17

¹ ጳውሎስቤ ሲላስቤ፣ ኣንፊጶልቤ ኣጶሎንያቤኻ ሳጋንቴ ተሰሎንቄዛራ ያእዲና፤ ኦጎታርካሞ ኣይሁድናሳ ምስኮ ኦኖ ዳይዲና። ² ጳውሎስ ሌሌ ይያያግያ ምስኮን ኦኖን ኦጎዛራ ኣርዳንቴ፤ ኣይሁድናሳ ኡኩንሳ ሮሮ ማካንካ ዋርቃትን ጫራጝሮኻ ኬናንቴ ጌይቴ ኬላማ ዼላቅዲና፤ ³ ክርሰቶስ ¹ ጋሎን ክያፓይንቤ ዴምጲንባራኻሞ ክዻጳይንቤም ኮዛግሳዶንም ኬናንቴ ጎንዽስቴ ጌይቴ ኬግያ፦ “ካ ዬናንቴ እጌያያ ኢየሱስ ኖ ክርስቶሲና” ሃምዲና። ⁴ ኣይሁድሳ ኤና ዋኒ ዼላቃ ይኤሳርዳም ቻንቴ ጳውሎስቤ ሲላስቤዛራ ማትዲና፤ ሃያንቴኻሞ ግርክ ኤና ፓይዶንሳ ጱፅና ባርያም ኩርትንጳይናቤ ሜና ጎሻዻዳና ጱፅናቤ ዼላቅን ይኤሳርዶን ኦጎም ቻንቴ ኬ ማላ ክንካ ማትዲና።

⁵ ኣይሁድ ኤና ዬራ ኣጋም ኬናሻድምነታኻ ኤድን ሱንን ያያን ጋባን ራቅንባራ ፑኡሺዲና፤ ዛርስንምካሞ ዻሳንቴ ከታማን ግዶሮ ዋጂ ዻስዲና፤ ጳውሎስቤ ሲላስቤም ኣንሳቴ ናዴ ዛርስንሳ ዎትሮ ² ዎይሳናንቴ ኤያ ኢያሶን ኦኖንዛራ ሩሩማንቴ ኬ ያእድና፤ ⁶ ኮዶንካሞ ኬ ኬም ሃፓናንቴ ቻላዲማሞ፤ ኣጋታኻ ኢያሶንቤ እንዳን ናና ዋኒቤም ኤና ካታማንሳ ጋርናቤሳ ዎትሮ ጉቻዳቴ ይንታ ሃማንቴና ኬእላታዶ፦ “ኤና ክና ፔን ፓይላም ዋጂሽቴ ይዶን ሃያንቴ፣ ታ ፕር ኮታ ኬ ናእዲና፤ ⁷ ኢያሶንካሞ ኬም ይሳ ኦኖንዛራ ኣርስድና፤ ኬ ክና ፓይላ፣ ‘ኢየሱስ ሃንዻያ ብቲ ኣብ ዳይድና’ ሃንቴ ብታ ቄሳርሳ ዳምብን ሴሳይናና።” ⁸ ዛርስንቤ ኤና ካታማንሳ ጌጲናቤ ዬራ እግናም ኤሳራንቴ ጄክዲና፤ ⁹ ሃያንቴኻሞ ኤና ካታማንሳ ጌጲና ኢያሶንቤ ኤና ዋኒቤም ብሬ ዬድስሳንቴ ኬም ቡልዲና። ¹⁰ እንዳ ናናኻሞ ኣጋዛራ ጳውሎስቤ ሲላስቤም ሶቲንካ ቤርያዛራ ይእስዲና፤ ኬኻሞ ኦጎታ ይዬስካዶን ዋዳንካ፣ ኣይሁዲናሳ ምስኮን ኦኖንዛራ ኣርድዲና። ¹¹ ቤርያ ፔን ኤና ተሰሎንቄ ፔን ኤናናንቴ ፓኻላና ኬዶ፤ ኦጎኖኻሞ ኬ ጳውሎስሳ ኣፖን ፃሊ ኤሳራንቴ ዬራ ካ ኦጎንታው ሃማንቴ ዋርቃትናም ሮሮ ውል ሼዲቴ ኣፖን ኬሳም ካልሎን ኣታንቴ ኬቻዶንታኻና። ¹² ኣጋኻ ሃማንቴ ኬግዶር ኤና ጱፅና ኣምንዲና፤ ሃያንቴኻሞ ግርክ ፔን ሜና ጎሺዻዳናቤ ኣንጌናቤ ኬ ላማ ክንካ ኣምንዲና።

