10

¹ ቂሳርያ ግዶር ‘ጣሊያናሳ ባንቆን ኤና’ ሃንዻይናሳ ዎታደርና ግዶር ዎታደርና ማቶናሳ ጌጳ ቆርኔሌዎስ ሃንዻያ ኤዲ ካላ ዳይዲና። ² ኖኻሞ ይሳ ሞሮን ኤና ፓይላ ማላ ክንካ ባርዮን ዼላቅንካ ዋቻዻዳቤ ባርያም ኩርትንዻያቤ፣ ኤና ኩፕናም ጎንዼ ኬልሻያ፣ ሮሮ ውል ባርያም ምስካያና። ³ ሃዮ ካላ ሮሮንሳ ሳኣት ሳልቤ ግዶር ባርያሳ ኤርጎ ኤያ ሃይማኻ ክዛራ ናዴ፣ “ቆርኔሌዎስ” ሃማንቴ ኪም ክግስማዃ ኖ ማይ ሃፕዲና።

⁴ ቆርኔሌዎስካሞ ቃꬅማንቴ ኪም ላይ ሼዳንቴ ክግያ፣ “ጌጳ፣ ሃርቴ?” ሃምዲና።

ባርያሳ ኤርጎን ኤያኻሞ ክግያ ይንታና ክያማዶ፤ “ሃሳ ምስኮንቤ ኤና ኩፕናም ሃኬልሻዶንቤ ዬር ይንካ ሃም ቃባዻያ ማታንቴ ባርያ ኻላ ዬስክዲና።

⁵ ታ ኤናም ኢዮጴዛራ ይእሳንቴ ጴጥሮስ ሃንዻያ ስምኦንም ንእስማ፤ ⁶ ኖ ኤያ ኛፓስንሳ ዴሞሮጎ ዳ ዼጴን ቆፃያ ስምኦን ኦናሮጎ ቾቻሞ ዳርቃንቴና ክዶ።”

⁷ ቆርኔሌዎስ ባርያሳ ኤርጎን ኤያ ኪም ዼላቅሳያ ክካላንካ ክያኣዃ ራስባራ፣ ይሳ ዋዳማን ኤና ግዶር ኤዲ ላማቤ ሃያንቴ ባርዮን ዼላቅንካ ኤያ ዋቻ ክናንቴ ኤርጎን ቻያ ዎታዳራቤም ግስንስዲና፤ ⁸ ዬራ ሃምማዳም ፓይላ ኬናንቴ ጌያንቴ ራስባራ ኬም ኢዮጴዛራ ይእስዲና። ⁹ ኤና ይእሳዻዳናኻሞ ዋጋላሞን ካታማስዛራ ኬዬስካያም፤ ሃዮኖ ትፓ ጭርግያ ኮማታዃ ጴጥሮስ ባርያም ምስካናንቴ ኮሬንዛራ ውትዲና፤ ¹⁰ ዋዳ ኣጋኻ ኖ ይዳቃዻዶንታኻ ዳኣኖ እꬃናንቴ ዛግዲና፤ ዳኣኖ ባክቴ ዳዽካ ክሳ ኣፒ ኮግንዻዃ ርምርም ሃማንቴ ሃይማ ሼድቴና ክዶ፤ ¹¹ ፖላኖ ኮቡልማዃ ዬር ኣፓላ ጌጲ ግያዳ ማራና ኦይዲናባራ ዬዳዻዃ ፔንዛራ ኮያንችካ ኖ ሃፕዲና። ¹² ኣፓላስዛራኻሞ ዳብና ራንሳ ኦይድናቤ ፔሮ ሹትማይናቤ፣ ካርያናቤና ዳና። 13 ዋዳስ ኣጋኻ ክግያ፣ “ጴጥሮስ፣ ዻጲማ፤ ክናም ማቻንቴ እሲማ” ሃማያ ናቅሲ ክዛራ ናእዲና። ¹⁴ ኮዶን ጴጥሮስ ክግያ፣ “ጌጳ፣ ኮኖ ኣግማሞ፤ እንታ ዬር ጫርጚ ትማ ዎይካሞ ዬር ሲያሞ ካላኻሞ እሳንቴ ዼስማሞ” ና ክያማዶ።

¹⁵ ናቅሳ ኣጋ ፕር እያ ላንሳም ክዛራ ናዴ ክግያ፣ “ዬርን ባርያ ይጫራጚሻዶንም ዬር ሲያሞግያ ሃፓይድናኖ” ና ክያማዶ።

¹⁶ ዬራ ኣጋኻሞ ማካምግያ ኣጋንታ ክያማዃ፤ ኣፓላስም ኣጋዛራ ዞን ፖላንዛራ ቻዽዲና።

¹⁷ ጴጥሮስካሞ ዬራ ሃይማኻ ይፓዳ ሃር ክዶን ክናንቴ ኮኣርዳድሞንታኻ ካልሎን ቃብምቴ ክዳዃ፤ ቆርኔሌዎስሳ ኤና ንእሳዻዳና ስምኦንሳ ኦኖን ዛጋቴ ሃፓንቴ ሙልዻፖሮ ዎይዲና፤ ¹⁸ ይሳ ናቅሲም ዼግ ሃያንቴ ጴጥሮስ ሃንዻዳ ስምኦን ኦጎታር ክዳ ማይሻንቴ ኬ ኦይስዲና።

