22
1
“ዎንዳና ናናቤ ዎምባናቤዮ፤ ታ ዼላቃ እዛራ ዻጳዳሳ ኢም ይንካ እማራያ ዼላቃ እጌያያም ኤሳርማቴ።”
2
ኖ እብራይስጥ ኣፖኻ ክዼላቃዃ ኤሳራንቴ፣ ብራንቴ ዝትክ ይያማዳሳ ኦባራ ኬ ካልሎን ዝትክ ሃምዲና።
ጳውሎስካሞ ይንታ ሃምዲና፦
3
“እንታ ኪልቅያሳ ፔንሳ ጠርሴስ ካታማሮ ኣዻዻዳ ኣይሁድ ኤዲና፤ ኮዶን ይንግዶር እጌጳዶኖ ካታማኖ ካኖና። ዎምባናሳ ዳምብንካሞ ኤያ ገማልያል ኻላ ዳንቴ እንታ ጎንዼ ታማርዲና፤ ሃይታላ ዬቲህ ዬናሻያ ኣጋግያ እንታኻሞ ባርያም ኣና ናሽቴና እዶ።
4
ኤና ጎያ ኣጋም ጫጋይናምካሞ ኬሳ ዴምጲዛራ ኦይታንቴ ያይቴ፣ ኣንጌናቤ ሜናቤም ዻኻንቴ ዻክን ኦኖን ኣርስቴና እዶ።
5
እሳ ዋድማ ኣጋም ኤና ባርያናንቴ ዳምብን ኣሽካይናሳ ብታቤ ኤና ብቶን ታኻይና ፓይላ ጌያናንቴ ቻላና ኬቻላይ። ኬኻላንካ ዋርቃት ቻንቴ ዳማስቆ ግዶር ዳና ኬሳ እንዳ ናና ኻላ ቃልቴ፣ ኤና እግናም ዻስካንቴ ኢየሩሳሌምዛራ ባኣቴ ናዴ ኬም ዻብንሻናንቴ ኦጎዛራ ይቴና እዶ።
6
“ይቴ ዳንቴኻሞ ትፓ ጭርግያ ደማስቆዛራ እሳንሳና፣ እኬንሽማ ዬር ጌጲ ፖላንባራኻ እዛራ ጳልቃትዲና፤
7
እንታኻሞ ፔሮ ጳርፅዲና፤ ሃያንቴ እግያ፣ ‘ሳኦል፣ ሳኦል፣ ሃርናንቴ ኢም ኦይታንቴ ሃያዬ?’ ሃማያ ናቅሲ እንታ ኤሳርዲና።
8
እንታኻሞ ክግያ፣ ‘ጌጳ፣ ያ ሃውቴ?’ ሃምዲና።
ኖኻሞ እግያ፣ ‘እንታ ኦይታንቴ ያያያ ናዝሬት ጋንታ ዬሱሲና’ ሃምዲና።
9
ኤና እማላን ዳናኻሞ ዬርን ጳልቃታዶን ሃፕዲና፤ ኮዶን እናንቴ ክጌያያ ናቅሳም ኬ ልኪ ኤሳርድማሞ።
10
“እንታኻሞ ክግያ፣ ‘ጌጳ፣ ሃር እያዬ?’ ና እያማዶ። ጌጳኻሞ ክግያ፣ ‘ዻጳንቴ ደማስቆዛራ ይማ፤ ኦጎታር ዬራ ሃኣሽኬኻናንቴ ዛግሳይናም ፓይላ ኤና ሃናንቴ ጌያና ኬጌያይ’ ሃምዲና።
11
ዬራ ጳልቃታዶንካ ሃማንቴ እሳ ኣፕኖ ኮካያዶንታኻ፣ ኤና እላማን ዳና እሳ ኣኒም ዬዳንቴ ደማስቆዛራ ኢም ኣንሳቴ ዬስክስዲና።
12
ሃያንቴኻሞ ሃናንያ ሃንዻያ ኤዲ ካላ ኢም ሼዳናንቴ እካላ ናእዲና፤ ኖኻሞ ባርያሳ ዳምብን ጎንዼ ጎባያቤ ኣይሁድ ኤና ኦጎታር ዳና ውል ካላ ካልሎን ጎሻዻዳና።
13
ኖ እካላ ዎያንቴ እግያ፣ ‘እንና ናሳ ሳኦል፣ ሃሳ ኣፕኖ ፓክ ኮያሜ!’ ሃምዲና፤ እንታኻሞ ኣጋዛራ ኪም ሃፕዲና።
14
“ሃያንቴኻሞ ኖ ሻባንቴ እግያ፦ ‘ዎምባና ባርያ ክሳ ቃቦን ሃዼሴኻናንቴቤ ኤያ ጫራጛም ሃያፔኻናንቴቤ ዼላቅን ክሳ ኣፖሮኻ ሃኤሳሬኻናንቴ ሃም ካምዲና፤
15
ኣጋኻሞ ዬራ ሃያፓዳናቤ ሃኤሳርዳናቤሳ ኤዲ ውልሳ ዎትሮ ክሳ ማኚ ሃዳንታኻና። 16 ታ ናንሲ ሃር ሃካላዴ? ዻጳንቴ ናብን ክሳም ፑርቴ ሻዽማ፤ ሃሳ ሴሶንምካሞ ሻይዽማ’ ና ክያማዶ።
