9

¹ ኮዶን ሳኦል ታኻሞ ኤና ጌጳሳ ጎይን ጫጋይናም ዴሳናንቴ ኬዛራ ኣሲ ጋኣዳቴ ኤና ባርያናንቴ ዳምብን ኣሽካይናሳ ብታዛራ ያእዲና፤ ² ኤና ጌጴሳ ጎይን ጫጋይና ኣንጌናቤ ሜናቤም ኦጎታር ይያፕና ኬም ዻኻንቴ ኢየሩሳሌምዛራ ክኣንሴኻናንቴ ዳማስቆ ግዶር ምስኮን ኦኖና ዳናናንቴ ዋርቃቲ ክናንቴ እንዼኻናንቴ ኤና ባርያናንቴ ዳምብን ኣሽካይናሳ ብታኻላ ምስክዲና። ³ ኖ ዳማስቆ ካታማን ዬስካናንቴ ሾሊ ሶጎ ኮሽዻና ፖላንባራኻ ዬር ክዛራ ጳልቃቲዲና። ⁴ ኖኻሞ ፔንዛራ ጳርፅዲና፤ ዋዳ ኣጋኻ “ሳኦል ሳኦል፤ ሃርናንቴ ኢም ኣይታንቴ ሃያዬ?” ሃማያ ናቅሲ ኖ ኤሳርዲና።

⁵ ሳኦልካሞ፣ “ጌጳ፣ ያ ሃውቴ?” ና ክያማዶ።

ኖኻሞ ክግያ፦ “ያ እንታ ኦይታንቴ ሃያያያ ዬሱሲና።

⁶ ታ ዻጳንቴ ካታማስዛራ ኣርዲማ፤ ዬራ ሃዬኻ ዛግሳያም ሃናንቴ ጌያና ጌይዻይ” ና ክያማዶ።

⁷ ኤና ሳኦል ላማ ይቴን ዳናኻሞ ኤያ ክላማ ኤላቃያሳ ናቅሲ ኤሳራንቴ ኤዲ ካላኻሞ ይያፓድሞንታኻ ኣፖ ይሳም ዬዳንቴ ዎይዲና። ⁸ ሳኦልካሞ ይጳርፃዶንባራ ዻጳንቴ ኣፒ ይሳም ዋጭ ክያይና ሃፓናንቴ ቻላድማሞ፤ ኣጋታኻ ኤና ክሳ ኣኒም ዬዳንቴ ኣንሳቴ ዳማስቆዛራ ኣርስዲና። ⁹ ሮሮ ማካምካሞ ኣፒ ክሳ ካይዲና፤ ዳኣኖኻሞ እሳዲማሞ ኑንቆኻሞ ውጫድማሞ።

¹⁰ ዳማስቆ ግዶር ሃናንያ ሃንዻያ ኢየሱስም ጫጋያ ኤዲ ካላ ዳይዲና፤ ጌጳኻሞ ሃይማንካ፣ “ሃናንያ!” ሃማንቴ ኪም ግስምዲና።

ኖኻሞ፣ “ዎይ፣ ጌጳ” ና ክያማዶ።

¹¹ ጌጳኻሞ ክግያ ይንታና ክያማዶ፦ “ዻጳንቴ ጎይን ጋዝ ሃሞን ሃንዻንካ ኤያ ይሁዳ ሃንዻያ ኦኖንዛራ ይማ፤ ኦጎታር ሳኦል ሃንዻያ ጠርሴስ ፔን ኤያ ምስክቴና ክዶ፤ ኪም ዛግማ፤ ¹² ኦጎኖኻሞ ኤያ ሃናንያ ሃንጰያ ክዶንዛራ ናዴ ኣኒን ክዛራ ክዎዳንቤ ኣፕኖ ክሳ ፓክ ኮያማይንም ኖ ሃይማኻ ሃፕዲና።”

¹³ ሃናንያኻሞ ማሳንቴ ክግያ ይንታና ክያማዶ፦ “ጌጳ፣ ኤያ ካ ኢየሩሳሌም ግዶር ኤና ሃሳ ጫራጝናዛራ ጋሎ ጌጲ ክዬስክሳዶንም ኤዲ ጱፅ ካላ እንታ ኤሳርዲና፤ ¹⁴ ኦራኻሞ ይንናንቴ ክናኣዶኖ ኤና ሃሳ ናብን ግስማይናም ፓይላ ዬዳናንቴ ኤና ባርያናንቴ ዳምብን ኣሽካይናሳ ጋርና ኻላ ጌጳሞ ቻንቴና።”

