13
1
ባርዮን ኤና ኣንፆኪያ ግዶር ዳና ግዶር ኤና ባርያሳ ኣፖን ጌያይናቤ ኣስታማርናቤ ዳይዲና፤ ኬኻሞ፣ ባርናባስቤ፣ ኔጌር ሃንዻያ ስምኦንቤ፣ ቀሬና ኤያ ሉክዮስቤ፣ ኣንቲጳስ ሃንዻያ ጋራ ሄሮዶስ ክንካን ጌጳዳ ሃርያስ ምናሄቤ፣ ሳኦልቤና።
2
ኬ ክናኻሞ ጌጳም ጎሽቴቤ ቶሮንዻንቴ ምስክቴ ኬዳኻ፣ ኡስኖ ጋዛኖ ኬግያ፦ “ባርናባስቤ ሳኦልቤ ዋድማን ይንናንቴ እግስማዶንናንቴ ኬም ቡላንቴ ይእስማቴ” ሃምዲና።
3
ኬኻሞ ቶሮንዻንቴ ምስካንቴ ይሳ ኣኒን ኬዛራ ዎዳንቴ ኬም ይእስዲና።
4
ባርናባስቤ ሳኦልቤ ኡስኖ ጋዛኖ ኮይእሷዃ ሴሌውቅያዛራ ሃንችዲና፤ ኣጋሮኻ ጋግንካ ቆጵሮስዛራ ያእዲና።
5
ስልማና ዬስካንቴኻሞ ኣይሁድናሳ ምስኮን ኦኖሮጎ ባርያሳ ዼላቅን ኤናናንቴ ጌይዲና፤ ዮሃንስካሞ ኬላማ ዳንቴ ኬም ኬልሽቴና ክዶ።
6
ቆጵሮስ ጉርቴንም ፓይላ ኬ ሽራንቴ ጳፉ ኬዬስካዶን ዋዳንካ፣ በርያሱስ ሃንዻያ ኣይሁድ ኤዲ ካላ ሞራስ ባርያ ናብንካ ፖጋሞን ኣፖን ጌያያም ኬ ሃፕዲና።
7
ኖኻሞ ኤያ ሰርግዮስ ጳውሎስ ሃንዻያ ፓኻላስ ፔንሳ ጋራ ላማ ክንካና ክዶ። ኤያ ፔንሳ ጋራ ኣጋኻሞ ባርያሳ ኣፖን ኤሳራናንቴ ዛጋንቴ ባርናባስቤ ሳኦልቤም ግስንስዲና።
8
ኮዶን ኤያ ሞራስ ናብንሳ ኤልማስ ሃማንቴን ዎኻልዻዳ ኣጋ፣ ኤያ ፔንሳ ጋራ ኣምናን ክጋሬኻናናንቴ ይዛጋዶንናንቴ ኬዛራ ዋጭምዲና።
9
ጳውሎስ ይንግያ ሃንዻዳ ሳኦል ኡስን ጋዛንካ ሃማንቴ፣ ኪም ቁዛንቴ ክግያ ይንታና ክያማዶ፦
10
“ያ ጋዛሞን ፓይላ ውልሳ ጋልታ፣ ጋሮንቤ ዛርባሞንቤ ፓይላ ይንዛራን ይዳ ዳብሎስ ናሳ! ጌጳሳ ጎይን ጋዛንም ሃቆርሳይንም ያ ጋራዮው?
