23

¹ ጳውሎስካሞ ኤና ብቶን ታኻይናዛራ ላይ ሼዳንቴ፣ “እንና ናናቶ፣ እንታ ሮራ ካዛራ ድክ ባርያሳ ዎትሮ ዎይላም ጫንቃል ሃማኻ ያይቴና እዶ” ና ክያማዶ። ² ዋዳ ኣጋኻ ኤና ባርያናንቴ ዳምብን ኣሽካይናሳ ብታ ኤና ጳውሎስሳ ዴሞሮ ዎያዳና ኣፖ ክሳም ኬጬኤኻናንቴ ጌይዲና። ³ ጳውሎስካሞ ክግያ፦ “ያ ኦኖኖ ሳሊንካ ቃዻዻዶኖ! ባርያ ሃም ጫኣና ክጫኣይ፤ ዳምብን ጎይንካ እዛራ ብቶን ሃታኬኻናንቴ ዳርቃንቴ ዳምብን ጎይን ጋራንቴ እዻዼኻናንቴ ሃጌያዶንታኻ ያ ሃባራንካ ዳምብንም ሴሲዲና” ና ክያማዶ።

⁴ ኤና ጳውሎስሳ ዴሞሮ ዎያዳና ክግያ፦ “ኤና ባርያናንቴ ዳምብን ኣሽካይናሳ ብታ ባርዮን ኤያም ሃስ ሃእሬ?” ና ኬያማዶ።

⁵ ጳውሎስ ኬግያ፦ “እንና ናናቶ፣ ኖ ኤና ባርያናንቴ ዳምብን ኣሽካይናሳ ብታ ክዶንም እንታ ዼሳድማሞ፤ ‘ኤያ ሃሳ ዛርስንሳ ብታዛራ ዬር ዛርቦ ሃጌይናኖ’ ሃማንቴ ኡካዽዲና” ና ክያማዶ።

⁶ ጳውሎስካሞ ዛርስንሳ ዋኒ ሰዱቃዊና፣ ዋኒ ኬሳኻሞ ፓራሳዊና ኬዶንም ይዼሳዶንታኻ፦ “እንና ናናቶ፣ እንታ ፓራሳዊ ኤዲ ባራንካ ኣዻዻዳ ፓራሳዊ ኤዲና፣ ብቶን ታኻዻንዛራ ይንናንቴ ኢም ባዻዶኖ ኤና ጃዳና ዴምጲንባራኻ ኬዻጳይንም ይንካ ቃሞ እቁንፃዶንታኻና” ሃማንቴ ኤና ብቶን ታይናሳ ዎትሮ እላትዲና። ⁷ ኣጋምካሞ ክጌያዶን ዋዳንካ፣ ፓራሳዊይናቤ ሰዱቃዊናቤሳ ግዶሮ ዋጭ ውትዲና፤ ኤና ቡካዳናኻሞ ራቅ ላማ ታክምዲና። ⁸ ኤና ሰዱቃዊና ኤና ጃዳና ዴምጲንባራኻ ዻጲማሞ፣ ባርያሳ ኤርጎን ኤናካሞ ቤሮናካሞ ቆልማሞ ሃማይናና፣ ኤና ፓራሳዊይና ዬራ ኪና ፓይላ ኬዶንም ኣምናይናና።

⁹ ጎርሞ ካልሎን ጌጲ ማትድና፤ ኤና ፓራሳዊና ጋይና ሙሴ ዳምብን ታማርሳይና ዋኒ ዻጳንቴ፣ “ኤያ ካዛራ ሴሶ ካላኻሞ ዎቲህ ሃፓዲማሞ፤ ኤሳንካ ኡሲ ዎይካሞ ኤርጎ ኤድ ክናንቴ ኮጌያዶንም ሃውቴ ዼሳዳ?” ሃማንቴ ኬላማ ካልሎን ኬ ዜርምዲና። ¹⁰ ጎርሞኖ ካልሎን ኮጌጳዻዶንታኻ ኤያ ዎታደርናሳ ብታ ኤና ጳውሎስም ጯጭ ጯጭ ሃያና ኬሃያይ ሃማንቴ ኩርትንዽዲና፤ ኣጋታኻ ዎታደርና ሃንቻንቴ ኬሳ ግዶሮኻ ኪም ቻንቴ ዎታደርና ራቅንዛራ ኬኣርሴኻናንቴ ጌይዲና።

