11

¹ ኤና ይእስድናቤ ይሁዳ ፔሮ ዳና እንዳናና ኣምናዳና ኤና ቶርስናኻሞ ባርያሳ ዼላቅን ኬቻዶንም ኤሳርዲና። ² ኣጋታኻ ጴጥሮስ ኢየሩሳሌምዛራ ክውታዶን ዋዳንካ፤ ኤና ቃማን ታኻዻዳና ኣምናዳና ክዛራ ዋጭምዲና፤ ³ ክግያ፣ “ኤና ቃማን ታኻዻድምናኻላ ቃልቴ ኬላማ ያ እꬅምዲና” ና ክያማዶ።

⁴ ኮዶን ጴጥሮስ ዬራም ይንካ ሃማንቴ ኬናንቴ ጎዪ ጎይካ ጌያን ካርስዲና፦ ⁵ “እንታ ኢዮጴ ካታማሮ ባርያም ምስክቴ ዳንቴ ርምርም ሃማንቴ ሃይማ ሃፕዲና፤ ኣፓላ ጌጲ ማራና ኦይዲናም ዬዳዻዃ እዶንዛራ ፖላንባራ ኮያንችካ እንታ ሃፕዲና። ⁶ ዬራ ኣጋም ላይ እሼድና፤ ዳብና ራንሳ ኦይድናቤ፣ ዳብና ቃውን ጋይናቤ፣ ዳብና ፔሮጎ ሳዳንካ ያያይናቤ፣ ካርያናቤም እንታ ሃፕዲና። ⁷ ዋዳ ኣጋኻ እግያ፣ ‘ጴጥሮስ፣ ዻጳንቴ ኬም ማቻንቴ እꬅማ’ ሃማያ ናቅሲ እንታ ኤሳርዲና።

⁸ “እንታኻሞ ክግያ፦ ‘ጌጳዮ፣ ኦጎኖ ይንታ ዳማሞ፤ እንታ ዬር ሲያሞ ዎይካሞ ዬር ጫራጝሻዻድማ ካላኻሞ እሳ ኣፖሮጎ ኣርዳንቴ ዼስማሞ’ ና እያማዶ።

⁹ “ናቅሳ ኣጋ ፕር፣ ‘ዬራ ባርያ ይጫራጝሻዳም ያ ዬር ሲያሞግያ ሃፓይድናኖ’ ሃማንቴ ፖላንባራ እናንቴ ጌይዲና። ¹⁰ ዬራ ኣጋኻሞ ኢ ማካም ክያማዃ፣ ሃያንቴ ኬም ፓይላ ፕር ፖላንዛራ ቻዺዲና።

¹¹ ሳኣታ ኣጋኻ ኤድ ማካም ቂሳርያባራ እዛራ ንእሳዻዃ ናዴ ኦና ይንግዶር እዳሳ ሙልዻፖሮ ዎይዲና፤ ¹² ኡስኖ ጋዛኖ ኢካዺማ ኬላማ ክንካ እዬኤኻናንቴ እናንቴ ጌይዲና፤ እግና እንና ናና ላናኻሞ እላማ ክንካ ያእዲና፤ ኤያሳ ኦኖንዛራኻሞ ዎቲህ ኣርድዲና። ¹³ ኖኻሞ ባርያሳ ኤርጎ ኤድ ክሳ ኦኖንሳ ኢሮ ዎያንቴ ክናንቴ ክያፕንዻዶንቤም ክግያ፦ ‘ኤዮጴዛራ ኤድ ይእሳንቴ ጴጥሮስ ሃንዻያ ስምኦንም ግስንስማ፤ ¹⁴ ኖ ሃቤ ሃሳ ሞሮን ኤናቤ ፓይላ ይንካ ዬዻቃን ዼላቅንም ሃናንቴ ጌያና ክጌያይ’ ክያማዶንቤም ዎናንቴ ጌይዲና።

¹⁵ “እንታኻሞ ኣኻራ እሳ ዼላቃን ካርሳ ኡስኖ ጋዛኖ ኣና ብራን ዎዛራ ይሃንቻዳግያ ኬዛራኻሞ ሃንችዲና። ¹⁶ ዋዳ ኣጋኻ፣ ‘ዮሃንስ ኑንቆንካና ክሻያዶ፤ ኮዶን ዬቲ ኡስን ጫራጝንካና ዬሻይዻይ’ ሃማንቴ ጌጳ ክጌያዳ ኣፓ እናንቴ ጶቅ ሃምዲና። ¹⁷ ታ ናንሲ ባርያ ጌጳ ኢየሱስ ክርስቶስካ ዎኣምናዳና ዎናንቴ እምንቶ ይእማዶንም ኬናንቴኻሞ ክእማዳና፣ ታ ናንሲ ባርያ እማን ክጋሬኻናንቴ ማራናንቴ እንታ ሃውቴ?”