11
ታኻሞ ጌጳሳ ኣንኖ ሃዛራና፤ ኣፒ ካያና ሃዳይ፤ ታ ናንሲ ካኻ ካርሳንቴ ዋዳ ቶኻናንቴ ሃዮን ሾሊካሞ ያ ሃፕማሞ።”
ኣጋዛራ ጉዳንቤ ፂፓንቤ ክዛራ ሃንችዲና፤ ኣን ክሳም ዬዳንቴ ኤዲ ኣንሳያ ኖ ዛግቴ እስቤ ኦራቤ ያኣን ካርስዲና።
12
ኤያ ፔንሳ ጋራኻሞ ዬራ ሃማዳናም ይፓዶን ዋዳንካ፣ ጌጳ ታማርን ታማርሳዻዶንም ዬርሻንቴ ኣምንዲና።
13
ጳውሎስቤ ክሳ ሃርያናቤ ጳፉ ግዶርካ ዻጳንቴ ጵንፍልያ ግዶር ዶን ጴርጌንዛራ ያእዲና፤ ዮሃንስካሞ ኬኻላንካ ፓርካንቴ ኢየሩሳሌምዛራ ማታቴ ያእዲና።
14
ኮዶን ኬ ጴርጌን ግዶርካ ዻጰንቴ ጲስድያ ግዶር ዶን ኣንጾኪያዛራ ያእዲና፤ ኣይሁድናሳ ኡኩንሳ ሮራ ጋላኻሞ ኣይሁድናሳ ምስኮን ኦኖን ኣርዳንቴ ኬ ዳርቅዲና።
15
ዳምብናቤ ኤና ባርያሳ ኣፖን ጌያይናቤሳ ዋርቃትን ናባባዻዃ ራስባራ ኤና ምስኮን ኦኖንሳ ጋርና ኬግያ፦ “ዎንዳና ናናቶ፣ ዛርስንም ኣፖ ዬክላያ ኮዳና ጌይማቴ” ሃማንቴ ኤዲ ኬዛራ ይእስዲና።
16
ጳውሎስካሞ ዻጳንቴ ኣን ይሳም ዻሳንቴ ኬግያ ይንታና ክያማዶ፦ “ዬቲህ ኤስራኤል ኤናቤ ዬቲ ባርያም ኩርትንዻይና ፓይላ ኤሳርማቴ።
17
እስራኤል ዛርስን ኮ ባርያ፣ ዎኮጎናም ካምዲና፤ ግብፅ ፔሮ ኬዳኻ ኖ ኬም ጱፅስዲና፤ ይሳ ካንታንካኻሞ ኦጎታርካ ኬም ቡልዲና።
18
ቦን ኦይዲታም ግያ ዳራሮ ኬናንቴ ኖ ዶንሺዲና
፤
19
ከነዓን ፔሮ ዳና ማንግስትና ሦጳናም ካይሳንቴ፣ ፔን ኬሳም ዛርስን ይኖንናንቴ ኬንቲ ሃያንቴ ኬናንቴ እምዲና።
20
ኦጎኖ ፓይላ ኮያማዶኖ ቦን ማቶ ኦይዲቤ ኣፖ ዶጚታምቤሳ ኢርና።
“ኣጋሳ ራስባራ፣ ኤያ ባርያሳ ኣፖን ጌያያ ሳሙኤል ዋዳንሳ ዬስካዛራ ባርያ ኬናንቴ ኤና ብቶን ታኻይናም እምዲና።
21
ሃያንቴ ዛርስኖ ኬናንቴ ኤዲ ብቲ ክብቲንሤኻ ኪም ምስክዲና፤ ባርያኻሞ ብንያም ብዛሮኻ ቂስ ናሳ ሳኦልም ኬናንቴ እምዲና፤ ኖኻሞ ቦን ኦድታም ኬዛራ ብቲሚዲና።
22
ሳኦሊም ሃንችሻንቴ ራቃ ክሳሮ ዳዊትም ኬናንቴ ብትንስዲና፤ ዬር ክሳኻሞ ‘ቃቦን እኖንግያ ዳቤ ዬራ እዛጋይናም ፓይላ ኣሽካያ እሴይ ናሳ ዳዊትም እንታ ሃፕዲና’ ሃማንቴ ክናንቴ ታርጅዲና።
23
ባርያ ኣፓ ይጌያዳኻ ሃማንቴ ኤያ ካሳ ብዛሮኻ ዻኣሾን ኤያ ኢየሱስም እስራኤል ዛርስንናንቴ ባእዲና።
