24

¹ ሮሮ ዶጝሳ ራስባራ፣ ኤና ባርያናንቴ ዳምብን ኣሽካይናሳ ብታ ሃናንያ ዛርስንሳ ዞንዛና ዋኒቤ ጠርጡለስ ሃንዻያ ብቶን ታኻዻን ጳልንዛራ ታርጃሞን ዎያያ ኤያቤ ላማ ክንካ ቂሳርያዛራ ሃንችዲና፤ ጳውሎስም ይንካ ኬቤርንሳዳ ዼላቃም ኤያ ጋራናንቴ ኬ ጌይዲና። ² ጳውሎስ ግስንዻዃ ክናኣዃ፣ ጠርጠሉስ ይንታ ሃማንቴ ቤርንሳ ዼላቃም ክዛራ ጌይዲና፤ “ጎሻዻዳ ፊልክስዮ፣ ዋዳን ሃኖንካ ዎናንቴ ፔኖ ዋልዳሶ ዳንቴ ቦን ጱፅ ካፕዲና፤ ያ ኤዲ ፓኻላ ሃዳኻ ዛርስን ኮናንቴ ዬር ፃል ባእዲና፤ ³ ራቅና ውል ግዶርቤ ሮሮ ውልቤ ዬራ ሃኣሽካዳ ካም ዎቲህ ጎሺ ጌጵካ ጶቅሳና ዎጶቅሳይ። ⁴ ኮዶን ሃም ካልሎን ቃጅሻን እጋሬኻናንቴ እናንቴ ሾሊ ሶጎ ሃኤሳሬኻናንቴ እንታ ሃም ምስካና እምስካይ።

⁵ “ኤያ ካ ኣይሁድና ፔሮን ዳና ውል ግዶር ሃጅሞ ማታንቴ ጎርሞን ዻሳያ፣ ሃያንቴኻሞ ኤና ናዝራዊ ሃንዻይና ኦላንሳ ብራሮ ዳ ጌጳ ክዶንም ዎቲህ ሃፕዲና። ⁶ ካሳ ጳባራኻሞ ባርዮን ኦኖንም ሴሳናንቴ ክያይካ ዎቲህ ኪም ሃፓንቴ ዬድዲና። ዳምብን ዎኖንካኻሞ ዎቲህ ክዛራ ዻባሞን ካናንቴ ዛጋንቴና ዎዶ፤ ⁷ ኮዶን ኤያ ዎታደርናሳ ብታ ሉስዮስ ናዴ ዎሳ ኣንሮኻ ኪም ካንታ ጌጲካ ሳራቴ ቻይዲና፤ ኤና ኪም ቤርንሳዳናምካሞ ሃዛራ ኬኔኤኻናንቴ ጌይዲና። ⁸ ኣጋታኻ ያኻሞ ክካላ ኦይሳንቴ ኪም ይንካ ዎዻብንሻዳ ዬራም ፓይላ ጎንዼ ኬዶንም ዼሳናንቴ ቻላና ሃቻላይ።” ¹

⁹ ኣይሁድናኻሞ ዼላቃ ኖ ክጌያዳ ጎንዼ ክዶንም ጌያንቴ ክሳ ኤላቃዛራ ታርጅዲና።

¹⁰ ፔንሳ ጋራኻሞ ክዼላቄኻናንቴ ጳውሎስም ኣንካ ክዼላቅሳና፣ ጳውሎስ ይንታ ሃማንቴ ማስዲና፦ "ኣናኻ ካርሳንቴ ዛርስን ኮናንቴ ኤዲ ብቶ ታኻያ ሃዶንም እንታ ዼስዲና፤ ኣጋታኻ ቃባ ይንካ ኢም እግሻያም እንታ ዋዛኻ ዳንቴና እጌያይ። ¹¹ ሮሮ ታጲ ላማሳ ብራር ባርያም ምስካናንቴ ኢየሩሳሌምዛራ እናኣዶንም ያ ሃባራንካ ዼሳናንቴ ቻላና ሃቻላይ። ¹² ኤና ክና ኢም ቤርንሳዳና እንታ ባርዮን ኦኖሮጎ ኤዲ ሃውላማኻሞ እዜርምካቤ፣ ኣይሁድናሳ ባርዮን ምስካዻን ኦኖሮጎ ዎይካሞ ካታማሮ ራቅ ካላ ግዶርካሞ ዛርስን ዬር ዛርቦኻ እዻስካ ኬ ኢም ሃፓድማሞ። ¹³ ታኻሞ ኬ ዬራ ይንካ ኢም ይቤርንሳዳም ጎንዼ ክዳም ማይ ዻዋናንቴ ኬ ቻልማሞ። ¹⁴ ይያማንካሞ ኬ ይንግያ ጎይ ቆሮና ኬያማያ ጌጳ ጎይን ጫግቴ እንታ ዎምባና ባርያምና እምስካይ፤ ዬራ ዳምብንካ ጌይዻዳቤ፣ ኤና ባርያሳ ኣፖን ጌያይናኻ ዼላቅን ኡካዻዶንቤም ፓይላ ኣምናና እኣምናይ፤ ¹⁵ ሃያንቴኻሞ ኤና እግና ጋንታግያ ኤና ጋዛናቤ ኤና ዛርቦናቤ ዴምጲንባራ ኬዻጳይንም እንታ ባርያዛራ ቃሞ ቁንፃና እቁንፃይ። ¹⁶ ኣጋታኻ ባርያቤ ኤናቤሳ ዎትሮ ዎይላም ጫንቃል ሃማ እሳ ኮዴኻናንቴ ሮሮ ውል ዛጋና እዛጋይ።

