¹ v 1. ኢየሱስ አስረ ውሬቸ ተማሪኋ እማቲ ኧኹዳይ ኸናኖምታ ሴጣን ያዎኦዋይ ኤኤመኖም ሰብ ተቫአሸኹኖዋ ያተርፉዋይ ደረግ ዳኝነድ አቨታ ሾመኖም፡፡ ² ኧጐይቭ መንግስት ኢቫ አኸ ኢኢጁዋሜዪ ኤኤመኖም ሰቭ አፍያ ኢነኧዋይ ኬሸኖም፡፡ ³ ኻአቨታዋኸ ባረኖም ‹‹ኧኬሸኩዋ ኤኤዲ ትታርታ ኧቨያኹዋ አታአር አጥጩዋ አአር ቢኸር፣ ሞነ ቢኸር፣ ሸረድ ቢኸር፣ ፈራንክ ቢኸር ይሰጉራን ኹጅር ዳር አጥሙጩዋ፡፡ ⁴ ኧቫዘነድ አት ቢድ በገፓኹዋ ኻ ቀያ ቴእትኹዋ ትታሩዋ ስን በኽም ቢድ ቸሮዋ፤ ⁵ ኧቃየኋ ሰቭ አንቴኤፖርኩዋ በኸረ ቃያኋ ቶኢ ያኦዋ በኹኖም እማኘ ኢኸርዎኸ ኧኧግራኹዋ ጉተ ጠጡም ዎኦዋ›› ባረኖም፡፡ ⁶ ኧቫኧ ኧኢየሱሲ ተማሪ ዎርምታ ኧጐይታ ቃር ቲኢጁሚ ባቫአሸ አጠቦጩዋ ሰቭ አፍያ ቲንዋ በቃያ ቃያኋ ውርውር ዩሩዋ ባነደ፡፡ ⁷ አታት ሰቭ ‹‹ያጠምካ ዩኻንስ ተውድ ተረሳ ቧርም ኢዝረኩዋ ኧረፐሬ ገሊላ ገኘ ኢገዛ ኼሮድስቭ ኢየሱስ ኤፐን ዘንጋ እን ሰምአታ ተቭራከገ፡፡ ⁸ አታትሞኹኗ ‹‹ነቢ ኤልያስ ተዠፐረ ማአ›› ቲዮርታ ኧኛኹኖዋ ‹‹ደረ ተዎጁዋ ነቢ አት ኹዳ ተረሳ›› ዪሩዋ ባነደ፡፡ ⁹ ኼሮድስ ጭን ‹‹ያጠምካ ዩኻንስሽ ኢያ መመርኋ አቴጥኹን ባነዳ፡፡ ባቴ ዋ ዘንጋ እን ኢንአ ቧርም ኢኢጅነዳ ኹዳ ማንተን?›› ባረ ያሽኪ ኢሲእ ባነደ፡፡ ¹⁰ ኧኢየሱሲ ኪሽረኘ ተኬሸውዮዋ ኤኤዲ ሞኦምታ ኤፐዊ ኹዳ እን ኧኢየሱስ ኤኤጂ፡፡ ኢየሱስ እማት ኹኖዋ ጠበጦታ ቤተሳይዳ ከተማ ምዬ አነዳ ቃያ ወረ፡፡ ¹¹ ግዚየ ኖኦራ ሰቭ ኢየሱስ ያርወዳ ኤኤዲ ኋርምታ ታኼተሪ፡፡ ኢየሱስ ተኤፐረኖምታ ኧጐይታ መንግስት አአር ኢኢድኮ ዋ ባነዳ፤ ተቫአሸመኹኖዋ አፍያ ኧኹርት አኖዎታ ኹኖዋ አፍያ ኤፐኖም፤ ¹² አፈር ቲቨሽ ቲያርካ አስራ ውርኤቸ ኪሽረኘኋ ኧኢየሱሲ ቴኤኖምታ ‹‹ዋ አነኔኮዳ ኤኤዲ በረኻን ዋ ሰቭ እን በዙሪያንራ አነወታ ቀያቪ ከተማ ኾቶውዋታ ሸረድቪ ኢሩኡኰዳ ኤኤድ ኢሱኡዋኸ አስራፕትኮዋ›› ቧሪ፡፡ ¹³ .