¹³ ኣይሁድና ተሰሎንቄ ጋይና ጳውሎስ ባርያሳ ዼላቅን ቤርያ ግዶር ካውል ክጌያዶንም ይዼሳዶን ዋዳንካ፤ ዛርስንም ዬር ዛርቦኻ ኪላንቴ ዻሳናንቴ ኦጎዛራ ኬ ያእድና። ¹⁴ ዋዳስ ኣጋኻ እንዳ ናና ጳውሎስም ይርካ ኛፓስንሳ ኣፖንዛራ ይእስዲና፤ ኮዶን ሲላስቤ ጢሞቴዎስቤ ኦጎታር ሺዽዲና። ¹⁵ ጳውሎስም ኤና ቡላዳና ኣቴና ካታማንዛራ ዬስክስዲና፤ ሃያንቴኻሞ ሲላስቤ ጢሞቴዎስቤ ይርካ ክዛራ ኬኔኤ ሃማያ ኣፖ ባኣቴ ማትዲና። ¹⁶ ጳውሎስ ኣቴና ግዶር ኬም ካሊቴ ዳንቴ፣ ካታማ ኣጋ ዬራ ባርዮን ሃንዻይናኻ ኮፆፃዶን ሃፓንቴ ይሳ ኢካ ዻጋስዲና። ¹⁷ ሃያንቴ ኖ ኣይሁድናሳ ምስኮን ኦኖሮጎ ኣይሁድናቤ ግርክ ኤና ባርያም ኩርትንዻይናቤ፣ ፕርካሞ ጋባን ራቅሮ ኤና ይያፓይና ማላ ሮሮ ውል ዼላቅቴና ክዶ። ¹⁸ ኤፊቆሮስቤ ኢሰጦኢክቤ ታማርን ኦኖና ትምርትን ጫጋይና ኤና ክዛራ ናዴ ክላማ ክትምቴና ኬዶ። ኤና ዋኒ ይጌይና፣ “ካ ኤያ ሱን ዎራቃያ ሃር ክያሜ?” ሃምንቴና ኬዶ፤ ኤና ዋኒካሞ፣ ኖ ኢየሱስሳ ሜርሜራ ፃላቤ ዴምጲንባራ ክዳጳዶንቤም ክጌያዃ ኤሳራንቴ፣ “ባርዮና ሃሊና ፔና ኣብና ጋይናሳ ዬር ክጌያያና ኮታካይ” ና ኬያማዶ። ¹⁹ ኪም ዬዳንቴኻሞ ራቃ ኣርዮስፋጎስ ሃንዻያዛራ ኣንሳቴ ናዴ ክግያ፦ “ያ ሃታማርሳያ ታማራ ሃላ ካ ሃር ክዶንም ዎዼሴኻናንቴ ናሻው ሃናሻይ? ²⁰ ዬራ ዎም ሃኤሳርሳይና ክና ዎናንቴ ዬር ሃሊ ኬዶንታኻ፣ ዬር ሃር ኬዶንም ዼሳናንቴ ዛጋና ዎዛጋይ” ና ኬያማዶ። ²¹ ኣቴና ፔን ኤና ፓይላ፣ ሃያንቴኻሞ ኤና ፔን ኣብንባራ ናኣዳና ፔን ኦጎሮን ዳና ፓይላ ዋዳን ይሳም ኬሳስካይኖ ዬር ሃሊ ኤሳርቴቤ ዼላቅቴቤና፣ ዬር ኣብ ሃይቴ ትማሞ።

²² ኣጋታኻ ጳውሎስ ኣርዮስፋጎስ ግዶር ዛርስን ፑጫዶንሳ ባክሮ ዎያንቴ ኬግያ ይንታና ክያማዶ፦ “ዬቲህ ኣቴና ኤና ዬር ፓይላ ውልካ ባርዮናም ጫጋይና ኤና ዬዶን እንታ ሃፕቴና እዶ፤ ²³ ያያንቴኻሞ ባርዮና ዬጫጋይናም እሼድና፣ ‘ባርዮ ዼሳዽማናንቴ’ ሃማያ ዋርቃት ይንዛራ ኡካዻዳ ሙልዻ ዎይሳዻዳ እንታ ሃፕዲና፤ ታ ናንሲ ካ ባርያ ዼሳማን ዬጫጋያም ዬናንቴ ጌያና እጌያይ።