¹⁷ “ቦን ጱፅሳ ራስባራኻሞ፣ እሳ ኤና ኩፕናናንቴ ኬልሾ ብሬ እማናንቴቤ ባርያንቴ ሙልዻሮ ቆሌ ኡካናንቴ ኢየሩሳሌምዛራ እንታ ናእዲና። ¹⁸ እንታ ባርዮን ኦኖሮጎ ዬራ ኣጋም ሃይቴ እዳኻ ኢም ኬያፓዶን ዋዳንካ ዳምብን ጎይንካ እንታ ጫራጚሚና እዶ፤ ሃያንቴኻሞ እላማ ክንካ ዛርሲ ቆልማሞ እላትካሞ ቆልማሞ። ¹⁹ ኮዶን እኒ ኤና ኮታር ናኣናንቴ ዛግሳይና እስያባራ ናኣዳና ኣይሁድ ኤና ዋኒ ኦጎታር ዳይዲና፤ ኬ ዬር ይንካ ኢም ሃሳ ዎትሮ ኬቤርንሳያ ኮዳና ኬ ኢም ኬቤርንሳናንቴ ቻላና ኬቻላይ። ²⁰ ዎይካሞ ኤና ክና ኮታር ዳና ኣንጋላላ ኤና ኬሳ ብቶን ታኻይናሳ ዎትሮ እዎያዶን ዋዳንካ ሴሶ እሳ ኬያፓዳ ኮዳና ኬጌዬ። ²¹ ኬሳ ዎትሮ እዎያዶን ዋዳንካ፣ ‘ኤና ጃዳና ዴምጲንባራኻ ዻጳና ኬዻይ እያማንታኻ ሃይታላ እንታ ዬሳ ዎትሮ ብቶንናንቴ ዎይዲና’ ዬራ ኣጋ እጌያዳሳ ኦባራ ዬር ኣብ ቆልማሞ።”

²² ኮዶን ፊልክስ ጌጳሳ ጎይን ጎንዼ ይዼሳዶንታኻ፣ “ኤያ ዎታደርናሳ ብታ ሉስዩስ ክንንና ዼላቃ ዬሳናንቴ ብቶን ታኻና እታኻይ” ሃማንቴ ዼላቃ ኬሳም ሮሮ ኣብዛራ ሳስክዲና። ²³ ሃያንቴ ጳውሎስም ዻክንካ ጋሊሻን ክጋሬኻናንቴ ኪም ሱን ዻቃንዼኻናንቴቤ ኤና ክሳ ናዴ ኪም ኬሼዴኻናንቴ ዎታደርና ማቶናሳ ጋራናንቴ ኖ ጌይዲና።

²⁴ ሮሮ ቶኻሳ ራስባራ፣ ፊልክስ ኣይሁድ ኤስን ሜን ይሳ ድሩሲላ ማላ ክንካ ናእዲና፤ ጳውሎስምካሞ ግስንሳንቴ ጳውሎስ ክርስቶስ ኢየሱስካ ኣምንዻይን ጎይን ክጌያዃ ኖ ኤሳርዲና። ²⁵ ጳውሎስካሞ ጋዛሞን ጎይንቤ፣ ሃም ሃዻር ማንካዻንቤ፣ ናኣንናንቴ ዶን ዻባሞንቤም ክናንቴ ክጌያዃ ፊልክስ ኩርትንዻንቴ ክግያ፦ “ሃይታላናንቴ ክና ዬክዲና፤ እናንቴ ኮኣግና ሮሮ ኣብካ እንታ ሃም ግስማና እግስማይ፤ ታ ያ ያዻን ቻላና ሃቻላይ” ና ክያማዶ። ²⁶ ሃያንቴኻሞ ኖ ጳውሎስ ካላ ጉቦ ቻናንቴ ቃሞ ይቁንፃዶንታኻ፣ ሮሮ ጱፅ ኪም ግስንስቴ ዼላቅስቴና ክዶ።

²⁷ ቦን ላማ ኮሳጋዃኻሞ፣ ፊልክስ ራቃሮ ኤያ ጶርቅዮስ ፊስጦስም ዎዳዽዲና፤ ፊልክስ ኣይሁድ ኤናም ዋዝንሳናንቴ ጳውሎስም ዻኻዻዳዛራ ጋርዲና።