¹ ኤዲ ዋኒካሞ ይሁዳባራ ኣንፆኪያዛራ ሃንቻንቴ፣ “ሙሴ ዳምብንካ ሃማንቴ ቃማ ዬታኻዻድምና ዬቲህ ዻቅማሞ” ሃማንቴ እንዳናናም ታማርሳን ካርስዲና። ² ዼላቃ ኣጋ ጳውሎስቤ ባርናባስቤም ኬ ማላ ዋጭ ጌጲ ግዶርቤ ክትሞ ግዶርቤ ኣርስዲና። ኣጋታኻ ጳውሎስቤ ባርናባስቤ ባርዮን ኤና ዋኒ ማላ ኢየሩሳሌምዛራ ውታንቴ ዼላቃ ካም ኤና ይእስድናቤ ባርዮን ኤናሳ ዞንዛናቤኻላ ኬኦይሴኻናንቴ ታኻዽዲና። ³ ባርዮን ኤና ኬም ፊንቄኻቤ ሰማርያቤኻ ሳጋንቴ ኢየሩሳሌምዛራ ኬዬኤኻ ይእስዲና፤ ኬኻሞ ራቅና እግና ግዶር ኤና ዳናናንቴ ቶርስን ኤና ባርያዛራ ኬማታዶንቤ ኬኣምናዶንቤም ጌይዲና፤ እንዳናናኻሞ ፓይላ ኣጋኻ ሃማንቴ ጌጲ ዋዝንዽዲና። ⁴ ኢየሩሳሌም ኬዬስካና፣ ባርዮን ኤናቤ ኤና ይእስድናቤ ዞንዛናቤ ኬም ቾችዲና፤ ኤና ይእሳዻዳናኻሞ ባርያ ኬላማ ዳንቴ ዋድማን ክኣሽካዶንም ፓይላ ኬናንቴ ጌይዲና። ⁵ ፈርሳዊና ባራኻ ኤና ኣምናዳና ዋኒ ዻጳንቴ፣ “ቶርስን ኤና ቃማን ኬታኻዼኻናንቴቤ ሙሴ ዳምብን ኬጫጌኻናንቴ ሃይዻይኖ ዛግሳና ኮዛግሳይ” ሃምዲና። ⁶ ኤን ይእስድናቤ ባርዮን ኤና ዞንዛናቤ ዬራ ኣጋም ሃሳዋናንቴ ክንካ ፑጭዲና። ⁷ ኬ ክንካ ጌጲ ኬክትማዃ ራስባራ ጴጥሮስ ዻጳንቴ ኬግያ ይንታና ክያማዶ፦ “እንና ናናቶ፣ ሮሮ ቶኻሳ ብራር ዬሳ ባክር ባርያ ኢም ካማንቴ፣ ቶርስና ባርያሳ ዼላቅን እካላ ኤሳራንቴ ኬኣምኔኻ ክያያዶንም ዬቲህ ዼስዲና። ⁸ ባርያ ኤና ውልሳ ዎይላምን ዼሳዳ ዎናንቴ ኡስን ጋዛን ይእማዳግያ፣ ኬናንቴኻሞ ኡስን ጋዛን እማንቴ ኬም ይቻዶንም ኬናንቴ ዻውዲና፤ ⁹ ኬሳ ዎይላምን እምነትንካ ሻያንቴ ዎቤ ኬቤሳ ባክሮጎ ኖ ፓሊንታ ካላኻሞ ሃያድማሞ። ¹⁰ ታ ናንሲ ዎምባናኻሞ ዎቲካሞ ባስኮን ባስክሳናንቴ ዎቻልሞን ኤና ኣምናዳናሳ ዛጋራሮ ዎድቴ ታ ባርያም ሃርናንቴ ዬዋጭንሼ? ¹¹ ዎትካሞ ዎዻቃዶኖ ኬንታግያ ጌጳ ኢየሱስሳ ዋድማንካ ኮዶን ዎቲ ዼሳና ዎዼሳይ።”