ጳውሎስሳ አፎኖ ቆሮንቶስ ኤናንቴ ይእሳጰደኖ 12

1 ፎካራንቴ ካለካሞ የሪ ሀፍጳያ ኮቆልሞና ካሞ ፎካሪ ኮዛግሳያደና ጌጳካለንካ ሀይማስ አቻደቤ እያፈደ ቤዛራ እየኤ፡፡ 2 ቦንታጲ ኦይድሳ ብራሪ ክርስቶካ ፓለስ ማክንሳዛራ ኤድ ቻጳደ ካለም አንታ ጴስድና ክም ቻጳደኖ ዋንካው ወይካም ዋካ ትህማው አንታጴስማሞ ኦደን ባሪያ ጴስድና፡፡ 3 ኤያ አጋም ዋንካው ቻጳደኖ ወን ካትህማው ቻጳደኖ እንታ ጴማሞ ኮደን ባሪያ ጴስድና፡፡ 4 ክም ገነት ዛራ ቻጳና አጎታርካሞ ኤድ ናሶሳ አፎካ የሪ ጌያቴ ደንደይጴማ ኤድ ካሞ ጌያን ኮጋሬ ካናንቴ ሪ ማሪጳደኔ እኤሳራደ፡፡ 5 አጋንተ ክያማደናንቴ ኤድካ ቃያኔ እቃያይ ኮን እሳ ካንታን ቃጀሞንሳ አባራ እንታ ቃይማሞ፡፡ 6 ፎ ከራናንቴ እዛጋደና ካሞ እም ኤድ የሪ ጴስማግያ የሼድናኖ እጌያይና እግና ጎንጲና ኮዶንካ ኡድ ካለካሞ እም ይያፈደናቤ ይኤሳሪ ደናቤሳ ጳባራ ሀያንቴ ሼደን ኮጋሬ ካናንቴ ፎካሪን ጋራኔ እጋራይ፡፡ 7 የራ ጌጳ ሀፍንጳደ ካካ ፎካራን እጋሬ ካናንቴ እሳ ዋንም ኡካያ ኖካሞ እም ጋልንሽያ ሜሽሳ ኤርጎ ኤድ እናንቴ አንጵድና፡፡ 8 የራ አጋካሞ እካለንካ ክፌግንጴ ካናንቴ ጌጳም እይማካምና እምስካደ 9 ኮን ኖ እሳ ናሽማኖ ሀናንቴ የካና ካንታኖ እሳ ጫራግም ኮደይኖ ሀቃጀን ዋደንካና እግያ ክያማደ፡፡ አጋታካ የሱስ ክርስቶስሳ ካንታኖ እለማ ኮዴካናቴ ካሎን ዎዛካ እስ ካንታን ቃጀሞንካ ቃያኔ እቃያይ፡፡ 10 ክርስቶስሳ ቃጀንካ እርሞንካ ክሳ ጋሎንካ ክሳ ባቆንብም ክሳ ቃቦንካቤ እዋዝንጳይኖ ኦጎናንቴና ክቃጂና ዋደን ኦጎካ እንታ ዋቺና፡፡ 11 እፎካሪደካካሞ እንታ ኤድ የሪ ጴስማ ማትህድና አጎዛራ ካሞ እም የሰክሳደና የትህና እን እናንቴ ማኛሞን ወያን ግያን ደሃና የትህና ሀያንቴካ የሪ ካለግያ ፋይ ደጰሞናካሞ ሐዋርያትና ጎሽድና ካለንካ የሪ ካለካካሞ እንታ ቶክማሞ፡፡ 12 ሐዋርያት ካለሳ የራ ሀይጳን ግያንደሃነ የሳ ባክሮጎ ሀይጴድና እግናካሞ ዛሪቦናም ደንሻንቴ ዋቻጳቤ የራ ሀሚማን ግያንደና ሀማደናቤና፡፡ 13 የዛራ ባስኮ እማታደሳ አባራ ባሪዮን አኖና ዋን ካለንካ ሀርካ የቶካዴ? ሴሳ እሳ አጋሞ እናንቴ ጋርማቴ፡፡ 14 የዛራ ናአንነቴ ካ እሳ ሼክማስ ማክንሳኔ እንና የዛራ የሪ ካለካሞ እንታ ባስ ኮ ማትህማሞ፣ እንታ የምና የካላን የሪ ካለካ ዛግማሞ ሀያንቴ ካሞ ናና እንባና ናናናንቴ ኮይሰን ፊእሸይና ናና እንባናናንቴ ኮይሳ ፊእሽማሞ፡፡ 15 ኮደን እንታ የናንቴ እሳ ደናሞ ፓይላ እም ካውል እማደና እናንቴ ባሽና፣ ታ እንታ የም ኦጎንታ እናሻያ ደና የሳ ናሽማኖ እናንቴ ዶኖ ቶካ ሶጎው? 16 ፓይላ ውል ኦጎኖ ኮያማደና ካሞ እንታ የዛራ ባስ ኮማ ትህማሞ ኮን ካሞ ጋሮቤ ማልታሞቤካ ኮሮጎ የም እአሪሳ ደና የማይሻደ፡፡ 17 ኤሳንካ ኤና የዛራ እይእሳደናሳ ካለካ እንታ የም ታይስድው? 18 ቲቶካሞ የዛራ ክኔ ኤካናንቴ አንታ ምስክድና ወንደን ናሳምካም ክለማ ክንካ አንታ ይእስድና፣ ቲቶ የም ታይስድው? ዴንታኖ የሳካም ኤሄ ካላ ጋኬ ኮደ? 19 ኮውል የናንቴ ወሳ እይ ማራንቴ ዋደ ታካው ወታካይ? ክርስቶካ ደሀንቴ ባሪያሳ ወትሮ ጴላቃኔ እጴላቃይ ወያሪያናቶ ኮውልም ይናንቴ ወያያይኖ የም ጫራግሻናንቴና፡፡ 20 የዛራ እናአን ወደንካ ካሞ ኬደ ቃባ እንታግያ ደማ ሸጳኔ የሸጳይ እምካሞ ኬ የካለደግያ ደን እጋሬ ካናንቴ ሀማንቴ እንታ ኩትንጲድና ወይካም የሳ ባክሮጎ ኡሮቤ ቁፓሞቤ ዋጭቤ ኤናም ዋጭንሻቤ ኤድሳ ናብ ሴሳቤ ቆጵሞቤ እለትቤ ደሀኔ ኮደይን ሀማንቴ እንታ ኩርትንጲድና፡፡ 21 ፈርካሞ እንና ጌጳ እሳ የሳ ወትሮ እም ከስንሳና ሀማንቴ እንታ ኩርትንጲድ አጋካሞ ካሳ ብራሪ ኤድ ጲፋ ሴሶን ይአሽካደንካቤ ጎይን ዛሪቦንቤም ይጫጋደን ቤም ቡለሞንቤ ኤናሳ ሜናካ ወጳጳንቤ ጋራንቴ ጳቆን ጎይን ዛራ ማትሀማ ኬሸጳኳ እንታ እልል ደና ሀማንቴና፡፡