16

¹ ጳወሎስ ደርቤንቤ ልስጥራቤዛራ ዬስክዲና። ኦጎታርካሞ ክሳ እንዳኖ ኣይሁድ ዳንቴ ኣምናዶኖ፣ ኮዶን እምባ ክሳ ግርክ ኤዲ ይዳ፣ ጢሞቴዎስ ሃንዻያ ባርዮ ኤድ ካላ ዳይዲና። ² ኖ ልስጥራቤ ኢቆንዮንቤ ግዶር ዳና እንዳ ናና ኤድ ፃል ክዶንም ይንሳ ኬጌያያ ኤዲና። ³ ጳውሎስ ኤያ ኣጋ ክላማ ክንካ ክዬኤኻናንቴ ዛግዲና፤ ኣጋታኻ ኣይሁድና ኤና ኦጎታር ዳናናንቴ ሃማንቴ ኪም ቃማን ታክዲና፤ ኣጋንታ ክያያዶኖ ኣይሁድና እግና ፓይላ ጢሞቴዎስ እምባ ግርክ ኤድ ክዶንም ኬዼሳዶንታኻና። ⁴ ኬኻሞ ካታማ ዋ ባራኻ ካታማ ኣብዛራ ይሳጋይን ዋዳንካ፣ ኤና ይእስድናቤ ባርዮን ኤና ዞንዛናቤ፣ ኢየሩሳሌም ግዶር ዼላቃ ኬታኻዳም ባርዮን ኤና ቻንቴ ይንካ ኬዴኻናንቴ ኬናንቴ እምቴና ኬዶ። ⁵ ባርዮን ኤናኻሞ እምነትንካ ዋቻዻዳቴቤ ላይ ሮሮ ውል ጱፃዻዳቴ ይቴና ኬዶ። ⁶ ጳውሎስቤ ክሳ ሃርያናቤ ባርያሳ ኣፖን እስያ ግዶር ጌያን ኬጋሬኻናንቴ ኡስኖ ጋዛኖ ኬም ኮማራዃ፣ ፍርግያቤ ገላትያቤኻ ሳጋንቴ ያእዲና። ⁷ ሚስያዛራ ኬፄድሳዶን ዋዳንካ፣ ብታንያዛራ ኣርዳናንቴ ኬ ሃይዲና፤ ኮዶን ኢየሱስሳ ኡስኖ ኬም ማርዲና፤ ⁸ ኣጋታኻ ኬ ሚስያኻ ሳጋንቴ ጢሮኣዳዛራ ሃንችዲና። ⁹ ጳውሎስካሞ ሶትን ሃይማኻ መቄዶንያ ኤድ ካላ ዎያንቴ ክግያ፦ “መቄዶንያዛራ ሳጋንቴ ዎም ኬልሽማ” ሃማንቴ ኪም ክምስክካ ሃፕዲና። ¹⁰ ጳውሎስ ሃይማ ኣጋም ክያፓዃ፣ ኬናንቴ ሜርሜራ ፃላም ዎጌዬኻናንቴ ባርያ ዎም ግስምዲና ሃማንቴ ዎቃባና ኣጋዛራ መቄዶንያዛራ ያኣናንቴ ዎቲ ዛግዲና። ¹¹ ጢሮኣዳባራ ጋግንካ ዻጳንቴ ዎቲ ጋዝ ሳሞትራቄዛራ ናእዲና፤ ዋጋላሞን ዎቲ ናጱሌዛራ ያዮን ካርስዲና፤ ¹² ሃያንቴ ሮም ማንግስትንሳ ሻንዻዶኖ መቄዶንያ ፔንሳ ካታማን ጌጶን ፊልጵስዩስዛራ ዎቲ ኣርድዲና፤ ኦጎታርካሞ ሮሮ ጱፅ ዎቲ ዳርቅዲና።

