20

¹ ዋጂኖኻሞ ኮቃጃና፣ ጳውሎስ ባርዮን ኤናም ግስንሳንቴ ኬም ኪሊዲና፤ ኬም ኤልቅማንቴኻሞ መቆዶንያዛራ ያኣናንቴ ዻጲዲና። ² ራቅና ሳጋዳ ግዶር ዛርስንም ኣፖ ዹፅካ ኪላዳቴ ግርክ ፔን ዬስክዲና፤ ³ ኣጎታርካሞ ኣርፒ ማካም ዳርቅዲና። ሶርያዛራ ጋግንካ ያኣናንቴ ኬሼኪና ኣይሁድና ክናንቴ ኬኦሻዶንታኻ፣ መቆዶንያኻ ሃያንቴ ማታናንቴ ኖ ቃብዲና። ⁴ ቤርያ ኤያ ጳይሮስ ናሳ ሱስጳጥሮስቤ፣ ተሰሎንቄ ኤና ኣርስጥሮኮስቤ ሲኮንዱስቤ፣ ደርቤን ኤያ ጋይዮስቤ፣ እስያ ፔና ግዶርካ ናኣዳና ቲኪቆስቤ ጥሮፊሞስቤ፣ ሃያንቴ ጢሞቴዎስካሞ ክላማ ኪንካ ያእዲና። ⁵ ኤና እግናኻሞ ዎም ብራንቴ ጢሮኣዳ ቃልቴ ካሊዲና። ⁶ ኮዶን ዎቲህ ኣይሁዲናሳ ባላሻን ባኣላ ክሳጓኻ ራስባራ፣ ፊልጵስዮስ ግዶርካ ጋግንካ ዎቲ ዻጲዲና፤ ሮሮ ዶጚሳ ራስባራ ኬላማ ጢሮኣዳ ግዶር ዎቲህ ኬርዲና፤ ኦጎታርካሞ ሮሮ ሦጳ ዎቲህ ዳርቅዲና። ⁷ ሳምንታሳ ሮሮ ካርሳ ጋላኻሞ ባላሻን እሳናንቴ ፑጫንቴ ዎዳኻ፣ ጳውሎስ ዋጋላሞን ያኣናንቴ ክቃባዶንታኻ፣ ኬም ታማርስቴና ክዶ፤ ዼላቅን ይሳምካሞ ሶቲንሳ ግዶ ጋልቲዛራ ጉዱጲስዲና። ⁸ ኮራ ይንግዶር ዎፑጫዳሮ ኖ ጱፅ ሮጵቴና ኮዶ። ⁹ ኣውጤኪስ ሃንዻያ ባርሻ ካላ ኮሬንሳ ማስኮትንዛራ ዳርቃንቴና ክዶ፤ ጳውሎስ ይሳ ዼላቅን ክጉድጵሳዃ፣ ኤያ ኣጋ ክሳ ኣፒ ኮግንዻዃ ካልሎን ራታንቴ፣ ኦኖንሳ ኮራ ማክንሳባራ ምጫ ዲናንቴ ክጃዃ ኤናም ኪም ዴምጲ ዻስዲና። ¹⁰ ጳውሎስካሞ ሃንቻንቴ ክዛራ ዎዻንቴ ኪም ዬዳንቴ ኤናግያ፦ “ሳዳንካ ክዶንታኻ ዬዋራቅናኖ” ሃምዲና። ¹¹ ሃያንቴ ማታቴ ፕር ዞን ኮሬንዛራ ውትዲና፤ ባላሻንካሞ ፖጫንቴ ኖ እꬅዲና፤ ፔንሳ ሶፃዛራኻሞ ኤና ማላ ጱፅ ዼልቃንቴ ናንሲ ዻጳንቴ ያእዲና። ¹² ኤናኻሞ ባርሻስ ኣጋም ሳዳንካ ቻይዲና፤ ኦጎኻኻሞ ኬ ካልሎን ሌሚዲና። ¹³ ኮዶን ዎቲ ጳውሎስም ቾቻናንቴ ብራንቴ ጋግንዛራ ያእዲና፤ ሃያንቴ ጋግንካ ኣሶንዛራ ዎቲ ያእዲና፤ ኦጎንታ ዋያዶኖ ጳውሎስ ኦጎዛራ ራኻ ያኣናንቴ ክዛጋዶንታኻና። ¹⁴ ኣሶን ግዶር ኬራንቴ ኪም ቾቻንቴ ክላማ ጋግንካ ሚሊጢንዛራ ዎቲ ያእዲና። ¹⁵ ዋጋላሞን ጋግንካ ይቴ ኪዩ ሃንዻያ ፔያስ ኑንቆን ግዶሮ ዳኻ ልኪ ዎቲ ዬስክዲና። ሮሮ ላንሳኻሞ ሳሞንዛራ ዎቲ ሳግዲና፤ ሮራ ማክንሳኻኻሞ ሚሊጢን ዎቲ ዬስክዲና። ¹⁶ ጳውሎስ እስያ ፔሮ ሮሮ ጱፅ ካፓናንቴ ይዛጋድሞንታኻ፤ ኤፌሶንዛራ ኣርድማ ሳጋንቴ ያኣናንቴ ቃብዲና፤ ኮኣጋዳና ኣይሁድናሳ ሮራ ዶጝታማሳ ባኣላም ኢየሩሳሌም ግዶር ሳስካናንቴ ግባንቴና።