¹⁵ ጌጳኻሞ ክግያ ይንታና ክያማዶ፦ “ይማ፤ ኤያ ካ ቶርሲን ኤናቤ ኤና ፔን ብትናቤ ሃያንቴኻሞ እስራኤል ዛርስንቤሳ ዎትሮጎ ናብን እሳናንቴ ማኚ ክዴኻናንቴ ኤዲ እሳ ካንዻዳና፤ ¹⁶ እንታኻሞ እሳ ናብንናንቴ ጋሎ ሃስ ሃማ ክቼኻ ኮዛግሳይንም ክናንቴ ዻዋና እዻዋይ።”

¹⁷ ሃናንያ ቃልቴ ኦና ጌይዻዳዛራ ኣርዳንቴ ሳኦልዛራ ኣን ይሳም ዎዳንቴ ክግያ፦ “እንና ናሳ ሳኦል፣ ኦራ ሃናኣን ጎይሮጎ ሃንናቴ ሃፕንዻዳ ጌጳ ኢየሱስ፣ ኣፕኖ ሃሳ ኮፖችሜኻናንቴቤ ኡስን ጋዛንቤኻ ሃፆፄኻናንቴ ኢም ንእስዲና” ና ክያማዶ። ¹⁸ ኣጋዛራ ሳኦልሳ ኣፕሮኻ ዬር ጎጞ ግያሃማ ድኒዲና፤ ፕርካሞ ኖ ሃፓን ቻሊዲና፤ ዻጳንቴኻሞ ኑንቆንካ ሻይዽዲና፤ ¹⁹ ዳኣኖ እሳንቴኻሞ ፕክዲና፤ ዳማስቆ ግዶር ዳና ኢየሱስም ኤና ጫጋይና ላማ ክንካ ሮሮ ዼፕ ዳርቅዲና። ²⁰ ኣጋዛራ ኖ ኢየሱስ ባርያ ናሳ ክዶንም ኣይሁድ ምስኮን ኦኖና ግዶር ጌያን ካርስዲና። ²¹ ኤና ኤሳራዳናኻሞ ፓይላ ዴንታኖ ክሳ ኬናንቴ ዬር ዋና ኮማታዃ፤ “ኤያ ካ ኢየሩሳሌም ግዶር ኤና ናባ ካም ግስማይናም ጋሊንሽሽቴን ዳሞ? ሃያንቴኻሞ ኖ ይንናንቴ ኦራ ክናኣዶኖ ኬም ዻኻንቴ ኤና ባርያናንቴ ዳምብን ኣሽካይናሳ ጋርናናንቴ ኣንሳናንቴሞ ክናኣዶኖ?” ²² ኮዶን ሳኦል ዋቻዻዳቴ ያእዲና፤ ዳማስቆ ግዶር ዳና ኣይሁድናናንቴ ኢየሱስ ¹ ኖ ክርስቶስ ክዶንም ማኚካ ጌይቴ ኬሳ ኣፖም ዬድስቴና ክዶ።

²³ ሮሮ ጱፅሳ ራስባራ ኣይሁድና ሳኦልም ዴሳናንቴ ኦሺዲና፤ ²⁴ ኮዶን ኖ ቃቦ ኬሳም ዼስዲና፤ ኬኻሞ ካታማንሳ ሙልዻፖንም ሮሮንቤ ሶቲንቤ ዻቃንቴና ኬዶ። ²⁵ ኮዶን ታማርና ክሳ ሶንትንካ ካታማንሳ ካርምንሳ ፑላንካ ዛብቆንኮካ ኪም ሃንችሽዲና።

²⁶ ሳኦልካሞ ኢየሩሳሌምዛራ ይናኣዶን ዋዳንካ ባርዮን ኤና ላማ ዎርማናንቴ ሃይዲና፤ ኮዶን ኖ ባርዮ ኤድ ክዶንም ይኣምናድሞንታኻ ኬ ፓይላ ኪም ኩርቲንዺዲና። ²⁷ ኮዶንካሞ ባርናባስ ኪም ቻንቴ ኤና ይእስድናዛራ ኣንሳቴ ናእዲና፤ ሳኦል ጎይን ይቴ ዳንቴ ጌጳም ሃሞንታ ይያፓዶንቤ፣ ጌጳ ኪም ሃሞንታ ክዼላቅሳዶንቤ፣ ሃያንቴኻሞ ዳማስቆ ኤናንናንቴ ኢየሱስ ናብንካ ኩርቲንዺማ ይጌያዶንም ኬናንቴ ጌይዲና። ²⁸ ኣጋታኻ ሳኦል ኬላማ ክንካ ዴንታን ካርስዲና፤ ኢየሩሳሌም ግዶርኻሞ ያያንቴ ጌጳሳ ናብንካ ኩርቲንዺማ ጌይቴና ክዶ። ²⁹ ኣይሁድና ግርክ ፔንባራ ናኣዳና ላማ ክንካ ሃሳውቴቤ ክቲምቴቤና ክዶ፤ ኮዶን ኬ ኪም ዴሳናቴ ዛግቴና ኬዶ። ³⁰ ክሳ እንዳናናኻሞ እግናም ይዼሳዶን ዋዳንካ፣ ቂሳርያዛራ ኪም ሃንቺሻንቴ ጠርሴስዛራ ይእስዲና።