24
ኢየሱስ ኣኻራ ክኒማ ብራሮ፣ ዮሃንስ እስራኤል ዛርስኖ ፓይላ ዻቆን ጎይንዛራ ናዴ ኑንቆንካ ኬሻይዼኻናንቴ ኬም ታማርስዲና።
25
ዮሃንስ ይሳ ዋድማንሳ ቱንስንዛራ ይሳንሳና ኬግያ፦ ‘ኢም ሃው ዬማይሻዴ? እንታ ክርስቶስ ትማሞ፤ ኮዶንካሞ ኤያ ይንሳን ዱጙርንሳ ካትን ቡላናንቴ እቻልማ እሳ ራስባራ ናኣና ክናኣይ’ ሃምቴና ክዶ።
26
“ዬቲ ክና ኣብርሃም ብዛሮኻ ኣዻዻዳና እንና ናናቶ፤ ሃያንቴኻሞ ዬቲ ባርያም ኩርትንዻይና ኤና ቶርስና ፓይላ፤ ካ ዻቆን ሜርሜራ ፃላ ይእሳዻዳ ፓይላ ዎውልናንቴና።
27
ኢየሩሳሌም ኤናቤ ብትና ኬሳቤ ኢየሱስም ዼሳድማሞ፤ ይያማን ኣይሁድናሳ ኡኩንሳን ሮራ ጋላ ናባባዻይኖ ኤና ባርያሳ ኣፖን ጌያይና ዼላቅኖ ጎንዼ ኳሜኻናንቴ ኬ ኪም ዻብንሽዲና።
28
ዴምጲዛራ ኪም ባኣያ ዬር ካላኻሞ ኬያፓድሞንታኻ ጲላጦስ ዴምጲን ዻባሞን ክዛራ ክኬኻናንቴ ኬ ምስክዲና።
29
ክሳ ዬር ዋርቃትሮ ኡካዻዳናም ፓይላ ኬኣሽካቴ ቱንሳንቴ ራስባራ፣ ሃቃስ ዚታዻዳባራ ኪም ሃንችሻንቴ ኬም ኪም ዱክዲና።
30
ኮዶን ባርያ ኪም ዴምጲንባራ ዻስዲና።
31
ገሊላርካ ቻንቴ ኢየሩሳሌምዛራ ኤና ክላማ ክንካ ያኣዳናናቴ ኖ ሮሮ ጱፅ ሃፕንዽዲና፤ ታ ኬኻሞ እስራኤል ዛርስንናንቴ ክሳ ማኚና።
32
ዎቲካሞ ባርያ ኣና ዎኮጎናናንቴ ሜርሜራ ፃላ ክግያዳም ዬናንቴ ጌያና ዎጌያ፤
33
ባርያ ኢየሱስም ዴምጲንባራ ይዻሳዶንካ ሃማንቴ ሜርሜራ ፃላ ካም ዎናና ኬሳናንቴ ሃይዲና፤ ኣጋኻሞ ዋርሳስ ላንሳሮጎ፤
“‘ያ እሳ ናሳና፤
እንታ ሃይታላ ሃም ኣዽዲና ሃማንቴ ኡካዺዲና።’
34
ፕርካሞ ኖ ጫፓን ክገሬኻናንቴ ባርያ ዴምጲንባራ ኪም ክዻሳዶን ዻዋናንቴ፤
“ ‘ዳዊትናንቴ እማናንቴ እጌያዶን ፓፅን ጫራጚንቤ ጎንዼ ማይ ሃሞን፣ ዬናንቴ እማና እእማይ’ ና ክያማዶ።’
35
ኣጋታኻ ዋርቃት ኣብ ግዶርካሞ
“ ‘ኤያ ሃሳ ጫራጛ ክጫፔኻናንቴ ያ ዛግማሞ’ ና ኮያማይ።
36
“ዳዊት ቦኒን ይኖንካ ባርያሳ ቃቦን ዋድማንቴ ራትዲና፤ እምባና ማላ ክንካ ዱካዻዃ ኖ ጫፕዲና።
37
ኮዶን ባርያ ኤያ ዴምጲንባራ ክዻሳዳ ጫፓድማሞ።
38
ታ ናንሲ ዎንዳና ናናቶ፣ ሴሶን ጋርንቶን ሃፓዻይኖ ኢየሱስባራ ኮዶን ዬናንቴ ጌይዻዶን ዼስማቴ፤
39