²⁴ ፔንቤ ኮሳ ኢሮን ዳናቤም ፓይላ ዎዳዳ ባርያ ኖ ፖላንቤ ፔንቤሳ ጌጳና፤ ኣጋታኻ ኤድሳ ኣን ይኣሽካዳ ኦኖ ግዶር ኖ ዳማሞ። ²⁵ ኤና ውልናንቴ ሳዳንቤ ኡስንቤም ሃያንቴ ዬራ ዋኒምካሞ እማያ ክዶንታኻቤ፣ ዬር ክሳ ጆጋዳ ኮቆልሞንታኻ ኤዲ ይኣሽካዳ ዋድማዛራ ኖ ታልቃሳዽማሞ። ²⁶ ኤናሳ ቢዛንም ፓይላ ኤዲ ካላ ግዶርካ ዎዳንቴ ፔን ፓይላ ግዶር ኬዴኻናንቴ ሃይዲና፤ ዬሳ ዋዳንቤ ሃማዛራ ዳናንቴ ዬናንቴ ኮዛግሳይንም ኖ ታክዲና። ²⁷ ኣጋኻሞ ኤና ባርያም ዛጋቴ ጫጋቴ ይንዳ ሙሽ ኪም ኬያፓዶኖ ሃማንቴና፤ ኣጋንታ ክዳናኻሞ ኖ ዎኻላንካ ፔጌ ትማሞ ክዶ፤ ²⁸ ዎዳይኖኻሞ፣ ዎያያይኖኻሞ ዎዶኖኻሞ ክንካ ሃማንቴና። ኤና ዬሳ ሃምና ኬጌያዳግያ ‘ዎቲ ክሳ ናናና።’

²⁹ ታ ናንሲ ዎቲ ባርያ ናና ዎዳና፣ ባርያ ኤድ ኣን ሃማሞኻቤ ዼስንቶቤኻ ዬር ኣሽካዻዳ ዎርቄ ዎይካሞ ብሬን ዎርቃ ዎይካሞ ሱኒግያና ክዶ ሃማንቴ ዎቃቤኻናንቴ ዛግስማሞ። ³⁰ ኣና ብራንቴ ባርያ ዬራ ክናግያምና ዼስማን ኬያያዳናም ኬናንቴ ዶንሺዲና፤ ኮዶን ታ ኤና ራቅ ይሳ ይሳር ዳና ፓይላ ዻቆን ጎይንዛራ ኬማቴኻናንቴ ጌይዲና፤ ³¹ ኖ ኤያ ይካማዳ ጎያኻ ፔንዛራ ጋዛሞኻ ብቶን ይታኻያ ሮራም ታክዲና፤ ኪምካሞ ዴምጲንባራኻ ዻሳንቴ ኤና ፓይላ ውልናንቴ ዬራ ካም ዻውዲና።”

³² ኬኻሞ ዴምጲንባራ ዻጲንቶን ይኤሳራዶን ዋዳንካ፣ ኤና ዋኒ ኬሳ ሃንጭዲና፤ ኮዶን ኤና ዋኒ “ዬራ ካም ፕርካሞ ሃኻላንካ ኤሳራናንቴ ዛጋና ዎዛጋይ” ና ኬያማዶ። ³³ ዋዳ ኣጋኻ ጳውሎስ ኬግዶርካ ውታንቴ ያእዲና። ³⁴ ኮዶን ኤና ዋኒ ጳውሎስ ይጌያዳም ኤሳራንቴ ክዛራ ማታንቴ ኣምንዲና፣ ኬኻሞ ዲናስዮስ ሃንዻዳ ኤና ኣርዮስፋጎስሳ ብቶን ታኻይና ግዶር ካላቤ፣ ዳማርስ ሃንዻይኖ ሜ ካላቤ ኤና ዋኒካሞ ኬላማ ዳይዲና።