¹⁷ ሚሊጢንባራኻ ኤፌሶንዛራ ኤዲ ይእሳንቴ ባርዮን ኤናሳ ዞንዛናም ግስንስዲና፤ 18 ኬናኣዃ ኬግያ ይንታና ክያማዶ፦ “እስያ ፔን እኣርዳዶሮኻ ሮራ ብራስካ ካርሳንቴ ሮሮ ውል ዬላማ ክንካ ዴንታ ሃሞንታ እዶንም ዬቲህ ዼስዲና። ¹⁹ ኮዶን ኣይሁድና ኦሻንቴ እዛራ ጋሎ ኬዬስክሳዳናካሞ፣ ጌጳናንቴ ዎይላም ፃላሞኻቤ ኤፒካቤ ዋድማም እንታ ጋራድማሞ፤ ²⁰ ቦዋሮቤ ኦኖና ግዶርቤ ያይቴ ዬም ታማርሳኻቤ ዬራ ዬናንቴ ዛግሳና ኬዛግሳይ ሃማንቴ እቃባዳናም ጌያኻ ራስዛራ እንታ ማታድማሞ። ²¹ ጎይን ዛርቦንባራኻ ባርያዛራ ኬማቴኻቤ ዎሳ ጌጰ ኢየሱስካ ኬኣምኔኻ፣ ኣይሁድናቤ ግርክ ኤናቤናንቴ እንታ ፃሊ ጌይዲና።

²² “ታኻሞ እንታ ኦጎታ እዬስክና ዬራ እዛራ ዬስካያም እዼስምናኻሞ ኡስኖ ጋዛኖ ኢየሩሳሌምዛራ እዬኤኻናንቴ እግያ ግዲካ ይማ ሃምቴና ኮዶ። ²³ ኮዶን ካታማና እያኣይና ውል ግዶር ዻኪቤ ጋሎቤ ኢም ኮካላይንም ኡስኖ ጋዛኖ እናንቴ ጌይቴና ኮዶ። ²⁴ ይያማን ጌጳ ኢየሱስካላ ዋድማን እቻዶንቤ ባርያሳ ሜርሜርን ፃሊን ጌያን ዋድማን እቱንሤኻናንቴ፣ እሳ ሳዳንም ዬር ዋጋ ይቆልማግያ ሃያንቴና እፓይዳይ።

²⁵ “ታኻሞ ዬቲህ ውል ፓይላ ካኻ ካርሳንቴ ኣና ዬሳ ባክር ያይቴ ባርያ ማንግስትን ዬናንቴ እጌያዳም፣ ኢም ዬያፕሞንም እንታ ዼስዲና። ²⁶ ኣጋታኻ ኤዲ ፓይላሳ ኣኒሮ እሳ ማኣሲ ኮቆልሞንም ሮራ ካሮ እንታ ዬናንቴ ማይ ጌያና እጌያይ፤ ²⁷ ኦጎኖኻሞ ባርያሳ ቃቦን ፓይላ ዬናንቴ እጌያድማ ሮሮ ኮቆልሞንታኻና። ²⁸ ዬናንቴቤ ኬም ዬግሼኻናንቴ ይንዛራ ኡስኖ ጋዛኖ ዬም ይጌጵሳዳና ¹ እያና ውልናንቴ ፃሊ ዳማቴ፤ ማኣስን ይኖንካ ሻናዳሳ ባርዮን ² ኤናም ማንክማቴ። ²⁹ እንታ ኢይና፣ ዮዮና ሳራይና ናዴ ዬሳ ባክር ኬኣርዳንቤ እያናናንቴ ኬቡርቃዽሞንቤም እንታ ዼስዲና። ³⁰ ዬግዶርካሞ ኤና ዋኒም ይዛራ ማሳናንቴ ኤና ባርያሳ ዼላቅን ጋዳ ሃያይና ዻጳና ኬዻጳይ። ³¹ ኣጋታኻ ፃሊ ዎይማቴ፤ ቦን ማካም ሶቲንቤ ሮሮንቤ ቃጆ ቆልማ ኤፕካ ዬውልም እኪላዶንም ጶቅስማቴ።

³² “ታኻሞ ባርያናንቴቤ፣ ፕርካሞ ዬም ዋችሻናንቴቤ ባርዮን ኤናሳ ባክሮ ዬም ኮይናም ዻልሳናንቴ ቻላን ባርያሳ ፃላሞን ዼላቅንናንቴ እንታ ዬም ኤልቅምዲና። ³³ ኤዲ ሃውሳኻሞ ብሬቤ ዎርቄቤ ዎይካሞ ኣፓላቤ እንታ እጝርዻድማሞ፤ ³⁴ እናንቴቤ ኤና እማላ ክንካ ዳናናንቴቤ ዬራ ዛግሳይናም ፓይላ እሳ ኣንና ክና ኬኣሽካዶን ዬቲህ ዼሳና ዬዼሳይ። ³⁵ ዎቲህ ፃሊ ዋቻዻንቴ ኣሽካንቴ ጋሎን ኤናም ዎኬልሻን ኮዛግሳይንም እያያዶን ውልካ እንታ ዬናንቴ ዻውዲና፤ ‘ኤያ ቻያናንቴ ኤያ እማያ ፑጋዻዳና’ ክያማዳ ጌጳ ኢየሱስ ኣፓም ዎጶቅሴ።”

³⁶ ኣጋም ጌያንቴ ኮምፓርሳንቴ ኬ ፓይላ ውል ማላ ባርያ ምስክዲና። ³⁷ ኬ ፓይላ ውል ኤፕዲና፤ ጳውሎስሳ ዛጋራን ዬዳንቴኻሞ ሱንቅዲና፤ ³⁸ ፓይላ ውልም ጋራንቴ ዬራ ኬሳ ዎይላምን ላኣሳዳ፣ ካኻ ካርሳንቴ ዎትን ክሳም ኬያፕሞን ኣፓ ኬናንቴ ክጌያዳና። ሃያንቴ ኬ ኪም ቡላንቴ ጋግንዛራ ዬስክስዲና።