¹¹ ዋጋላሞን ሶትንካ ጌጳ ክሳ ዴሞሮ ዎያንቴ ክግያ፦ “ጳውሎስዮ፣ ሃኩርትንዽናኖ! ኢየሩሳሌም ግዶር እናንቴ ማኚ ሃማታዳግያ፣ ሮም ግዶርካሞ እሳ ማኚ ሃዴኻናንቴ ዛግሳና ኮዛግሳይ” ሃምዲና። ¹² ፔኖ ኮሶፃዃኻሞ ኣይሁድና ክንካ ፑጫንቴ ኦሻንቴ ጳውሎስም ኬ ይሳ ዴሳዛራ ዳኣኖ ይእꬅሞንቤ ኑንቆ ይውጭሞንቤም ኣሽንሺዲና። ¹³ ኤና ይንታ ኦሻንቴ ኣሽንሻዳና ኦይድታምሳ ጳባራና ኬዶ። ¹⁴ ኬኻሞ ኤና ባርያናንቴ ዳምብን ኣሽካይናሳ ጋርናቤ ዛርስንሳ ዞንዛናቤዛራ ቃልቴ፦ “ጳውሎስም ዴስማ ዎቲህ ዳኣኖ እꬅማሞ ሃማንቴ ታክዲና። ¹⁵ ታ ናንሲ ዬቲህ ኤና ብቶን ታኻይና ማላ ክንካ፣ ዬራ ሃምማዳሳ ዼላቅ ኣብ ልክ ሃማ ፕር ክካላ ኤሳራናንቴ ዬዛጋያ ማይሻንቴ ኤያ ዎታደርናሳ ብታ ጳውሎስም ዬዛራ ክንእሴኻናንቴ ኪም ምስክማቴ፤ ዎቲካሞ ኖ ኮታ ኣኻራ ክዬስክማ ኪም ዴሳናንቴ ሼክሚና ዎዶ” ና ኬያማዶ።

¹⁶ ኮዶን ጳውሎስሳ እንዳ ናን ናሳ ዼላቃ ኣጋም ኤሳራንቴ፣ ዎታደርና ራቅንዛራ ቃልቴ ኣፓ ኣጋም ጳውሎስናንቴ ጌይዲና።

¹⁷ ጳውሎስካሞ ዎታደርና ማቶናሳ ጋርና ግዶርካ ዋም ግስማንቴ ክግያ፦ “ናሳ ካ ኤያ ዎታደርናሳ ብታናንቴ ዬር ክጌያያ ኮዶንታኻ ክዛራ ኣንሳቴ ይማ” ሃምዲና። ¹⁸ ኖኻሞ ኪም ኤያ ዎታደርናሳ ብታዛራ ኣንስዲና።

ዎታደርና ማቶናሳ ጋራኻሞ ዎታደርናሳ ብታግያ፦ “ዻክን ኤያ ጳውሎስ ኢም ግስማንቴ፣ ባርሻስ ካ ዬር ሃናንቴ ክጌያያ ኮዶንታኻ ኪም ሃዛራ እኣንሤኻናንቴ ኢም ምስክዲና” ና ክያማዶ።

¹⁹ ኤያ ዎታደርናሳ ብታኻሞ ባርሻስሳ ኣኒም ዬዳቴ ዋና ኪም ቡላንቴ ክግያ፦ “እናንቴ ጌያናንቴ ዬራ ሃዛጋዳ ሃርቴ?” ሃምዲና።

²⁰ ናሳ ባርሻስኻሞ ክግያ፦ “ኣይሁድና ኤያ ካሳ ዼላቅ ኣብ ኤሳራናንቴ ዛጋያግያ ሃያንቴ ካይስንሦኻ ሳኻ ብቶን ራቅንዛራ ኪም ሃኣንሤኻናንቴ ሃም ምስካናንቴ ሃሳውዲና። ²¹ ኣጋታኻ ኬናንቴ ሃናሽናኖ፤ ኦጎኖኻሞ ኬግዶር ኤና ኦይድታምሳ ጳባራ ዳና ኪም ዴሳናንቴ ካሊቴ ባꬅማንቴና ኬዶ፤ ሃያንቴኻሞ ኪም ይሳ ዴሳዛራ ኬ ዳኣኖ ይእꬅሞንቤ ኑንቆ ይውጭሞንቤም ኣሽንሺዲና፤ ታኻሞ ኬ ሼካንቴ ኣፖ ሃሳም ካሊቴና ኬዶ።”

