12

¹ ዋዳን ኦጎኻ ጋራ ሄሮዶስ ባርዮን ኤናሳ ዋኒም ኦይታንቴ ያያይቴ ጋልንሽቴና ክዶ፤ ² ዮሃንስሳ እንዳናሳ ያእቆብም ሃልፓንካ ኖ ዴስስዲና። ³ ዬራ ኣጋንታ ክያያዳ ኣጋ ኣይሁድናም ኮዋዝንሳዶንም ሃፓንቴ፣ ጴጥሮስምካሞ ዬድስዲና፤ ኦጎኖ ይንታ ኮያማዶኖ ባላሻን ባኣልን ዋዳንካና። ⁴ ኖ ጴጥሮስም ዻክን ኦኖሮ ኣርሳንቴ፣ ፖሊስና ኦይዲ ኦይዲ ማታንቴ ኪም ኬዻቃኔኻናንቴ ፖሊስና ራቅ ኦይዲ ዎይሳዻዳናናንቴ እምዲና፤ ኖ ኦጎም ይንታ ክያያዶኖ ፋስካን ባኣሊኖ ኮሳጋዃ ዛርስንሳ ዎትሮ ኪም ቡላንቴ ክዛራ ብቶን ካናንቴ ቃባንቴና።

⁵ ጴጥሮስም ኣጋኻ ሃማንቴ ዻክን ኦኖሮጎ ኣርሳዽዲና፤ ኮዶን ባርዮን ኤና ክናንቴ ባርያዛራ ጌጲ ምስክቴና ኬዶ።

⁶ ሄሮዶስካሞ ጴጥሮስዛራ ሳሃ ቡርን ብቶ ታኻናንቴ ቃብቴ ክዳዃ፤ ጴጥሮስ ሶታ ኣጋኻ ሳንሳላት ላማኻ ኪም ዻኻዻዃ ፖሊስ ላማሳ ባክሮ ዎዻንቴና ክዶ፤ ኤና ዎርዲያናኻሞ ዻክን ኦኖንሳ ሙልዻፖሮጎ ዻቃንቴና ክዶ። ⁷ ጌጳሳ ኤርጎን ኤያኻሞ ኬንሻዽማ ሃፕንዽዲና፤ ኦኖንሳ ኢኖኻሞ ፓክ ሃምዲና፤ ባርያሳ ኤርጎን ኤያኻሞ ጴጥሮስሳ ዴሞም ጫኣንቴ ኪም ቃንሳንቴ “ዪርካ ዻጵማ!” ሃምዲና፤ ዋዳ ኣጋኻ ሳንሳላትኖ ክሳ ኣኒሮኻ ዲኒዲና።

⁸ ኤርጎን ኤያኻሞ ክግያ፦ “ኣፓላን ሃሳም ዻክዽማ፤ ዱጙራ ሃሳምካሞ ኣርስማ” ሃምዲና። ጴጥሮስካሞ ጌይዻዳግያ ሃይዲና። ኤርጎን ኤያኻሞ ሃያንቴ ክግያ፣ “ኮታ ሃሳም ጳባራ ኣርሳንቴ ኢም ጫግማ” ሃምዲና። ⁹ ጴጥሮስካሞ ኪም ጫጋቴ ዻክን ኦኖንባራ ዉትዲና፤ ኮዶን ክካላ ሃይማ ይያይማዻዳግያና ክማይሻዶ፤ ኤርጎን ኤያሳ ዬር ጎንዼ ሃይቴ ክዶንም ኖ ዼሳድማሞ። ¹⁰ ኬ ዎርዲያና ብራሮን ዳናቤ ራስባራን ዳናቤም ሳጋንቴ፣ ጎይን ካታማንዛራ ቡላንዛራ ሙልዻፖን ዛዉንካ ዺፃዻዶንዛራ ዬስክዲና። ሙልዻፖኖኻሞ ይዻር ኬናንቴ ቡልምዲና፤ ኬኻሞ ውታንቴ ያእዲና፤ ሾሊ ያኣግያ ኬያያዃ ኤርጎን ኤያ ኪም ጋራንቴ ያእዲና።

¹¹ ጴጥሮስካሞ ክኬንሽና፣ “ጌጳ ይሳ ኤርጎን ኤያም ንእሳንቴ ሄሮዶስ ኣንሮኻቤ ኣይሁድና እናንቴ ዬርን ኬቃባዶሮኻቤ ፓይላ ኢም ክቡልዶንም ታ እንታ ቃግማ ቆልማ ዴስዲና” ሃምዲና።

