14

¹ ኢቆንዮን ግዶር ጳውሎስቤ ባርናባስቤ ክንካ ኣይሁድናሳ ምስኮን ኦኖን ኣርድዲና፤ ኣጎታር ኬ ኤናም ጌጲ ኬታማርሳዃ ኣይሁድባራቤ ግርክባራቤ ኤዲ ጱፅ ኣምንዲና። ² ኮዶን ኣይሁድና ኣምናዳና፣ ቶርስን ኤናም ዻስሳንቴ እንዳ ናናም ኬቶዛዼኻናንቴ ሃይዲና። ³ ጳውሎስቤ ባርናባስቤ ጌጳሳ ኣፖን ኩርትንዽማ ጌይቴ ሮሮ ጱፅ ኦጎታር ካፕዲና፤ ጌጳኻሞ ዬራ ሃምማን ግያንዳናቤ ሃምማንቴ ዼስማቤ ኣሽክቴ ኣፖን ዻኣሾን ጋይን ኬጌያይንናንቴ ማኚ ዎይቴና ክዶ። ⁴ ካታማንሳ ዛርስኖ ኪም ራቅ ላማ ታክድና፤ ዋኒ ኮሳ ኣይሁድናናንቴ ታርጂዲና፣ ዋኒ ኮሳ ኤና ይእስድናናንቴ ታርጂዲና። ⁵ ዋዳ ኣጋኻ ቶርስን ኤናቤ ኣይሁድናቤ ይሳ ኤና ጋርና ማላ ክንካ ኬም ጋልንሻናንቴቤ ሱኒንካ ፓኻናንቴ ሃይዲና። ⁶ ኮዶን ኬ ኣጋም ይዼሳና ልስጥራንቤ ደርቤንቤ ሃንዻይና ሊቃኦንያ ካታማና ዛራቤ ፔና ኬሳ ዴሞሮ ዳናዛራ ጎብቴ ያእዲና፤ ⁷ ኦጎታርካሞ ኬ ሜርሜርን ጌያን ካርስዲና። ⁸ ልስጥራ ግዶር ኤያ ራንሳ ኤላስ እንዳንሳ ኢንባራ ይውታዳዛራ ያያንቴ ዼስማ ኤዲ ካላ ዳርቃንቴና ክዶ። ⁹ ኤያ ኣጋኻሞ ጳውሎስ ክጌያይንም ኤሳርቴና ክዶ። ጳውሎስ ኪም ላይ ሼዳንቴ ኖ ፓሻናንቴ እምነት ክሳ ኮዶንም ሃፓንቴ፤ ¹⁰ ናቅሲ ይሳም ዼግ ሃያንቴ ክግያ፦ “ዻጳንቴ ዎይማ!” ሃምዲና፤ ዋዳ ኣጋኻ ኤያ ጩራንቴ ዻጳንቴ ያያን ካርስዲና።

¹¹ ዛርስኖኻሞ ጳውሎስ ይያያዶን ሃፓንቴ፣ ሊቃኦንያ ኣፖንካ “ባርዮና ዎዛራ ኤዲግያ ማታንቴ ሃንችዲና!” ሃማንቴ እላትዲና፤ ¹² ባርናባስም “ድያ” ሃማንቴና ኬግስማዶ፤ ጳውሎስ ኤያ ዋናስ ዼላቃያ ክዶንታኻ ኪም “ሄርሜን” ሃማንቴና ኬግስማዶ። ¹³ ካታማንሳ ጳልባራ ዳ ባርያ ድያ ሃንዻያ ኦኖንሳ ኤያ ዳምብን ኣሽካያ ዋጛ ዝኣናቤ ኡሹምንቤም ካታማንሳ ሙልዻንዛራ ባኣቴ ናዴ ዛርስን ማላ ኬናንቴ ኡካናንቴ ዛግዲና።

