19

¹ ኣኻራ ኣጵሎስ ቆሮንቶስ ግዶር ክዶን ዋዳንካ፣ ጳውሎስ ጳባራን ዶን ፔንካ ሳጋንቴ ኤፌሶንዛራ ናእዲና፤ ኦጎታርካሞ ባርዮን ኤና ዋኒም ሃፓንቴ ኬግያ፦ ² “ዬኣምንዶን ¹ ዋዳንካ ኡስን ጋዛን ዬቲህ ቻይድው?” ሃምዲና።

ኬኻሞ ክግያ፦ “ዎቲ ቻድማሞ፤ ኡስኖ ጋዛኖ ኮዶንምካሞ ዎቲ ኤሳራድማሞ” ሃምዲና።

³ ጳውሎስካሞ ኬግያ፦ “ታ ዬቲህ ሃርካ ዬሻይዻዴ?” ና ክያማዶ።

ኬኻሞ ክግያ፦ “ዮሃንስ ሻዮንካና ዎሻይዻዶ” ና ኬያማዶ።

⁴ ጳውሎስካሞ ኬግያ፦ “ዮሃንስ ሻዮኖ ሴሶንባራ ማታዻዶን ዻዋያ ሻዮና፤ ኖ ይባራንካ ክሳ ራስባራ ናኣያ ኢየሱስካ ኤና ኬኣምኔኻናንቴ ጌይዲና” ሃምዲና። ⁵ ኬኻሞ ዬራ ኣጋም ይኤሳራዶን ዋዳንካ ጌጳ ኢየሱስ ናብንካ ሻይዽዲና። ⁶ ጳውሎስካሞ ይሳ ኣኒን ኬዛራ ክዎዳዃ፣ ኡስኖ ጋዛኖ ኬዛራ ሃንችዲና፤ ኣፖ ኣብ ኣብካ ኬ ዼላቃንቴ ባርያሳ ኣፖን ² ጌይዲና። ⁷ ኤና እግና ዳናኻሞ ታጲ ላማግያና።

⁸ ጳውሎስካሞ ኣይሁድናሳ ምስኮን ኦኖንዛራ ኣርድቴ ባርያ ማንግስትንሳ ዬር ጌይቴቤ ኬም ኣምንስቴቤ ኣርፒ ማካም ኩርትንዽማ ዻር ጌይቴና ክዶ። ⁹ ኮዶን ኤና ዋኒ ዛርማ ኤድ ዳንቴ፣ ኣምናናንቴ ዛጋድማሞ፤ ጌጳሳ ጎይን ኬ ማይ ቦውቴና ኬዶ። ኣጋታኻ ጳውሎስ ኬም ጋራንቴ ያእዲና፤ ባርዮን ኤናም ፃክርሚ ቡላንቴ ታማርን ኦኖን ጢራኖስ ግዶር ኬላማ ሮሮ ውል ሃሳውቴና ክዶ። ¹⁰ ኦጎንታ ሃይቴኻሞ ቦን ላማ ክሳጋዶንታኻ፤ እስያ ግዶር ዳና ኣይሁድ ኤናቤ ግርክ ኤናቤ ፓይላ ጌጳሳ ዼላቅን ኤሳራንዻን ቻሊዲና።

¹¹ ባርያኻሞ ጳውሎስካ ዬር ሃምማንቴ ዼስማ ጌጲ ዬርሻዻያ ሃይቴና ክዶ፤ ¹² ጫርቃ ሾላ ክሳ ዎትን ዹቃያ ዎይካሞ ክሳ ብሽን ላኣሳዶን ኣፓላን ኤና ሃጅሞንዛራ ኬዎድና ኤና ይሳ ሃጅሞናባራ ፓሽቴና ኬዶ፤ ቤሮናኻሞ ኤናባራ ውትቴና ኬዶ።

¹³ ያይቴ ኤናባራኻ ቤሮን ቡላይናሳ ኣይሁድና ዋኒ፣ “ጳውሎስ ይጌያያ ኢየሱስ ናብንካ ዬውቴኻናንቴ ዎቲ ዬናንቴ ጌይዲና!” ሃንቴ ኤና ቤሮን ይሽማዳናዛራ ጌጳ ኢየሱስ ናብን ግስማናንቴ ሃይዲና፤ ¹⁴ ባርያናንቴ ዳምብን ኣሽካይናሳ ጋራ ኣይሁድ ኤያ ኣስቄዋሳ ኣንጌን ናና ሦጳናኻሞ ኣጋንታ ሃይቴና ኬዶ። ¹⁵ ቤራኻሞ ኬግያ፣ “ኢየሱስም እንታ ዼስዲና፤ ጳውሎስምካሞ እንታ ዼስዲና፤ ኮዶን ኤ ዬቲህ ሃውቤቴ?” ሃምዲና። ¹⁶ ሃይዻዃ ኤያ ቤሮን ይሽማዳ ኬዛራ ጱላንቴ ኬም ዬድዲና፤ ኬዛራ ካሎን ክዋቻዻዃኻሞ ኦኖን ጋራንቴ ፑርዱንቆ ማኣሳዳቴ ጎብቴ ያእዲና።