17
ኢየሩሳሌምዛራ ማታቴ ቃልቴ ባርዮን ኦኖሮጎ ምስክቴ ዳንቴ ሃይማኻ፣
18
ጌጳ ኢም ክዼላቅስካ እንታ ሃፕዲና፤ ኖኻሞ እግያ፣ ‘ኢየሩሳሌምባራ ታ ዪርካ ውትማ! እሳ ዼላቅን ሃጌያይንም ኬ ኤሳርማሞ’ ና ክያማዶ።
19
“እንታኻሞ ክግያ፦ ‘ጌጳዮ፣ ኤና ሃንካ ኣምናዳናም ኣና ዻኻናንቴቤ ዻናንቴቤ ኣይሁድናሳ ምስኮን ኦኖና ግዶር ያይቴ እዶንም ኤና ክና ዼሳና ኬዼሳይ፤
20
ሃያንቴኻሞ ሃናንቴ ሃማንቴ ጃዳ
እስጢፋኖስም ኬዴሳይን ዋዳንካ ዬርን ኬኣሽካይን ኦጎም ናሻንቴ ራቃ ኣጋሮ ዳንቴ ኤና ዴሳይናሳ ኣፓላናም ዻቃኒቴና እዶ” ና እያማዶ።
21
ጌጳኻሞ እግያ፦ “ይማ፣ ቶርስና ፔጌን ዳናዛራ ሃም ይእሳና እይእሳይ’ ና ክያማዶ።
22
ዛርስኖኻሞ ዼላቃ ኣጋም ኖ ክሳ ጌያዛራ ኪም ኤሳርዲና፤ ሃያንቴ ኬ ናቅሲ ይሳም ዼግ ሃያንቴ “ኤያ ካም ፔሮኻ ካይሳዼ! ሳዳንካ ክዴኻናንቴ ዛግስማሞ” ሃማንቴ ክዛራ እላትዲና።
23
ኬኻሞ እላትቴቤ ኣፓላና ይሳም ዻባዳቴቤ ፔንካሞ ፖላንዛራ ይፅቴ ኬዳዃ፣
24
ዎታደርናሳ ብታ ጳውሎስም ዎታደርና ራቅንዛራ ኬኣርሴኻናንቴቤ ኤዲኖ ክዛራ ሃርናንቴ ይንታ ኮእላታይንም ኪም ዽቴ ኦይሳዼኻናንቴ ኣፖ ጌይዲና።
25
ጳውሎስምካሞ ኬ ካትንካ ዻኻንቴ ዻናንቴ ኬያያዃ፣ ክካላ ዎያዳ ዎታደርና ማቶናሳ ጋራግያ፦ “ሮም ኤድ ካላም ብቶ ቆልማ ዻዻያም ዳምብኖ ዬናንቴ ጌያው ኮጌያይ?” ና ክያማዶ።
26
ዎታደርና ማቶናሳ ጋራ ኣጋም ኤሳራንቴ፣ ዎታደርናሳ ብታኻላ ቃልቴ ክግያ፣ “ሃር ሃይቴ ሃዶንም ያ ዼስድው? ኤያ ካ ሮም ኤዲታይ” ሃምዲና።
27
ዎታደርናሳ ብታኻሞ ጳውሎስ ካላ ናዴ ክግያ፦ “ያ ኤያ ካ፣ ይንዳ እናንቴ ጌይማ፣ ያ ሮም ኤድው?” ና ክያማዶ።
ኖኻሞ ክግያ “ዪኒ፣ እንታ ሮም ኤዲና” ሃምዲና።
28
ዎታደርናሳ ብታኻሞ ክናንቴ ይማሳና፦ “እንታ ሮም ኤድ ይንካ እማታዶኖ ብሬ ጱፅ ቡላንቴና” ና ክያማዶ።
ኮዶን ጳውሎስ ክግያ፦ “ኢም ኣዻዽዳሮኻ ካርሳንቴ እንታ ሮም ኤዲና” ሃምዲና።
29
ኣጋታኻ ኤና እግና ክካላ ኦይሳናንቴ ቃባዳና ኣጋዛራ ክካላንካ ጎብዲና፤ ዎታደርናሳ ብታኻሞ ኖ ሮም ኤድ ክዶን ይዼሳዶን ዋዳንካ፣ ኪም ሳንሠለትንካ ይዻኻዶንታኻ ኩርትንዽዲና።
30
ዋጋላሞንካሞ ዎታደርናሳ ብታ፣ ኣይሁድና ጳውሎስም ይንካ ዻቢ ኬሃያዳሳ ጎያ ጎንዻ ሃር ክዶንም ዼሳናንቴ ይዛጋዶንታኻ ኪም ቡልዲና፤ ሃያንቴ ኤና ባርያናንቴ ዳምብን ኣሽካይናሳ ጋርናቤ ኤና ኣይሁድናሳ ብቶን ታኻይናቤ ፓይላ ኬፑጬኻናንቴ ኣፖ ጌይዲና፤ ጳውሎስምካሞ ባኣሳንቴ ኬሳ ዎትሮ ዎይስዲና።