18

¹ ኣጋሳ ራስባራ ጳውሎስ ኣቴና ግዶርካ ዻጳንቴ ቆሮንቶስ ካታማንዛራ ያእዲና። ² ኦጎታርካሞ ጳንጦስ ግዶር ኣዻዻዳ ኣይሁድ ኤያ ኣቂላ ሃንዻያም ሃፕዲና፤ ኖኻሞ ኣይሁድ ኤና ሮም ካታማሮኻ ኬውቴኻ ቀላውዴዎስ ክጌያዳ ጎያኻ ሃማንቴ ሜን ይሳ ጵርስቅላ ማላ ጣልያን ፔንባራ ዋዳ ፄዲሳ ኢርና ኬናኣዶ። ጳውሎስካሞ ኬም ሼዳናንቴ ኬዛራ ያእድና፣ ³ ኖኻሞ ኬግያ ኤድ ዱንካ ኣሽካያ ይዶንታኻ፣ ኬ ማላኻሞ ክንካ ዋድማ ክግያማ ግዶር ኣርድዲና። ⁴ ኣይሁድናሳ ኡኩንሳን ሮሮና ጋላኻሞ ኣይሁድ ኤናቤ ግርክ ኤናቤ ላማ ኣይሁድና ምስኮን ኦኖን ግዶር ሃሳውቴ ኬም ኣምንሳናንቴ ሃይቴና ክዶ።

⁵ ሲላስቤ ጢሞቴዎስቤ መቄዶንያባራ ኬሃንቻዶን ዋዳንካ፣ ጳውሎስ ዋቻዻንቴ ኣፖን ጌይቴ፣ ኢየሱስ ኖ ክርስቶስ ¹ ክዶንም ኣይሁድ ኤናናንቴ ጌይቴና ክዶ። ⁶ ኮዶንካሞ ኬ ኪም ቶዛዻንቴ ኬኢራዶን ዋዳንካ ኣፓላን ይሳም ይፓታንቴ ኬግያ፦ “ማኣስኖ ዬሳ ዬዛራ ኮዴ! እንታ ኤድ ጫንቃላማና፤ ናንሲ ካኻ ካርሳንቴ ቶርስን ኤናዛራና እያኣይ” ና ክያማዶ።

⁷ ኦጋታርካ ውታንቴ ቲቶስ ኢዮስጦስ ሃንዻያ፣ ኤያ ባርያም ምስካያ ኦኖንዛራ ያእዲና፤ ኤያ ኣጋሳ ኦኖኖ ኣይሁድናሳ ምስኮን ኦኖንካላ ፄዲና ኮዶ። ⁸ ኤያ ኣይሁድናሳ ምስኮን ኦኖንሳ ጋራ ቀርስጶስ ኤና ይሳ ፓይላ ውል ማላ ጌጳኻ ኣምንዲና፤ ጳውሎስ ክጌያዃ ኤሳርዳና ቆሮንቶስ ኤድኖ ጱፅኖኻሞ ኣምናንቴ ኑንቆንካ ሻይዽዲና።

⁹ ጌጳኻሞ ሶቲን ሃይማንካ ጳውሎስግያ፦ “ሃኩርትንዽናኖ፤ ጌይማ፣ ጫክ ሃምናኖ፤ ¹⁰ እንታ ሃላማ ክንካ እዶንታኻ ኤድ ካላኻሞ ሃዛራ ዻጳንቴ ዬር ዛርቦ ዬስክሳናንቴ ቻልማሞ፤ ካታማ ካሮ ኤዲ እሳ ጱፅ ዳይዲና” ና ክያማዶ። 11 ኣጋታኻ ጳውሎስ ኬም ባርያሳ ኣፓን ታማርስቴ ቦን ካላቤ ኣርፒ ላቤ ኬላማ ዳርቅድና።

¹² ጋልዮስ ኣካይያ ፔንሳ ጋር ክዶን ዋዳንካ፣ ኣይሁድና ክዛራ ማታንቴ ጳውሎስዛራ ዻጲድና፣ ብቶን ታኻያ ጋራሳ ዎትሮ ኪም ዎይሳንቴ፦ ¹³ “ኤያ ካ ዳምብን ይጌይሞን ጎይንካ ኤና ባርያም ኬምስኬኻናንቴ ኬም ጎይ ዛርቦኻ ይእስቴና ክዶ” ና ኬያማዶ።

