25

¹ ፊስጦስካሞ ፔያስ ኣጋዛራ ክኣርዳዃ ሮሮ ማካንሳ ራስባራ ቂሳርያባራኻ ኢየሩሳሌምዛራ ውትዲና። ² ኤና ባርያናንቴ ዳምብን ኣሽካይናሳ ጋርናቤ ኣይሁድናሳ ዞንዛናቤ ክካላ ናዴ ጳውሎስም ቤርንስዲና። ³ ኬ ጳውሎስም ጎይሮ ባꬅማንቴ ዴሳናንቴ ይቃባዶንታኻ፣ ፊስጦስ ኬዛራ ዎዻንቴ ኪም ኢየሩሳሌምዛራ ክኣንሤኻናንቴ ኬ ኪም ጌጲ ምስክዲና። ⁴ ፊስጦስካሞ ኬናንቴ ይማሳና፦ "ጳውሎስም ዻኻዻዃ ቂሳርያ ግዶር ዻክን ኦኖሮጎና ክዶ፤እንታኻሞ ፄዲንኮ ኦጎዛራ ማታቴ ያኣና እያኣይ፤ ⁵ ዬሳ ኤና ጋርና ግዶር ኬሳ ዋኒ እላማ ክንካ ቃልቴ ክሳ ሴሶ ኮዳና ይሳ ቤርንሦንም ኦጎታር ኬቤርንሤ” ና ክያማዶ።

⁶ ኖኻሞ ኬላማ ሮሮ ሎንካይ ዎይካሞ ታጲግያ ካፓንቴ፣ ቂሳርያዛራ ሃንችዲና፤ ዋጋላሞን ብቶን ታኻዻን ቦርኮቶንዛራ ኖ ዳርቃንቴ ጳውሎስም ክዛራ ኣንሳዼኻናንቴ ጌይዲና። ⁷ ጳውሎስካሞ ክናኣና፣ ኢየሩሳሌምባራኻ ናኣዳና ኣይሁድና ኪም ታኻንቴ፤ ዼላቅ ጌጲ ጎይ ቆልማ ጱፅካ ኪም ቤርንስዲና።

⁸ ጳውሎስካሞ ይጌይና፣ “እንታ ኣይሁድ ዳንብንቤ ባርዮን ኦኖንቤ ዎይካሞ ቄሳርቤዛራ ዬር እሴሳዳ ቆልማሞ” ሃማንቴ ይባራንካ ዼላቃም ቶልዲና።

⁹ ፊስጦስካሞ ኣይሁድናዛራ ዎዻንቴ፣ ጳውሎስግያ፦ “ዼላቃ ካም ኢየሩሳሌምዛራ ውታንቴ እሳ ዎትሮ ዎያንቴ ብቶን ታኻዼኻናንቴ ናሻው ሃናሻይ?” ሃምዲና።

¹⁰ ጳውሎስካሞ ክግያ፦“ታኻሞ እንታ ብቶን እያፓይን ራቅን ቄሳር ቦርኮቶንሳ ዎትሮጎ ዎያንቴና እዶ፤ ያኻሞ ጎንዴ ሃዼሳዳግያ ኣይሁድናም ይንካ እሴሳዳ ዬር ካላኻሞ ቆልማሞ፤ ¹¹ ይያማን ኢም ዴሶዛራ ባኣያ ሴሶ እዛራ ሃፓዻዳና እንታ ጅማሞ ሃምማሞ፤ ኮዶን ኣይሁድና ክና ዬራ ይንካ ኢም ኬቤርንሳያ ጎንዼ ክትምና፣ ኢም ኤዲ ኬናንቴ ሳስካቴ እማያ ቆልማሞ፤ ኣጋታኻ ዼላቃ እንታኻ ቄሳርዛራ ክዬኤ።”

¹² ፊስጦስካሞ ይሳ ቦርኮቶን ኤና ማላ ሃሳዋንቴ ክግያ፦ “ዼላቃ እንታኻ ቄሳርዛራ ክዬኤ ሃማዶንታኻ፣ ቄሳርዛራ ያኣና ሃያኣይ” ና ክያማዶ። ¹³ ሮሮ ቶኻሳ ራስባራኻሞ ጋራ ኣግርጳቤ በርኒቄቤ ፊስጦስም ጌሳናንቴ ቂሳርያዛራ ሃንችዲና፤ 14 ኦጎታርካሞ ሮሮ ጱፅ ኬ ዎዽዲና፤ ፊስጦስካሞ ጳውሎስሳ ዼላቃም ኤያ ጋራናንቴ ይንታ ሃማንቴ ጌይዲና፦ "ፊልክስ ዻክን ኦኖሮጎ ይጋራዳ ኤዲ ካላ ኮታር ዳይዲና፤ ¹⁵ ኢየሩሳሌም እያኣዶን ዋዳንካ፣ ኣይሁድናሳ ኤና ባርያናንቴ ዳምብን ኣሽካይናሳ ጋርናቤ ዛርስንሳ ዞንዛናቤ ኪም እዻብንሼኻናንቴ ኪም ቤርንስዲና።