¹³ ኣይሁድናሳ ኡኩንሳን ሮራ ጋላኻሞ ምስካናንቴ ራቅ ዛጋንቴ ካታማንባራኻ ባዪ ካላዛራ ዎቲ ሃንችዲና፤ ኦጎታርካሞ ዎቲ ዳርቃንቴ ሜና ፑጫንቴ ዳናናንቴ ዼላቅን ጌያን ካርስዲና። ¹⁴ ሜና ኤሳርቴ ዳና ግዶርካሞ ልድያ ሃንዻይኖ ሜ ካላ ዳይዲና፣ ናኻሞ ባርያም ምስካይኖ ትያጥሮን ካታማባራ ኖኣዶኖ ኣፓላ ዛዊ ሻንሻያ ናጋዳና። ጳውሎስሳ ዬራ ክጌያያም ኮኤሳሬኻናንቴ ጌጳ ዎይላም ኮሳም ማስዲና። ¹⁵ ኮቤ ኮሳ ኤናቤ ኣምናንቴ ኬሻይዻዃ ይጌይና፦ “ጌጳኻ እኣምናዶንም ጎንዼ ዬዼሳዳና፣ እሳ ኦኖን ናዴ እካላ ዳርቅማቴ” ሃማንቴ ዎም ካልሎን ምስክዲና። ¹⁶ ሮሮ ካላ ባርያም ምስካናንቴ ራቅ ካላዛራ ዎይና፣ ኤናናንቴ ሞራንካ ኣፖን ጌያይን ሜ ካይሲ ካላ ዎም ሃፕዲና፤ ናኻሞ ይሳ ሞራን ዋድማንካ ኤና ኮሳ ጌጲናናንቴ ሌሌ ብሬ ጱፂ ሃፕስቴን ዶኖና። ¹⁷ ካይስቶኖ ኦጎኖ ጳውሎስቤ ዎቤም ጫግቴ፣ “ኤና ክና ዻኣሾን ጎይን ዬናንቴ ጌያይና ባርያሳ ዋድማን ኤናና!” ሃንቴ እላትቴና ኮዶ፤ ¹⁸ ዬራ ኣጋምካሞ ሮሮ ጱፅ ጌይቴና ኮዶ፤ ኮዶን ጳውሎስ ዬራ ኣጋ ኪም ክቶሧዃ ራስዛራ ማታንቴ ቤራም “ኤስንባራ ሃውቴኻናንቴ ኢየሱስ ክርስቶስ ናብንካ እንታ ሃናንቴ ጌይዲና!” ሃምዲና። ቤራኻሞ ኣጋዛራ ኮባራ ውትዲና።

¹⁹ ኤና ኮሳ ጌጵናኻሞ ዬራ ብሬን ኬናንቴ ሃፕሳያ ውታንቴ ክያኣዶን ዼሳንቴ፤ ጳውሎስቤ ሲላስቤም ዬዳንቴ ጉቻቴ ኤና ጌጵናሳ ይንግዶር ዳዻዶን ጋባን ጳልንዛራ ባእዲና፤ ²⁰ ኤና ጌጵናሳ ዎትሮ ኬም ዎይሳንቴ ክግያ፦ “ኤና ክና ኣይሁድ ኣድ ዳንቴ ካታማ ዎሳም ጄክሽዲና፤ ²¹ ሃያንቴኻሞ ዎቲ ሮም ኤና ዳምብን ዎችሞንቤ ዎኣሽክሞንቤም ዛራስንሳ ባክሮ ጌያና ኬጌያይ” ና ኬያማዶ። ²² ዛርስኖኻሞ ክዛራ ማታንቴ ጳውሎስቤ ሲላስቤዛራ ዻጵዲና፣ ኤና ጌጵናኻሞ ኣፓላን ኬሳም ቡላንቴ ኬም ዻዼኻናንቴ ጌይዲና። ²³ ኬም ዛርቦ ዻንቴ ዻክን ኦኖን ኬ ኣርስዲና፤ ኤያ ዻክን ኦኖን ዻቃናያ ኬም ፃሊ ክዻቃኔኻናንቴ ክናንቴ ጌይዲና። ²⁴ ኖኻሞ ዼላቃ ኣጋም ኤሳራንቴ ኬም ዻክን ኦኖንሳ ቆፓን ኣርሳንቴ ራን ኬሳም ሃቃን ማላ ክዛራ ጳጝ ሃያንቴ ዻክዲና።