¹⁴ ኤና ይእስድና ባርናባስቤ ጳውሎስቤ ዬራ ኣጋም ይኤሳራዶን ዋዳንካ፣ ኣፓላና ይሳም ሃኣሳንቴ፣ ዛርስንሳ ባክን ጎብቴ ኣርዳንቴ ናቅሲ ይሳም ዼግ ሃያንቴ ይንታና ኬያማዶ፦ ¹⁵ “ዬቲህ ኤና ክና፣ ሃርናንቴ ኮም ይንታ ዬያዬ? ዎቲካሞ ዬግያ ኤዲና። ዬትካሞ ዬርን ሱን ሃሞሮኻ ፔግንዻንቴ ፖላንቤ ፔንቤ፣ ኛፓስንቤ ኬሳ ኢሮን ዶን ዬርን ውልም ዎዳዳ ባርያ ላይን ዳያዛራ ዬማቴኻናንቴና ሜርሜርን ፃሊን ዬናንቴና ዎጌያይ። ¹⁶ ኖ ሃርያን ኣናን ጋን ዋዳንካ ኤዲን ፔን ጋላፕሮ ዶን ፓይላ ጎያ ይዛጋዳኻ ኬዬኤኻናንቴ ኬም ጋርዲና። ¹⁷ ኦጎንታ ኮዶን ኖ ዬናንቴ ዶቦን ፖላንባራ ሃንችሻንቴ እስኖ ይሳ ዋዳኻ ኮኡሼኻ ሃያንቴ፤ ሃያንቴኻሞ ዬም እሳሮንካቤ ዋዛንካቤ ምሽሻንቴ ዬናንቴ ዬር ፃል ሃያንቴ ይናንቴ ማኚ ዎይስዲና። ¹⁸ ዬር ኦጎ ውልም ኬ ኬናንቴ ጌያንቴ ዛርስኖ ኬናንቴ ቆሌ ኡካን ኮጋሬኻንናቴ ጋሎ ጌጲ ካና ኬጋርሳዶ።

¹⁹ ኮዶን ኣይሁድ ኤና ኣንፆኪያቤ ኢቆንዮንቤባራ ናዴ፣ ዛርስንም ክሊዲና፤ ጳውሎስም ሱኒንካ ኬ ፓኻንቴ፣ ክጃዳ ማይሻንቴ ኪም ጉቻቴ ካታማንሳ ቡዶሮ ቡላቴ ዻብዲና። ²⁰ ኮዶን ታማርና ኪም ታኻንቴ ኬዳኻ ኖ ዻጳንቴ ካታማንዛራ ኣርድዲና። ዋጋላሞን ኖ ባርናባስ ማላ ደርቤንዛራ ያእዲና። ²¹ ጳውሎስቤ ባርናባስቤ ደርቤን ግዶር ሜርሜርን ፃሊን ጌያንቴ፣ ኤዲ ጱፂም ኢየሱስም ኮጫጌኻ ሃያንቴ፣ ልስጥራቤ ኢቆንዮንቤ ኣንፆኪያቤዛራ ማትዲና። ²² ኤና ኣምናዳናሳኻሞ ዎይላምን ዋችሻንቴንቤ ይሳ እምነትንካ ዋቻዻንቴ ኬዴኻናንቴ ኪላንቴ ኬግያ፦ “ዎቲ ጋሎ ጱፅ ግዶርካ ሳጋንቴ ባርያ ማንግስትንዛራ ዎኣርደኻናንቴና ኮዛግሳይ” ሃምዲና። ²³ ሃያንቴ ራቅ ውል ግዶር ባርዮን ኤናናንቴ ኬ ዞንዛናም ካማንቴ ኬናንቴ ቶሮንዻንቴ ምስካንቴ ጌጳ ኬ ኣምናዳናንቴ ኬም ኤልቅማንቴ እምዲና። ²⁴ ኬ ጲስድያኻ ሳጋንቴ ጵንፕልያዛራ ናእዲና፤ ²⁵ ጴርጌን ግዶርካሞ ኬ ባርያሳ ዼላቅን ጌያንቴ፣ ፔን ኣጣልያዛራ ሃንችዲና።

²⁶ ኣጣልያ ግዶርካ ዻጳንቴ ዋድማን ካውል ኬኣሽካዶንም ኬኣሽኬኻናንቴ ባርያ ይሳ ፃላሞንካ ኬም ካማንቴ ይንግዶር ይኤልቅማዶን ኣንፆኪያ ካታማንዛራ ጋግንካ ኬ ማትዲና። ²⁷ ኬ ኦጎታር ዬሳካንቴ፣ ባርዮን ኤናም ፓይላ ግስማንቴ፣ ባርያ ኬንካ ሃማንቴ ዋድማን ይኣሽካዶንም ፓይላ፣ ሃያንቴኻሞ ቶርስናናንቴ ባርያ እምነትን ጎይን ሃሞንታ ክቡልዶንም ኬናንቴ ጌይዲና። ²⁸ ኦጎታርካሞ ባርዮን ኤና ማላ ሮሮ ጱፅ ኬ ዳርቅዲና።