¹⁹ ጴጥሮስ ሃይማሲም ቃብቴ ክዳዃ፤ ኡሳ ጋዛስ ክግያ፦ “ኤዲ ማካም ዋኒ ¹ ሃም ዛግቴና ኬዶ፤ ²⁰ ኣጋታኻ ዻጳንቴ ሃንችማ፤ ኬም ንእሳዳ እንታ እዶንታኻ ኢካዺማ ኬላማ ክንካ ይማ” ና ክያማዶ።

²¹ ጴጥሮስካሞ ሃንቻንቴ ኤና ኪም ዛጋዳናግያ፦ “ኤያ ዬዛጋያ እንታና፤ ዬራ ይንካ ዬናኣዳ ሃርቴ?” ና ክያማዶ።

²² ኤናኻሞ፣ “ዎቲ ዎናኣዶኖ ቆርኔሌዎስ ሃንዻያ ዎታደርና ማቶናሳ ኤያ ጋራ ባራንካና፤ ኖኻሞ ኤዲ ጋዛቤ ባርያምካሞ ኩርትንዻያ፣ ኣይሁድ ዛርስኖኻሞ ፓይላ ይጎባያ ኤዲና። ሃም ኦኖን ይሳዛራ ክንእሴኻቤ ዬራ ሃጌያይናም ክኤሳሬኻናንቴ ኤርጎን ኤያ ጋዛስ ክናንቴ ጌይዲና” ና ኬያማዶ። ²³ ጴጥሮስካሞ ኤናም ቾችንሻናንቴ ኦኖንዛራ ኬም ኣርስዲና። ቡርን ኮሳ ጴጥሮስ ዻጳንቴ ኬላማ ክንካ ያእዲና፤ ፔን ኢዮጴ ባራ እንዳናና ዋኒ ክላማ ያእዲና። ²⁴ ዋጋላሞን ኮሳ ኖ ቂሳርያ ዬስክዲና። ቆርኔሌዎስካሞ ይሳ ኤዳናቤ ይሳ ሃርያናቤም ፑኡሻንቴ ኬም ካሊቴና ክዶ። ²⁵ ጴጥሮስካሞ ክሳ ኦኖንዛራ ክኣርዳዃ ቆርኔሌዎስ ኪም ቾቻንቴ፤ ክሳ ራሮኻሞ ጳርፃንቴ ኮምፓርስዲና። ²⁶ ኮዶን ጴጥሮስ ክግያ፣ “እንታ ሃግያ ኤዲና፤ ዻጵማ!” ሃማንቴ ኪም ዻስዲና።

²⁷ ጴጥሮስካሞ ኪም ዼላቅሳዳቴ ክላማ ኦኖን ክኣርድና ኤዲ ጱፅ ፑጫንቴ ኮዳዃ ሃፕዲና፤ ²⁸ ኖ ኬግያ ይንታና ክያማዶ፦ “ኣይሁድ ኤድ ካላ ቶርሲ ኤድ ማላ ክንካ ክዳሞንቤ ክዛራ ኬንሞንቤም ዎሳ ዳንብኖ ኮጌይሞንም ዬቲህ ዼሳና ዬዼሳይ፤ ኮዶንካሞ እንታ ኤዲ ካላ ሲያሞና ዎይካሞ ጫራጚማድማና ሃማን እጋሬኻናንቴ ባርያ እናንቴ ዻውዲና፤ ²⁹ ኣጋታኻ ኢም ግስዻዶን ዋዳንካ ኢካዺማ እንታ ናእዲና፤ ታ ናንሲ ሃርናንቴ ኢም ዬግስማዶንም ዼሳናንቴ ዛጋና እዛጋይ።”

³⁰ ቆርኔሌዎስካሞ ክግያ ይንታና ክያማዶ፦ “ሮሮ ኦይድሳ ብራሮ ዋዳ ካኻ ሮሮንሳ ሳኣት ሳልካ እሳ ኦኖሮ ምስክቴና እዶ፤ እኬንሽማ ኣፓላ ጫውሊ ፑ ሃማ ኣርሳዳ ኤዲ ካላ ናዴ እሳ ዎትሮ ዎያንቴ፤ ³¹ እግያ ይንታና ክያማዶ፦ ‘ቆርኔሌዎስ ሃሳ ምስኮንም ኤሳርዺዲና፤ ኤና ኩፕናናንቴ ዬራ ሃእማይና ይንካ ሃም ቃባዼኻናንቴ ባርያሳ ዎትሮ ዬስክዲና። ³² ኤናም ኢዮጴዛራ ይእሳንቴ ጴጥሮስ ሃንዻዳም ስምኦንም ንእስስማ፤ ኖኻሞ ኛፓስንሳ ዴሞሮጎ ኤያ ዳ ዼጴን ቆፃያ ስምኦን ኦኖሮ ቾቻሞ ዳርቅዲና።’ ³³ እንታካሞ ኣጋዛራ ኤናም ሃዛራ ይእስድና፤ ያኻሞ ኦራ ሃናኣዳኻ ዬር ፃል ሃይዲና። ታ ናንሲ ዎቲህ ፓይላ ጌጳሳ ሃናንቴ ጌይዻዳናም ሃጌዬኻ ኤሳራናንቴ ባርያሳ ዎትሮ ዎቲህ ዳይዲና።”