¹⁷ ዬራ ኣጋኻሞ ኤፌሶን ግዶር ዳና ኣይሁድናናንቴቤ ግርክ ኤናናንቴቤ ውል ኮኤሳርማዶን ዋዳንካ፤ ኤዲኖ ፓይላ ኩርትንዽዲና፤ ዬራ ኣጋኻ ሃማንቴ ጌጳ ኢየሱስ ናብን ኩርትንዻዽዲና። ¹⁸ ኤና ኣምናዳና ግዶር ኤዲኖ ጱፅኖ ናዴ ይሳ ዋድማና ዛርቦናም ኬናንቴ ጋርዼኻናንቴ ማይ ጌይዲና፤ ¹⁹ ኤና ሞራን ቃንሲቴን ዳና ጱፅና ግዶርካሞ ዋኒ ይሳ ዋርቃታናም ፑኡሻንቴ ባኣቴ ናዴ ዛርስንሳ ዎትሮ ኮቅዲና። ዋርቃትና ኮቃዻዳናም ዬክንሳዻዃ ዋጋኖ ኬሳ ብሬ ሺ ዶጝታምግያና ኮዶ። ²⁰ ኣጋኻ ሃማንቴ ጌጳሳ ዼላቅኖ ካንታኻ ሻማዳቴቤ ባሻዳቴቤ ያእዲና።

²¹ ኣጎኖ ውል ፓይላ ኦጎንታ ኮማታዃ፣ ጳውሎስ መቄዶንያቤ ኣካይያቤኻ ሳጋንቴ ኢየሩሳሌምዛራ ያኣናንቴ ቃባንቴ፣ “ኣጎታር ይዬስካና ፕር ሮም ካታማንም ሃፓናንቴ ዛጋና እዛጋይ” ሃምዲና። ²² ኤና ኪም ኬልሻይና ግዶር ላማና ጢሞቴዎስቤ ኤርስጦንቤም መቄዶንያዛራ ይእሳንቴ ኖ ይባራንካ እስያ ግዶር ሮሮ ቄታ ካፕዲና። ²³ ዋዳን ኦጎኻ ጌጳ ጎይንካ ሃማንቴ ዋጅ ዻጵዲና። ²⁴ ድሜጥሮስ ሃንዻያ ኤዲ ካላ ብሬን ዎርቄን ፓኻያ ኣርጤምስ ሃንዻይኖ ባርይቶኖ ኦኖንናንቴ ኮይሶን ፓኻንቴ ሻንሽቴ ይሳ ዋድማን ኤናናንቴ ብሬኖ ክያፕሳይኖ ቄታ ትማሞ። ²⁵ ኖኻሞ ኤና ዋዳማን ኣሽካይና እግናቤ ኤና ዋኒቤም ክዛራ ፑኡሻንቴ ክግያ ይንታና ክያማዶ፦ “ኤናቶ፣ ዋድማ ካ ዬር ፃል ዎናንቴ ክያፕሳይንም ዬቲህ ዼሳና ዬዼሳይ። ²⁶ ጳውሎስ ሃንዻያ ኤያ ኣጋ ኤፌሶን ግዶር ሶጎ ጋራንቴ እስያ ግዶር ፓይላ ዛርስን ዶንም ኢየሱስካ ኣምንስቴ ጎይ ጶርጋዳ ይእስቴ ክዶን ኮሼ ዬቲህ ሃፕቴቤ ኤሳርቴቤና ዬዶ፤ ኤናሳ ኣኒንካ ኣሽካዻዳና ባርዮና ሾሊካሞ ባርዮና ኬትሞኒና ክጌያይ። ²⁷ ዋድማን ዎኖን ኮሳ ናብኖ ኮስያዶንሳ ጳባራ፣ እስያ ፔኖ ፓይላቤ ፔን ጋላፕን ይምስካይኖ ጌጶኖ ኣርጤምስሳ ኦኖኖ ዋጋ ቆልማና ኮዳይ፤ ሃያንቴኻሞ ኮሳ ጎሺኖ ሽዻና ኮሽዻይ።”