¹⁸ ኦጎም ይኤሳራዶን ዋዳንካ ዬር ይጌያያ ካይሳንቴ፤ “ኦጎንታ ዳና ቶርስና ሳዳንዛራ ኬኔኤኻናንቴ ባርያ ኬናንቴ ዻቆን ጎይን እምዲና” ሃምቴ ባርያም ኬ ጎሺዲና። ¹⁹ እስጢፋኖስዛራ ባቆን ናኣዶንካ ሃማንቴ ኤና ኣምናዳና ላልማዳና ዼላቅንም ኣይሁድናናንቴ ሶጎ ጌያዳቴ ላይ ፊንቄቤ፣ ቆጵሮስቤ ኣንጾኪያቤዛራ ዬስክዲና። ²⁰ ቆጵሮስቤ ቀሬናቤ ግዶርካ ናኣዳና ኤና ዋኒ ኣንጾኪያዛራ ቃልቴ ግርክ ኤናናንቴ ካውል ጌይቴ ጌጳ ኢየሱስ ክርስቶስሳ ዼላቅንም ኬናንቴ ጌይዲና። ²¹ ጌጳሳ ካንታኖኻሞ ኬላማ ክንካና ኮዶ፤ ኤና ፓይዶንሳ ካልሎን ጱፅናኻሞ ኣምናንቴ ጌጳዛራ ናእዲና።

²² ዬራ ሃማዳናኻሞ ባርዮን ኤና ኢየሩሳሌም ግዶር ዳናናንቴ ዬስክዲና፤ ኬኻሞ ባርናባስም ኣንጾኪያዛራ ይእስዲና። ²³ ኖኻሞ ኦጎታ ቃልቴ ባርያ ይሳ እምንቶካ ዬራ ክኣሽካዳና ይያፓዶን ዋዳንካ ዋዝንዽዲና፤ ኬ ፓይላ ዎይላም ካላኻ ማታንቴ ጌጳኻ ኤርማንቴ ኬዋቻዼኻናንቴ ኬም ኪሊዲና። ²⁴ ባርናባስካሞ ኡስን ጋዛንቤ እምናቲንቤኻ ዳ ኤድ ፃሊና፤ ዛርስኖ ፓይዶንሳ ጱፅኖ ጌጳዛራ ካይምዲና።

²⁵ ሃያንቴ ኣጋሳ ራስባራ ባርናባስ ሳኦልም ዛጋቴ ጠርሴስዛራ ያእዲና፤ ²⁶ ይያፓዶን ዋዳንካ ኣንጾኪያዛራ ኪም ኣንሳቴ ናእዲና። ኬላማ ውል ባርዮን ኤና ኦጎታር ዳና ላማ ክንካ ማታንቴ ቦን ካላ ፓሲ ዛርስ ጱፅ ኬ ታማርስዲና፤ ባርዮን ኤናምካሞ ብርካ ‘ኤና ክርስቶስም ጫጋይና’ ሃማንቴ ግስንዻዶኖ ኣንጾኪያ ግዶርና።

²⁷ ዋዳ ኣጋኻ ኤና ባርያሳ ኣፖን ጌያይና ዋኒ ኢየሩሳሌም ግዶርካ ኣንጾኪያዛራ ሃንቺዲና፤ ²⁸ ኬግዶርካሞ ካላ ኣጋቦስ ሃንዻያ ዻጳንቴ ሮም ፔሮ ፓይላ ዳቆ ኮኣርዳይንም ኡስን ጋዛንካ ሃማንቴ ጌይዲና፤ ኣጋኻሞ ቄሳር ቀላውዴዎስ ዋዳንካ ሃሚዲና። ²⁹ ባርዮን ኤናኻሞ ኬ ፓይላ ውል ይዳዛራ ይቻላዳግያ ኮይሶ ቡላንቴ ይሁዳ ግዶር ዳና እንዳናናም ኬልሻናንቴ ታክዲና። ³⁰ ኮይና ኬልሾን ጋይና ፑኡሻዻዳናምካሞ ባርናባስቤ ሳኦልቤኻ ባርዮን ኤና ዞንዛናናንቴ ይእስቴ ኦጎም ሃይዲና።