¹² ዬራ ኣጋም ኖ ዼሳንቴ ራስባራ፣ ኤዲን ጱፅንሳ ክዛራ ፑጫንቴ ክንካ ምስካዻን ማርቆስ ሃንዻያ ዮሃንስ እንዳን ማርያም ኦኖንዛራ ያእዲና። ¹³ ኖ ኦጎታ ዬስካንቴ ሙልዻፖን ጳልን ጋይን ክኮካዃ፣ ሮዳ ሃንዻይኖ ካይስኖ ኮካያ ሃው ክዶንም ዼሳናንቴ ሙልዻፖንዛራ ናእዲና። 14 ና ጴጥሮስ ናቅሳ ክዶንም ዼሳንቴ ካልሎን ይዋዛንዻዶንታኻ ሙልዻፖን ቡልማ ማታቴ ጎብቴ ቃልቴ ጴጥሮስ ሙልዻፖሮ ዎያንቴ ክዶንም ኤናናንቴ ጌይዲና።

¹⁵ ኤናኻሞ ኮግያ፣ “ያ ባርያዻው ሃባርያዻዶ!” ሃምዲና፤ ኮዶን ና ዬራ ኣጋም ማሶኻ ኬናንቴ ኮጌያኻ፣ ኬ ይጌይና “ኦጎንታ ዳና ኣጋ ክሳ ኤርጎን ኤያና” ሃምዲና።

¹⁶ ኮዶን ጴጥሮስ ሙልዻፖን ላይ ላይ ኮካን ዎይሳድማሞ፤ ኬኻሞ ሙልዻፖን ቡላንቴ ኪም ሃፓንቴ ኬናንቴ ዬር ዋማ ማቲዲና። ¹⁷ ኖኻሞ ላይ ኬያሜኻናንቴ ኣኒካ ኬናንቴ ጌያንቴ፣ ጌጳ ኪም ዻክን ኦኖንባራ ሃሞንታ ክቡልዶንም ኬናንቴ ጌይዲና፣ ኖ “ዬራ ሃምማዳም ያእቆብናንቴቤ እንዳናናናንቴቤ ጌይማቴ” ሃማንቴ ራቅ ኣብዛራ ያእዲና።

¹⁸ ፔኖ ኮሶፃዃ ቡርን ፖሊስና “ጴጥሮስ ሃንታ ክያኣዴ?” ሃንቴ ኬ ካልሎን ጄኪዲና። ¹⁹ ሄሮዶስ ጴጥሮስም ኤናኻ ዛግሳንቴ ይያፓድሞን ዋዳንካ፣ ኤና ዎርድያናኻላ ፃሊ ኦይሳንቴ ኬም ዴሳዼኻናንቴ ጌይዲና። ሃያንቴ ሄሮዶስ ይሁዳባራኻ ቂሳርያዛራ ሃንቻቴ ዳርቅዲና። ²⁰ ኖ ጢሮስ ካታማን ኤናቤ ሲዶና ካታማን ኤናቤ ማላ ክሳ ጋሊና፤ ካታማና እግና ኤና እሳሮን ይንግዶር ኬያፓይኖ ኤያ ጋራ ሄሮዶስ ፔሮ ኮዶንታኻ፤ ክሳ ጁላስ ብላስጦስሳ ኬልሾ ሃፓንቴ፣ ኬ ክንካ ማታንቴ ክላማ ቃሽማናንቴ ኦይስዲና።

²¹ ሮራ ታኻዻዳ ጋላ ሄሮድስ ይሳ ብታሞን ኣፓላን ኣርሳንቴ ይሳ ብታሞን ቦርኮቶሮ ዳርቅዲና፤ ዛርስንሳ ዎትሮኻሞ ሃሳውዲና። ²² ዛርስኖኻሞ ይጌይና “ኮኖ ባርዮ ናቅሲና፣ ኤድ ናቅስ ትማሞ!” ሃማንቴ እላትዲና። ²³ ሄሮድስካሞ ባርያናንቴ ጎሺ ክእማድሞንታኻ፣ ጌጳሳ ኤርጎን ኤያ ኣጋዛራ ኪም ዻይዲና፤ ቃዮኖኻሞ ኪም ኮእሳዃ ኖ ጃይዲና።

²⁴ ኮዶን ባርያሳ ዼላቅኖ ጌጳዳቴቤ ሻማዳቴቤ ያእዲና።

²⁵ ባርናባሳቤ ሳኦልቤኻሞ ዋድማስ ይንናንቴ ኬም ይእሳዻዳም ቱንሳንቴ፣ ኢየሩሳሌምባራ ማትዲና፤ ¹ ማርቆስ ሃንዻያ ዮሃንስምካሞ ኬ ይላማ ክንካ ኣንሳቴ ናእዲና።