³⁴ ጴጥሮስካሞ ይንታ ሃማንቴ ዼላቃን ካርስድና፦ “ባርያ ኤድ ካላዛራኻሞ ክዎዽሞኖ እናንቴ ኣርድዲና፤ ³⁵ ኮዶንካሞ ኖ ኤና ኪም ኩርትንዻይናቤ ዬርን ፃሊን ሃያይናቤም ፓይላ ቶርሲ ሃውካሞ ክዴ ኬም ቻና ክቻይ። ³⁶ ባርያ ፓይላ ውልሳ ጌዻ ኢየሱስ ክርስቶስባራ እስራኤልሳ ዛስንዛራ ቃሽን ሜርሜራ ፃላ ክንእሳዳ ኣፓ ካና። ³⁷ ዮሃንስሳ ሻዮን ዼላቅን ጌይዻዶንሳ ራስባራ ገሊላ ግዶርካ ካርሳንቴ ይሁዳ ፔን ፓይላ ግዶር ዬራ ሃማዳናም ዬቲህ ዼስዲና፤ ³⁸ ባርያ ናዝሬት ጋንታ ኢየሱስም ኡስን ጋዛንቤ ካንታንቤኻ ቃዽዲና፤ ኖኻሞ ባርያ ክላማ ክንካ ክዶንታኻ ራቅና ይያኣዳና ውልግዶር ዬር ፃል ሃያንቴ ዳቡሎስሳ ጌጳሞንሳ ቾባራን ዳናም ፓይላ ፓሽሺዲና።

³⁹ ኖ ኣይሁድ ፔሮቤ ኢየሩሳሌምቤ ግዶር ዬራ ክያያዳናሳ ዎቲህ ማኚናና፤ ሃያንቴኻሞ ኤና ኪም ሃቃንዛራ ዝታንቴ ዴስዲና። ⁴⁰ ኮዶን ባርያ ኪም ሮራ ማክንሳኻ ዴምጲንባራኻ ዻስዲና፤ ኤና ኪም ኬያፔኻናንቴኻሞ ሃይዲና፤ ⁴¹ ክሳ ሃፕንዽዲኖኻሞ ኤና ፓይላ ውልናንቴ ትማሞ፤ ዴምጲንባራኻ ዻጳንቴ ዎ ክላማ እሲማዳናቤ ክላማ ክንካ ውጫዳና፣ ኤና ባርያ ብራንቴ ይካማዳና ክሳ ማኚና ዎናቴና ክያፕንዻዶ። ⁴² ዛርስንናንቴ ዎጌኻናንቴቤ፣ ኤና ሳዳንካ ዳናቤ ኤና ጃዳናቤዛራ ብቶን ክታኬኻ ባርያ ይጌጲሳዳ ኖ ክዶንም ማኚ ዎዴኻናንቴ ኖ ዎም ይእስዲና። ⁴³ ኤና ክንካ ኣምናይና ፓይላ ናብን ክሳኻ ሴሶን ኬሳም ኬናንቴ ጋርዻይንም ኤና ባርያሳ ኣፖን ጌያይና ክናንቴ ማኚ ማትዲና።”

⁴⁴ ጴጥሮስ ክናም ጌይቴ ክዳኻ፣ ኤና ዼላቅን ኤሳርቴ ዳና ፓይላ ውልዛራ ኡስኖ ጋዛኖ ሃንቺዲና። ⁴⁵ ጴጥሮስ ላማ ኤና ናኣዳና፣ ባርዮን ኤና ቃማን ታኻዻዳና፣ ኡስን ጋዛን ኤና ቶርሲናናንቴ እንዻዃ ኬያፓዶኖ ኬናንቴ ዬር ዋና ማትዲና፤ ⁴⁶ ኣጋኻሞ ኬ ኣፖ ሃሊካ ² ዼላቅቴ ባርያም ኬጎሻን ይኤሳራዶንናንቴና።

ዋዳን ኦጎኻ ጴጥሮስ ይታና ክያማዶ፦

⁴⁷ “ኤና ክና ኡስን ጋዛንም ዎንታግያ ኬቻዶንታኻ፤ ታ ናንሲ ኑንቆንካ ኬሻይዼኻናንቴ ኬም ማራያ ሃውቴ?” ⁴⁸ ኣጋታኻ ኢየሱስ ክርስቶስ ናብንካ ኬሻይዼኻናንቴ ኖ ጌይዲና። ኣጋሳኻሞ ራስባራ ጴጥሮስ ኬላማ ክንካ ክካፔኻናንቴ ኬ ምስክዲና።