³¹ ዋዳስ ኣጋኻ ባርዮን ኤና ይሁዳቤ፣ ገሊላቤ፣ ሰማርያቤ ግዶር ዳና ፃሊንካ ዳን ካርሲዲና፤ ዋቻዺዲና። ሃያንቴኻሞ ኬ ባርያም ኩርንትንዽቴ፣ ኡስን ጋዛንካ ዋዝንዽቴ ሻብማዳቴ ያእዲና። ³² ጴጥሮስ ፔናዛራ ያይቴ ክዶን ዋዳንካ ልዳ ግዶር ዳና ባርዮን ኤና ጫራጝናም ሼዳናንቴ ሃንቺዲና። ³³ ኦጎታርካሞ ኤንያ ሃንዻያ ቦን ሎንካይ ሃጃዻንቴ ዎዻንቴ ዳ ኤድ ራንሳ ማልግም ካላም ሃፒዲና። ³⁴ ጴጥሮስካሞ ክግያ፦ “ኤንያ፣ ኢየሱስ ክርስቶስ ሃም ፓሽሻና ክፓሽሻይ፤ ዻጳንቴ ዼጴን ሃሳም ቱፑማ” ና ክያማዶ። ኤንያካሞ ኣጋዛራ ዻጲዲና። ³⁵ ኤና ልዳቤ ሳሮናቤ ግዶር ዳና ፓይላ ኪም ሃፓንቴ ጌጳዛራ ማቲዲና። ጴጥሮስ ዶርቃም ዴምጲንባራኻ ዻሲዲና

³⁶ ኢዮጴ ግዶር ጣቢታ ሃንዻይኖ ሜ ባርዮን ኤድ ካላ ዳይዲና፤ ኮሳ ናብንሳ ዎኻልኖ ² ዶርቃና ሃንዻዶ። ናኻሞ ሮሮ ውል ዋቻዻንቴ ዬር ፃል ሃይቴ ኤና ኩፕናም ኬልሽቴና ኮዶ። ³⁷ ዋዳስ ኣጋኻ ና ሃጃዻንቴ ጃይዲና፤ ኤናኻሞ ኮም ሻያንቴ ኮሬሮ ዎድዲና። ³⁸ ልዳ ኢዮጴናንቴ ፄዲ ኮዶንታኻ፣ ባርዮን ኤና ጴጥሮስ ልዳ ግዶር ክዶንም ይኤሳራና ኤዲ ላማም ይእሳንቴ፣ “ባንዞ፣ ይርካ ዎዛራ ንማ” ሃማንቴ ኪም ምስክዲና።

³⁹ ጴጥሮስካሞ ዻጳንቴ ኬላማ ክንካ ያእድና፤ ኦጎታር ይዬስካዶን ዋዳንካ ኮሬንዛራ ኪም ኬ ቡልዲና። ሜና ዳልሶናኻሞ ዶርቃ ኬላማ ክንካ ይዶን ዋዳንካ ኣፓላና ኮኣሽካዳና ካርቴናናቤ ኣፓላና ዋኒቤም ክናንቴ ዻውቴ ኪም ታኻንቴ ኤፕቴና ኬዶ።

⁴⁰ ጴጥሮስካሞ ኮሬሮኻ ኬ ፓይላም ቡልሳንቴ ኮምፓርሳንቴ ባርያም ምስክዲና፤ ኮዛራኻሞ ሽራንቴ “ጣቢታ፣ ዻጲማ” ና ክያማዶ። ናኻሞ ኣፕ ይሳም ጶቅ ሃይዲና፤ ጴጥሮስምኻሞ ይያፓና ጳዻንቴ ዳርቅዲና፤ ⁴¹ ኖኻሞ ኣን ኮሳም ዬዳንቴ ኮም ዻስዲና፤ ባርዮን ኤናቤ ሜና ዳልሶናም ግስማንቴ ኣፕካ ኮም ኬናንቴ እምዲና። ⁴² ዬራ ካ ኢዮጴ ፔን ፓይላ ውል ግዶር ኤሳርምዲና፤ ኤዲ ዹፅኻሞ ጌዻኻ ኣምንዲና። ⁴³ ጴጥሮስካሞ ስምኦን ሃንጰያ ኤድ ዼጴ ቆፃያ ካላ ላማ ኢዮጴ ግዶር ሮሮ ጱፅ ዳርቅዲና።