ኤና ክንካ ኣምናይና ፓይላ ሙሴ ዳምብንካ ጋዛሞን ሃፓናንቴ ይቻልሞን ሃፓና ኬያፓይ።
40
ኣጋታኻ ኤና ባርያሳ ኣፖን ጌያይና፦
41
“ ‘ዬቲህ ክና ዻርባስን ኤና፣ ሼድማቴ፤
ዬርሽማቴ፤ ካይማቴ፤ ሃውካሞ ዬናንቴ፣
ኮጌያዋዃ ዬኣምንሞን ዋድማን፣
ቦኒን ዬኖንካ ኣሽካና እኣሽካይ ሃማንቴ ኬጌያዶኖ ዬዛራ ዬስካን ኮጋሬኻናንቴ ዬም ማንክማቴ።”’
42
ጳውሎስቤ ባርናባስቤ ባርያም ምስካዻን ኦኖንባራ ኬውታዃ፤ ኤና ዬራ ካሳ ዬር ኣይሁድናሳ ኡካንሳን ሮራ ናኣያሮ ፕር ኬናንቴ ኬጌዬኻናንቴ ኬም ምስክዲና።
43
ኤዲኖ ፑጫዶኖ ኮላልማዃ፣ ኣይሁድ ኤና ጱፅናቤ ኤና ቶርስና ኣይሁድንዛራ ካይማዳና ባርዮን ዼላቅንካ ዋቻዻዳና፣ ጳውሎስቤ ባርናባስቤም ጫግዲና፤ ኬኻሞ ኬም ዼላቅስዲና፤ ባርያሳ ፃላሞንካ ዋቻዻንቴ ኬዴኻናንቴ ኬም ክሊዲና።
44
ኡኩንሳ ሮራ ጌይዻዳ ክዬስካዃ ካታማን ዛርስንሳ ኤዲ ቶኻ ሶጎ ኮሽዻዃ ዛርስኖ ፓይላ ባርያሳ ዼላቅን ኤሳራናንቴ ፑጭዲና።
45
ኣይሁድናኻሞ ኤዲ ጱፅ ይያፓና፣ ፆላሳሞኻ ዎይዲና፤ ጳውሎስ ክዼላቅና ጅባንቴ ኪም ኢርቴና ኬዶ።
46
ጳውሎስቤ ባርናባስቤ ኩርትንዽማ ኬግያ ይንታ ሃምዲና፦ “ባርያሳ ኣፖን ብራንቴ ዬናንቴ ጌይዼኻ ዛግሳና ኮዛግሳይ፤ ኮዶን ዬቲህ ቦዋንቴ ሳዳን ላይን ዳዻይን ዬናንቴ ኮዛግስሞንም ዬቲህ ዬዛራ ብቶን ዬታኻዶንታኻ፤ ዎቲካሞ ቶርስን ኤናዛራ ዎዬኤኻናንቴ ዎናንቴ ግዲ ማትዲና።
47
ፕርካሞ ጌጳ ዎግያ፦
“‘ዻኣሾን ፔ ውልዛራ ሃዬስክሴኻናንቴ፤
ቶርስንሳ ሃዮ ሃዴኻናንቴ እንታ ሃም ሃይዲና’” ሃማንቴ ዎም ኤርግዲና።
48
ቶርስን ኤና ዬራ ኣጋም ይኤሳራዶን ዋዳንካ ዋዝንዽዲና፤ ባርያሳ ዼላቅንናንቴ ጎሺን እምዲና፤ ኤና ሳዳን ላይን ዳዻንናንቴ ካንዻዳና ፓይላ ኣምንዲና።
49
ጌጳሳ ዼላቅኖኻሞ ፔና ኦግታር ዳና ውልዛራ ሻምዲና።
50
ኮዶን ኣይሁድ ኤና ኤና ሙሴ ዳምብንካ ዋቻዻዳና ሜና ጎሻዻዳናምቤ ሃያንቴ ካታማንሳ ኣንጌና ጎሻዻዳናቤም ዻሳንቴ ጳውሎስቤ ባርናባስቤዛራ ባቆ ዻስዲና፤ ይሳ ፔንባራኻሞ ኬም ኦይትዲና።
51
ጳውሎስቤ ባርናባስቤ ኤናሳ ዼላቅም ይጋራዶን ዻዋናንቴ ቡቡንና ይሳ ራናዛራ ዳናም ዹርዹራንቴ ኢቆንዮንዛራ ያእዲና።
52
ባርዮን ኤናኻሞ ዋዛንካቤ ኡስን ጋዛንካቤ ፆፅዲና።