ኢየሱስ ጭን ዠፐረታ ‹‹ኢወረአታአር አኹዋ ገጋኹዋ አውዮዋ›› ባረኖም፡፡ ኹኖም ‹‹ኢና አነንዳ አምስት እንጀራቢ ውርኤት አሳምን፤ ቭእም ኧቫአ ኾይተነ ሸረድ በስየነ ባኸሬ ሰቭ እን አይቨቃካ›› ቧሪ፡፡ ¹⁴ በኽመኸ ኧረፖሩዋ አምስት ኹዉ ኢኾርታ ገማ ባነ፤ ውዋተ ኢየሱስቭ ኧተማሪኋ ‹‹ ሰቭ ኽኗ አምሳ አምሳ ኦኖም ሻጉጁም ቤኤድዲ አውሬዮዋ›› ባረኖም፡፡ ¹⁵ ኢየሱስ ኧቨረኖመሐ እንዎኹኗ በኤድኤኤዲ አዎኖዮም፡፡ ¹⁶ ኢየሱስቭ አምስት እንጀራቪ ውርኤት አሳቭ ነሳታ ኧሳቫዪ ኤፐ አሸታ ኧጐይታ ሽኩር ባረ፤ ሑድ ፈረነቨ ኧሰቭ እን ያሰረኦዋይ ኧተመሪኋ አቨኖም፡፡ ¹⁷ በኼኤዲ ኧረፓሩዋ ሰቭ እን አፎም በኖምታ ኧኢየሱሲ ተማሪ አስረ ውርኤት ቀርጫት ኧተነፈ ሸረድ ነሾም አፎኮም፡፡ ¹⁸ ተኽም ቀጥወ ኢየሱስ ኧወጣሞኻ ጠሎት ዬቭ ባነደ፤ ተማሪሞኻ ተኹድ ኧረፖሩዋይ ኧኸሬ ኢየሱስ ‹‹ዋ ሰብ ኢያ ማንተ ዩረዋ? ባረ ተሳረኖም፡፡ ¹⁹ ‹‹አታትኹኖዋ አጥማቂ ዩኻንስ ኧኛኹኗ ኤሊያስ አታተኹኗዋ ተድረ ነቢ ተኾሩዋ ሰቭ አትኹዳ ተውንድ ተረሳ ዩሩዋ›› ቧሪ፡፡ ²⁰ ኢየሱስ ኧተማሪኋ ‹‹አኹኽ ኢያ ማንተን ቱርኝ?›› ባረ ተሳአረኖም፡፡ ጴጥሮስ ‹‹አኸ ጔይታኧሸፐተናኸ ትቫአኬ ኧዋሪ ክርስቶስንኸ›› ባረን፡፡ ²¹ ኢየሱስ ዋ ዘንጋ አአትዎኋ አዩኢጂዋኸ ኧተማሪኋ አትጤፐኖም፤ ²² ኻአቮታ ኢየሱስ ኧተመሪኋ ‹‹ኧሰቨ ትከ ኖኦራ መከራ ኧተኧወርት በገኘባ ባሪቅ ኧካኽን አለቃ ኧቂጫ አስተማሪ ኢቆርጪዴ፤ ዮኦትሪዴይቭ ቢኸር ጭን በኦተሪ በሶኦስተኘ ቀረኋ ተውድ አተሸት ኦነወ››ባረኖም፡፡ ²³ ቀጥወ እንዎኹኖዋ ‹‹ኢያ ኢትኺተሪ ኢሲእካ ሰቭ እን ገግኋ ኧኽዳ፤ መስቀርሞኻ እን ቀረ ኧፈንግ ኧትኸተሪ›› ባረኖም፡፡ ²⁴ ነፍስኋ ያተርፊ ኢሲእካ ሰቭ እን ኢቨኧስ ነፍስኋ ያአይ፤ ኢያ ትይር ነፍስኋ የአይካ ሰቭ እን ያተርፍኩ ባረኖም፡፡ ²⁵ ተኽም ቀጥወ እንእዎኹኖዋ ዋኸ ባረኖም‹‹ሰቭ በአፈር አነዳ ዱንያ እን ቢረኽቭ ነፍስኋ ጭን ቢያአይ ምር ያቁጥነዴ? ²⁶ ቢያዪ በቃርመኛ አቅቨጭካ ሰቭ እን ኧሰቭ ትከ በገግሞኋ በአባሞኋ በተቀደሶ ጥርር በኾሩዋ መላአይካ ክብር ቲቫ አካ በኹዳ ኢቅቨጭወዴ ²⁷ ኧውረምየኛ እኹዋ በዌኤዲ ታነውታ ሰቭ ኧጐይታ መንግስት ቲያዡዋ ስን አይዎጁዋ ሰቭ አነውዋ›› ባረኖም፡፡ ²⁸ ኢየሱስ ዋዳ ተዝሬከ ተሱንት ቀረ ቀጥወ ጴጥሮስ ዩኻንስቪ ያቆብ ጠበጠታ ኢጸልዪ በአት ቆቶ ፎር ዋአ፡፡ ²⁹ ቲጠልይ ታነ መርክኋ ተሸጋገረ፤ኹጅርሞኋ ያግራከርካ ጓድ ኸረ፡፡ ³⁰ ኽም ግዝየ ውርኤት ሰቭ ሙሴቭ ኤልያስ ተኹዳ እማቲ ኢድዝራከዋ ባነደ፡፡ ³¹ በክብር ተረኮምታ ኢየሱስ በኢየሩሳሌም ጁጋረ ኢስራአወ መኸራ ኢዎድመኸ ኢኢጅ ባነደ፡፡ ³² ኽም ግዝየ ጴጥሮስቪ ተኹዳ ኧረፖሩዋ ሰቭ እን ዊኢንድ ጠበጠኖም ባነደ፡፡ ቃንዠ ቲዩርታ ጭን ኧኢየሱስ ክብርቪ ተኹዳ እማቲ ኧትሽኮውዋ እኛ ውርኤት ሰቭ አሸም፡፡ ³³ ሙሴቭ ኤልያስ ተኢየሱስ ተዋይሩም ቲያርታ ጴጥሮስ ኧኢየሱስ ‹‹ጐይታኞ ኢናሽ በእመኸ አኹርትን ወኼ ናአር በመኸ ሶኦስት ዳስ ነረሽነታ፤ አትኹዳ አኸ አትኹዳ ኧሙሴ አትኹዳ ኤኤሊያስ ኢኽርሴ›› ባረን፡፡ ጴጥሮስ ዋዳ ቲይካ ኢዝሬካአር ባኺርካ፡፡ ³⁴ .ኹድ ዋዳ ቲዝሬክ ታነ ዳመራ ማአ አኸተረኖም፤ ዳቨራ ማአ ቲያኸድርኮታ ጴጥሮስ ያቆብቨ ዩኻንስ ፈኞም፡፡ ³⁵ በዳመራ ከስ‹‹ኧሸፐትኹን ትከኛ ዋዳን ኧኹድቭ ሱኤ ይካ ቃር ተስዎአ፤ ³⁶ እም ቃር ተትሰማ ቀጥወ ኢየሱስ ኧወጣሞኻ በትሸከቨ ኤኤዲ ነኮዊ ተማሪሞኋ ዋ ዘንጋ ቢኺንኹኖዋ አዎኖዪ ባኻሬ አሸዊ ኹዳ አአትዎኋ አኔኤጅታ፡፡ ³⁷ በቨረጋኋ ተቆቶ ፎር በወንጁዋጋ ኖኦራ ሰቭ ኧኢየሱስ ተራኪዊ፡፡ ³⁸ ግዝየ አት ምስ ተሰቭ ግት ቃርኋ ነሳታ ዋኸ ባረ‹‹አስተማሪዮ እነኒዳ እማት ኧች ኧኸሬ አትርፍኒ ባኹ ኧትሰኧርኸ ³⁹ ሴጣን ጠበጠን ቲትረሳወዳ ኧጠነቃር ኮ ያቲፕኩ፤ እቧ ቧፍ ኢንአታ በአፈር አተገ ያክቮንርኩ ኖኦራአር በጐዳንመጋ አምቧአ ነፍስኋ ኢችኩ፡፡ ⁴⁰ እመዳ ያዎኦነኸ ኧተማሪያኸ ሳአርኹኖም ባነደ፡፡ ኹኖመ ኦኦት ኤመኖም›› ባሪ፡፡ ⁴¹ ኢየሱስ ዠፐረታ‹‹እምነት ኤነነኋ ጣማማ ኧዋ ዘመርሰቭ መቸ ስን ታኹዋ ኧረብርኬ መቸ ስን ኧፈርኽኖኹዋኔ›› ኾር እንዴ ትካኸ ዋይ አአኩ›› ባረን፡፡ ⁴² ቲያቫ አኩታነ ሴጣንኋ አትባ ጥቨጠቨን ኢየሱስ ጭን ኧሴጣንኹዳ አጥራቆረንታ ኧችኹ አፍያ ኤፐ አአቦኻ አቨ፡፡ ⁴³ ስቭ ኹኖዋ ኧጐይታ ኑእነድ ወግ ኸረዎም፡፡ ኹዳ ቤፐናአር ሰብ እን ወግ እን ፈቲኸርወ ታነ ኧተማሪኋ ⁴⁴ ‹‹ዋ ኤኤድኹዋታ ዘንጋ ስርም እንትረሳናኹዋ ኧሰቭ ትከ በሰቭ ኧጅ ኤኤቶ ያአይፑረዴ›› ባረኖም፡፡ ⁴⁵ ኹኖዋ ጭን ኧቫረኖዋ ኹዳ አምቤሰርታ አይዋሰሪኸ ዘንጋኋ ተደኧረዎም ባነዴ ኻይቶ አይትሳአሪመኸ ፈኞም፡፡ ⁴⁶ ኧኢየሱሲ ተማሪ ኹኖምተኹኖም ቢና ግት ትንእዎኻ ኢረካ ማንተን ቧርም