¹⁴ ጳውሎስ ዼላቃናንቴ ኣኻራ ኣፖ ይሳም ክሳ ቡላ፣ ጋልዮስ ኣይሁድ ኤናግያ፦ “ኣይሁድ ኤናቶ፣ እዛራ ዼላቃ ዬባኣዳ እኒ ሴሶ ዎይካሞ ዬር ዛርቦባራ ኮዳና እንታ እኒ ዬናንቴ ኤሳራና እኤሳራይ፤ ¹⁵ ኮዶንካሞ ዬሳ ዼላቅኖ ሱንን ጋይኖቤ፣ ዬራ ናብና ጋይናቤ ዬሳ ዳምብንናንቴ ኮዶንታኻ፣ ዬቲህ ዬዻር ቱንስማቴ፤ እንታ ዬር ካግያኻ ብቶ ታኻናንቴ ዛግማሞ” ና ክያማዶ። ¹⁶ ኣጋታኻ ኬም ብቶን ታኻዻን ቦርኮቶንሳ ዎትሮኻ ኖ ቡልስዲና። ¹⁷ ዋዳስ ኣጋኻ ኬ ፓይላ ኤያ ኣይሁድናሳ ምስኮን ኦኖንሳ ጋራ፣ ሶስቴንስም ዬዳንቴ ብቶን ታኻዻን ኦኖንሳ ሻንሮ ኬ ዻይዲና፤ ኮዶን ጋልዮስ ዬራ ኣጋባራ ካላኻሞ ግባርሳድማሞ። ¹⁸ ናንሲ ጳውሎስ ቆሮንቶስ ግዶር ሮሮ ጱፅ ካፕዲና፤ ኣይሁድ ዳምብንካ ኖ ባርያናንቴ ዬራ ይኣሽንሻዳም ይቱንሳዶንታኻ ክንክራኦስ ግዶር ስትን ይሳም ሃዳዽዲና፤ ሃያንቴ እንዳ ናናም ኤልቅማንቴ ጵርስቅላቤ ኣቂላቤ ማላ ጋግንካ ሶርያዛራ ያእዲና። ¹⁹ ኤፌሶን ይዬስካና ጵርስቅላቤ ኣቂላቤም ኦጎታር ጋራንቴ፤ ኖ ኣይሁድናሳ ምስኮን ኦኖንዛራ ኦርዳንቴ ኣይሁድና ማላ ሃሳውቴና ክዶ። ²⁰ ኮዶን ኬላማ ክንካ ክካፔኻናንቴ ክካላ ኬኦይሳዶን ዋዳንካ ኖ ናሻድማሞ፤ ²¹ ኬኻላንካ ውታንቴ ይያኣና ኬግያ፦ “ባርያሳ ቃቦ ኮዳና ማታቴ ናኣና እናኣይ” ና ክያማዶ፤ ሃያንቴ ኤፌሶንባራ ዻጳንቴ ጋግንካ ያእዲና። ²² ቂሳርያ ይዬስካዶን ዋዳንካ፣ ኢየሩሳሌምዛራ ውታንቴ ባርዮን ኤናም ጌሳንቴ፤ ኣንፆኪያዛራ ሃንችዲና።

²³ ኣንፆኪያ ግዶር ሮሮ ቶኻ ካፓንቴ፣ ኦጎታርካ ዻጳንቴ ገላትያቤ ፍርግያቤ ፔና ግዶር ያያንቴ ታማርናም ፓይላ ሶቦርስዲና።

²⁴ ዋዳ ኣጋኻ እስክንድርያ ግዶር ኣዻዻዳ ኣይሁድ ኤያ ኣጵሎስ ሃንዻያ ኤፌሶንዛራ ናእዲና፣ ኖ ታማርዳቤ ዋርቃትን ጫራጚን ፃሊ ዼሳዳና፤ ²⁵ ኤያ ካ ጌጳሳ ጎይን ታማራዳ፣ ኢየሱስሳ ዬርን ጎንዼ ጌያያቤ ኡስን ጋዛንካ ኦይዻዻንቴ ² ታማርሳያ ኤዲና፤ ይያማንካሞ ኖ ክዼሳዶኖ ዮሃንስሳ ሻዮን ሶጎና። ²⁶ ኖኻሞ ኣይሁድናሳ ምስኮን ኦኖሮ ኩርትንዽማ ዼላቃን ካርስዲና፤ ጵርስቅላቤ ኣቂላቤ ኣጋም ይኤሳራዶን ዋዳንካ፣ ኪም ይሳ ኦኖንዛራ ግስማንቴ ባርያስ ጎይንም ክናንቴ ልኪ ሃያንቴ ጌይዲና።

²⁷ ኣጵሎስ ኣካይያዛራ ያኣናንቴ ይቃቦዶን ዋዳንካ፣ እንዳ ናና ኪም ሶቦርስዲና፤ ኦጎታር ዳና ብና ባርዮን ኤና ኪም ይዛራ ኬቼኻናንቴ ዋርቃት ክናንቴ ኬ ኡክዲና። ኦጎታርካሞ ክዬስካና ባርያሳ እምንቶን ክናንቴ እንዻዶንካ ሃማንቴ ኤና ኣምናዳናናንቴ ኖ ኬልሾ ጌጲ ማትዲና፤ ²⁸ ኢየሱስ ኖ ክርሰቶስ ክዶንም ዋርቃትን ጫራጝሮኻ ዻውቴ ኣይሁዳና ላማ ክንካ ካልሎን ዜርምቴ ዛርስንሳ ዎትሮ ኬም ባሽቴና ክዶ።