¹⁶ እንታኻሞ ኬናንቴ ኤዲ ዬር ሴሳዳ ካላ ኤና ኪም ቤርንሳዳናሳ ዎትሮ ይንካ ኪም ቤርንሳዻዳሳ ዼላቅ ክጌይማ፣ ኪም ዻባሞንናንቴ ሳስካቴ እንዻይኖ ሮም ኤናሳ ዳምቢ ኮትሞንም ጌይዲና። ¹⁷ ኣጋታኻ ኪም ኤና ቤርንሳዳና እላማ ክንካ ኮታር ኬናኣዃ፣ ዼላቃም ጉዱጲ እዎኦስማ ዋጋላሞን እንታ ብቶን ቦርኮቶንዛራ ዳርቃንቴ ኤያ ኣጋም ኣንሳቴ ኬኔኤኻናንቴ ጌይዲና። ¹⁸ ኤና ኪም ቤርንሳዳና ዻጳንቴ ኬጌያዃኻሞ፣ እቃባዳግያ ኬ ዴላቅ ዋቺ ክዛራ ባኣድማሞ፤ ¹⁹ ኬሳ ዼላቃ ኬ ይምስካያ ባርያሳ ዼላቅቤ ኣና ኤያ ጃዳ ጳውሎስ ይንግያ ዴምጲንባራ ዻጵዲና ክያማያ ኢየሱስሳ ዬርና ክላማ ኬዜርማይ። ²⁰ እንታኻሞ ዼላቃ ካሳ ጎንዻም ሃስ ሃያንቴ እዼሳይንም እናንቴ ኮዋቻዻዶንታኻ፣ ኢየሩሳሌም ቃልቴ ዬራ ካሳ ብቶን ክናንቴ ታኻዼኻናንቴ ክናሻያ ዳና ክካላ እንታ ኦይስዲና። ²¹ ኮዶን ጳውሎስ ይሳ ዼላቃም ብታ ቄሳር ክያፔኻናንቴ ክጌያዶንታኻ፤ እንታኻሞ ኪም ቄሳርዛራ እሳ ይእሳዛራ ዻክን ኦኖሮ ክዴኻናንቴ እንታ ጌይዲና።”

²² ኣግርጳኻሞ ፊስጦስግያ፦ “እንታኻሞ ኤያ ኣጋ ክዼላቃዃ ኤሳራናንቴ ዛግቴና እዶ” ሃምዲና።

ኖኻሞ ክግያ፦ “ኦጎንታ ዳና ሳኻ ክካላ ኤሳራና ሃኤሳራይ” ና ክያማዶ።

²³ ዋጋላሞንካሞ ኣግርጳቤ በርኒቄቤ ጎሺ ጌጲካ ውታንቴ፣ ኤና ዎታደርናሳ ጋርና ጌጲናቤ ካታማንሳ ኤና ጌጲናቤ ማላ ጉባይን ኦኖንዛራ ኣርድዲና፤ ፊስጦስ ክጌያዃ ጳውሎስ ክኔኤኻ ሃይዽዲና። ²⁴ ዋዳ ኣጋኻ ፊስጦስ ይንታና ክያማዶ፦ “ጋራ ኣግርጳዮ፣ ሃያንቴኻሞ ኤና ዎላማ ኮታር ዳና ፓይላ፣ ኤያ ካም ሃፕቴ ዬዶ? ኣይሁድና ኢየሩሳሌም ግዶር ዳናቤ ኮታር ቂሳርያ ግዶር ዳናቤ ፓይላ ኤያ ካ ሳዳንካ ክዴኻናንቴ ዛግስማሞ ሃምንቴ እላትቴ ኢም ምስክዲና። ²⁵ እንታኻሞ ዬር ኪም ዴምጲዛራ ባኣሳያ ካላኻሞ ክኣሽካድሞንም ዼስዲና፤ ይያማን ኖ ይሳ ዼላቃም ብታ ቄሳር ክያፔኻናንቴ ክጌያዶንታኻ፤ ኪም ሮምዛራ ይእሳናንቴ እንታ ታክዲና። ²⁶ ኮዶን ክሳ ዬር እሳ ብታናንቴ ዋርቃት ግዶር ኡካቴ እይእሳያ ዬር ጎንዼ ዳ እንታ ሃፓድማሞ፤ ኣጋታኻ ኪም ኦይሳዻዃ ዬር ዋርቃትዛራ እኡካያ ሃፓናንቴ ዬውልሳ ዎቲዛራ እንታ ኣንሳቴ ናእዲና፣ ውልም ጋራንቴ ጋራ ኣግርጳ ኪም ሃሳዛራና ኣንሳቴ እናኣዶ። ²⁷ ኦጎኖኻሞ ዻኪ ኤድ ካላም ኤያ ጌጳ ጳባራን ዳናንቴ ይእሳዽና ኪም ይንካ ዻቢ ሃይዻዳ ዼላቃም ጌይዽማ ይእሳዻያ እናንቴ ልኪ ክዳድሞንታኻና።”