²² ኤያ ዎታደርናሳ ብታኻሞ፦ “ዬራ ካም እናንቴ ሃጌያዶንም ኤዲ ካላናንቴኻሞ ሃጌይናኖ” ሃማንቴ ናሳ ባርሻስም ኪላንቴ ይእስዲና። ²³ ሃያንቴ ዎታደርና ማቶናሳ ጋርናሳ ላማም ግስማንቴ ኬግያ፦ “ዎታደር ማቶ ላማቤ፣ ዎታደርና ፓርዳሮ ዳንቴ ዳማይና ሦጳታምቤ፣ ዎታደር ማቶ ላማ ባንቆንካ ዳማይናቤም ሶትንሳ ሳኣት ማካንካ ቂሳርያዛራ ኬዬኤኻናንቴ ሼክሽማቴ፤ ²⁴ ሃያንቴኻሞ ጳውሎስ ይዛራን ዳርቃንቴ ኤያ ፔንሳ ጋራ ፊልክስዛራ ፃሊንካ ክዬስኬኻናንቴ ፓርዳናም ክናንቴ ቡልዼ” ና ክያማዶ።

²⁵ ኖ ሃያንቴ ዋርቃታ ይንታ ሃማያምካሞ ኡክዲና፦ ²⁶ እንታ ቀላውዴዎስ ሉስዩስ፣ ²⁷ ኣይሁድና ኤያ ካም ዴሳናንቴና ኬዛጋዶ፤ ኮዶን ኖ ሮም ኤድ ክዶንም ዼሳንቴ፣ እሳ ዎታደርና ማላ ናዴ እንታ ኪም ዻኣሽዲና። ²⁸ ኬ ኪም ሃርናንቴ ቤርንናሳንቴ ኬዛጋዶንም ዼሳናንቴ ኤና ኬሳ ብቶን ታኻይናዛራ ኪም እንታ ኣንስዲና። ²⁹ ሃያንቴኻሞ ኪም ይንካ ኬቤርንሳዶኖ ዬር ኬሳ ዳምብን ጎይንባራኻ ዻጳዳ ጋንትና፤ ዬር ዴምጲንዛራቤ ዎይካሞ ዻክዛራ ዬስክሳያ ኮትሞንም እንታ ዼስዲና። ³⁰ ኮዶን ኣይሁድና ኤያ ካም ዴሳናንቴ ኬኦሻዶንም ዼሳንቴ፣ ኣጋዛራ እንታ ኪም ሃዛራ ይእስዲና፤ ኤና ኪም ቤርንሳዳናኻሞ ይሳ ኤላቅናም ሃዛራ ባኣቴ ኬዬኤኻናንቴ እንታ ኬናንቴ ጌይዲና።”

³¹ ኣጋታኻ ዎታደርና ኬናንቴ ጌይዻዳ ጎያኻ፣ ጳውሎስም ሶቲካ ፔያስ ኣንቲጳጥርስዛራ ኣንሳቴ ያእዲና። ³² ዋጋላሞንካሞ ዎታደርና ፓርዳሮ ዳንቴ ዳማይና ሶጎ ኪም ኬዬስክሴኻናንቴ፣ ዎታደርና ዋኒ ሌሌ ይዶን ራቅንዛራ ማትዲና። ³³ ዎታደርና ፓርዳሮ ዳንቴ ዳማይናኻሞ ቂሳርያ ይዬስካና፣ ዋርቃታቤ ጳውሎስቤም ፔንሳ ጋራናንቴ እምዲና። ³⁴ ፔንሳ ጋራኻሞ ዋርቃታም ናባባንቴ፣ ጳውሎስም ፔ ሃምባራ ክናኣዶንም ክካላ ኦይስዲና፤ ኪልቅያ ኤድ ክዶንም ኖ ዼሳንቴ፣ ³⁵ ክግያ፦ “ዼላቃ ሃንታም ኤና ሃም ቤርንሳዳና ኬናኣዃ ኤሳራና እኤሳራይ” ና ክያማዶ። ሃያንቴኻሞ ኤና ጳውሎስም ሄሮድስሳ ጌጳሞን ኦኖሮጎ ኬዻቃኔኻናንቴ ጌይዲና።