛንካ ማታንቴ ፖላንዛራ ላይ ክሼድና ባርያሳ ጎሺንቤ፣ ኢየሱስካሞ ባርያሳ ምዛቅንባራ ዎያንቴ ክዳዃ ሃፓንቴ፣ ⁵⁶ “ታ ፖላኖ ዋጭ ኮያማዃ ኤዲ ናሶም ባርያሳ ምዛቅንባራ ዎያንቴ ክዳዃ እንታ ሃፕቴና እዶ” ሃምዲና።

⁵⁷ ዋዳን ኦጎኻ ኬ ካልሎን እላትቴ ቃሞ ይሳም ሹፓንቴ ክዛራ ጎብዲና፤ ⁵⁸ ኪም ዬዳንቴኻሞ ካታማንሳ ቡዶንዛራ ቡላንቴ ሱኒንካ ፓኻን ካርስዲና። ኦጎኖ ይንታ ኮያማን ዋዳንካ ኤና እስጢፋኖስዛራ ማኛሞን ዎያዳና ኣፓላና ይሳም ሳኦል ሃንዻያ ኤያ ባርሻስ ካላ ዎድዲና።

⁵⁹ እስጢፋኖስም ኬ ፓክቴ ኬዳዃ፣ ኖ ይጌይና “ጌጳ ኢየሱስ፣ ሳዳን እሳም ችማ” ሃማንቴ ምስክዲና፤ ⁶⁰ ሃያንቴ ኮምፓርሳንቴ፣ ናቅሲ ይሳም ዼግ ሃያንቴ፦ “ጌጳዮ! ኬሳ ሴሳ ካም ሃፓይድናኖ” ሃማንቴ እላትዲና፤ ኣጋንታ ሃማንቴኻሞ ራትዲና።