ክልማስ ቱንሳ

1 የዛራ እና አያ ካ እሳ ማክንሳኔ፣ የራ ፓይላ ውል ማኝ ላማካ ወይካም ማሳንካኔ ካጎንጲማይ፡፡ 2 ያያ እሳ ለንሳካ የለማ እድን ዋደንካ እንታ የም ጎርድና ታካሞ ፔጌ ደሀንቴ የም ጎራኔ እጎራይ፣ የዛራ ማታቴ እንና አና ካሳ ብራሪ ኤና ሴሶን አሽካደና ካሞ ወንናንቴ ካሞ እንታ ቡቃዲማሞ 3 አጋካ ክደይኖ የሱስ ክርስቶ እግደር ደሀንቴክጴላቃይንም ማኝ የዛጋደንታካና፡፡ ኖካሞ የሳ ባክሮጎ ዋቹና ካንታ ቃጀትህማሞ፡፡ 4 ክም ዝታጳን ከንታ ቃጀ ክደንካ ባሪያሳ ከንታንካ ሀማንቴ ሳደንካ ደሀኔ ከደሀይ፡፡ ወትህካሞክንካ ሀማንቴ ካታን ቃጀና ወደሀናካ ኮዶን የናንቴ ዋድናቴ ባሪያሳ ካንታን ካ ክለማ ክንካ ሳደንካ ለይ ደሀኔ ወደሀይ፡፡ 5 የሱስ ለማ ክንካ የደንም ጴሳናቴ ይንደ የም ማሳንቴ ሼድማቴ የም ፓትሽማቴ፡፡ ኤና ፎጋሞንካ ወትህ ባሪያሳ አፎን ጌያይናኔ ሀማይና ካለንካ የና አድምና ኢየሱስ ክርስቶስ የሳ እሮ ክዶንም የት ጴሳዮው? 6 ኮደን ወትህ ዋችይ ወዶን የቃባያ እካላ ማይና፡፡ 7 ታካሞ የሪ ዛሪቦ የአሽክና ባርያሞ ምስካኔወምስካይ ወትህ ይናንቴ ወምስካ ይኖ ካም ዋቻሞ ወሳም ኤና ኬያፌካናንቴ ትህማሞ፣ ኮደን ካ ወትህ ዋች ወትህሞናካሞ የትህካሞ የራ ጻልናሞ የአሽኬ ካናንቴና፡፡ 8 ጎንጴናንቴና ጎንጳዘራ የሩ ካካ ሀያናንቴ ወደን ደይምንታካ፡፡ 9 ወትህ ካንታ ቃጀና ኮደን የትህ ዋች የደና ወናንቴ ባሽና ወሳ ሞኮኖካ የትህ ጫራግሞ የዴካናቴና፡፡ 10 የካለንካ ፔጌ ደሃንቴ የራ ክናም ይናቴን የናንቴን እፃፈይኖ የዛራ እና አን ዋደንካ ጌጳሞን እሳም እንታ የናንቴ ካፎታካ ጳዋና ሀማንቴና፡፡ ጌጳሞን ኮሞ ጌጳሳ ይናንቴን እናንቴ እንጳደኖ የም ጫራግ ሻናንቴና ለላናንቴ ትህማሞ፡፡ 11 እና ናናቶ ናንስ (ዋደና ሻጳደሀና ክናም) ፃልንካ ደማቴ፡፡ ጫራግም ደሀማቴ እሳ ክልማን ኤሳሪማቴ ቃቦ የሳ ካላ ኮዴ ፃልንካ ደሀማቴ፡፡ ናሽማንቤ ፃለምንቤሳ ጌጳ የለማ ክን ደሀኔ ክደሀይ፡፡ 12 ጌሶ ገዛ ክም ጌስማቴ፡፡ 13 ባርዮን ኤና ፓይለ የሳዋፎ ቻይድና፡፡ 14 ጌጳ ዋሳ ኢየሱስ ክርስቶስሳ ናሽማኖ ባሪያሳናሽማኖ ኡስን ገዛንሳ ካለሞኖ የውል ለማ ክንካ ኮዴ፡፡