²⁸ ኤናኻሞ ኦጎም ኤሳራንቴ ካልሎን ዻጋሳንቴ፣ “ኤፌሶን ጋይኖ ኣርጤምስ ጌጲና!” ሃንቴ እላታን ካርስዲና። ²⁹ ኣጋዛራኻሞ ካታማሮ ፓይላ ዋጅ ዻጵዲና፤ ዛርስኖኻሞ ክዛራ ማታንቴ ጳውሎስ ማላ ይቴን ዳና ክሳ ሃርያና መቄዶንያ ኤና፣ ጋይዮስቤ ኣርስጥሮኮስቤም ዬዳንቴ ኣልምን ዻዋዻይን ራቅንዛራ ጎብቴ ኬ ኣርድዲና። ³⁰ ጳውሎስካሞ ዛርስንሳ ዎትሮ ውታናንቴ ክዛጋዃ፤ ባርዮን ኤና ኪም ማርዲና። ³¹ ፔን ኦጎሳ ጌጵና ክሳ ሃርያና ዋኒ ጳውሎስ ኣልምን ዻዋዻይን ራቅንዛራ ኣርዳን ክጋሬኻናንቴ ኤዲ ይእሳንቴ ኪም ምስክዲና።

³² ኤድን ፑጫዶንሳ ኣፖ ኪም ኮጋኣድሞንታኻ፣ ዋ ኣብ ክጌይና ዋኻሞ ኣብ ጌይቴ እላትቴና ኬዶ፤ ኤድኖ ጱፅኖ ዋኒ ኦጎታር ሃርናንቴ ይፑጫዶንም ዼስማሞ። ³³ ኣይሁድ ኤናኻሞ እስክንድሮስም ዛርስንሳ ባክሮኻ እስ ብራዛራ ይቃቴ ኬቡላዶን ዋዳንካ፤ ኤና ዋኒ ክዼላቄኻናንቴ ክዛራ እላትዲና፤ ኖኻሞ ኬናንቴ ታርጃናንቴ ጫክ ኬያሜኻናንቴ ኣኒካ ኬም ዼላቅስዲና። ³⁴ ኮዶን ኖ ኣይሁድ ኤድ ክዶንም ይዼሳዶን ዋዳንካ፣ ኬ ፓይላ ውል ኣፖ ካላኻ፣ “ኤፌሶን ጋይኖ ኣርጤምስ ጌጲና” ሃንቴ ሳኣት ላማግያ እላትዲና።

³⁵ ኤያ ካታማን ኦጎሳ ዋርቃንት ኡካያ ዛርስንም ጫክ ሃይሳንቴ ይንታና ክያማዶ፦ “ኤፌሶን ኤናቶ፣ ኣርጤምስ ጌጶንሳ ኦኖንቤ፣ ፖላንባራ ሃንቻዳ ዬራ ኮሳ ብሽን ዻዋን ግያንዳም ዻቃናይኖ ኤፌሶን ካታማንሳ ዛርስኖ ኮዶንም ዼስማ ሃውቴ? ³⁶ ኣጋታኻ ዬራ ካ ጎንዼ ክዶን ዜርማዽሞንታኻ፣ ሌማንቴ ዬር ካላም ግቦኻ ኣሽካን ዬጋሬኻናንቴ ዛግሳና ኮዛግሳይ። ³⁷ ኤና ክናም ዎሳ ባርይቶንሳ ኦኖን ኬሮግማ፣ ዎይካሞ ዎሳ ባርይቶንዛራ ኢርሞ ኣፖ ጌይማ ኬም ሱን ባኣቴ ዬቲህ ኮዛራ ናእዲና። ³⁸ ኣጋታኻ ድሜጥሮስቤ ክላማን ዳና ዋዳማን ኤና ኬሳ ዼላቅ ኮዳና፣ ብቶን ኦኖኖ ቡልሚና ኮዶ፤ ኤና ብቶን ታኻይናኻሞ ዳይዲና፤ ኦጎታር ናዴ ዼላቅና ይሳም ጌያን ቻላና ኬቻላይ። ³⁹ ካሳ ኦባራ ዬር ኣብ ባኣናንቴ ዬዛጋዳና፣ ዬራ ኣጋም ዳምብን ጎይንካ ጉባይሮና ታኻዻይ። ⁴⁰ ኦጎንታ ኮዳድምና፣ ዬራ ሃይታላ ሃምማዳ ዋጅን ዻሳዳኻ ሃማንቴ ዎም ቤርንሳዻና ዎም ኩርትንሳና ኮኩርትሳይ፤ ዬራ ካናንቴ ዬር ጎንዼ ሃማ ኮቆልሞንታኻ ዎኻላ ኦይሳዽና ዬር ማሳናንቴ ዎቲ ቻልማሞ” ሃምዲና። ⁴¹ ኖ እግናም ጌያንቴ ዛርስኖ ፑጫዶኖ ኮላልሜኻ ሃይዲና።