²⁵ ፔንሳ ግዶ ማላር ጳውሎስቤ ሲላስቤ ባርያም ምስክቴቤ ዋርሳ ዻስቴቤ ባርያም ጎሽቴና ኬዶ፣ ኤና ዋኒ ዻኻዻዳና ኬም ኤሳርቴና ኬዶ። ²⁶ ኬንሻዽማ ዻክን ኦኖንም ጫጪንካ ዝጋያ ዝጋ ጌጲ ናእዲና፤ ኣጋዛራኻሞ ዻክን ኦኖንሳ ሙልዻፖና ቡልምዲና፤ ኤና ውልሳ ሳንሳላትኖ ቡልምዲና። ²⁷ ኤያ ዻክን ኦኖን ዻቃናያኻሞ ራትንባራ ዻጳንቴ ዻክን ኦኖንሳ ሙልፖና ቡልሚ ኬዶን ሃፓንቴ፣ ዻክን ኤና ዻቃቴ ኬያኣዳ ማይሻንቴ ዪም ዴሳናንቴ ሃልፓ ጉችዲና። ²⁸ ኮዶን ጳውሎስ ናቅሲ ይሳም ዼግ ሃያንቴ “ዎቲ ፓይላ ኮታ ዳይዲና፣ ሃዛራ ዬር ዛርቦ ሃይናኖ!” ሃማንቴ ክዛራ እላትዲና።

²⁹ ኤያ ዻክን ኦኖን ዻቃናያ ኖ ባኣሳንቴ ኢንዛራ ጎብቴ ኣርድዲና፤ ግብዛዳቴ ጳውሎስቤ ሲላስቤሳ ራሮ ጳርፅዲና፤ ³⁰ ኬም ጳልንዛራ ቡላንቴ ኬግያ፦ “ዬቲህ ኤናቶ፤ ዻቃናንቴ ሃር እያዬ?” ሃምዲና።

³¹ ኬኻሞ ክግያ፣ “ሃቤ ሃሳ ሞሮን ኤናቤ ጌጳ ኢየሱስካ ኣምንማቴ፣ ያኻሞ ሃሳ ኤናኻሞ ዻቃና ዬዻቃይ” ሃምዲና። ³² ሃያንቴ ክናንቴቤ ኤና ክሳ ኦኖሮ ዳና ውልናንቴ ጌጳሳ ዼላቅን ኬ ጌይዲና። ³³ ኤያ ዻክን ኦኖን ዻቃናያኻሞ ሶትን ሳኣታ ኣጋኻ ኬም ቻንቴ ኬሳ ሃጅምን ሻይዲና፤ ኣጋዛራኻሞ ክቤ ክሳ ኤናቤ ፓይላ ኑንቆንካ ሻይዽዲና። ³⁴ ኖ ኬም ኦኖን ይሳዛራ ኣንሳቴ ቃልቴ ዳኣኖ እꬅንስዲና፤ ይሳ ሞሮን ኤና ማላ ፓይላ ክያኣምናዶንታኻ ካልሎን ዋዝንዽዲና።

³⁵ ፔኖ ኮሳፃዃ ኤና ጌጵና ክግያ፦ “ኤና እግናም ቡላንቴ ንእስማ” ሃማንቴ ፖልሲና ይሳ ቾባራን ዳናም ክዛራ ይእስዲና። ³⁶ ኤያ ዻክን ኦኖን ዻቃናያኻሞ፣ “ኤና ጌጵና ዬም ቡልዼኻናንቴ ጌይዲና፤ ኣጋታኻ ውታንቴ ፃሊንካ ይማቴ” ሃማንቴ ጳውሎስናንቴ ጌይዲና።

³⁷ ኮዶን ጳውሎስ ፖልሲናግያ ይጌይና፦ “ዎቲ ሮም ኤድ ዎዳኻ፣ ዎም ዻባሞ ዎሳም ኬንሽማ ዛርስንሳ ዎትሮ ዻንቴ ዻክን ኦኖሮ ዎም ኬ ኣርስዲና፤ ታ ኬ ዎም ኣችምንካ ቡላናንቴው ኬዛጋዶ? ኦጎኖ ይንታ ዳማሞ፤ ኬ ይባራንካ ናዴ ዎም ኬቡሌ!” ሃምዲና።

³⁸ ፖልስናኻሞ ኣፓ ኣጋም ኤና ጌጵናናንቴ ጌይዲና፤ ኬኻሞ ጳውሎስቤ ሲላስቤ ሮም ኤድ ኬዶን ይኤሳራና ቃꬅምዲና። ³⁹ ኬኻሞ ይዻር ናዴ ኬላማ ቃሽማንቴ ዻክን ኦኖንባራ ኬም ቡልዲና፤ ካታማን ጋራንቴ ኬዬኤኻናንቴኻሞ ኬም ምስክዲና። ⁴⁰ ጳውሎስቤ ሲላስቤ ዻክን ኦኖንባራ ውታንቴ ልድያ ኦኖንዛራ ያእዲና፤ ኦጎታር እንዳ ናናም ሃፓንቴ ኬም ሶቦርሳንቴ፣ ናንሲ ያእዲና።