ኢጥጭዋቸቁዋ ባረንደ፡፡ ⁴⁷ ኢዩስስ ኧኺንኹኖዋ አሳብ ኻረታ አት እንስየ ትከ አቫአ ሰቭየኋይ አትሸከቨን፡፡ ⁴⁸ ሰቭ ዋ አስየ ትከ በሹዉኛ ቢቴኤፐር ኢያ ተኤፐረ ኧዋርትን ኢያ ኧቴኤፐረ ኹዳ ኧኬሽይ ኹዳ ኤቴኤፐር አካ ባኹዋ ግት ትንአኹዋ ያአስካ ኹዳ ትንአኹ ኢረእ›› ባረኖም፡፡ ⁴⁹ ዩኻንስ ‹‹ጌታንሮ አት ምስ በሹዋኸ ሴጣን ቲያዋአካ አሸነታ ቲና አያራአር ኧኸሬ ቴእ ባነዪ›› ባረን፡፤ ⁵⁰ ኢየሱስ አትኹርኤ አአኹዋ አይትራከስኹዋ ሰቭ እን ታኹትን›› ባረን፡፡ ⁵¹ ኢየሱስ ኧሳቫዪ ኢዋአወዳ ብዝየ አቴኤነቬ ኧኸሬ ኢየሩሳሌም ከተማ ያሪ በወርአ ኺንኋ አንጠ ተረሳ ⁵² ኢኢፍቲ ብደይተዊ ያፎይወዳ ኤኤዲ ኢንኪነዳ ሰቭ ኬሸ፡፡ ኹኖም ኤኤድ ኢጌኪኔ አት ኧሰማሪያ ቃያ ጐፖም፡፡ ⁵³ ኹድ ኢኢፍትሞኻ ኢየሩሳሌምያረኻ አኋርዋይ ኧኸሬ ኧሰማሪያ ሰቭ ኢቴኤፖር አሴኤዉታ፡፡ ⁵⁴ ተማሪሞኋ ያቆብቪ ዩኻንስ ዋዳ አሾምታ ‹‹ጌታ ኢየሱሶ ‹‹ኤሊያስ አፐመኸ እሳድ ተሰቫይ ውረጅተ ያአፋኮኸ ኒኢዝዘኔ ትፈቅድንረሴዪ? ⁵⁵ ኢየሱስ ጭን ተዥቫፐረ ነፈገኖምታ አኹዋ ተቭር አይነት መንፈስ ኧኸርኹዋኸ አትኺርታ ኧሰቭ ትከ ኧቫአ ኹዳ ኧስቭ ነፍስ ያተርፍኔ ባኸሬ ኧሰቭ ነፍስ ያአዪ አኸረዳ›› ባረኖም፡፡ ⁵⁶ ተኽም ቀጥወ ቾኦም ኧኛ ቃያ ዎርም፡፡ ⁵⁷ ኢየሱስ ተተማሪኋ በቨያ ቲያርካ አት ምስ ኧኹዳይ ቴኤነቨታ ‹‹ታርወዳ ኤኤዲ እን ኧትኼተርኸዴ›› ባረን፡፡ ⁵⁸ ኢየሱስ ዠፐረታ እንጐረጉየ ኢረዉርኮዳ ጐጀ ኧቫይ አንፉ ኢቸኖኮዳ ቪድ አነኖዋ ኧሰቭ ትከ ጭን መመርኋ ያጋአወዳአር ዳር ኤነነዳ ባረን፡፡ ⁵⁹ አአት ኧዉችር ምስ ጭን ‹‹ተኸተሬ›› ባረን፡፡ ምስኹዳ ‹‹ጐይታኞ ንተርታ አባኛ ቲዎድ ስን ንኽድም ንዌኩ ፍቅድኒ›› ባረን፡፡ ⁶⁰ ኢየሱቭ ኧዎጅዋኹኖዋ ቶኡዩዋ ኧዎጁዎ ኹኗ ኧዎኩዮዋ አኼ ኾርታ ኧጐይታ መንግስታአር አውድ›› ባረን፡፡ ባረን፡፡ ⁶¹ አት ኧኛቭ ምስ‹‹ጐይታኞ ‹‹ኧትኾተርሽ ኧትኸተርኸሴ ዘንጋ ጭን ንትዣቨር ንኾርታ አበሩሰኛ ንትስራቨት ናአ ፍቅድኒ›› ባረን፡፡ ⁶² ኢየሱስ ጭን ማንየ ስቭ በዋውራ ቲቹድካ ኧዋውራ ማረሻ ጥጭተታ ኢኢንየ ያዥካ ሰቭ ኤነዳ፡፡ እመኸቭ አት ሰቭ ኧጐይታ ሜና ጥጭተታ ኢኢንየ አያዥካ ቢያዥ ጭን ኧጐይታ መንግስት አይቨቃካ፡፡